1-2. Ngimba kindu kiliku ikyakuswighisya iki kyabombiwe pisiku ilya Pentekositi mu 33 C.E.?

PALI po pasabata nulubunju ku Yerusalemu. Nkyinja kya 33 C.E., kangi pali pisiku lya Pentekositi. Igulu lya bafundiwa abakufwana 120 babungene pampene nkipinda ikya pamwanya. (Imbo. 1:13-15; 2:1) Yesu ababulile ukuti bangasokangamo mu Yerusalemu, panongwa yakuti bayagha pakwambilila ikyabupe ikyapamwanya fiyo. (Imbo. 1:4, 5) Ngimba findu fiki fyayagha pakubombiwa?

² “Nakalinga itolo akogho kalinkufuma kumwanya, kalinkufwana kobela kwa mbelo unkulumba.” Kalinkwisula nnyumba yosa iyi batughelemo. Popapo balinkusibona isi syali bo si, “ndimi sya moto” syo silinkwitapulania silinkutughala pali bosa yumo yumo, bosa “balinkwisula mbepo mwikemo.” (Imbo. 2:2-4) Yehova abapele mbepo wake mwikemo Abakristu aba munjila iyakuswighisya fiyo. (Imbo. 1:8) Abene bo bali bakwanda ukupakiwa na mbepo mwikemo * nukupeliwa ulusubilo ulwakuti bakalaghileghe na Yesu kumwanya.

3. Nongwa yafiki bosa aba balipo pa Pentekositi bakakayikilagha ukuti bapakiwe na mbepo mwikemo?

³ Linga mwali yumo mwa bafundiwa aba babungene nkipinda  ikya pamwanya pisiku lila, mukayagha pakwibwa isi syabombiwe. Ikindu kimo iki kikuboneka bo ndimi sya moto kikwisa pamutu winu, kangi mukwanda ukuyoba injobelo isyakukindanakindana! (Imbo. 2:5 12) Mwayagha pakusubila ukuti mupakiwe naloli na mbepo mwikemo. Loli bosa aba bikupakiwa na mbepo mwikemo, ngimba sikubombiwa munjila iyakuswighisya kangi napakabalilo kamokene pabumi bwabo? Hayi. Ngimba tukumanya bulebule?

4. Ngimba bosa aba bapakiwe na mbepo mwikemo nkabalilo kakunyuma bapakiwe pakabalilo kamokene? Lingania.

⁴ Tukuya pakuyobesania isi sikubombiwa ukuti umundu apakiwe. Igulu lya Bakristu 120 bakali bene aba bapakiwe na mbepo mwikemo pa Pentekositi, 33 C.E. Bo akabalilo kakindilepo, abandu abangi abakufwana 3,000 bope balyambilile mbepo mwikemo. Bo bosiwe abene bapakiwe na mbepo mwikemo. (Imbo. 2:37, 38, 41) Loli ifyinja ifyakukongapo, bakali Bakristu bosa aba bapakiwagha na mbepo mwikemo pakabalilo aka bosiwagha. Utubalilo tumo Abasamaria bapakiwagha na mbepo mwikemo bo bosiwe. (Imbo. 8:14-17) Kangi ukupakiwa kwa Korneliyo na ba munyumba yake kwali kwakuswighisya fiyo panongwa yakuti abene bapakiwe bo bakali ukosiwa.—Imbo. 10:44-48.

5. Ukufwana na 2 Bakorinti 1:21, 22, ngimba findu fiki fikubombiwa linga umundu apakiwe na mbepo mwikemo?

⁵ Isagha tuyobesanie kangi isi sikubombiwa linga umundu apakiwe na mbepo mwikemo. Bamo aba bapakiwe kubaghile ukuya kukafu ukuti bitikisye ukuti Yehova abasalile. Abene babaghile ukwilalusya ukuti, ‘Nongwa yafiki Yehova ansalile une?’ Loli bamo bakabaghila ukwipilika bo ulu. Mulimosa muno sibaghile ukuyila, untumiwa Pauli alingenie isi sikubombiwa ku bosa aba bapakiwe umwene atile: “Mulinkumwitika Kristu, po Kyala alinkubapa ikikolekelo * kyake pamyinu apa abapagha umwe mbepo mwikemo uyu afingile ukubapa, umwene mbepo yuyuyu kyo kikole.” (Ef. 1:13, 14.) Yonongwa yake Yehova abombile mbepo wake mwikemo ukuti Abakristu aba  bamanye ukuti umwene yo abasalile. Munjila iyi, mbepo mwikemo kyo “kikole” iki abapele ukuti baye nulusubilo ulwakuti nkyeni bisakwikalagha nu bumi bwa bwila na bwila kumwanya komma pa kisu kyapasi.—Belenga 2 Bakorinti 1:21, 22.

