1-2. ( a) Ngimba Yehova ikuketa findu fiki linga abandu bingi babungene ukuti bakumbukile inifwa ya Yesu? (Keta ikithuzi kya pakikope.) (b) Ngimba tukuya pakuyobesania isyafiki mu nkhani iyi?

INONG’ONELA muno Yehova ikuketela linga abandu bingi pa kisu kyosa babungene pampene ukuti bakumbukile inifwa ya Yesu. Umwene atikuketa ubwingi bwa bandu; loli ikumanya aliwesa uyu isile. Mwakifwanikisyo, ikuketa bosa aba bikwisa ikyinja kilikyosa. Bamo mwa bandu aba bikwisa nalinga ukuti bikwaghana nindamyo isyakukindanakindana. Abandu bamo batikwisa kabilikabili ku ngomano isingi loli bikuketa ukuti ukwaghiwapo pa kyakubombiwa iki kwakulondiwa fiyo. Yehova ikubamanya bosa aba bisile akakwanda pa kyakubombiwa iki panongwa yakuti bikulonda ukumanya nyingi.

² Kisita kukayika, Yehova ikuhoboka linga ikuketa ukuti abandu bingi bikwaghiwapo pakukumbukila inifwa ya Yesu. (Luka 22:19) Loli Yehova atikwinong’onela fiyo isya bwingi bwa bandu aba bikwaghiwapo. Umwene ikuhoboka fiyo panongwa ya kwaghiwapo kwabo; iki kyo kyakulondiwa fiyo kwa Yehova. Mu nkhani iyi, tukuya pakuyobesania ilalusyo ilyakulondiwa fiyo: Nongwa yafiki tutikwaghiwapo pene pa lukomano ulwa kukumbukila inifwa ya Yesu loli tukwaghiwa na pangomano isya pakipanga sabata aliwesa isi Yehova ikubatendekesyela abandu bake?

3-4. (a) Nongwa yafiki tukwaghiwapo pangomano? (b) Ngimba ukwaghiwapo pangomano kukututula bulebule? (c) Ukufwana na isi ilemba lya1 Bakorinti 11:23-26 likuyoba, nongwa yafiki tutikulondiwa ukutoliwa ukukumbukila inifwa ya Yesu?

³ Tukwaghiwapo pangomano sya kipanga panongwa yakuti kighaba kimo kya kumwiputa Kyala. Kangi tukwaghiwapo panongwa yakuti tukumanyisiwa na Yehova linga tuli pangomano.  Abandu bakwibona batikusubila kangi bikukana ukuti bakabaghila ukumanyisiwa kilikyosa. (3 Yoh. 9) Loli uswe, tukwiyipa ukuti tumanyisiwe na Yehova ni gulu lyake ili ikulibombesyela imbombo.—Yes. 30:20; Yoh. 6:45.

⁴ Ukwaghiwapo kwitu pangomano kukunangisya ukuti tuli bakwiyisya—twitendekisye kangi twitikisye ukuti tumanyisiwe. Ikilo kyakuti kilabo ikuya pakufwa, tukukumbukila inifwa yake panongwa yakuti tukupilikila mwakwiyisya amasyu gha Yesu aghakuti: “Bo mubombeghe bunobuno ukungumbukilamo une.” (Belenga 1 Bakorinti 11:23-26.) Ulukomano ulu lukukasya ulusubilo lwitu ulwa nkyeni kangi lukutukumbusya muno Yehova atughanile. Loli Yehova asimenye ukuti tukulondiwa ukuti tukasiweghe akabalilo kosa. Yonongwa yake ikututendekesyela ingomano sabata aliwesa kangi ikulonda ukuti twaghiwengepo. Ukwiyisya kukutupangisya ukuti tumpilikileghe. Tukuya na kabalilo kakwitendekesya sabata aliwesa nukwaghiwapo pangomano.

5. Nongwa yafiki abandu bakwiyisya bikwitika ukumanyisiwa na Yehova?

⁵ Ikyinja kilikyosa, abandu bakwiyisya bikwitikisya ukuti bamanyisiwe na Yehova. (Yes. 50:4) Bikuhoboka ukwaghiwapo pa kyakubombiwa ikya kukumbikila inifwa ya Yesu kangi pabumalilo bikwanda ukwaghiwa pangomano isingi isya pakipanga. (Zeka. 8:20-23) Twesa uswe tuli mbwanaloli na aba bikwanda ukumanyila, tukulondiwa ukumanyisiwa nu kulongosiwa na Yehova untuli, ‘[witu] nu mpoki [witu]’. (Sal. 40:17) Naloli sikuya syakuhobosya kangi syakulondiwa fiyo ukuti tumanyisiweghe na Yehova nu mwanake Yesu, uyu atughanile fiyo?—Mat. 17:5; 18:20; 28:20.

