1. Nongwa yafiki tukulondiwa ubulongosi bwa Yehova? Yoba ikifwanikisyo.

 INONG’ONELA ukuti muyongile mmatengele. Kumalo agha kwakutilisya fiyo panongwa yakuti kukwaghiwa ifinyamana fyandisu, ifyakumela fya poizoni kangi amalo ghamo lungalangala. Mubaghile ukundaghisya fiyo linga muli numundu uyu ikubalongosya uyu aghamenye kanunu amalo aghakutilisya kangi abaghile ukubatula ukuti mungafulalagha. Ikisu iki kili bo amatengele agha. Mukwaghiwa ifindu ifyakutilisya ifi fibaghile ukonanga ubumanyani bwitu na Yehova. Loli tuli Nundongosi unnunu fiyo, Yehova. Umwene ikutufighilila ku findu ifibibi nukutulongosyela kubumi bwa bwila na bwila nkisu ikipya.

2. Ngimba Yehova ikutulongosya bulebule?

² Ngimba Yehova ikutulongosya bulebule? Injila yakwanda ko kwendela Mmasyu ghake, Ibaibolo. Loli ikubombela kangi abandu aba abimike ukuti batulongosyeghe. Mwakifwanikisyo, ikubombela “untumwa unsubiliwa nuwamahala” ukutupa ifyakulya fyamwambepo ifi fikututula ukusala kanunu ifyakubomba. (Mat. 24:45) Yehova ikubombela kangi abanyambala aba babaghiliwe ukuti batulongosyeghe. Mwakifwanikisyo, abakwendela idela na bakulumba bakipanga bikutukasya nukutupa ubulongosi ubu bubaghile ukututula ukwifimbilisya pakabalilo kandamyo. Tukundaghisya fiyo panongwa yakuti Yehova ikutulongosya kanunu nkabalilo akapalapala aka bo ubumalilo bukali ukufika. Isi sikututula ukukindilila ukuya pabumanyani na Yehova kangi tukuya balusekelo lino na nkyeni.

3. Ngimba tukuya pakuyobesania isyafiki munkhani iyi?

³ Loli utubalilo tumo kubaghile ukuya kukafu ukukonga ubulongosi bwa Yehova fiyofiyo linga bukufuma kubandu abasitabugholofu. Nongwa yafiki? Panongwa yakuti lumo tukabaghila ukuhoboka nubulongosi ubu bikutupa. Pamo lumo tubaghile ukuketa ukuti ubulongosi ubu twambilile bukaya bwakutula kangi bukafuma  kwa Yehova. Utubalilo bo utu, tukulondiwa ukusubila ukuti Yehova yo uyu ikubalongosya ababombi bake kangi ukukonga ubulongosi bwake kubaghile ukututula. Ukuti tukasye ulusubilo lwitu, munkhani iyi tukuya pakuyobesania (1) muno Yehova abalongosyelagha Abaisraeli, (2) muno ikutulongosyela amasiku agha, kangi (3) ulusayo ulu tukulwagha linga tukukonga ubulongosi bwake.

MUNO YEHOVA ABALONGOSYELAGHA ABAISRAELI

4-5. Ngimba Yehova anangisye bulebule ukuti ambombesyelagha Mose ukubalongosya Abaisraeli? (Keta ikithuzi kyapakikope.)

⁴ Yehova alinsalile Mose ukuti abalongosyeghe Abaisraeli ukusokako ku Egiputi. Kangi abapele Abaisraeli ubuketi ubwakuti abalongosyagha abene ukwendela mwa Mose. Mwakifwanikisyo, Yehova abalongosyelagha mwibingu pamusi kangi pakilo mmoto. (Kuso. 13:21) Mose akongagha ibingu, ili lyandongosyagha umwene na Baisraeli bo bikubuka kwa Sumbi Unkesefu. Abandu bali nubogha fiyo bo bikwinong’onela isyakuti bali pakati pasumbi nigulu lya balwabwite ba ku Egiputi ili lyababopesyagha. Abene balyandile ukwinong’ona ukuti Mose asobile fiyo ukubatwala kwa Sumbi Unkesefu. Loli akasobile. Yehova alinsalile Mose ukuti abalongosyele abandu bake ku malo agha. (Kuso. 14:2) Ukufuma apo, Kyala abapokile munjila iyakuswighisya fiyo.—Kuso. 14:​26-28.

