1. Ngimba Yesu ababulile isyafiki abafundiwa bake isyakufwana “nubumalikilo bwa kisu” kangi abasokile isyafiki?

 BO Yesu asyele panandi ukufwa, abafundiwa bake 4 balindalusisye ukuti: “Ngimba ikimanyilo kya kumanyilamo ukwisakwako . . . nubumalikilo bwa kisu kyo kiliku?” (Mat. 24:3) Abafundiwa aba babaghile ukuti balondagha ukumanya akabalilo aka Yerusalemu ni tempile fisakupyutiwa. Yesu akabamwile isyakufwana nukupyutiwa kwa Yerusalemu ni tempile kwene loli isyakufwana kangi “nubumalikilo bwa kisu” iki tukwikalamo lino. Pakuyoba isya bumalikilo bwa kisu, Yesu atile: “Loli isya isiku lilalila nakabalilo kalakala nayumo umundu akasimanya, bope nabandumi ba kumwanya, nalinga yo yu mwana, loli mwene yu Tata.” Ukufuma apo umwene abasokile abafundiwa bake ukuti ‘bayeghe maso.’​—Mar. 13:32-37.

2. Nongwa yafiki Abakristu bakunyuma balondiwagha ukukindilila ukuya maso?

² Abakristu ba Chiyuda balondiwagha ukukindilila ukuya maso ukuti bapoke ubumi bwabo. Yesu ababulile abafundiwa bake isi balondiwagha ukubomba ukuti bamanye akabalilo aka ubulaghili bwa Bayuda bwayagha pakumalika. Umwene atile: “Linga mwisile kwagha akaya ka Yerusalemu kasyungutiliwe nifilundilo fya bwite, po mwise mumanyeghe ukuti ukupalaghanika kwake kuseghelile.” Pakabalilo aka, abene balondiwagha ukupilikila isi Yesu abasokile “nukwanda ukubopela mfyamba.” (Luka 21:20, 21) Bosa aba bapilikile baponile bo Abaroma bikonanga akaya ka Yerusalemu.

3. Ngimba tukuya pakuyobesania isyafiki mu nkhani iyi?

 ³ Amasiku agha, tukwikala nkabalilo aka ifindu ifibibi ifya nkisu fikuya pakumalika mwalululu. Yonongwa yake tukulondiwa ukukindilila ukuya maso. Mu nkhani iyi, tukuya pakuyobesania muno tubaghile ukubombela nifyakubombiwa fya nkisu, muno tubaghile ukuyila maso nukubombela kanunu akabalilo kitu.

4. Nongwa yafiki tukuhoboka ukuketa ukuti ifyakubombiwa fya nkisu fikufwanisya ubusololi bwa mu Baibolo?

⁴ Filipo ififukwa ifinunu ifi fikutupangisya ukuti tuhobokeghe linga tukuketa ukuti ifi fikubombiwa nkisu fikufwanisya ubusololi bwa mu Baibolo. Mwakifwanikisyo, Yesu ayobile ifindu ifi fisakubombiwagha ukuti fitutule ukumanya ukuti ubumalikisyo bwa findu ifibibi fya nkisu kya Setano buseghelile. (Mat. 24:3-14) Untumiwa Peteri atukasisye ukuti tuketeghe ukufwanisiwa kwa busololi ukuti tukindilile ukuya nulwitiko lwamaka. (2 Pet. 1:19-21) Ibuku lyabumalilo mu Baibolo likwanda namasyu aghakuti: “Ubu bo busetuli ubu Kyala alimpele Yesu Kristu ukubanangisya ababombi bake isi syayagha pakwisa mbibimbibi.” (Ubuset. 1:1) Yonongwa yake tukuhoboka fiyo ni findu ifi fikubombiwa nkisu nukumanya ukuti fikufwanisya ubusololi bwa mu Baibolo. Kangi tukulondiwa ukubabulako abangi isyakufwana nifyakubombiwa ifi.

5. Ngimba tutikulondiwa ukubomba ifindu fiki loli tubombeghe isyafiki? (Keta kangi ifithuzi.)

⁵ Linga tukuyobesania ubusololi bwa mu Baibolo, tutikulondiwa ukusakisya itolo isi sikubombiwa. Nongwa yafiki? Panongwa yakuti fibaghile ukupangisya ukuti tungakolelanagha nkipanga. Mwakifwanikisyo, tubaghile ukupilika isi abalaghili bankisu bikuyoba isyakufwana namuno babaghile ukumasyila indamyo mwakutwala ulutengano nukufighililiwa. Mmalo mwakusakisya itolo ukuti isi bikuyoba sikufwanisya ubusololi ubu buli pa 1 Batesalonike 5:3, tukulondiwa ukumanya inkhani isi sibombiwe mwalululu. Linga isi tukuyoba sikufuma mmabuku agha igulu likutupa, tukubatula abakamu na balumbu nkipanga ukuti bakindilileghe ukukolelana “mwakuya ninyinong’ono simosyene.”​—1 Kor. 1:10; 4:6.