6. Ngimba Unkristu umpakiwa ikulondiwa ukubomba isyafiki ukuti ambilile ikyabupe ikyakubuka kumwanya?

⁶ Linga Unkristu apakiwe, ngimba sikusanusya ukuti umwene ikuya pakubuka kumwanya kisita kutoliwa? Hayi. Umwene ikumanya ukufumila pasi pandumbula ukuti naloli ikuya pakubuka kumwanya. Loli ikulondiwa ukukumbukila ubulongosi ubu: “Mwe bamyitu amukindilileghe ukwiyula, ukwitoteka ndubilikilo lwinu, na mbusunguliwa bwinu namanga linga mukubomba sisisi po mutisakusokamo ndwitiko lwinu.” (2 Pet. 1:10) Yonongwa yake nalinga ukuti Unkristu umpakiwa asaliwe ukubuka kumwanya, umwene ikuya pakwambilila ikyabupe kyake pene linga ikukindilila ukuya nsubiliwa.—Filip. 3:12-14; Hib. 3:1; Ubuset. 2:10.

7. Ngimba abapakiwa bikumanya bulebule ukuti bikuya pakubuka kumwanya?

⁷ Ngimba umundu ikumanya bulebule ukuti ikuya pakubuka kumwanya? Ansala tukumwagha m’masyu gha Pauli agha abalembile abandu ba ku Roma aba “babilikiliwe ukuya bikemo.” Umwene ababulile ukuti: “Namanga mbepo uyu Kyala abapele umwe atikubapelela umwe ukuya batumwa nukubapelela ukuya nulutende umma, loli ikubapelela umwe ukuya bana, yo uyu tukukutilamo bo tukwiputa tukuti: ‘Abba, Tata!’ Yo yu mbepo uyu ikusisimikisya pamopene nimbepo syitu ukuti tuli bana ba Kyala.” (Rom. 1:7; 8:15, 16) Yonongwa yake ukwendela mwambepo wake mwikemo, Kyala ikunangisya ukuti abapakiwa bikuya pakubuka kumwanya.—1 Tes. 2:12.

8. Ngimba pa 1 Yohani 2:20, 27 pikunangisya bulebule ukuti abapakiwa batikulondiwa ukuti abandu bamo babasimikisyile ukuti bapakiwe?

⁸ Yehova atikukayikila isi sili mundumbula namunyinong’ono sya bosa aba bambilile ikyabupe ikyakubuka kumwanya. (Belenga 1 Yohani 2:20, 27.) Momumo ukuti, Abakristu abapakiwa bikulondiwa ukumanyisiwa na Yehova ukwendela nkipanga ukufwana itolo na aliwesa. Loli abene batikulondiwa ukuti umundu yumo abasimikisyile ukuti bapakiwe. Yehova ikubombela amaka ghake pa kisu kyosa ikyapasi, mbepo wake mwikemo, ukunangisya ukuti bapakiwe!

9. Linga umundu yumo apakiwe, ngimba ikuchenja ifindu ifiki, ukufwana nilemba lya Baefesi 1:18?

⁹ Kukuya kukafu fiyo amasiku agha ku babombi ba Yehova ukupilikisya isi sikubombiwa ku mundu yumo linga Kyala ampakile na mbepo mwikemo. Isi syakupilikiwa panongwa yakuti abene bakapakiwamo. Kyala abapelile abandu ukuti bikaleghe pa kisu kyapasi kwa bwila na bwila komma kumwanya. (Bwa. 1:28; Sal. 37:29) Loli Yehova abasalile bamo ukuti bakikaleghe kumwanya. Yonongwa yake linga abapakile, mwanakalinga ulusubilo lwabo namuno bikwinong’onela fikuchenja ukuti binong’oneleghe isya bumi bwa kumwanya.—Belenga Baefesi 1:18.