⁵ Kwa fyinja 40, Mose akindilile ukusubila ukuti Yehova abombelagha ibingu ukubalongosya abandu bake mmatengele. a Utubalilo tumo, Yehova abikagha ibingu pamwanya pihema lya Mose, isi syapangisyagha ukuti Abaisraeli bosa baliboneghe. (Kuso. 33:​7, 9, 10) Ukwendela mwibingu, Yehova ayobagha na Mose, uyu abapagha ubulongosi abandu. (Sal. 99:7) Abaisraeli bali nubuketi bosa ukuti Yehova ambombesyelagha Mose ukuti abalongosyeghe.

6. Ngimba Abaisraeli babombagha bulebule nubulongosi bwa Yehova? (Ukubaliwa 14:​2, 10, 11)

⁶ Syakitima ukuti, Abaisraeli bingi bakasubilagha ubuketi ubwakuti Yehova ambombesyelagha Mose na bandu aba abimike. (Belenga Ukubaliwa 14:​2, 10, 11.) Mwakwandisania, abene bakasubilagha ukuti Yehova ambombesyelagha Mose ukuti abalongosyeghe. Panongwa ya isi, Yehova akabitikisye ukwingila Nkisu kya Lufingo.—Kuba. 14:30.

7. Yoba ififwanikisyo fya bandu aba bakongagha ubulongosi bwa Yehova. (Ukubaliwa 14:24) (Keta kangi ikithuzi.)

⁷ Loli Abaisraeli bamo bakongagha ubulongosi bwa Yehova. Mwakifwanikisyo, Yehova atile: “Kalebu . . . angongagha une nindumbula yosa.” (Belenga Ukubaliwa 14:24.) Kyala alinsayile Kalebu kangi alimwitikisye ukuti asale kuno ikulonda ukwakwikala Nkisu kya Lufingo. (Yos. 14:​12-14) Abaisraeli aba balingile Nkisu kya Lufingo, bope banangisye ikifwanikisyo ikinunu mwakukonga ubulongosi bwa Yehova. Bo Yoswa ingile mmalo mwa Mose ukuti abalongosyeghe Abaisraeli, abene “balinkungindika mbumi bwake bosa.” (Yos. 4:14) Isi syapangisye ukuti Yehova abasaye nukubapa ikisu iki afingile ukuti ikuya pakubapa.—Yos. 21:​43, 44.

8. Lingania muno Yehova abalongosyelagha abandu bake nkabalilo ka banyafyale. (Keta kangi ikithuzi.)

⁸ Bo ifyinja fikindilepo, Yehova asalile abalongi ukuti babalongosyeghe abandu bake. Ukufuma apo, nkabalilo ka balongi, Yehova abimike abasololi ukuti babalongosyeghe abandu bake. Abanyafyale abasubiliwa bakongagha ubulongosi ubwakufuma ku basololi. Mwakifwanikisyo, Umwalafyale Davidi anangisye ukwiyisya mwakwambilila ubulongosi ubwakufuma ku nsololi Natani. (2 Samu. 12:​7, 13;  1 Syambu. 17:3, 4) Umwalafyale Yehoshafati akongile ubulongosi ubwakufuma ku nsololi Yahazieli kangi abakasisye abandu ba ku Yuda ukuti “basubileghe muli isi bayobile abasololi ba [Kyala].” (2 Syambu. 20:​14, 15, 20) Pakabalilo aka atamiwagha naminong’ono, Umwalafyale Hezekiya alinsumile unsololi Yesaya ukuti antule. (Yes. 37:​1-6) Akabalilo kosa aka abanyafyale bakongagha ubulongosi bwa Yehova, abene basayiwagha fiyo kangi babafighililagha abandu ba Yehova. (2 Syambu. 20:​29, 30; 32:22) Aliwesa alondiwagha ukusubila ukuti Yehova ababombesyelagha abasololi ukuti babalongosyeghe abandu bake. Loli abanyafyale bingi na Baisraeli bakabapilikilagha abasololi ba Yehova.—Yere. 35:​12-15.