6. Ngimba ukwiyisya kwalintulile bulebule umundu yumo ukuti aghiwepo pakukumbukila inifwa ya Yesu?

⁶ Ikyinja kilikyosa, tukughelaghela ukubakolela abandu bingi ukuti basaghiwepo pakukumbukila inifwa ya Yesu. Abandu bingi abakwiyisya bikusayiwa linga bisile pakyakubombiwa iki. Inong’onela ikifwanikisyo iki. Ifyinja fingi ifi fikindilepo, umundu yumo alyambilile akapepala akakumukolela ku kyakubombiwa ikyapadela iki loli alimbulile unkamu uyu alinkolile ukuti atisa kwaghiwako. Loli pisiku lya kukumbukila inifwa ya Yesu, unkamu aswighile fiyo ukumbona umundu yula alinkolile ku kyakubombiwa iki ikwingila mu Nyumba ya Bunyafyale. Umundu uyu aswighile fiyo namuno abakamu na balumbu balimwambililile isi syalimpangisye ukuti ande ukwaghiwapo pangomano sya pakipanga. Nalinga ukuti ikyinja kyakukongapo atoliwe ukwaghiwapo pangomano simo. Ngimba findu fiki ifi fyalintulile ukuti aghiwengepo pangomano? Umwene alondagha fiyo ukuchenja aminong’ono ghake. Unkamu uyu alinkolile pabumalilo ayobile ukuti, “Mundu wakwiyisya fiyo.” Yehova alinkwabile naloli umundu uyu ukuti amwiputeghe kangi lino osiwe.—2 Samu. 22:28; Yoh. 6:44.

7. Ngimba isi tukumanyila pangomano na isi tukubelenga mu Baibolo sibaghile ukututula bulebule ukuti tuye bakwiyisya?

⁷ Isi tukumanyila pangomano na isi tukubelenga mu Baibolo sibaghile ukututula ukuti tuye bakwiyisya. Linga tuli pipi ukuti tukumbukile inifwa ya Yesu, isi tukumanyila pangomano sikuyoba fiyo isya Yesu namuno anangisyile ukwiyisya mwakubika ubumi bwake ukuya ikemo. Kangi linga tuli pipi ukukumbukila inifwa ya Yesu, tukukasiwa ukuti tubelengeghe inkhani sya mu Baibolo isyakuyoba ifi fyabombiwe pa nifwa ya Yesu nukusyuka kwake. Isi tukumanyila pangomano kangi ni nkhani isi tukubelenga mu Baibolo sikunangisya ukuti tukundaghisya ukufuma pasi pandumbula panongwa ya ikemo ili Yesu abikile. Isi sikutupangisya ukuti tukongeghe akayilo kake akakwiyisya kangi ukuti tubombeghe ubwighane bwa Yehova nalinga ukuti kubaghile ukuya kukafu kumyitu.—Luka 22:41, 42.

8. Ngimba Yesu anangisye bulebule ubukifu?

⁸ Tukunkonga kangi Yesu linga tukunangisya ubukifu. Isagha twinong’onele muno anangisyile ubukifu bo asyele panandi ukufwa. Umwene amenye ukuti abalughu bake basyele panandi ukunkosya isoni, ukunkoma, nukundonga. (Mat. 20:17-19) Loli umwene alitikisye ukuti afwe. Bo akabalilo kafwene, umwene ayobile kubafundiwa bake abasubiliwa aba ali nabo mu Getisemani ukuti: ‘Amusumukeghe tubuke. Keta! Uyu ikumbikagha m’maboko gha balughu aseghelile.’ (Mat. 26:36, 46) Kangi bo ikilundilo kya bandu kipimbile ifilwilo ukuti bankole, umwene alinkwima nkyeni myabo, nukwilingania mwene kangi ababulile abasilikali ukuti babaleke abafundiwa bake ukuti babukeghe. (Yoh. 18:3-8) Apa naloli Yesu anangisye ubukifu! Amasiku agha, Abakristu abapakiwa na bang’osi isingi bikughelaghela ukunkonga Yesu mwakunangisya ubukifu. Bulebule?

