Baketile Ukuti Banangisyagha Ulughano Ukwendela Mfyakubomba
YOMARA na balumbu bake—Marcelo na Hiver—bikwikala nkaya akanandi aka Guatemala. Yomara alyandile ukumanyila Ibaibolo na Baketi kangi bope abalumbu bake balyandile ukumanyila. Loli yalipo indamyo yimo. Bosa bakaketagha kangi batoliwagha ukubelenga amabuku gha bandu aba batikuketa. Yonongwa yake uyu abamanyisyagha Ibaibolo ababelengelagha amapalagilafu na mavesi gha mu Baibolo.
Kangi kwali kukafu fiyo ukuti bafikeghe kungomano. Abene batoliwagha ukwenda ubulendo bwa maminiti 40 ukuti bakafike ku Nyumba ya Bunyafyale iyi bali nayo pabupipi. Loli abakamu na balumbu nkipanga babatulagha ukuti bafwanisyeghe ukufika pangomano. Kangi bo abakamu aba bandile ukuyoba inkhani isya nkati mwasabata, abakamu na balumbu babatulagha ukuti basungile ikighaba iki bapeliwe.
Mu Meyi 2019, balyandile ukubungana nkaya kabo. Pakabalilo aka, imbumba yimo iyi yabombagha ubupayiniya bwa kabalilo kosa babatumile ku malo agha. Abene biyipagha fiyo ukubamanyisya abandu batatu aba ukuti babelengeghe nukulemba amabuku gha bandu aba batikuketa nalinga ukuti imbumba iyi yikamenye muno yabaghile ukubombela. Abene babukile ku layibulale ukuti bakafufuze amabuku gha bandu aba batikuketa namuno babaghile ukubamanyisyila abangi ukuti babombesyeleghe amabuku agha.
Marcelo ikwamulapo pangomano
Kwa myesi minandi itolo, abandu batatu aba balyandile ukubelenga kanunu amabuku gha bandu aba batikuketa, isi syatulile ukuti bakusye ubumanyani bwabo na Yehova. a Lino Yomara, Marcelo na Hiver bapayiniya bakabalilo kosa. Marcelo ntuli nkipanga. Abene bikwiyipa fiyo mubufumusi sabata aliwesa. Panongwa yakuti bikwiyipa fiyo pakumbombela Yehova, sikubapangisya abangi ukuti bope biyipeghe
Abandu batatu aba bikundaghisya fiyo ubutuli ubwakufuma ku bakamu na balumbu. Yomara atile, “Bo twaghene na Baketi ba Yehova akakwanda, batunangisye ulughano lwa Bukristu. Tuli nabamanyani abanunu fiyo nkipanga kyitu kangi tuli mumbumba yakukolelana iya pakisu kyosa, kangi Marcelo alyongelile ukuti, imbumba iyi yighanene fiyo. Yomara na balumbu bake bikughulila isiku ili Yehova isakutendekesya ikisu ukuya paradaiso.—Sal. 37:10, 11; Yes. 35:5.
a Ibulosha ilyakuti Learn to Read Braille lyapangiwe ukuti lintule umundu uyu atikuketa ukuti amanyile ukubelenga nukulemba.
Lumo Mubaghile Ukulonda Ukumanya Isya Nkhani iyi
MUNO IFYABUPE FYINU FIKUBOMBELA IMBOMBO
Utumadoti utu Tukuchenja Ubumi bwa Bandu
Tutikusosya itolo amabuku gha braille loli tukubamanyisya kangi muno babaghile ukubelengela amabuku gha braille.
