1-2. Ngimba ndamyo siliku isi ababombi ba Yehova bikwaghana nasyo, kangi ngimba sikubapalamasya bulebule?

INONG’ONELA ififwanikisyo fitatu ifi: Unkamu uwakilumyana ikutamiwa nindamyo iya bubine. Unkamu yumo uwa mfyinja fya m’ma 50 imbombo yimmalikile nalinga ukuti ikwiyipa fiyo mwakulonda iyingi loli umwene ikutoliwa ukuti ayaghe imbombo iyingi. Umulumbu unkangale ikutoliwa ukubomba nyingi mwakumbombela Yehova panongwa yakuti akaya namaka.

² Linga muli nindamyo bo isi, lumo mubaghile ukwinong’ona ukuti mukaya bakulondiwa. Indamyo bo isi sibaghile ukumasya ulusekelo lwinu, ukubapangisya ukuti mwipilikeghe ububibi, kangi nukuti mungayagha pabumanyani ubununu nabandu abangi.

3. Ngimba Setano na aba bikunkonga bikubuketa bulebule ubumi bwa bandu?

³ Ikisu iki kikukolelana na isi Setano ikulonda. Akabalilo kosa umwene ikubabombela abandu ifya nkhaza nukuti biketeghe ukuti bakaya bakulondiwa. Setano alinsyobile Eva ukuti ayagha pakuya nubwabuke linga akampilikila Kyala, nalinga ukuti asimenye ukuti ukusita kupilikila kukutwala ubufwe. Setano yo ikulongosya pankhani ya malonda, indyali namatchalichi nkisu iki. Yonongwa yake sikaya syakuswighisya ukuti abamalonda, abandyali nabalongosi ba matchalichi bikunangisya ukuti batikubughindika ubumi bwa bandu.

4. Ngimba tukuya pakuyobesania isyafiki munkhani iyi?

⁴ Loli Yehova, ikulonda ukuti twipilikeghe kanunu pabumi bwitu, kangi umwene ikututula linga twaghene nindamyo isi sibaghile ukutupangisya ukuti twiketeghe ukuti tukaya bakulondiwa.  (Sal. 136:23; Rom. 12:3) Inkhani iyi yikuya pakulingania muno Yehova ikututulila pandamyo sitatu isi: (1) Linga tukutamiwa nindamyo iya bubine, (2) linga tukutamiwa nindamyo iya ndalama (3) linga ubukangale bukutupangisya ukuti tutoliweghe ukumbombela Yehova. Ikyakwanda, isagha tukete inongwa iyi tukulondiwa ukuya nulusubilo ukuti aliwesa wa uswe wakulondiwa fiyo kwa Yehova.

5. Ngimba findu fiki fikunangisya ukuti abandu bakulondiwa fiyo kwa Yehova?

⁵ Nalinga ukuti Kyala atupelile ukufuma ku mfu, loli umwene ikutuketa ukuti tuli bakulondiwa fiyo. (Bwa. 2:7) Inong’onela ififukwa fimo ifi tukumanya ukuti tuli bakulondiwa fiyo kwa Yehova. Umwene atupelile ukuti tunangisyeghe utuyilo twake utununu. (Bwa. 1:27) Mwakubomba isi, atwimike pamwanya pambombo sya maboko ghake, nukutupa amaka ukuti tufilaghileghe ifinyamana pa kisu.—Sal. 8:4-8.

6. Ngimba buketi buliku ubungi ubu bukunangisya ukuti Yehova ikubaketa abandu aba bakaya bagholofu ukuti bakulondiwa?

⁶ Nalinga ukuti Adamu alyonangile, loli Yehova akindilile ukubaketa abandu ukuti bakulondiwa fiyo. Umwene ikutuketa ukuti tuli bakulondiwa fiyo yonongwa yake atupele umwanake Yesu, ukuya kitabulilo panongwa ya butulanongwa bwitu. (1 Yoh. 4:9, 10) Ukwendela nkitabulilo kya Yesu, Yehova ikuya pakubasyusya bosa aba bafwile panongwa ya butulanongwa bwa Adamu, “abagholofu nabaniongafu.” (Imbo. 24:15) Amasyu ghake ghikunangisya ukuti tuli bakulondiwa fiyo kumyake nalinga tukwaghana nindamyo bo isi, ububine, ukusita kuya nindalama nubukangale.—Imbo. 10:34, 35.

