Ngimba Mukubaketa Abakikulu bo Muno Yehova Ikubaketela?
TULI nulusako ulunywamu fiyo ulwakumbombela Yehova pampene nabakikulu bingi abasubiliwa. Tubaghanile kangi tukundaghisya umulumbu aliwesa pamwene panongwa ya busubiliwa nukwiyipa kwabo. a Yonongwa yake abakamu bikulondiwa ukubabombela ifindu mwakisa, mbugholofu na mwalughindiko. Loli panongwa yakuti tuli basitabugholofu, utubalilo tumo kubaghile ukuya kukafu ukubomba isi. Abakamu bamo bikwaghana nindamyo simo.
Bingi bakulile munyiho isi abanyambala bingi bikubaketa abakikulu ukuti bakaya bakulondiwa. Mwakifwanikisyo, Hans, uwakwendela idela uwa ku Bolivia, atile: “Abandu bamo bakulile munyiho isi sikubakasya abanyambala ukuti biketeghe ukuya bakulondiwa fiyo. Abanyambala aba bikusubila ukuti abene bakulondiwa fiyo ukukinda abakikulu kangi utubalilo twingi batikubabombela ifindu mwalughindiko.” Shengxian, unkulumba wakipanga ku Taiwan, atile: “Kuno ngwikala abanyambala bikuketa ukuti abakikulu batikulondiwa ukuyobapo aminong’ono ghabo pankhani ya bizinesi. Linga unnyambala akolelene naminong’ono gha nkasi wake pankhani simo, abinake bakabaghila ukungindika.” Abanyambala bamo bikubasala abakikulu munjila isingi. Mwakifwanikisyo, abene babaghile ukubayobela abakikulu amasyu amabibi.
Syakuhobosya ukumanya ukuti akayapo umundu uyu ikukonga inyiho isya kuno akulile. Umwene abaghile ukumasya aminong’ono aghakuti abanyambala bo bakulondiwa fiyo ukukinda abakikulu. (Ef. 4:22-24) Isi sibaghile ukubombiwa linga bikukonga ikifwanikisyo kya Yehova. Munkhani iyi, tukuya pakuyobesania muno Yehova ikubaketela abakikulu, muno abakamu babaghile ukubombela ukuti babaketeghe abakikulu bo muno Yehova ikubaketela kangi na isi abakulumba bakipanga babaghile ukubomba ukuti babanangisyeghe ulughindiko abalumbu.
NGIMBA YEHOVA IKUBAKETA BULEBULE ABAKIKULU?
Yehova ikunangisya ikifwanikisyo ikinunu ikya muno ikubaketela abakikulu. Pakuya yo Tata wakisa, umwene abaghanile fiyo abanake bosa. (Yoh. 3:16) Kangi abalumbu abasubiliwa bikufwana banake abakulondiwa fiyo. Inong’onela injila isi Yehova ikunangisya ukuti abaghanile kangi ikubaghindika abakikulu.
Ikubabombela ifindu kisita kusala. Yehova abapelile abanyambala nabakikulu nkifwani kyake. (Bwa. 1:27) Umwene akabapelile abanyambala ukuya bamahala fiyo pamo namaluso ukukinda abakikulu kangi atikuketa ukuti abanyambala bo bakulondiwa fiyo ukukinda abakikulu. (2 Syambu. 19:7) Yehova abapelile abanyambala na bakikulu ukuti baye namaluso aghakufwana itolo ukuti bapilikisyeghe kanunu ubwanaloli bwa mu Baibolo nukukonga utuyilo twake utununu. Kangi umwene ikubandaghisya abanyambala na bakikulu aba bali nulwitiko mmyake. Abapele bosa ulusubilo ulwakwisakwikala kwa bwila na bwila pakisu pamo ulusubilo ulwakuya banyafyale kangi baputi kumwanya. (2 Pet. 1:1.) Ukuyoba ubwanaloli, Yehova ikubabombela ifindu abakikulu kisita kusala.
Ikubapilikisya. Yehova ikumanya muno abakikulu bikwipilikila kangi nindamyo isi bikwaghana nasyo. Mwakifwanikisyo, apilikisye nukwamula inyiputo sya Rakeli na Hana. (Bwa. 30:22; 1 Samu. 1:10, 11, 19, 20) Yehova ababulile kangi abalembi ba Baibolo ukuti balembe inkhani sya banyambala aba babapilikisyagha abakikulu. Mwakifwanikisyo, Abrahamu akongile ubulongosi bwa Yehova ubwakuti apilikisye ku nkasi wake Sara. (Bwa. 21:12-14) Umwalafyale Davidi apilikisye kwa Abigelo. Kangi aketagha ukuti Yehova yo antumile ukuti ayobesanie nawe. (1 Samu. 25:32-35) Yesu uyu akongagha utuyilo twa Tata wake, apilikisyagha kwa mama wake, Maria. (Yoh. 2:3-10) Ififwanikisyo ifi fikunangisya ukuti injila yimo iyi Yehova ikunangisyila ulughindiko ku bakikulu ko kubapilikisya.