MUNO YEHOVA ABALONGOSYELAGHA ABAKRISTU BABWANDILO

9. Ngimba Yehova ababombesyelagha abanani ukubalongosya Abakristu babwandilo? (Keta kangi ikithuzi.)

⁹ Bo Yesu asyukile, Yehova alyandisye ikipanga kya Bukristu. Ngimba umwene abalongosyagha bulebule Abakristu babwandilo aba? Yehova alimwimike Yesu ukuya ntu wakipanga. (Ef. 5:23) Loli Yesu akambulagha ifyakubomba umfundiwa wake aliwesa pamwene. Umwene ababombesyelagha abatumiwa nabanyambala abakusi aba ku Yerusalemu ukuti bo balongosyeghe. (Imbo. 15:​1, 2) Kangi abakulumba balimikiwe ukuti balongosyeghe ifipanga.—1 Tes. 5:12; Titi 1:5.

10. (a) Ngimba Abakristu bingi babombagha bulebule nubulongosi ubu bambililagha? (Imbombo sya Batumiwa 15:​30, 31) (b) Nongwa yafiki bamo bakabapilikilagha abandu aba Yehova abimike ukuti babalongosyeghe? (Keta kangi ibokosi iyakuti “ Nongwa Yafiki Bamo Bakanagha Ubuketi Ubwakuboneka na Maso?”)

¹⁰ Ngimba Abakristu babwandilo aba bakongagha bulebule ubulongosi? Bingi bahobokagha ukukonga ubulongosi ubu bambililagha. Yonongwa yake, “balinkusekela panongwa ya lusubisyo” ulu balyambilile. (Belenga Imbombo sya Batumiwa 15:​30, 31.) Loli ngimba Yehova ikubalongosya bulebule ababombi bake amasiku agha?

MUNO YEHOVA IKUTULONGOSYELA AMASIKU AGHA

11. Yoba ikifwanikisyo iki kikunangisya muno Yehova ikubatulila aba bikulongosya amasiku agha.

¹¹ Yehova ikukindilila ukubalongosya ababombi bake amasiku agha. Umwene ikubomba isi ukwendela Mmasyu ghake, Ibaibolo, kangi nu Mwanake uyu yo ntu wakipanga. Ngimba tukuketa ubuketi ubwa muno Kyala ikukindilila ukubombesyela abandu aba abimike mmasiku ghitu  agha? Ena. Mwakifwanikisyo, inong’onela isi syabombiwe mu 1870. Charles Taze Russell nabinake balyandile ukupilikisya kanunu ukuti ikyinja kya 1914 kyayagha pakuya kyakulondiwa fiyo Mbunyafyale bwa Kyala. (Dan. 4:​25, 26) Bayimenye ifundo iyi panongwa yakuti bafufuzagha mu Baibolo kangi basubilagha ukuti bisakuketa ukufwanisiwa kwa busololi. Ngimba Yehova abalongosyagha linga bikufufuza mu Baibolo? Ena. Ifi fyabombiwagha nkisu mu 1914 fyanangisyagha ukuti Ubunyafyale bwa Kyala bwandile ukulaghila. Ubwite bwakwanda bwalyandile, kangi kwali imbungo imbela filalilali, utusenyenda kangi ninjala. (Luka 21:​10, 11) Ukuyoba ubwanaloli, Yehova abombesyelagha abanyambala abasubiliwa aba ukuti babatuleghe abandu bake.

12-13. Ngimba abakamu aba balimikiwe babombile isyafiki nkabalilo ka Bwite Bwabubili Ubwa Pakisu Kyosa ukuti imbombo iyakufumusya yibukeghe pankyeni?

