Loli pope Yehova ikulonda ukuti tughulileghe mpaka apa umwene isakubombapo simo pakabalilo kake. Nongwa yafiki Yehova ikulonda ukuti tughulileghe? Ngimba findu fiki fibaghile ukututula ukuya balusekelo bo tukughulila?

NONGWA YAFIKI YEHOVA IKULONDA UKUTI TUGHULILEGHE?

Ibaibolo likuti: “Yehova Kyala ikubaghulila umwe ukuti anangisye ikisa kumyinu. Itendekisye ukubapakisya umwe, papo umwene yo ikubomba bwila isya bugholofu. Bo basangalufu aba bikubika ulusubilo lwabo mwa Yehova.” (Yes. 30:18) Amasyu gha Yesaya agha, ghabukagha ku Bayuda aba bawile amaka mwambepo. (Yes. 30:1) Loli balipo Abayuda bamo aba bali basubiliwa kangi amasyu agha ghabapele ulusubilo. Mwakufwana itolo, amasyu ghaghagha ghikubapa ulusubilo ababombi abasubiliwa ba Yehova amasiku agha.

Yonongwa yake tukulondiwa ukughulila mbufisalyoyo panongwa yakuti Yehova ikughulila mbufisalyoyo. Umwene abikile akabalilo apa isakusosyapo ifindu ifibibi ifi kangi ikughulila mbufisalyoyo mpaka isiku nakabalilo ako kafike. (Mat. 24:36) Pakabalilo ako, sisakunangisya pabwelu ukuti isi Umohesi ikunjobela Yehova na aba bikumbombela syabutungulu. Umwene isakunsosyapo Setano na aliwesa uyu ali kulubafu lwake. Loli uswe “isakutunangisya ikisa.”

Pakabalilo aka, Yehova akabaghila ukusosyapo indamyo syitu. Loli ikutusimikisyila ukuti tubaghile ukuya balusekelo bo tukungulila. Bo muno Yesaya ayobile, tubaghile ukuya balusekelo bo tukughulila ifindu ifinunu ifi fikuya pakwisa. (Yes. 30:18) a Ngimba tubaghile ukulwagha bulebule ulusekelo? Filipo ifindu 4 ifi fibaghile ukututula.

NGIMBA TUBAGHILE UKULWAGHA BULEBULE ULUSEKELO BO TUKUGHULILA?

Mwinong’oneleghe ifindu ifinunu ifi muli nafyo. Umwalafyale Davidi afibwene ifindu fingi ifibibi pabumi bwake. (Sal. 37:35) Loli pope alembile ukuti: “Uye myemyemye nkyeni mwa Yehova; ungulileghe yuyo mbufisalyoyo; Komma ukutamiwa mu ndumbula pa mundu uyu ikuya mbununu, nalinga po pa  mundu uyu ikubomba imbibi.” (Sal. 37:7) Davidi inong’onelagha isi Yehova afingile kumyake isyakuti isakumpoka. Kangi andaghisyagha pa findu fyosa ifinunu ifi Yehova alimbombile. (Sal. 40:5) Linga nanuswe tukwinong’onela ifindu ifinunu pabumi bwitu nukuleka ukwinong’onela indamyo isi tukwaghana nasyo, kwisakuya kupepe fiyo ukungulila Yehova.

Akabalilo kosa tuyobeghe inunu isi Yehova ikubomba. Uyu alembile Salimo 71, fikunangisya ukuti ali yo Davidi. Umwene alimbulile Yehova ukuti: “Loli une nikukusubilagha uwe bwila itolo, kangi nikongelangapo fiyo ukukupala.” (Sal. 71:14) Ngimba Davidi ampalagha bulebule Yehova? Abafumukisyagha abandu isya Yehova kangi amwimbilagha inyimbo. (Sal. 71:​16, 23) Mwakufwana itolo na Davidi, nanuswe tubaghile ukuya nulusekelo bo tukungulila Yehova. Tubaghile ukumpala Yehova mwakufumusya ku bandu nukubabula abamanyani nabamumbumba yitu isya Yehova nukwimba inyimbo syitu. Linga isiku limo mwisakwimba yimo mwa nyimbo syitu, mwinong’onele fiyo amasyu ghake namuno ghikubapa ulusekelo.

Tukasiweghe mwakwangala nabakamu na balumbu bitu. Linga Davidi aghene nindamyo, ambulagha Yehova ukuti: “Nikuyifumusyagha ingamu yako inunu nkyeni mbandu bako abasubiliwa.” (Sal. 52:9) Nanuswe tubaghile ukukasiwa linga tuli nabakamu na balumbu bitu kungomano, mubufumusi nukwangala nabo.—Rom. 1:​11, 12.

Tukasyeghe ulusubilo lwitu. Pa Salimo 62:5 pikuti: “Yu Kyala mwene yo une ngungulila kimyemye itolo papo nikunsubila yuyo mwene.” Kwakulondiwa fiyo ukuya nulusubilo lwamaka fiyofiyo linga ubumalikisyo butikwisa mwanakalinga bo muno twasubilagha. Tukulondiwa ukusubila ukuti isi Yehova afingile sikuya pakufwanisiwa naloli mulimosa muno sibaghile ukuyila. Tubaghile ukukasya ulusubilo lwitu mwakumanyila Amasyu gha Kyala. Mwakifwanikisyo, inong’onela ifindu fyosa ifi Ibaibolo lyayobile ngani ifi fyafwanisiwe kale, muno aba balembile Ibaibolo bikukolelana kangi namuno Yehova ikwifumbulila kumyitu. (Sal. 1:​2, 3.) Mwakongelelapo, tukulondiwa ukukindilila ukuti ‘twiputileghe mwa mbepo mwikemo’ ukuti tukindilile ukuya pabumanyani ubwa maka na Yehova bo tukughulila ukuti ulufingo lwake ulwa bumi bwa bwila na bwila lwisakufwanisiwa.—Yuda 20, 21.

Mwakufwana na Mwalafyale Davidi, nanuswe tusubileghe ukuti Yehova ikubaketa bosa aba bikungulila kangi ikubanangisya ulughano lwake ulusubiliwa. (Sal. 33:​18, 22) Isagha tukindilileghe ukungulila Yehova mbufisalyoyo mwakwinong’onela ifindu ifinunu pabumi bwitu, mwakumpala Yehova, mwakukasiwa na Baketi abinitu nukukindilila ukukasya ulusubilo lwitu.