Ikubasubila. Mwakifwanikisyo, alimbulile Eva ukuti akipweleleleghe ikisu. (Bwa. 1:28) Umwene abombile isi komma ukuti anangisye ukuti umwene akali wakulondiwa ukukinda undume wake Adamu loli ukuya ntuli wa ndume wake. Kangi Yehova alimbulile Debora na Huluda ukuti abape ubulongosi abandu bake ukongelelapo undongi numwalafyale. (Balo. 4:4-9; 2 Banyaf. 22:14-20) Amasiku agha, Yehova ikubabula abakikulu Abakristu ukuti babombeghe imbombo yake. Abakikulu abasubiliwa aba bikumbombela Yehova pakuya bafumusi, bapayiniya kangi bamishonale. Abene bikutulapo pambombo iyakuyenga nukutendekesya Inyumba sya Bunyafyale na maofesi. Abangi bikubomba pa Beteli; kangi bamo bikubomba mu maofesi aghakusanusya amabuku. Abalumbu aba, bali bo kilundilo ikikulumba ikya balwabwite aba Yehova ikubabombesyela ukuti babombe ubwighane bwake. (Sal. 68:11) Ukuyoba ubwanaloli, Yehova atikubaketa abakikulu ukuya bonywa pamo ukuti bakabaghila ukufwanisya ukubomba simo.
NGIMBA ABAKAMU BABAGHILE UKUBOMBA BULEBULE UKUTI BABAKETEGHE ABAKIKULU BO MUNO YEHOVA IKUBAKETELA?
Mwe bakamu, ukuti mumanye linga mukubaketa abakikulu Abakristu bo muno Yehova ikubaketela, mukulondiwa ukwinong’onela nukuketa muno mukubabombela ifindu. Ukuti mufwanisye ukubomba isi, mukulondiwa ubutuli. Mwakufwana itolo namashini gha X-ray agha ghabaghile ukuntula dokotala ukumanya muno indumbula ya mundu yiyilile nkati, ummanyani unnunu na Masyu gha Kyala ghabaghile ukututula ukumanya linga tukubaketa abakikulu bo muno Yehova ikubaketela pamo hayi. Ngimba tukulondiwa ukubomba isyafiki ukuti twambilile ubutuli ubu?
Mundalusye ummanyani winu wanaloli. (Mbu. 18:17) Tubaghile ukundalusya ummanyani witu uyu tukunsubila, wakisa kangi ikuketa kanunu ifindu, amalalusyo bo agha: “Ngimba ngubabombela bulebule ifindu abalumbu? Ngimba bikuketa ukuti ngubaghindika? Ngimba silipo simo isi ngulondiwa ukubomba ukuti mbabombeleghe kanunu ifindu?” Linga ummanyani winu ayobile isi mukulondiwa ukubomba komma ukukalala. Mmalo mwake mughelegheleghe ukuchenja.
Mumanyileghe Amasyu gha Kyala. Injila inunu iyakumanya linga tukubaketa kanunu abalumbu, ko kwinong’ona nukubomba ifindu mwakukolelana na Masyu gha Kyala. (Hib. 4:12) Linga tukubelenga Amasyu agha Kyala, tukumanyilamo isya banyambala aba bababombelagha kanunu ifindu abakikulu na aba bakababombelagha kanunu. Ukufuma apo, tufwanikisyeghe isi babombagha na isi uswe tukubomba. Mwakongelelapo, tutikulondiwa ukwinong’onela itolo ivesi limolyene nukwanda ukubabombela abakikulu ifindu ifibibi. Mmalo mwake, tukulondiwa ukwinong’onela amavesi mingi agha mu Baibolo agha ghabaghile ukututula ukuti tubabombeleghe abakikulu ifindu ifinunu. Ukubomba bo ulu, kubaghile ukututula ukupilikisya kanunu muno Yehova ikubaketela abakikulu. Mwakifwanikisyo, ukufwana nilemba lya 1 Peteri 3:7, unnyambala ikulondiwa ukungindika unkikulu panongwa yakuti “monywa.” b Ngimba isi sikusanusya ukuti unkikulu akaya wakulondiwa, akaya namahala pamo amaluso? Hayi. Fwanikisya amasyu agha Peteri ayobile na isi sikwaghiwa pa Bagalatia 3:26-29, isi sikunangisya ukuti Yehova abasalile abakikulu na banyambala ukuti bakalaghileghe pampene na Yesu kumwanya. Linga tukubelenga Amasyu gha Kyala nukunsuma ummanyani witu ukuti atubule muno tukubaketela abakikulu, tubaghile ukwanda ukubanangisya ulughindiko abalumbu bitu.
