Pachitatu nulubunju, Januwale 24, 2018, abakamu na balumbu aba pa Beteli yaku United States na Canada bahobwike ukupilika inkhani iyakuhobosya iyakuti: Unkamu Kenneth Cook, Jr., ongeleliwe mu Kabughatila Kakulongosya ka Baketi ba Yehova.

Unkamu Cook apapiwe nukukulila ku Pennsylvania, U.S.A. Umwene amanyile ubwanaloli ukufuma ku nnine uyu amanyilagha nawe ikilasi limolyene nukwakufika ku sukulu ya pamwanya kangi alyosiwe pa Juni 7, 1980. Umwene alyandile ububombeli bwa kabalilo kosa mwakuya mpayiniya wakabalilo kosa mu Seputembala 1, 1982. Bo abombile ubupayiniya kwa fyinja fibili, balinkolile ku Beteli, ukuti akande ububombeli bwake ubwa pa Beteli ku Wallkill, New York, mu Okutobala 12, 1984.

Kwa fyinja ifingi 25, Unkamu Cook abombile muma dipatimenti aghakukindanakindana bo Ukupulinta amabuku nukubomba pa Beteli. Mu 1996 alyeghile ukinkulu ingamu yake Jamie, kangi yope alyandile ububombeli bwa pa Beteli kuWallkill. Mu Disembala 2009, Unkamu nuMulumbu Cook babatumile ukubuka ku Sukulu Isyakumanyisya Ibaibolo ku Patterson, New York, kuno Unkamu Cook apeliwe ububombeli bwakubomba pampene na ba mu Dipatimenti Yakwamula Abakalata. Mu Epulelo 2016, bo baghomokile ku Wallkill, Unkamu nu Mulumbu Cook babatumile ku Brooklyn, New York. Bo imyesi 5 yikindilepo, babatumile kangi ku mahedikota ghitu agha pa kisu kyosa ku Warwick, New York. Mu Januwale 2017, Unkamu Cook asaliwe ukuti atuleghe mu Komiti Yakuketesya Ifyakulemba iya Mukabughatila Kakulongosya.