6. Ngimba tukumanyilapo isyafiki pa 2 Peteri 3:11-13?

⁶ Belenga 2 Peteri 3:11-13. Untumiwa Peteri ikututula ukumanya ikifukwa iki tukulondiwa ukwinong’onela fiyo ubusololi bwa mu Baibolo. Umwene ikutukasya ukuti “tughulileghe ukwisa kwa isiku lya Yehova.” Nongwa yafiki? Komma panongwa yakuti tukulonda ukumanya “isiku nakabalilo” aka Yehova ikuya pakutwala ubwite bwa Armagedoni loli panongwa yakuti tukulonda ukubombela akabalilo aka kasyele ukuti tukete “muno tuyilile ndwendo lwitu, mbwikemo nu kuntila Kyala.” (Mat. 24:36; Luka 12:40) Mmasyu aghangi, tukulondiwa ukukindilila ukubomba ifindu ifinunu nukuketa ukuti tukumbombela Yehova panongwa yakuti tunganile fiyo. Ukuti tufwanisye ukubomba isi, tukulondiwa ukukindilila ukuya maso.

7. Ngimba tubaghile ukunangisya bulebule ukuti tuli maso? (Luka 21:34)

⁷ Yesu ababulile abafundiwa bake ukuti bayeghe maso komma pafindu ifi fikubombiwa nkisu loli pabene. Ifundo iyi yikukolelana namasyu aghakusoka agha ghikwaghiwa pa Luka 21:34. (Belenga.) Yesu atile: “Amuyeghe maso.” Umundu uyu ikuya maso ikumanya ifindu ifibibi ifi fibaghile ukonanga ubumanyani bwake na Yehova kangi  ikughelaghela ukwepuka. Linga umwene ikubomba isi, ikukindilila ukuya ndughano lwa Kyala.​—Mbu. 22:3; Yuda 20, 21.

8. Ngimba bulongosi buliku ubu untumiwa Pauli abapele Abakristu?

⁸ Untumiwa Pauli ababulile Abakristu ukuti bayeghe maso. Mwakifwanikisyo, ababulile Abakristu ba ku Efesi ukuti: “Mwandeghe lelo muno mukwendela, mungayagha bo abandu abasitamahala loli muyeghe bo abandu aba mahala.” (Ef. 5:15, 16) Setano ikughelaghela fiyo ukuti onange ubumanyani bwitu na Yehova, yonongwa yake Ibaibolo likutukasya ukuti “tubwaghanieghe muno buyilile ubwighane bwa Yehova” ukuti tufwanisye ukulimbana ni ndamyo yiliyosa.​—Ef. 5:17.

9. Nongwa yafiki tukulondiwa ukubomba ubwighane bwa Yehova?

⁹ Ibaibolo litikuyoba isyakufwana nikindu kilikyosa iki kibaghile ukonanga ubumanyani bwitu na Yehova. Utubalilo tosa tukulondiwa ukusala kanunu ifyakubomba pankhani simo isi Amalemba ghatikuyoba. Ukuti tusale kanunu ifyakubomba, tukulondiwa ukwinong’onela tasi “ubwighane bwa Yehova.” Tubaghile ukubomba isi, linga akabalilo kosa tukumanyila Amasyu gha Kyala nukwinong’onelapo. Linga tukubomba ubwighane bwa Yehova nukuya “ninyinong’ono sya Kristu,” tukuya pakuya “bandu bamahala,” nalinga ukuti tukaya nindaghilo isi sikuyoba isi tukulondiwa ukubomba. (1 Kor. 2:14-16) Utubalilo tumo kubaghile ukuya kupepe ukumanya ifindu ifi tukulondiwa ukwepuka. Loli utubalilo tumo kubaghile ukuya kukafu.

10. Ngimba tuyilo tuliku utubibi utu tutikulondiwa ukuya nato?

¹⁰ Utuyilo tumo utubibi utu tukulondiwa ukwepuka tukongelelapo ubogha, ukunwa fiyo ubwalwa, ukulya fiyo, amasyu amabibi, ifyankhaza, ifithuzi fyamwiko ni findu ifingi. (Sal. 101:3) Undughu witu, Umohesi ikughelaghela ukulwaghilapo ulusako ukuti onange ubumanyani bwitu na Yehova. (1 Pet. 5:8) Linga tukaya maso, Setano abaghile ukubyala mundumbula yitu imbeyu ya bufi, ukuleka ukuya nsubiliwa, ubunyonywatosa nukubabenga abangi. (Gal. 5:19-21) Pakwanda tubaghile ukuketa ukuti utuyilo utu tukaya tubibi. Loli linga tutikubombapo simo mwanakalinga, tukuya pakukindilila ukukula bo ilisu lya poizoni ili likonanga ifyakumela.​—Yak. 1:14, 15.