NGIMBA ABAKULUMBA BABAGHILE UKUNANGISYA BULEBULE ULUGHINDIKO KUBALUMBU?
Abakamu nkipanga babaghile ukumanyilako kangi ukubabombela ifindu abalumbu mwalughindiko mwakukonga ikifwanikisyo kya bakulumba bakipanga aba bali nulughano. Ngimba abakulumba bakipanga babaghile ukunangisya bulebule ikifwanikisyo ikinunu ikya kubanangisya ulughindiko abalumbu? Keta injila simo isi.
Abakulumba bikubandaghisya abalumbu. Untumiwa Pauli anangisye ikifwanikisyo ikinunu iki abakulumba bikulondiwa ukukonga. Umwene abandaghisye abalumbu bingi mwakalata wake uwakubuka kukipanga kya ku Roma. (Rom. 16:12) Mubaghile ukwinong’onela ulusekelo ulu abalumbu aba balinalo bo kalata uyu Pauli alembile ikubelengiwa nkipanga. Mwakufwana itolo, abakulumba bikubandaghisya abalumbu panongwa yatuyilo twabo utununu nukwiyipa ukumbombela Yehova. Isi sikubatula abalumbu ukumanya ukuti abakamu nkipanga bikubaghindika nukubandaghisya. Amasyu aghakukasya agha unkulumba abaghile ukuyoba, ghabaghile ukubakasya abalumbu ukuti bakindilile ukumbombela Yehova mbusubiliwa.—Mbu. 15:23.
Mubandaghisyeghe
Linga abakulumba bikubandaghisya abalumbu, bikuyoba mbwanaloli kangi bikuyoba ifi bikubomba kanunu. Nongwa yafiki? Umulumbu Jessica atile: “Sikuya syakuhobosya fiyo linga abakamu bikumbula umulumbu ukuti ‘ubombile kanunu.’ Loli tukukasiwa fiyo linga bikutundaghisya mwakuyoba ikindu kimo iki tubombile, bo ukubamanyisya abanitu ukuti bangatamyagha pangomano pamo ukubuka ukwakumwegha ummanyili witu wa Baibolo nukwisa nawe kungomano.” Linga abakulumba bikubandaghisya abalumbu pa kindu kimo iki babombile, bikubapangisya abalumbu ukuti bipilikeghe ukuya bakulondiwa nkipanga.
Bikubapilikisya abalumbu. Abakamu ba kwiyisya bikumanya ukuti abalumbu bope bali nifundo isyakukasya. Abakamu bo aba bikubasuma abalumbu ukuti bayobengepo amasakisyo ghabo kangi bikupilikisya kanunu linga abalumbu bikuyoba. Linga bikubomba bo ulu, abakulumba bikubakasya abalumbu kangi bope bikukasiwa. Bulebule? Gerardo uyu nkulumba wakipanga kangi ikubomba pa Beteli atile: “Ngetile ukuti ukubalalusya abalumbu aminong’ono ghabo, sikundula ukuti mbombeghe kanunu imbombo. Utubalilo twingi abene bikubomba isi kwa kabalilo akatali ukukinda abakamu.” Nkipanga, abalumbu bingi bikumbombela Yehova pakuya bapayiniya yonongwa yake bikubamanya kanunu abandu bankighaba kyabo. Bryan uyu nkulumba wakipanga atile: “Abalumbu bali nutuyilo twingi utununu namaluso agha ghakulondiwa fiyo mu gulu lya Yehova. Yonongwa yake mukulondiwa ukumanyilako simo kumyabo.”
Mubapilikisyeghe
Abakulumba bamahala batikulondiwa ukusula amasakisyo gha balumbu. Nongwa yafiki? Edward uyu nkulumba wakipanga atile, “Isakisyo lya mulumbu libaghile ukuntula unkamu ukupilikisya kanunu ifundo yimo kangi sibaghile ukuntula ukuti anangisyeghe ikisa. (Mbu. 1:5) Nalinga ukuti utubalilo tumo unkulumba akabaghila ukukonga amasakisyo gha mulumbu, umwene abaghile ukundaghisya amasakisyo ghake aghakupilikiwa kanunu.