10. Ngimba “ukupapiwa kangi” sikusanusya isyafiki? (Keta amasyu gha pasi.)

¹⁰ Linga Abakristu bapakiwe na mbepo mwikemo, abene “bikupapiwa kangi.” * Yesu yope ayobile ukuti sikabaghila ukubombiwa ukundingania umundu yumo uyu akapakiwa muno sikuyila linga umundu “apapiwe kangi,” pamo apapiwe mwambepo.”—Yoh. 3:3-8.

11. Lingania muno umundu ikwinong’onela linga apakiwe.

 ¹¹ Ngimba Abakristu bikwanda ukwinong’ona bulebule munjila iyingi? Bo Yehova akali ukubapaka Abakristu aba, abene bali nulusubilo ulwakwisakwikala pa kisu kya pasi kwa bwila na bwila. Baghulilagha nindumbula yosa akabalilo aka Yehova ikwisa pakupangisya ikisu ukuya paladaiso nukusosyapo ifindu ifibibi. Lumo binong’onagha muno bisakubambililagha abakamu babo pamo abamanyani babo aba bafwile. Loli bo bapakiwe na mbepo mwikemo, abene balyandile ukwinong’ona munjila iyingi. Nongwa yafiki sili bo ulu? Panongwa yakuti bakinong’onagha ukuti ukwikala pa kisu kyapasi kwa bwila na bwila kukali kununu fiyo. Abene bakachenjile aminong’ono ghabo panongwa yakuti baghanagha nindamyo. Kangi bakinong’onelagha ukuti ukwikala pa kisu kya pasi kwa bwila na bwila kutikuhobosya. M’malo mwake, Yehova abombile mbepo wake mwikemo ukuti bachenje muno binong’onelagha kangi nulusubilo ulu bali nalo.

12. Ukufwana na 1 Peteri 1:3, 4, ngimba abapakiwa bikwipilika bulebule isyakufwana nulusubilo lwabo?

¹² Umundu uyu apakiwe abaghile ukuketa ukuti akaya wakulondiwa ukwambilila ikyabupe kyapamwanya iki. Loli umwene atikukayikila napanandi ukuti Yehova ansalile. Umwene ikuya walusekelo kangi ikundaghisya linga ikwinong’onela isya lusubilo ulwa kubuka kumwanya.—Belenga 1 Peteri 1:3, 4.

13. Ngimba abapakiwa bikwinong’onela bulebule isya bumi bwabo pa kisu kyapasi iki?

¹³ Loli ngimba isi sikusanusya ukuti abapakiwa bikulonda ukufwa? Untumiwa Pauli alyamwile ilalusyo ili. Umwene afwanikisye umbili wa bandu nihema: “Namanga bo tukali tuli muhema yiyiyi tukwikema munda bo tutimbikiliwe, papo tukighana ukuti tufuliweghe, loli twighanile ukufwikiwa, ukuti aka kufwa kanduliweghe nu bumi.” (2 Kor. 5:4) Abakristu aba batikukatala nu bumi bwa pa kisu kyapasi ukuti bafwe mwanakalinga. Mwakukindana na isi, abene bikuhoboka nu bumi kangi akabalilo kosa bikumbombela Yehova nimbumba syabo kangi nabamanyani babo. Mulimosa muno babaghile ukubombela, akabalilo kosa abene bikwinong’onela isya lusubilo lwabo ulwa nkyeni.—1 Kor. 15:53; 2 Pet. 1:4; 1 Yoh. 3:2, 3; Ubuset. 20:6.