¹² Inong’onela kangi isi syabombiwe pakabalilo Kabwite Bwabubili Ubwa Pakisu Kyosa. Abakamu aba bimikiwe ku ofesi yitu inywamu iya pakisu kyosa bafufuzile kanunu ilemba lya Ubusetuli 17:8. Bo bafufuzile, bapilikisye kanunu ukuti Ubwite Bwabubili ubu butisakulongosyela ku bwite bwa Armagedoni. Yonongwa yake basyaghenie ukuti kisakuya kabalilo kalutengano linga ubwite bumalike. Isi syapangisye ukuti Abaketi ba Yehova babafumukisye abandu bingi. Nalinga ukuti ifindu fimo fyabonekagha ukuti fikabaghila ukubombiwa pakabalilo kala, igulu lya Yehova lyalyandisye isukulu ya Gilead ukuti babamanyisye abamishonale ukufumusya nukumanyisya pakisu kyosa. Abamishonale aba batumiwe ukwakufumusya nalinga ukuti bwaliko ubwite. Mwakongelelapo, untumwa unsubiliwa alyandisye Sukulu ya Uteŵeti wa Ufumu b mfipanga fyosa ukuti babatule abafumusi ukufwanisya ukufumusya nukumanyisya. Isi syabatulile ababombi ba Kyala ukwitendekesya pambombo iyakufumusya iyi yayagha pakubombiwa nkyeni.

¹³ Amasiku agha, tuli nubuketi bosa ukuti Yehova abalongosyagha ababombi bake pakabalilo akapalapala kala. Ukwanda pakabalilo ka Bwite Bwabubili Ubwa Pakisu Kyosa, ababombi ba Yehova bikufumusya mbwabuke mfisu fingi. Kangi imbombo iyakufumusya yikubuka pankyeni.

14. Nongwa yafiki tukulondiwa ukusubila ubulongosi ubu bukufuma ku gulu lya Yehova na ku bakulumba aba bimikiwe? (Ubusetuli 2:1) (Keta kangi ikithuzi.)

 ¹⁴ Amasiku agha, abakamu ba Nkabughatila Kakulongosya bikukindilila ukukonga ubulongosi ubwakufuma kwa Kristu. Bikulonda ukuti abakamu na balumbu baketeghe ukuti ubulongosi ubu bikwambilila bukufuma kumwanya. Kangi bikubabombesyela abakwendela idela nabakulumba bakipanga ukuti babapeghe ubulongosi abakamu na balumbu nkipanga. c Abakamu abapakiwa bali na Kristu ku “kiboko ikililo.” (Belenga Ubusetuli 2:1.) Bwanaloli ukuti abakamu bosa aba basitabugholofu kangi bikusoba. Mose na Yoswa utubalilo tumo basobagha, mwakufwana itolo nabatumiwa. (Kuba. 20:12; Yos. 9:​14, 15; Rom. 3:23) Loli tubaghile ukuketa ukuti Yesu ikundongosya untumwa unsubiliwa nuwamahala nabakulumba aba bimikiwe, kangi ikuya pakukindilila ukubomba bo ulu “bwila ukwakufika kubumalikilo ikisu.” (Mat. 28:20) Lino tuli nififukwa fingi ifyakusubila ubulongosi ubu Yesu ikutupa ukwendela mu aba abimike ukuti batulongosyeghe.

TUKUSAYIWA FIYO LINGA TUKUKINDILILA UKUKONGA UBULONGOSI BWA YEHOVA

15-16. Ngimba mukumanyilako isyafiki ku bandu aba bakongagha ubulongosi bwa Yehova?

¹⁵ Linga tukukindilila ukukonga ubulongosi bwa Yehova, tukusayiwa fiyo. Mwakifwanikisyo, Andy na Robyn bakongile ubulongosi ubwakufuma ku ntumwa unsubiliwa ubwakuti bikaleghe ubumi ubusita kulonda ifindu fingi. (Hib. 13:5) Isi syabatulile ukuti bakatulepo pambombo iyakuyenga Inyumba sya Bunyafyale nifingi. Robyn atile: “Utubalilo tumo twikalagha mutunyumba utunandi utu tukayagha namalo aghakupiyapo. Isi syapangisye ukuti nulisye ifibombelo fimo ifi nabombelagha pakujambula, nalinga ukuti nalighanile fiyo ukujambula ifithuzi. Nalilile fiyo bo nulisye. Loli mwakufwana itolo na Abrahamu na Sara, naketile ukuti ngulondiwa ukwinong’onela isya nkyeni, komma isi nasilekile kunyuma.” (Hib. 11:15) Ngimba imbumba iyi yasayiwe bulebule? Robyn atile: “Tuli balusekelo fiyo panongwa yakumanya ukuti tukumpa Yehova kilikyosa iki tulinakyo. Linga tukubomba imbombo iyi Yehova atupele ukuti tubombe, sikututula ukumanya muno ubumi bwisakuyila nkisu ikipya.” Andy yope alitikisye mwakuyoba ukuti: “Tuli balusekelo fiyo panongwa yakuti tukumalila akabalilo namaka ghitu ukuti tutulepo pambombo ya Bunyafyale.”

