UTUBALILO twingi aba balembagha Ibaibolo bayobagha amasyu mwakwandisania. Inong’onela ififukwa fitatu ifi lumo fyabapangisyagha ukubomba bo ulu:

Akabalilo aka balembagha. Nkabalilo ka Baisraeli, abandu bingi bakalinagho amabuku gha ndaghilo. Utubalilo twingi bapilikagha indaghilo sikubelengiwa linga babungene pampene Pihema. (Kukumbu. 31:​10-12) Kisita kukayika, fibaghile ukuti fyalipo ifyakusofania linga bikupilikisya bo bimile kwa maawala mingi pakilundilo ikinywamu. (Nehe. 8:​2, 3, 7) Pakabalilo bo aka, ukuyoba ifundo mwakwandisania kwabaghile ukuti kwabapangisyagha abandu ukuti kuyeghe kupepe ukukumbukila amalemba nukughakonga. Ukwandisya amasyu ghamo kubaghile ukuti kwabatulagha ukukumbukila ifundo isi syaghiwagha mundaghilo isi Yehova abapele.—Levi. 18:​4-22; Kukumbu. 5:1.

Muno Balembelagha. Ifighaba fimo fya mu Baibolo filembiwe bo nyimbo. Mwakifwanikisyo, ibuku lya Masalimo, Ulwimbo Ulukulu kangi ni lya Inguto ghalembiwe bo muno bikulembela inyimbo. Utubalilo twingi inyimbo sikuya namasyu aghakwandisania. Isi sikunangisya amasyu agha ghikukolelana numutu wa lwimbo kangi sikubatula aba bikwimba ukuti baghasungileghe pandumbula. Mwakifwanikisyo, keta amasyu agha ghikwaghiwa pa Salimo 115:​9-11 agha ghikuti: “We Israeli, ulisubilagha mu mwa Yehova, buno yo yu ntuli wako kangi yo ngulu yako. We nyumba ya Aroni, ulisubilagha mu mwa Yehova, yo yu ntuli wako kangi yo ngulu yako. Mwe mukuntila Yehova munsubileghe yuyo, yo ntuli winu kangi yo ngulu yinu.” Ukuyoba mwakwandisania amasyu agha, kubaghile ukuti kwabatulagha aba bimbagha ukusungila pandumbula amasyu aghakulondiwa fiyo agha.

Ukwandisania amasyu aghakulondiwa. Aba balembagha Ibaibolo, utubalilo tumo bayobagha mwakwandisania amasyu aghakulondiwa fiyo. Mwakifwanikisyo, pakabalilo aka Yehova ababulagha Abaisraeli ukuti bangalyagha ilopa, alimbulile Mose ukuti ayobeghe mwakwandisania ikifukwa kyake. Kyala alondagha ukulingania kanunu ukuti ubumi bwa kyabumi kilikyosa buli mwilopa pamo ukuti ilopa likwimila ubumi. (Levi. 17:​11, 14) Ukufuma apo, bo abatumiwa nabakulumba ba ku Yerusalemu balembile isi Abakristu balondiwagha ukubomba ukuti banhobosyeghe Kyala, balinganiagha kangi mwakwandisania ukulondiwa kwa kwepuka kwilopa.—Imbo. 15:​20, 29.

Nalinga ukuti Ibaibolo likuyoba amasyu mwakwandisania, isi sitikusanusya ukuti Yehova ikulonda ukuti twandisanieghe itolo ukuyoba amasyu gha mu Baibolo. Mwakifwanikisyo, Yesu atile: “Bo mukwiputa mungayobagha mwalwemwalwe itolo.” (Mat. 6:7) Ukufuma apo, ayobile ifindu ifi tukulondiwa ukusuma ndwiputo ifi fikukolelana nubwighane bwa Kyala. (Mat. 6:​9-13) Nalinga ukuti tutikuyoba amasyu mwakwandisania munyiputo syitu loli tubaghile ukuyoba mwakwandisania ifundo ndwiputo.—Mat. 7:​7-11.

Pakifukwa ikinunu, Amasyu gha Kyala ghikuyoba amasyu ghamo mwakwandisania. Iyi yo yimo mwa njila nyingi isi Undongosi witu Unkulumba ikutumanyisyila ukuti tukasiweghe.—Yes. 48:​17, 18.