INKHANI IYAKUMANYILA 5
Tukuya Pakubuka Pampene Nanuwe
“Tubukeghe palikimo nanuwe papo tupilike ukuti Kyala akusalile uwe.”—ZEKA. 8:23.
ULWIMBO 26 Mukachitira Ine
ISI TUKUYA PAKUMANYILA *
Aba ng’osi isingi (“abandu abahesya kalongo”) bikumwiputa Yehova pampene na bapakiwa (“Umuyuda”) (Keta amapalagilafu 1-2)
1. Ngimba Yehova ayobile ngani isyafiki isyakufwana na m’masiku agha?
YEHOVA ayobile ngani ukuti: “Ntubalilo tula abandu abahesya kalongo bisakwisagha ku Yuda yumoywene nukuyoba ukuti: ‘Oko tubukeghe palikimo nanuwe, papo tupilike ukuti Kyala akusayile uwe.’” (Zeka. 8:23) “Umuyuda” ikwimila bosa aba Kyala abapakile na mbepo wake mwikemo. Abene bikukoleliwa kangi ukuti “bandu ba Kyala.” (Gal. 6:16) “Abandu abahesya kalongo” bikwimila bosa aba bali nulusubilo ulwakwisakwikala nubumi bwa bwila na bwila pa kisu kyapasi. Abene basimenye ukuti Yehova alisalile igulu ilya bapakiwa kangi bikuhoboka ukwiputa pampene nabo.
2. Ngimba “abandu abahesya kalongo” “bikubuka pampene” bulebule na bapakiwa?
2 Nalinga ukuti tukabaghila ukufwanisya ukumanya ingamu ya aliwesa uyu apakiwe pa kisu, * loli aba bali nulusubilo ulwakwisakwikala pa kisu kyapasi “bikubuka pampene” na bapakiwa. Bulebule? Ibaibolo likuti “Abandu abahesya kalongo” bikuya “pakukola umwenda wa Muyuda, nukuyoba ukuti: ‘Tubukeghe palikimo nanuwe papo tupilike ukuti Kyala akusalile uwe.’” Ibaibolo likuyoba isya Muyuda yumoywene. Loli amasyu aghakuti “nanuwe” kangi “akusayile uwe” ghikusanusya isya bandu bingi ukukinda umundu yumoywene. Isi sikusanusya ukuti akaya Muyuda yumoywene loli bikwimila igulu lyosa ilya bapakiwa. Bosa aba bakaya bapakiwa bikumbombela Yehova pampene na bapakiwa. Loli abene batikubaketa abapakiwa ukuya balongosi babo, panongwa yakuti Yesu yo Ndongosi wabo.—Mat. 23:10.
3. Ngimba malalusyo ghaliku agha ghikuya pakwamuliwa munkhani iyi?
3 Panongwa yakuti abapakiwa balipo pa kisu kyapasi, abandu bamo babaghile ukwilalusya ukuti: (1) Ngimba abapakiwa bikulondiwa ukuti biketeghe bulebule? (2) Ngimba bosa aba bikulya nukunwa ifimanyikilo bikulondiwa ukuti tubabombeleghe bulebule? (3) Ngimba tukulondiwa ukupasya linga inambala ya aba bikulya nukunwa ifimanyikilo yikubala? Inkhani iyi yikuya pakwamula amalalusyo agha.
NGIMBA ABA BAPAKIWE BIKULONDIWA UKUTI BIKETEGHE BULEBULE?
4. Ngimba bulongosi buliku ubu buli pa 1 Bakorinti 11:27-29 ubu abapakiwa bikulondiwa ukukumbukila, kangi nongwa fiki?
4 Aba bapakiwe na mbepo mwikemo bikulondiwa ukwinong’onela fiyo isya bulongosi ubu buli pa 1 Bakorinti 11:27-29. (Belenga.) Ngimba umundu uyu ikulya nukunwa ifimanyikilo “mbusitakubaghila” abaghile ukuya wakulondiwa? Umwene akabaghila ukuya wakulondiwa linga ikulya nukunwa ifimanyikilo loli atikupilikila indaghilo sya Yehova. (Hib. 6:4-6; 10:26-29) Aba bapakiwe, bikumanya ukuti bikulondiwa ukukindilila ukuya nulwitiko linga bikulonda ukwambilila “ifya kusekesya ifya lubilikilo ulwa kumwanya ulwa mwa Kristu Yesu.”—Filip. 3:13-16.