¹⁶ Ngimba tukusayiwa kangi bulebule linga tukukindilila ukukonga ubulongosi bwa Yehova?  Bo amalile ifimanyilo ifya ku sekondale, Marcia alondagha fiyo ukukonga ubulongosi ubu alyambilile ubwakuti abombeghe ubupayiniya. (Mat. 6:33; Rom. 12:11) Umwene atile: “Nayagha pakubuka ku yunivesite ukuti ngamanyile kwa fyinja 4 kisita kulipila. Loli nalondagha ukubomba nyingi ukuti mfwanisye ubwighane bwangu ubwakumbombela Yehova. Yonongwa yake nasalile ukubuka ku sukulu iyi bikumanyisya ifyakuyenga ukuti mfwanisyeghe ukusyagha indalama isi sibaghile ukundula ukubomba ubupayiniya. Iki kyo kimo mwafyakusala ifinunu fiyo ifi mbombile. Lino nguhoboka ukubomba ubupayiniya bwakabalilo kosa, kangi panongwa yambatiko iyi ndinayo, ngutulapo pa Beteli nukubomba ububombeli ubungi.”

17. Ngimba lusayo luliku ulungi ulu tukulwagha linga tukukindilila ukukonga ubulongosi bwa Yehova? (Yesaya 48:​17, 18)

¹⁷ Utubalilo tumo, tukwambilila ubulongosi ubu bukutufighilila. Mwakifwanikisyo, tukusokiwa ukuti tungasighanagha fiyo indalama nukubomba ifindu ifi fibaghile ukutupangisya ukuti tungapilikilagha indaghilo sya Kyala. Pafighaba bo ifi, tukuya pakusayiwa fiyo linga tukukonga ubulongosi bwa Yehova. Tukukindilila ukuya namabyebye amanunu nukwepuka ku ndamyo nyingi. (1 Tim. 6:​9, 10) Ifyakukongapo fyake, tubaghile ukumbombela Yehova nindumbula yosa. Isi sikututula ukuya balusekelo, ukuya nulutengano lwamundumbula kangi tukwikutisiwa na ifi tuli nafyo.—Belenga Yesaya 48:​17, 18.

18. Nongwa yafiki mukulonda ukukindilila ukukonga ubulongosi bwa Yehova?

¹⁸ Tukusubila ukuti Yehova ikuya pakukindilila ukubabombesyela abandu aba abimike ukuti batupeghe ubulongosi pakabalilo kabutolwe ubukulumba ukwakufika mbulaghili bwa Kristu ubwa fyinja 1,000. (Sal. 45:16) Ngimba tukuya pakukindilila ukukonga ubulongosi ubu nalinga ukuti kubaghile ukuya kukafu? Kubaghile ukuya kupepe ukubomba isi linga tukukonga ubulongosi bwa Yehova lino. Po isagha utubalilo tosa tukongeghe ubulongosi bwa Yehova, ukongelelapo ubulongosi ubu bukufuma kubandu aba abimike ukuti batulongosyeghe. (Yes. 32:​1, 2; Hib. 13:17) Linga tukubomba isi, tubaghile ukunkonga Undongosi witu, Yehova nindumbula yitu yosa. Umwene ikututula ukwepuka ku kindu kilikyosa iki kibaghile ukonanga ubumanyani bwitu numwene kangi nukutulongosyela ku bumi bwa bwila na bwila nkisu ikipya.