7. Ngimba fifukwa filiku ifingi ifi fikutupangisya ukuya nulusubilo ulwakuti Yehova ikutuketa ukuti tuli bakulondiwa fiyo?

⁷ Tuli nififukwa fyingi ifi fikutupangisya ukuya nulusubilo ulwakuti Yehova ikutuketa ukuti tuli bakulondiwa fiyo. Umwene atutulile ukuti tuseghelele fiyo kumyake kangi aketile muno twabombile bo tupilike amasyu ghake amanunu. (Yoh. 6:44) Bo twandile ukuseghelela kwa Yehova, yope aseghelile kumyitu. (Yak. 4:8) Yehova ikumalila kangi akabalilo namaka ghake mwakutumanyisya, nukunangisya ukuti tuli bakulondiwa kumyake. Umwene atumenye kanunu muno tuyilile kangi namuno tubaghile ukukulila mwambepo. Yehova ikutupa ulufundo panongwa yakuti atughanile. (Mbu. 3:11, 12) Ubu buketi bunywamu fiyo ubwakuti Yehova ikutuketa ukuti tuli bakulondiwa fiyo kumyake!

8. Ngimba amasyu agha ghali pa Masalimo 18:27-29 ghikutupalamasya bulebule?

⁸ Bamo bikuketa ukuti Mwalafyale Davidi akali wakulondiwa loli umwene amenye ukuti Yehova alinganile kangi antulagha. Panongwa yakuti Davidi asimenye isi, syalintulile fiyo ukuti ifimbilisye kundamyo nukuya naminong’ono amanunu. (2 Samu. 16:5-7) Linga tutikwipilika kanunu, Yehova abaghile ukututula pabumi bwitu ukuti tumalane nindamyo. (Belenga Masalimo 18:27-29.) Nubutuli bwa Yehova, kikayapo ikindu iki kibaghile ukututolesya ukumbombela umwene mwalusekelo. (Rom. 8:31) Isagha tuyobesanie indamyo sitatu isi apa tukukumbukila ukuti Yehova atughanile kangi ikutuketa ukuti tuli bakulondiwa fiyo.

9. Ngimba ububine bubaghile ukutupalamasya bulebule?

⁹ Ububine bubaghile ukupalamasya aminong’ono ghitu kangi bubaghile ukutupangisya ukuti twiketeghe ukuti tukaya bakulondiwa. Tubaghile ukukosiwa isoni linga abandu bamo basimenye isi tukutoliwa ukubomba kangi linga tukusubila ubutuli ukufuma ku bandu abangi. Nalinga ukuti abangi bakabaghila ukumanya isya bubine bwitu, loli tubaghile  ukwanda ukutamiwa naminong’ono panongwa yakutoliwa ukufwanisya ukubomba ifindu fimo pabumi bwitu. Pakabalilo kandamyo aka, Yehova abaghile ukutukasya fiyo. Bulebule?

10. Ukufwana nilemba lya Isya Mbupingamu 12:25, ngimba findu fiki ifi fibaghile ukututula linga tubinile?

¹⁰ Linga tubinile, “amasyu gha ipyana” ghabaghile ukutukasya fiyo. (Belenga Isya Mbupingamu 12:25.) Yehova ikutubula ifindu fyingi ifinunu ifi fikutukumbusya ukuti twiketeghe ukuti tuli bakulondiwa fiyo kumyake nalinga tukwaghana nindamyo. (Sal. 31:19; 41:3) Linga tukubelenga amasyu gha Kyala nukwinong’onelapo, umwene ikuya pakututula ukuti tumalane naminong’ono amabibi agha ghikwisa panongwa ya bubine.