11. Ngimba tukulondiwa ukwepuka ku findu fiki kangi nongwa yafiki?

¹¹ Ikindu ikingi ikibibi bo bamanyani ababibi? Inong’onela ikyakubombiwa iki. Mukubomba imbombo numundu yumo uyu akaya Nketi wa Yehova. Mukulonda ukuti umwene abaketeghe kanunu Abaketi ba Yehova, yonongwa yake mukuntula nukunnangisya ikisa. Kangi mubaghile ukwitika ukuti mulyeghe pampene ifyakulya fya pamusi. Bo akabalilo kakindilepo panandi, mukwanda ukulyela pampene. Akabalilo kamo, umundu uyu ikwanda ukuyoba inkhani syabulowe, loli mukughelaghela ukuti mungapilikisyagha. Ukufuma apo, nanumwe mukwanda ukuyoba inkhani isi kangi mutikuketa indamyo yiliyosa. Loli isiku limo, umwininu uyu abakolile ukuti mukalye nawe ifyakulya kangi mwitike. Pabumalilo, mwandile ukukolelana fiyo. Linga isi sibombiwe, mutikuya pakwegha akabalilo akatali ukuti mwande ukubomba isi umwene ikubomba. Bwanaloli ukuti tukulondiwa ukunangisya ikisa nulughindiko ku mundu aliwesa loli tukulondiwa ukukumbukila ukuti tubaghile ukusofanisiwa na bandu aba tukwangala nabo akabalilo akatali. (1 Kor. 15:33) Linga tukukindilila ukuya maso, bo muno Yesu atukasyile, tutikuya pakukolelana  na bandu aba batikukonga ifundo sya Yehova. (2 Kor. 6:15) Tukuya pakumanya ifindu ifibibi nukwepuka.

12. Ngimba abafundiwa ba Yesu babombagha findu fiki bo bikughulila ubumalikisyo ukuti bwise?

¹² Yesu alondagha ukuti abafundiwa bake bikolanieghe fiyo bo bikughulila ubumalikisyo ukuti bwise. Umwene abapele imbombo iyakuti babombeghe. Abapele ululaghilo ulwakuti bafumusyeghe amasyu amanunu “nkaya ka Yerusalemu namosa nkisu kya Yudai, na nkisu kya Samaria, ukwakufika kuno kimalikile ikisu.” (Imbo. 1:6-8) Abene bali nimbombo inywamu fiyo. Mwakubomba syosa isi bafwanisyagha pakubafumukisyila abangi, abene babombelagha kanunu akabalilo kabo.

13. Nongwa yafiki tukulondiwa ukubombela kanunu akabalilo kitu? (Bakolosi 4:5)

¹³ Belenga Bakolosi 4:5. Ukuti tukindilile ukuya maso, tukulondiwa ukwinong’onela muno tukubombesyela akabalilo kitu. ‘Ifindu ifibibi’ fibaghile ukubombiwa ku mundu aliwesa. (Ndumbi. 9:11) Tubaghile ukufwa kisitakughulila.

14-15. Ngimba tubaghile ukubombela bulebule kanunu akabalilo kitu? (Bahiburi 6:11, 12) (Keta kangi ikithuzi.)

¹⁴ Tubaghile ukubombesyela kanunu akabalilo  kitu mwakubomba ubwighane bwa Yehova nukukasya ubumanyani bwitu numwene. (Yoh. 14:21) Tukulondiwa “ukwitoteka kangi tungasukanikagha; bwila itolo tukindilileghe ukubomba imbombo ya Mwalafyale.” (1 Kor. 15:58) Linga ubumalikisyo bwa kisu iki buseghelile, tutikwisa pakwilumbusya ukuti tukabomba nyingi pakumbombela Yehova.​—Mat. 24:13; Rom. 14:8.

¹⁵ Amasiku agha, Yesu ikukindilila ukubalongosya abafundiwa bake bo bikufumusya isya Bunyafyale bwa Kyala pakisu. Umwene afwanisye isi afingile. Ukwendela mu gulu lya Yehova, Yesu ikutumanyisya muno tubaghile ukufumusyila kangi ikutupa ifi tukulondiwa ukuti tufumusyeghe amasyu amanunu. (Mat. 28:18-20) Tukubomba isi tubaghile ukufwanisya pakufumusya nukubamanyisya abangi ukukindilila ukuya maso bo tukughulila ukuti Yehova amasye ifindu ifibibi pakisu. Mwakukonga ubulongosi ubu buli pa Bahiburi 6:11, 12, tukuya pakukasya ulwitiko lwitu “ukwakufika kubumalikilo.”​—Belenga.

16. Ngimba tukulondiwa ukughelaghela ukubomba isyafiki?

¹⁶ Yehova asalile akabalilo aka isakumasya ifindu ifibibi pakisu. Linga akabalilo aka kafwene, umwene isakufwanisya ubusololi ubu alembile Mmasyu ghake. Loli utubalilo tumo tubaghile ukwanda ukwinong’ona ukuti ubumalilo bukukabila. Loli isiku lya Yehova “litikuya pakukabila.” (Haba. 2:3) Isagha tughelegheleghe “ukughulila kwa Yehova umpoki [witu].”—Mika 7:7.