INKHANI IYAKUMANYILA 4
Yehova Ikutusaya Linga Tukwaghiwapo Pakukumbukila Inifwa ya Yesu
“Bo mubombeghe bunobuno ukungumbukilamo une.”—LUKA 22:19.
ULWIMBO 19 Mugonero wa Fumu
ISI TUKUYA PAKUMANYILA a
1-2. Nongwa yafiki tukukumbukila inifwa ya Yesu ikyinja kilikyosa?
PABAGHILE ukuti pakindile ifyinja 2,000 ukufuma apa Yesu atufwilile, isi syapangisye ukuti tusafwanisye ukubwagha ubumi bwa bwila na bwila. Ikilo ikyakuti kilabo ikuya pakufwa, Yesu ababulile abafundiwa bake ukuti bakumbukileghe ulughano ulu abanangisye mwakubomba ikyakubombiwa ikipepe iki kikongelelapo ikisyesye nikinwelo.—1 Kor. 11:23-26.
2 Tukupilikila ululaghilo lwa Yesu panongwa yakuti tunganile fiyo. (Yoh. 14:15) Ikyinja kilikyosa bo tukali kangi tukumbukile inifwa ya Yesu, tukunangisya ukundaghisya pa isi atubombile mwakuya nakabalilo akakwinong’onela nukwiputa isyakufwana na isi inifwa yake yikusanusya ku bandu. Kangi tukuhoboka fiyo ukubomba nyingi mubufumusi, nukubakasya abandu bingi ukuti tusaye nabo pakyakubombiwa ikya padela iki. Bwanaloli ukuti tukukasiwa ukuti tungitikisyagha kilikyosa ukuti kitutolesye ukwaghiwapo pakukumbukila inifwa ya Yesu.
3. Ngimba tukuya pakuyobesania isyafiki mu nkhani iyi?
3 Mu nkhani iyi, tukuya pakuyobesania injila sitatu isi ababombi ba Yehova bikwiyipa ukubomba ukuti bakumbukile inifwa ya Yesu: (1) mwakubomba ukufwana namuno Yesu abamanyisyile, (2) mwakubakolela abangi (3) mwakwaghiwapo nalinga ukuti bikwaghana ni ndamyo.
MWAKUBOMBA UKUFWANA NA MUNO YESU ABAMANYISYILE
4. Ngimba fundo siliku isi tukumanyila linga tukukumbukila inifwa ya Yesu, kangi nongwa yafiki kwakulondiwa ukumanya ifundo isi? (Luka 22:19, 20)
4 Ikyinja kilikyosa linga tukukumbukila inifwa ya Yesu, tukupilikisya ku nkhani ya mu Baibolo iyi yikwamula kanunu amalalusyo mingi. Tukumanyila inongwa iyi abandu bikulondiwa ikemo namuno inifwa ya mundu yumoywene yibaghile ukuhomba ubutulanongwa bwa bandu bingi. Tukukumbusiwa isi ikisyesye nikinwelo fikwimila kangi na aba bikulya nukunwa. (Belenga Luka 22:19, 20.) Kangi tukwinong’onela isya bumi ubununu ubwa nkyeni ubwa bandu aba bali nulusubilo ulwa kwisakwikala pa kisu kwa bwila na bwila. (Yes. 35:5, 6; 65:17, 21-23) Tutikulondiwa ukwibwa ifundo iyakulondiwa fiyo iyi. Abandu bingi batikupilikisya kangi batikundaghisya ukulondiwa kwa ikemo lya Yesu. Kangi abene batikukumbukila inifwa ya Yesu ukufwana namuno umwene abamanyisyile abafundiwa bake. Nongwa yafiki sili bo ulu?