14. Ngimba findu fiki ifi fitikunangisya ukuti umundu apakiwe na mbepo mwikemo?

¹⁴ Lumo mukukayikila linga naloli mupakiwe na mbepo mwikemo. Linga mo siyilile amwinong’onele amalalusyo aghakulondiwa fiyo agha: Ngimba muli nubwighane ubwakumbombela Yehova? Ngimba mukuketa ukuti mukwiyipa fiyo pambombo iyakufumusya? Ngimba mukuhoboka ukumanyila amasyu gha Kyala ukuti mumanye “ukufyenesya fyosa nifya mbusolofu bwa Kyala”? (1 Kor. 2:10) Ngimba mukuketa ukuti Yehova abapele ifindu ifinunu panongwa yakwiyipa kwinu pambombo iyakufumusya? Ngimba mukuketa ukuti muli nubudindo ubunywamu ubwakubatula abangi ukuti bamanyile isya Yehova? Ngimba muli nubuketi ubwakuti Yehova ikubatula munjila isyakukindanakindana pabumi bwinu? Linga mwamwile ukuti ena pa malalusyo ghosa agha, ngimba sikunangisya ukuti mukuya pakubuka kumwanya? Hayi, sikaya bo ulu. Nongwa yafiki? Panongwa yakuti ababombi bosa ba Kyala babaghile ukwipilika bo ulu, kali bapakiwe pamo hayi. Kangi ukwendela mwambepo mwikemo, Yehova abaghile ukubatula ababombi bake ukubomba isi kisita kwinong’onelako isya lusubilo lwabo. Ukuyoba ubwanaloli linga mukukayikila ukuti mupakiwe na mbepo mwikemo, kokuti sikunangisya ukuti  mukapakiwa. Bosa aba basalile na Yehova batikukayikila linga bapakiwe pamo hayi! Abene bikumanya naloli ukuti bapakiwe!

15. Ngimba tukumanya bulebule ukuti bakaya bosa aba bambilile mbepo mwikemo wa Kyala basaliwe ukubuka kumwanya?

¹⁵ Mu Baibolo, muli ififwanikisyo fingi ifya banyambala abasubiliwa aba balyambilile mbepo mwikemo; loli abene bakali nulusubilo ulwakubuka kumwanya. Davidi alongosiwagha na mbepo mwikemo. (1 Samu. 16:13) Mbepo mwikemo walintulile ukupilikisya kanunu ifindu ifi Yehova ikulonda kangi walintulile ukulemba ikighaba kimo ikya mu Baibolo. (Marko 12:36) Nalinga syali bo ulu, untumiwa Peteri atile Davidi ‘akafyukile kumwanya.’ (Imbo. 2:34) Yohani Umosi “aliswile na mbepo mwikemo.” (Luka 1:13-16) Yesu ayobile ukuti akabonekamo nayumo unkulumba ukunkinda Yohani, loli atile Yohani akali kulubafu lwa Bunyafyale ubwa kumwanya. (Mat. 11:10, 11) Yehova abapele mbepo wake mwikemo abanyambala aba ukuti babombe ifindu ifyakuswighisya, loli akabasalile ukuti bakikaleghe kumwanya. Ngimba isi sikusanusya ukuti bakali nulwitiko ulwamaka ukukinda aba basaliwe ukuti bakalaghileghe kumwanya? Hayi. Yehova isakubasyusya mu Paladaiso pa kisu kyapasi.—Yoh. 5:28, 29; Imbo. 24:15.

16. Ngimba kyabupe kiliku iki ababombi ba Kyala bingi bikughulila amasiku agha?

¹⁶ Amasiku agha ababombi ba Yehova bingi bakaya nulusubilo ulwakwisakwikala kumwanya. Bo Abrahamu, Sara, Davidi, Yohani Umosi, kangi nabanyambala na bakikulu bingi aba nkabalilo kakunyuma, bikughulila ukwisakwikala pa kisu kyapasi linga Ubunyafyale bwa Kyala bwandile ukulaghila.—Hib. 11:10.

17. Ngimba malalusyo ghaliku agha tukwisa pakuyobesania?

¹⁷ Amasiku agha abapakiwa bakali bikwaghiwa pakati pa babombi ba Kyala, yonongwa yake tubaghile ukuya na malalusyo. (Ubuset. 12:17) Mwakifwanikisyo, ngimba abapakiwa, bikulondiwa ukukwiketa bulebule? Linga umundu yumo nkipanga kyinu andile ukulya nukunwa ifimanyikilo pakukumbukila inifwa ya Yesu, ngimba tukulondiwa ukubomba nawe bulebule? Bule linga ubwingi bwa nambala ya aba bikulya nukunwa yikukindilila ukubala, ngimba tukulondiwa ukupasya na isi? Tukwisa pakwamula amalalusyo agha mu nkhani iyakukongapo.