11. Ngimba unkamu yumo alyambilile bulebule ubutuli bwa Yehova?

¹¹ Inong’onela isi syalimbonekile Jorge. Undumyana Jorge alyaghiwe nimbungo iyi yampangisyagha ukuti iketeghe ukuti akaya wakulondiwa. Umwene atile, “Nginong’onelagha ukuti nayagha pakwaghana nindamyo iya bubine bo ubu pamo nukuya nisoni panongwa ya bubine. Bo ububine bwangu bufikile pabubibi fiyo, ninong’onagha isya muno ubumi bwangu bwayagha pakuchenjela. Nasulumenie fiyo, kangi nalinsumile Yehova ukuti andule.” Ngimba Yehova alintulile bulebule? “Panongwa yakuti natamiwagha ukupilikisya, nabelengagha amavesi manandi ukufuma mu buku ilya Masalimo ili likunangisya muno Yehova ikubatulila ababombi bake. Ngubelenga amavesi manandi isiku lililyosa kangi nguketa ukuti ghikunsubisya fiyo. Pabumalilo, abandu bamo balyandile ukuketa ukuti ndiwalusekelo. Abene bayobagha ukuti ulusekelo lwangu lwabakasisye fiyo. Nasyaghenie ukuti Yehova alyamwile inyiputo syangu! Umwene alindulile fiyo ukuti njenje muno niketelagha. Nalyandile ukukindilila ukuketa isi amasyu ghake ghikuyoba isya muno ikungetela nalinga ukuti nali mbine.”

12. Linga mukwaghana nindamyo iya bubine ngimba mubaghile ukubomba isyafiki ukuti Yehova abatule?

 ¹² Linga mukwaghana nindamyo iya bubine, mukulondiwa ukumanya ukuti Yehova ayimenye indamyo iyi muli nayo. Munsumeghe ukuti abatule ukuti mumalane nindamyo. Ukufuma apo mubelengeghe amasyu gha Yehova agha ghabaghile ukubasubisya. Mwinong’oneleghe fiyo amavesi agha ghikunangisya muno Yehova ikubaketela ababombi bake ukuti bakulondiwa fiyo. Linga mukubomba isi, mukuya pakuketa ukuti Yehova ali nikisa fiyo ku babombi bake abasubiliwa.—Sal. 84:11.

13. Ngimba unnyambala uyu imbombo yimmalikile abaghile ukwipilika bulebule?

¹³ Mumbumba yiliyosa unnyambala ali nubudindo ubwakulonda ifindu ifyakulondiwa mumbumba yake. Loli, unkamu uyu imbombo yibaghile ukummalikila nalinga ukuti akatulapo inongwa nayimo. Umwene abaghile ukwiyipa fiyo ukuti ayaghe imbombo iyingi lumo akabaghila ukuyagha. Linga aghene nindamyo bo iyi, abaghile ukwiketa ukuti akaya wakulondiwa. Ngimba ukwinong’onela fiyo isya lufingo lwa Yehova kubaghile ukuntula bulebule?

14. Nongwa yafiki Yehova ikufwanisya isi afingile?

¹⁴ Akabalilo kosa Yehova ikufwanisya ulufingo lwake. (Yos. 21:45; 23:14) Umwene ikubomba isi pafifukwa fyingi. Ikifukwa ikyakwanda kyo kyakuti, isi sikupalamasya fiyo ingamu yake kangi nakayilo kake. Yehova afingile ukuti ikuya pakubafighilila ababombi bake abasubiliwa, kangi umwene itendekisye ukufwanisya isi afingile. (Sal. 31:1-3) Mwakongelelapo, Yehova asimenye ukuti akabaghila ukwipilika kanunu linga atoliwe ukubafighilila ababombi bake. Umwene afingile ukuti ikuya pakutupa ifindu fyosa ifi tukulondiwa ifyakumbili nifyamwambepo, kangi kikayapo nakimo ikindu iki kibaghile  ukuntolesya ukufwanisya isi afingile!—Mat. 6:30-33; 24:45.

15. (a) Ngimba ndamyo yiliku iyi Abakristu abakunyuma balyaghene nayo? (b) Ngimba ilemba lya Masalimo 37:18, 19 likututula bulebule?

¹⁵ Linga tukukumbukila inongwa iyi Yehova ikufwanisya isi afingile, tubaghile ukuya nulusubilo ukuti ikuya pakututula linga twaghene nindamyo iya ndalama. Inong’onela isya kifwanikisyo kya Bakristu abakunyuma. Bo bandile ukufwimiwa ku Yerusalemu, “abatumiwa bosa balinkubalanila.” (Imbo. 8:1) Inong’onela isi syabombiwe. Abene balyaghene nindamyo iya ndalama! Abakristu balekile utwaya twabo na mabizinesi ghabo. Loli, Yehova akabalekile; kangi abene bakindilile ukuya nulusekelo. (Imbo. 8:4; Hib. 13:5, 6; Yak. 1:2, 3) Yehova abatulile ababombi bake abasubiliwa aba nkabalilo kakunyuma kangi ikuya pakututula nanuswe amasiku agha.—Belenga Masalimo 37:18, 19.