5. Ngimba abapakiwa bikulondiwa ukwimanya bulebule?
5 Mbepo wa Yehova ghukubatula ababombi bake ukuti bayeghe bakwiyisya, komma ukwibona. (Ef. 4:1-3; Kolos. 3:10, 12) Yonongwa yake abapakiwa batikwibona ukuti bapamwanya ukukinda abangi. Abene basimenye ukuti Yehova atikubapa mbepo wake mwikemo ukukinda muno ikubapela ababombi bake abangi. Batikwibona ukuti bikupilikisya fiyo ubwanaloli bwa mu Baibolo ukukinda aliwesa. Abene batikumbulamo nayumo ukuti apakiwe kangi ukuti ande pakulya nukunwa ifimanyikilo pakukumbukila inifwa ya Yesu. M’malo mwake, mwakwiyisya bikumanya ukuti Yehova mwene yo ikubakolela abandu ukuti babuke kumwanya.
6. Ukufwana na 1 Bakorinti 4:7, 8, ngimba abapakiwa bikulondiwa ukunangisya akayilo kaliku?
6 Nalinga ukuti abapakiwa bikumanya ukuti syakuhobosya fiyo ukukoleliwa ukubuka kumwanya loli abene batikughulila ukuti abangi bababombeleghe ifindu munjila iyapadela. (Filip. 2:2, 3) Abapakiwa basimenye ukuti linga bapakiwe, Yehova atikumbulapo umundu nayumo ukuti amanye isi. Yonongwa yake uyu apakiwe atikuswigha linga abandu bamo batikusubila ukuti apakiwe. Umwene ikumanya ukuti Ibaibolo likuyoba ukuti tutikulondiwa ukuya bengo ukusubila linga yumo ikuyoba ukuti Kyala ampele ubudindo bumo ubwapadela. (Ubuset. 2:2) Uyu apakiwe atikulonda ukuti abandu binong’oneghe sisyake syene, yonongwa yake atikubabula ukuti apakiwe. Kangi atikwibona linga ali nabangi.—Belenga 1 Bakorinti 4:7, 8.
7. Ngimba abapakiwa bikulondiwa ukwepuka ukubomba ifindu fiki, kangi nongwa yafiki?
7 Abapakiwa batikwinong’ona ukuti bikulondiwa ukwangala na bapakiwa abinabo bene, bo muno bikubombela abandu aba bali mugulu ilyapadela fiyo. Abene batikulonda ukuti bayobesanieghe na bapakiwa abinabo inkhani isyakufwana namuno bapakiliwe nukupanga utumagulu ukuti bamanyileghe Ibaibolo. (Gal. 1:15-17) Linga babaghile ukubomba bo isi, ulutengano lukabaghila ukuyamo nkipanga. Abene babaghile ukwimikana na mbepo mwikemo, ughu ghukubatula abandu ba Kyala ukuya palutengano.—Rom. 16:17, 18.
NGIMBA ABAPAKIWA BIKULONDIWA UKUTI TUBABOMBELEGHE BULEBULE?
Tutikulondiwa ukubabombela abapakiwa pamo aliwesa uyu ikulongosya mwakufwana itolo nabandu aba bali mu kilabu ilyapamwanya fiyo (Keta ipalagilafu 8) *
8. Nongwa yafiki tukulondiwa ukuya maso namuno tukubombela ifindu nabapakiwa? (Keta amasyu gha pasi.)
8 Ngimba abakamu na balumbu aba bapakiwe tukulondiwa ukubabombela bulebule ifindu? Kubaghile ukuya kubibi fiyo ukunyonnywa umundu, nalinga ukuti apakiwe. (Mat. 23:8-12) Linga Ibaibolo likuyoba isya bakulumba bakipanga, likutukasya ukuti “tukongeghe ulwitiko lwabo,” loli litikuyoba ukuti tubaghile ukumbika umundu aliwesa ukuya ndongosi witu. (Hib. 13:7) Bwanaloli ukuti Ibaibolo likuyoba ukuti bamo “bongelelangapo kabili ukubapa umfwalo.” Loli isi sikubombiwa panongwa yakuti abene “bikulongosya kanunu” kangi “bikwiyula ukufumusya nukumanyisya,” komma panongwa yakuti bapakiwe. (1 Tim. 5:17) Linga tukubatufya fiyo aba bapakiwe tubaghile ukubapangisya ukuti bangipilikagha kanunu. * Ikindu ikibibi fiyo kyo kyakuti, tubaghile ukubapangisya ukuti bitufyeghe. (Rom. 12:3) Akayapo nayumo uyu ikulonda ukubomba kilikyosa iki kibaghile ukubapangisya abakamu abapakiwa ukuti batule inongwa!—Luka 17:2.