5. Bo abafundiwa ba Yesu bingi bafwile, ngimba abandu bakumbukilagha bulebule inifwa yake?
5 Bo abafundiwa ba Yesu bingi bafwile itolo, Abakristu babutungulu balyandile ukwingila nkipanga. (Mat. 13:24-27, 37-39) Abene bayobagha ‘iniongafu nukubakwaba abafundiwa ukuti babakongeghe babo.’ (Imbo. 20:29, 30) Fimo mwa fimanyisyo “ifiniongafu” ifi abakristu babutungulu aba balyandile ukumanyisya yali fundo yakuti Yesu akabikile ubumi bwake “kamokene itolo ukuti abusosyepo ubutulanongwa bwa bingi” bo muno Ibaibolo likuyobela, loli ukuti ikemo lyake lyalondiwagha ukubikiwa mwakwandisania. (Hib. 9:27, 28) Amasiku agha, abandu bingi bikusubila ikimanyisyo ikyabutungulu iki. Utubalilo twingi bikwaghana mu matchalichi ukuti bakumbukile inifwa ya Yesu iyi mu tchalichi lya Katolika bikuyiyoba ukuti “ikemo lya Misa.” b Abandu mu matchalichi aghangi bikukumbukila inifwa ya Yesu utubalilo twingi loli abalongosi babo batikupilikisya kanunu isi ikemo lya Yesu likusanusya. Bamo bikwilalusya ukuti, ‘Ngimba inifwa ya Yesu yibaghile ukundula naloli ukuti ubutulanongwa bwangu buhobokeliwe?’ Nongwa yafiki bikulalusya ilalusyo ili? Panongwa yakuti abene bikusofanisiwa na bandu aba bikuyoba ukuti tukabaghila ukuhobokeliwa ubutulanongwa panongwa yakuti Yesu atufwilile. Ngimba abafundiwa ba Yesu bikuyiketa bulebule ifundo iyi?
6. Ukufika mu 1872, ngimba akagulu ka bamanyili ba Baibolo kapilikisye ifundo yiliku?
6 Mfyinja fya mma 1900, akagulu ka bamanyili ba Baibolo aka kalongosiwagha na Charles Taze Russell kalyandile ukufufuza kanunu Amalemba. Abene balondagha ukumanya isi ikemo lya Yesu lyasanusyagha na muno babaghile ukubombela pakukumbukila inifwa yake. Ukufika mu 1872, bapilikisye ifundo sya mu Baibolo kangi basyaghile ukuti Yesu abikile naloli ikemo ukuti abatabule abandu. Abene bakafisile ifundo isi basyaghile. Mmalo mwake, bababulile abangi ukwendela mmabuku, mu nyuzipepala na mmagazini. Ukufuma apo, balyandile ukubakonga Abakristu ba kunyuma, mwakubungana kamokene pa kyinja ukuti bakumbukile inifwa ya Yesu.
7. Ngimba tukusayiwa bulebule panongwa ya isi abamanyili ba Baibolo ba kunyuma bafufuzile?
7 Amasiku agha, tukusayiwa fiyo panongwa ya isi abamanyili ba Baibolo bakunyuma bafufuzile. Bulebule? Yehova atutulile ukupilikisya kanunu isi ikemo lya Yesu likusanusya na muno lisakututulila uswe na bandu bosa. (1 Yoh. 2:1, 2) Tumanyile kangi ukuti Ibaibolo likulingania ulusubilo lubili ulu abandu aba bikunhobosya Kyala bali nalo—bamo bisakwambilila ubumi ubusita kufwa kumwanya abangi bisakwikala nu bumi kwa bwila na bwila pa kisu kyapasi. Tukuseghelela fiyo kwa Yehova linga tukwinong’onela muno atughanile kangi namuno ikemo lya Yesu likuntulila umundu aliwesa. (1 Pet. 3:18; 1 Yoh. 4:9) Yonongwa yake mwakufwana itolo na Bakristu abasubiliwa bakunyuma, tukubakolela abangi ukuti tusakumbukile nabo inifwa ya Yesu ukufwana na muno ababulile abafundiwa bake.
TUKUBAKOLELA ABANGI PAKUKUMBUKILA INIFWA YA YESU
Ngimba tukulondiwa ukubomba isyafiki ukuti tufwanisye pakubakolela abandu pakukumbukila inifwa ya Yesu? (Keta amapalagilafu 8-10) e
8. Ngimba ababombi ba Yehova babombile isyafiki ukuti babakoleleghe abandu pakukumbukila inifwa ya Yesu? (Keta ikithuzi.)