16. Ngimba findu fiki fibaghile ukutupangisya ukuti twinong’oneghe ukuti ukwiputa kwitu kwa Yehova kukaya kwakulondiwa?

¹⁶ Linga twandile ukukangala, tubaghile ukwinong’ona ukuti tukutoliwa ukubomba nyingi pakumbombela Yehova. Mwalafyale Davidi bo akangele, abaghile ukuti yope ipilikagha bo ulu. (Sal. 71:9) Ngimba Yehova abaghile ukututula bulebule?

17. Ngimba tukumanyilako isyafiki ku mulumbu Jheri?

¹⁷ Inong’onela isi umulumbu Jheri alyaghene nasyo. Umwene balinkolile ukuti akamanyile imbombo iyakutendekesya Inyumba sya Bunyafyale, loli akalondagha ukubuka. Umwene atile: “Ngangele, ndi mfwilwe, kangi ngamanya imbombo nayimo. Ngaya wakulondiwa.” Bo akali ukubuka, pakilo aliputile kwa Yehova. Bo afikile pa Nyumba ya Bunyafyale isiku ilyakukongapo, umwene alyandile ukukayikila linga naloli ayagha pakufwanisya. Bo ipologilamu yandile,  unjobi yumo atile ubumanyi bwitu ubwakwanda ko kwiyipa nukwitikisya ukumanyisiwa na Yehova. Jheri atile: “Ubumanyi ubu ndinabo!’ Nahobwike fiyo mwakumanya ukuti Yehova amwile ulwiputo lwangu. Umwene alindulile ukumanya ukuti nali nikindu kimo ikyakulondiwa fiyo kangi alondagha ukuti amanyisye!” Linga ikukumbukila isya kunyuma umwene ikuti: “Nali mogha fiyo, ngali namaka kangi nali monywa. Loli bo akabalilo kakindilepo nalyandile ukuya nulusubilo, nakasiwe fiyo kangi naketile ukuti nali wakulondiwa!”

18. Ngimba Ibaibolo likunangisya bulebule ukuti Yehova ikukindilila ukutuketa ukuti tuli bakulondiwa nalinga tukangele?

¹⁸ Linga tukangele, tusubileghe ukuti tubaghile ukukindilila ukumbombela Yehova. (Sal. 92:12-15) Yesu atumanyisye ukuti, ifindu ifi tukubomba kali fikuboneka ukuti fikaya fyakulondiwa loli Yehova ikufiketa ukuya fyakulondiwa fiyo. (Luka 21:2-4) Yonongwa yake tukulondiwa ukwiyipa fiyo mwakubomba syosa isi tubaghile ukufwanisya. Mwakifwanikisyo, tubaghile ukubomba isi linga tukufumusya isya Yehova, tukubiputila abakamu na balumbu bitu nukubakasya ukuti bakindilileghe ukuya basubiliwa. Yehova ikutuketa ukuya babombanisi ba mbombo yake, komma panongwa ya isi tukufwanisya ukubomba loli panongwa ya kwiyipa kwitu nukumpilikila.—1 Kor. 3:5-9

19. Ngimba ilemba lya Baroma 8:38, 39 likutukasya bulebule?

¹⁹ Tukundaghisya fiyo panongwa yakuti tukumwiputa Yehova, Kyala uyu ikubaketa bosa aba bikumbombela ukuti bakulondiwa fiyo! Umwene atupelile ukuti tubombeghe ubwighane bwake, kangi ukuyoba ubwanaloli linga tukumwiputa Kyala tukuya nulusekelo fiyo. (Ubuset. 4:11) Nalinga ukuti ikisu kibaghile ukutuketa ukuti tukaya bakulondiwa, loli Yehova mukaya momuno ikutuketela. (Hib. 11:16, 38) Linga tukuwa amaka panongwa ya bubine, ukusita kuya nindalama kangi nubukangale, tukumbukeghe ukuti kikayapo ikindu iki kibaghile ukutupaghula ku lughano lwa Tata witu uwakumwanya.—Belenga Baroma 8:38, 39.