9. Ngimba tubaghile ukunangisya bulebule ukuti tukubaghindika abapakiwa?
9 Ngimba tubaghile ukunangisya bulebule ukuti tukubaghindika bosa aba Yehova abapakile na mbepo mwikemo? Tutikulondiwa ukubalalusya ukuti bapakiwe bulebule. Iyi nkhani ya aliwesa pamwene. (1 Tes. 4:11; 2 Tes. 3:11) Kangi tutikulondiwa ukwinong’ona ukuti aba mumbumba yabo bope bapakiwe. Umundu atikwingila ikilingo ukufuma ku mbumba yake ukuti aye nulusubilo ulwakwisakwikala kumwanya. Umwene ikwambilila ukufuma kwa Kyala. (1 Tes. 2:12) Kangi tutikulondiwa ukubalalusya amalalusyo agha ghabaghile ukubakalalisya. Mwakifwanikisyo, tutikulondiwa ukunndalusya unkasi wa nkamu uyu apakiwe muno ikwipilikila isyakwisakwikala pa kisu kyapasi mwene kisita nndume wake. Tuli nulusubilo losa ukuti nkisu ikipya, Yehova “isakukapagha akabumi kosa ifi kikulonda.”—Sal. 145:16.
10. Ngimba tukwifighilila bulebule linga tukwepuka “kufinyonywa fyabo”?
10 Linga tutikubabombela ifindu abapakiwa mwakunangisya ukuti bakulondiwa fiyo ukukinda abangi tubaghile ukwifighilila twibene. Bulebule? Ibaibolo likuyoba ukuti abapakiwa bamo batikuya pakukindilila ukuya basubiliwa. (Mat. 25:10-12; 2 Pet. 2:20, 21) Loli linga tukwepuka ‘kufinyonywa fyabo,’ tutikuya pakunkonga umundu aliwesa, nalinga bo aba bapakiwe na mbepo mwikemo pamo aliwesa uyu mfumuke, ukongelelapo aba bambombile Yehova kwa kabalilo akatali. (Yuda 16) Linga balekile ukuya basubiliwa pamo basokile nkipanga, tutikuya pakuwa amaka loli tukuya pakukindilila ukumbombela Yehova.
NGIMBA TUKULONDIWA UKUPASYA NUBWINGI BWA NAMBALA YA ABA BIKULYA NUKUNWA?
11. Ngimba findu fiki ifi fikubombiwa ninambala ya aba bikulya nukunwa ifimanyikilo pakukumbukila inifwa ya Yesu?
11 Kwa fyinja fingi, inambala ya aba bikulya nukunwa ifimanyikilo pakukumbukila inifwa ya Yesu yikililagha pasi. Loli amasiku agha, inambala ya aba bikulya nukunwa ifimanyikilo yikongelela ukubala ikyinja kilikyosa. Ngimba tukulondiwa ukupasya na isi? Hayi. Isagha tukete inongwa iyi tutikulondiwa ukupasya.
12. Nongwa yafiki tutikulondiwa ukupasya nubwingi bwa nambala ya aba bikulya nukunwa ifimanyikilo pakukumbukila inifwa ya Yesu?
12 “Yehova abamenye abake.” (2 Tim. 2:19) Mwakukindana na Yehova, abakamu aba bikubelenga abandu aba bikulya nukunwa ifimanyikilo pakukumbukila inifwa ya Yesu batikumanya uyu apakiwe naloli. Yonongwa yake inambala iyi yikongelelapo abandu aba bikwinong’ona ukuti bapakiwe loli bakapakiwa. Mwakifwanikisyo, bamo aba balyagha nukunwa ifimanyikilo balekile bo akabalilo kakindilepo. Bamo imitu yitikwenda kanunu pamo bali nindamyo iya minong’ono isi sikubapangisya ukuti binong’oneghe ukuti bisakulaghilagha na Kristu kumwanya. Ukuyoba ubwanaloli, tutikumanya ubwingi bwa bapakiwa aba basyele pa kisu kyapasi.
13. Ngimba Ibaibolo likuyoba isya bwingi bwa bapakiwa aba bisakukindilila ukuya pa kisu kyapasi linga ubutolwe ubukulumba bwandile?
13 Pisakuya abapakiwa bingi pa kisu kyapasi linga Yesu isile pakubegha ukubuka nabo kumwanya. (Mat. 24:31) Ibaibolo likuyoba ukuti m’masiku ghakubumalikisyo, pisakuya inambala nandi fiyo iya bapakiwa pa kisu kyapasi. (Ubuset. 12:17) Loli litikuyoba isya bwingi bwa bapakiwa aba bisakukindilila ukuya pa kisu kyapasi linga ubutolwe ubukulumba bwandile.