8 Kwa fyinja fingi ababombi ba Yehova bikubakolela abandu pakukumbukila inifwa ya Yesu. Ukwanda mu 1881, abakamu na balumbu ku United States babungene pampene ku nyumba ya nkamu ku Allegheny, Pennsylvania, ukuti babombe ikyakubombiwa kyapadela iki. Ukufuma apo, ikipanga kilikyosa kikukumbukila inifwa ya Yesu. Mu Malichi 1940, abafumusi babuliwe ukuti babaghile ukunkolela umundu aliwesa nkighaba kyabo uyu ikulonda ukuti akaghiwepo. Mu 1960, pakabalilo akakwanda, Ofesi yapulintile utumapepala utwakubakolela abandu pakukumbukila inifwa ya Yesu nukutuma ku fipanga. Ukufuma pakabalilo kala, tukubayabila abandu utumapepala twingi utwakubakolela pakukumbukila inifwa ya Yesu. Nongwa yafiki tukwiyipa fiyo ukubakolela abandu?
9-10. Ngimba bo banani aba bikusayiwa linga tukwiyipa ukubakolela abangi pakukumbukila inifwa ya Yesu? (Yohani 3:16)
9 Ikifukwa kimo iki tukubakolela abandu ukuti basaghiwepo pakukumbukila inifwa ya Yesu kyo kyakuti tukulonda ukuti bosa aba balyaghiwepo akakwanda basamanyile isi Yehova na Yesu batubombile twesa. (Belenga Yohani 3:16.) Tuli nulusubilo ukuti isi bisakuketa nukupilika pakyakubombiwa iki sisakubakasya ukuti bamanyile nyingi nukuya babombi ba Yehova. Loli balipo abangi aba bikusayiwa.
10 Tukubakolela kangi aba balekile ukumbombela Yehova. Tukubomba isi mwakubakumbusya ukuti Kyala akali abaghanile. Bingi bikwitika linga tubakolile kangi tukuhoboka fiyo linga bisile. Ukwaghiwapo pakukumbukila inifwa ya Yesu kukubakumbusya muno bahobokelagha pakumbombela Yehova kunyuma. Inong’onela ikifwanikisyo kya Monica. c Pakabalilo ka mbungo ya COVID-19 umwene iyipagha fiyo pakufumusya. Bo aghiwepo pakukumbukila inifwa ya Yesu mu 2021, umwene atile: “Ikyakubombiwa iki kyakulondiwa fiyo kumyangu. Kwa fyinja 20, ngubafumukisya abandu nukubakolela ukuti basaghiwepo pakukumbukila inifwa ya Yesu. Ngughelaghela ukubomba kilikyosa ukuti mbakolele panongwa yakuti ngundaghisya isi Yehova na Yesu bambombile.” (Sal. 103:1-4) Kali abandu bikwitika linga tukubafumukisya pamo hayi, loli tukughelaghela fiyo ukubakolela pakukumbukila inifwa ya Yesu panongwa yakuti tukumanya ukuti Yehova ikundaghisya ukwiyipa kwitu.
11. Ngimba Yehova ikutusaya bulebule linga tukwiyipa pakubakolela abandu pakukumbukila inifwa ya Yesu? (Hagai 2:7)
11 Yehova ikutusaya fiyo linga tukwiyipa pakubakolela abandu pakukumbukila inifwa ya Yesu. Nalinga ukuti mu 2021, batukanisye ukubomba ifindu fimo panongwa ya mbungo ya COVID-19, loli abandu abakufwana 21,367,603 balyaghiwepo pakukumbukila inifwa ya Yesu. Inambala iyi nywamu fiyo ukongelela kabili na hafu panambala ya Baketi ba Yehova pa kisu kyosa. Bwanaloli ukuti Yehova atikwinong’onela isya bwingi bwa bandu aba bikwaghiwapo. Loli umwene ikuhoboka fiyo nu mundu aliwesa uyu ikwaghiwapo. (Luka 15:7; 1 Tim. 2:3, 4) Tuli nulusubilo losa ukuti linga tukubapa abandu utumapepala utwakubakolela pakukumbukila inifwa ya Yesu, Yehova ikututula ukuti tubaghe abandu aba bali nindumbula inunu.—Belenga Hagayi 2:7.