Bikubamanyisya abalumbu. Abakulumba bamahala bikusyagha injila isyakuti babamanyisyeghe abalumbu. Mwakifwanikisyo, babaghile ukubamanyisya abalumbu muno babaghile ukulongosyela pakwitendekesya mubufumusi linga unkamu uyu osiwe akayapo. Babaghile ukubamanyisya muno babaghile ukubombela ifibombelo pamo amashini ukuti batulepo pambombo iyakuyenga nukutendekesya ifindu fya Bunyafyale. Pa Beteli, aba bikuketesya babamanyisye abalumbu ukubomba ububombeli bumo bo ukubombela mu dipatimenti yakutendekesya ifi fyonangike, idipatimenti yakula ifindu, idipatimenti ya maakaunti, idipatimenti ya makompyuta naghangi. Linga abakulumba bikubamanyisya abalumbu, bikunangisya ukuti bikubaketa ukuya bakulondiwa kangi basubiliwa.
Mubamanyisyeghe
Abalumbu bingi bikukonga isi abakulumba babamanyisye ukuti babatule abangi. Mwakifwanikisyo, abalumbu bamo bikubombela amaluso agha bamanyile pambombo ya fyakuyenga ukuti babatule abangi ukutendekesya inyumba syabo linga syonangike ningozi syakipeliwa. Bamo bikubombela amaluso agha bamanyile agha muno babaghile ukufumusyila pabwelu, ukubatula abalumbu bingi pambombo iyakufumusya. Ngimba abalumbu bikwipilika bulebule linga abakamu babamanyisye? Umulumbu Jennifer atile: “Linga ngutulapo pambombo iyakutendekesya Inyumba ya Bunyafyale, uwakuketesya ikuya nakabalilo akakumanyisya. Umwene ikumanya isi ngufwanisya ukubomba kangi ikundaghisya. Nguhoboka fiyo ukubomba nawe panongwa yakuti ngwiketa ukuti ndiwakulondiwa kangi nsubiliwa.”
ULUSAYO ULU TUKULWAGHA LINGA TUKUBAGHINDIKA ABAKIKULU NKIPANGA UKUYA BALUMBU BITU
Tubaghanile fiyo abalumbu bitu bo muno Yehova abaghanile. (1 Tim. 5:1, 2) Tukubandaghisya fiyo kangi tukuhoboka ukubomba nabo pampene. Kangi tukuhoboka linga bikuketa ukuti tubaghanile nukubatula. Umulumbu Vanessa atile: “Ngundaghisya fiyo kwa Yehova pakuya kukighaba kya gulu lyake ili lili nabakamu aba bikungasya fiyo.” Umulumbu yumo uwa ku Taiwan atile: “Ngundaghisya fiyo panongwa yakuti Yehova nigulu lyake bikubandaghisya abakikulu kangi bikughindika isi basalile. Isi sikukasya ulwitiko lwangu kangi sikumbangisya ukuti nndaghisyeghe ulusako ulwakuya kukighaba kya gulu lya Yehova.”
Yehova ikuhoboka fiyo linga ikuketa abanyambala Abakristu bikubandaghisya nukubaghindika abakikulu bo muno umwene ikubombela. (Mbu. 27:11) Unkamu Benjamin wa ku Scotland atile, “abanyambala bingi amasiku agha batikubaghindika abakikulu napapanandi. Yonongwa yake linga abakikulu bafikile pa Nyumba ya Bunyafyale, tukulondiwa ukuketesya ukuti abene bikwipilika ukuti bikughindikiwa kangi baghaniwe.” Isagha twesa tughelegheleghe ukunkonga Yehova mwakubabombela ifindu mwalughano abalumbu bitu nukubanangisya ulughindiko ulu bikulondiwa.—Rom. 12:10.
a Munkhani iyi, amasyu aghakuti “abalumbu” ghikuyoba fiyofiyo isya balumbu Abakristu komma abakamu bitu mwakumbili.
b Ukuti mumanye nyingi isyakufwana namasyu aghakuti “bonywa,” keta inkhani iyakuti “Mtengo wa ‘Chotengera Chochepa Mphamvu’” mu Ingasya ya Ndindilili iya Chichewa iya Meyi 15, 2006, kangi ninkhani iyakuti “Ulongozgi Wavinjeru kwa Ŵakutorana” mu Ingasya ya Ndindilili iya Chitumbuka iya Malichi 1, 2005.