Ngimba tukulondiwa ukwipilika bulebule linga yumo ikulya nukunwa ifimanyikilo pakukumbukila inifwa ya Yesu? (Keta ipalagilafu 14)
14. Ukufwana na Baroma 9:11, 16, ngimba tukulondiwa ukumanya isyafiki pankhani iyakusala abapakiwa?
14 Yehova ikwinong’ona mwene akabalilo akakusala abapakiwa. (Rom. 8:28-30) Yehova alyandile ukusala abapakiwa bo Yesu asyukile ku bufwe. Sikuboneka ukuti nkabalilo kakunyuma, Abakristu bosa babwanaloli bapakiwe. Mfyinja fyakunyuma, bosa aba batighi Bakristu bakankongagha naloli Kristu. Nalinga mo syayilile, Yehova abapakile Abakristu banandi aba bali babwanaloli. Abene bali bo ingano isi Yesu ayobile ukuti sikuya pakukula pampene nindulwe. (Mat. 13:24-30) M’masiku aghakubumalikisyo agha, Yehova ikukindilila ukusala abandu aba bisakuya kukighaba ikya ba 144,000. * Yonongwa yake linga inong’wine isyakusala abandu bamo m’masiku agha, tutikulondiwa ukukayika na isi asalile ukubomba. (Belenga Baroma 9:11, 16.) * Tukulondiwa ukuya maso ukuti tungabombagha ifindu bo abandu aba Yesu abalingenie mfifwanikisyo fyake. Abene balyandile ukwilumbusya panongwa ya muno bwana wabo abombile na aba babombile imbombo kwa kabalilo akanandi.—Mat. 20:8-15.
15. Ngimba bosa aba bapakiwe bali kulubafu ulwa “mbombi unsubiliwa nuwamahala,” ukufwana na Matai 24:45-47? Lingania.
15 Bakaya bosa aba bali nulusubilo ulwakubuka kumwanya bali kulubafu ulwa “mbombi unsubiliwa nuwamahala.” (Belenga Matai 24:45-47.) Mwakufwana itolo na nkabalilo kakunyuma, Yehova na Yesu amasiku agha bikubombela abakamu banandi itolo ukubalyesya, nukubamanyisya abandu bingi pa kisu kyapasi. Kangi Abakristu banandi itolo, aba nkabalilo kakunyuma bo balembile amalemba gha Chigiriki. Amasiku agha Abakristu abapakiwa banandi itolo bo bali nubudindo ubwakubapa abandu ba Kyala “ifyakulya pakabalilo kake.”
16. Ngimba mumanyile isyafiki munkhani iyi?
16 Ngimba tumanyile isyafiki munkhani iyi? Yehova isakubapa abandu bingi ubumi bwa bwila na bwila pa kisu kyapasi kangi nabandu banandi aba bikwisa kulaghila na Yesu kumwanya. Yehova ikubasaya ababombi bake bosa “Umuyuda” pampene “nabandu abahesya kalongo” kangi ikulonda ukuti bapilikileghe indaghilo syake nukuya basubiliwa. Bosa bikulondiwa ukuya bakwiyisya. Bosa pampene bikulondiwa ukumbombela Kyala nukuya balutengano. Kangi bikulondiwa ukughelaghela ukuya palutengano na bakamu na balumbu. Bo tuli m’masiku ghakubumalikisyo, isagha twesa tumbombeleghe Yehova nukunkonga Kristu ukuya “ntimo ghumowene.”—Yoh. 10:16.
^ ipal.5 Ikyinja iki, ukukumbukila inifwa ya Yesu kukuya pakubombiwa pa Kibili, Epulelo 7. Ngimba tukulondiwa ukubaketa bulebule bosa aba bikulya nukunwa ifimanyikilo? Ngimba tukulondiwa ukupasya linga inambala ya aba bikulya nukunwa ifimanyikilo yikukindilila ukubala? Tukuya pakughagha amaansala gha malalusyo agha munkhani iyi, agha ghafumile mu Gongwe la mulinda ilya January 2016.
^ ipal.2 Ukufwana na Masalimo 87:5, 6, munkyeni Kyala lumo abaghile kwisakuyoba ingamu sya bosa aba bikuya pakulaghila na Yesu kumwanya.—Rom. 8:19.
^ ipal.8 Keta ibokosi ilyakuti “Chitemwa ‘Chikuchita Mwambura Kwenelera Yayi’” mu Gongwe la Mulinda ilya January 2016.
^ ipal.14 Nalinga ukuti ilemba lya Imbombo sya Batumiwa 2:33 likunangisya ukuti mbepo mwikemo ghukubikiwa ukwendela mwa Yesu, loli yo Yehova uyu ikunkwaba umundu aliwesa.
^ ipal.14 Ukuti mumanye nyingi, keta amasyu aghakuti “Mafunso Ochokera kwa Owerenga” mu Nsanja ya Olonda, iya May 1, 2007.
ULWIMBO 34 Kwenda mu Urunji
^ ipal.56 ISI IKITHUZI KIKULINGANIA: Uwa nkabughatila kakulongosya nu nkasi wake basyungutiliwe nabandu ukuti babajambule ifithuzi. Isi sikaya syalughindiko!