TUKUKUMBUKILA INIFWA YA YESU NALINGA UKUTI TUKWAGHANA NI NDAMYO
Yehova ikutusaya panongwa yakwiyipa kwitu ukuti tukumbukile inifwa ya Yesu (Keta ipalagilafu 12) f
12. Ngimba findu fiki fibaghile ukupangisya ukuti kuyeghe kukafu ukwaghiwapo pakukumbukila inifwa ya Yesu? (Keta ikithuzi.)
12 Yesu ayobile ngani ukuti mmasiku ghakubumalikisyo, twisakwaghanagha ni ndamyo nyingi bo—ukususiwa na ba mumbumba, ukufwimiwa, ubwite, imbungo imbela filalilali ni ndamyo isingi. (Mat. 10:36; Mar. 13:9; Luka 21:10, 11) Utubalilo tumo, indamyo isi sikutupangisya ukuti kuyeghe kukafu ukwaghiwapo pakukumbukila inifwa ya Yesu. Ngimba abakamu na balumbu bitu bikubomba isyafiki ukuti balimbane ni ndamyo isi kangi Yehova ikubatula bulebule?
13. Ngimba Yehova alinsayile bulebule Artem panongwa yakunangisya ubukifu ukuti akumbukile inifwa ya Yesu bo ali mu jele?
13 Linga batupinyile mu jele. Abakamu na balumbu bitu aba bali mu jele panongwa ya lwitiko lwabo, bikubomba syosa isi babaghile ukufwanisya ukuti bakumbukile inifwa ya Yesu. Inong’onela ikifwanikisyo kya Artem. Mu 2020 pakabalilo kakukumbukila inifwa ya Yesu, umwene balimbikile mu jele iya mamita 17 (amafiti 183) muno mwali abandu 5. Nalinga ukuti ali mu jele, umwene afwanisye ukufyagha ifindu ifyakuti abombele pakukumbukila inifwa ya Yesu, kangi apangile imbatiko iyakuti iyobele mwene inkhani. Loli abandu aba bali mu jele bakwesagha ingambo kangi bayobagha amasyu amabibi. Ngimba abombile isyafiki? Umwene abasumile linga babaghile ukuleka ukuyoba amasyu amabibi nukukwesa ingambo kwa awala yimoyene. Artem aswighile fiyo bo abandu aba bitike nukuleka ukusofania pakabalilo kakukumbukila inifwa ya Yesu. Artem atile, “Nabasumile ukuti mbabule isyakufwana nikyakubombiwa iki.” Nalinga ukuti bayobile ukuti batikulonda ukupilikisya, loli bo bambwene Artem ikubomba, abene balindalusisye nyingi.
14. Ngimba ababombi ba Yehova bafwanisye bulebule ukukumbukila inifwa ya Yesu nalinga ukuti kwali imbungo ya COVID-19?
14 Pakabalilo kambungo ya COVID-19. Panongwa ya mbungo iyi kwali kukafu ukuti ababombi ba Yehova bakumbukile inifwa ya Yesu maso na maso. Loli isi sikapangisye ukuti batoliwe ukukumbukila. d Ifipanga ifi fyali nulusako lwa intaneti fyakumbukile inifwa ya Yesu ukwendela pa vidiyokofelensi. Loli ngimba abandu bingi aba bakali nulusako lwa intaneti babombile bulebule? Mfisu fimo amaofesi ghapangile imbatiko ukuti abandu baketelele inkhani pa TV pamo ukupilikisya pa lediyo. Mwakongelelapo, amaofesi ghajambwile inkhani munjobelo isyakukinda 500 ukuti abandu aba bali ntwaya bafwanisye ukupilikisya. Kangi abakamu bapangile imbatiko iyakuti batume inkhani isi syajambuliwe ku malo agha kwalondiwagha ubutuli.