9. (a) Nongwa yafiki tukulondiwa ukuya bakifu ukuti twaghiwengepo pangomano akabalilo kosa? (b) Ngimba ikifwanikisyo kyitu kibaghile ukubatula bulebule abakamu bitu aba bali mu jele panongwa ya lwitiko lwabo?

⁹ Ukuti twaghiweghe pangomano akabalilo kosa, tukulondiwa ukunangisya ubukifu nalinga ukuti tukwaghana nindamyo. Abakamu na balumbu bitu bamo bikwaghiwa pangomano nalinga ukuti bikwaghana nindamyo bo, ikitima, ukuwa amaka pamo ububine. Bamo bikunangisya ubukifu mwakwaghiwa pangomano nalinga ukuti bikunyoziwa na ba mumbumba yabo pamo nabalaghili ba boma. Inong’onela muno ikifwanikisyo kyitu kikubapalamasyila abakamu bitu aba bali mu jele panongwa ya lwitiko lwabo. (Hib. 13:3) Linga bapilike ukuti tukukindilila ukumbombela Yehova nalinga ukuti tukwaghana nindamyo, abene bikukasiwa fiyo nukukindilila ukuya nulwitiko, ukuya bakifu nu kukindilila ukuya basubiliwa. Untumiwa Pauli yope alyaghene nindamyo bo iyi. Bo ali mu jele ku Roma, ahobokagha fiyo linga ikupilika ukuti abakamu bake bikukindilila ukumbombela Kyala ndwitiko. (Filip. 1:3-5, 12-14) Bo ali pipi ukwabuliwa pamo bo abuliwe, Pauli alembile kalata ku Bahiburi. Mu kalata wake abakasisye Abakristu abasubiliwa ukuti “ulughano lwa bunyamundu lo luyengeko bwila” kangi bangalekagha ukwaghanila pampene.—Hib. 10:24, 25; 13:1.

10-11. (a) Ngimba bo baliku aba tukulondiwa ukubakolela pakukumbukila inifwa ya Yesu? (b) Ngimba ilemba lya Baefesi 1:7 likuyoba inongwa yiliku iyi tukulondiwa ukubomba bo ulu?

¹⁰ Tukunangisya kangi ubukifu linga tukubakolela abakamu bitu, aba tukubomba nabo imbombo na bapalamani bitu pakukumbukila inifwa ya Yesu. Nongwa yafiki tukubakolela? Tukubakolela panongwa yakuti tukundaghisya Yehova na Yesu pa isi batubombile, iyi yonongwa yake tukubakolela abangi ukuti basaghiwepo pakyakubombiwa iki. Tukulonda ukuti bope bamanyile muno babaghile ukupindulila ‘nipyana lyake’ ili Yehova atunangisye ukwendela mu ikemo.—Belenga Baefesi 1:7; Ubuset. 22:17.

¹¹ Linga tukunangisya ubukifu mwakubungana pampene, tukunangisya kangi akayilo akanunu fiyo aka Kyala nu mwanake bikunangisya munjila isyakukindanakindana.

12. (a) Ngimba ingomano sikukasya bulebule ulughano lwitu kwa Yehova na Yesu? (b) Ngimba ilemba lya 2 Bakorinti 5:14, 15 likutukasya ukubomba isyafiki ukuti tunkongeghe Yesu?

¹² Ulughano lwitu kwa Yehova na Yesu lukutufimbilisya ukuti twaghiwengepo pangomano. Isi tukumanyila pangomano sikukasya ulughano lwitu kwa Yehova nu mwanake. Linga tuli pangomano tukukumbusiwa kabilikabili isi abene bikutubombela. (Rom. 5:8) Inifwa ya Yesu yikutukumbusya fiyo isya muno ulughano lwabo luyilile, nalinga ko ku bandu aba batikundaghisya ikemo. Panongwa yakundaghisya isi ikutubombela, tukughelaghela ukunkonga Yesu ilisiku lililyosa. (Belenga 2 Bakorinti 5:14, 15.) Mwakongelelapo, indumbula yitu yikutupangisya ukuti tumpaleghe Yehova panongwa ya kutupa ikemo. Injila yimo iyi tunganangisyila ukuti tukumpala ko kwamulapo pangomano ukufumila pasi pandumbula.

13. Ngimba tubaghile ukunangisya bulebule ulughano ulwakufuma pasi pandumbula kwa Yehova nu Mwanake? Lingania.

¹³ Tubaghile ukunangisya ulughano ulwakufuma pasi pandumbula kwa Yehova nu mwanake mwakubomba kilikyosa iki tubaghile ukufwanisya. Tubaghile ukubomba isi mwakwaghiwapo pangomano. Ifipanga fingi fikubungana nkati mwa sabata linga abandu bingi baghomwikeko ku mbombo nalinga ukuti bingi bikukatala. Ingomano isingi sikubombiwa kubumalilo bwa sabata apa abandu bingi bikutusya. Ngimba Yehova ikundaghisya ukuti tukughelaghela ukwaghiwapo pangomano nalinga ukuti tukukatala? Kisita kukayika, ikundaghisya fiyo! Yehova ikundaghisya fiyo ulughano ulu tukunangisya linga tukwaghiwapo pangomano nalinga ukuti tukwaghana ningamyo.—Marko 12:41-44.

14. Ngimba Yesu atunangisye bulebule ikifwanikisyo ikinunu ikya muno tubaghile ukunangisyila ulughano ulwakufuma pasi pandumbula?

¹⁴ Yesu atunangisye ikifwanikisyo ikinunu ikya muno tubaghile ukunangisyila ulughano ulwakufuma pasi pandumbula. Abombile isi komma ukuti abafwilile itolo abafundiwa bake loli akabalilo kosa abikagha ifyakulonda fyabo pa malo ghakwanda. Mwakifwanikisyo, umwene akabalilo kosa ayagha na bafundiwa bake nalinga ukuti akatalagha. (Luka 22:39-46) Kangi umwene inong’onelagha fiyo ifindu ifi abaghile ukubapa abandu m’malo mwa ifi umwene abaghile ukukaba ukufuma ku bandu. (Mat. 20:28) Linga ulughano lwitu kwa Yehova na ku bakamu bitu  lwamaka, tubaghile ukubomba kilikyosa iki tubaghile ukufwanisya ukuti twaghiwengepo pakukumbukila inifwa ya Yesu na pangomano sya pakipanga.

15. Ngimba bo baliku aba tukuhoboka fiyo ukubatula?

¹⁵ Tuli Bakristu ba bwanaloli ba pa kisu kyosa, kangi tukuhoboka fiyo ukubakolela abangi ukuti tuye nabo pampene. Loli tukuhoboka fiyo ukubatula bosa aba “tuli ndwitiko lumolwene” loli fiyofiyo aba bonywa. (Gal. 6:10) Tukubanangisya ulughano mwa kubakasya ukuti baghiwengepo pangomano, fiyofiyo pakukumbukila inifwa ya Yesu. Ukufwana na Yehova na Yesu, nuswe tukuhoboka fiyo linga umundu umonywa aghomokile kwa Yehova, Tata witu uwalughano nuntimi witu.—Mat. 18:14.

16. (a) Ngimba tubaghile ukukasania bulebule kangi ngimba ingomano sibaghile ukututula bulebule? (b) Nongwa yafiki ikyinja iki ko kabalilo akanunu akakukumbukila amasyu gha Yesu agha ghikwaghiwa pilemba lya Yohani 3:16?

¹⁶ Mu basabata aba bikwisa, musabakolele abandu bingi ukuti basaghiwepo pakukumbukila inifwa ya Yesu pa Chihano namayolo, Epulelo 19, 2019. (Keta ibokosi ilyakuti “Ngimba Mukuya Pakubakolela?”) Ikyinja kyosa iki, tukulondiwa ukubomba kilikyosa iki tubaghile ukufwanisya ukuti tusakasanie mwakwaghiwapo pangomano syosa isi Yehova ikututendekesyela. Panongwa yakuti ikisu iki kili kubumalilo, tukulondiwa ukwaghiwapo pangomano ukuti tukindilile ukuya bakwiyisya, bakifu na balughano. (1 Tes. 5:8-11) Nindumbula yitu yosa, isagha tunangisye muno tukwipilikila nulughano ulu Yehova nu mwanake balinalo kumyitu!—Belenga Yohani 3:16.