15. Ngimba mukumanyilako isyafiki ku mmanyili wa Baibolo uyu ingamu yake yo Sue?
15 Linga tukususiwa na ba mumbumba. Bamo kukuya kukafu fiyo ukwaghiwapo pakukumbukila inifwa ya Yesu panongwa yakususiwa na ba mumbumba yabo. Inong’onela ikifwanikisyo kya mmanyili wa Baibolo yumo uyu ingamu yake yo Sue. Mu 2021, bo isiku lya kukumbukila inifwa ya Yesu likali ukufika, Sue alimbulile ummanyisi wake wa Baibolo ukuti panongwa yakuti abandu ba mumbumba yake bikunsusya, atisakufwanisya ukwaghiwapo. Ummanyisi wake wa Baibolo alimbelengile ilemba lya Luka 22:44. Kangi alingenie ukuti linga twaghene ni ndamyo tukulondiwa ukukonga ikifwanikisyo kya Yesu mwakumbula Yehova ndwiputo nukunsubila fiyo. Isiku ilyakukongapo, Sue atendekisye ikisyesye nikinwelo nukuketelela ipulogilamu ya kwiputa kwa nulubunju pa jw.org. Namayolo bo ali mwene kukipinda kyake, alyandile ukupilikisya ikyakubombiwa ikyakukumbukila inifwa ya Yesu pa foni yake. Ukufuma apo, Sue alimbulile ummanyisi wake wa Baibolo ukuti: “Walingasisye fiyo mmayolo. Nabombile kilikyosa ukuti mfwanisye ukwaghiwapo pakukumbukila inifwa ya Yesu kangi Yehova alindulile. Ndiwalusekelo kangi ngundaghisya fiyo.” Ngimba mukwinong’ona ukuti Yehova abaghile ukubatula linga mwaghene ni ndamyo iyakufwana itolo?
16. Nongwa yafiki tuli nulusubilo ukuti Yehova ikuya pakutusaya panongwa yakwiyipa kwitu ukuti tusaghiwepo pakukumbukila inifwa ya Yesu? (Baroma 8:31, 32)
16 Yehova ikundaghisya fiyo ukwiyipa kwitu linga tukwaghiwapo pakukumbukila inifwa ya Yesu. Tuli nulusubilo losa ukuti umwene ikuya pakutusaya linga tukundaghisya pa isi atubombile. (Belenga Baroma 8:31, 32.) Isagha tughelegheleghe ukuti tusaghiwepo pakukumbukila inifwa ya Yesu ikyinja iki nukubomba kilikyosa iki tubaghile ukufwanisya ukuti tusiyipe pakufumusya pakabalilo kakukumbukila inifwa ya Yesu.
ULWIMBO 18 Kuwonga Sembe Yakuwombora
a Pakibili, Epulelo 4, 2023, abandu bingi pa kisu kyosa bisakukumbukila inifwa ya Kristu. Bingi kisakuya kakwanda ukwaghiwapo. Bamo aba balekile ukumbombela Yehova kangi bakalyaghiwepo pakukumbukila inifwa ya Yesu kwa fyinja fingi, bisakwaghiwapo. Bamo bikwaghana ni ndamyo isi sikubapangisya ukuti kuye kukafu ukwaghiwapo loli bisakughelaghela ukuti basaghiwepo. Kisita kwinong’onela isi mukwaghana nasyo pa bumi bwinu, mubaghile ukuya nulusubilo ukuti Yehova isakuhoboka fiyo linga mwisakughelaghela ukuti musaghiwepo.
b Abandu bingi bikusubila ukuti pakabalilo kakukumbukila inifwa ya Yesu, ikisyesye nikinwelo fikuchenja nukuya mbili kangi ilopa lya Kristu. Abene bikwinong’ona ukuti, umbili nilopa lya Yesu fikubikiwa akabalilo kosa aka linga umundu ikweghapo ikighaba pakyakubombiwa iki.
c Ingamu simo sichenjile.
d Keta kangi pa jw.org inkhani isyakuti “Kukumbukira Nyifwa ya Khristu mu 2021.”
