1. Nongwa yafiki ukukumbukila inifwa ya Yesu, isiku lyakulondiwa fiyo pakyinja? (Luka 22:​19, 20)

 KUBABOMBI ba Yehova, isiku lya kukumbukila inifwa ya Kristu ili likubombiwa kamokene pakyinja, kyo kindu kyakulondiwa fiyo kumyabo. Iki kyo kyakubombiwa kyene iki Yesu ababulile abafundiwa bake ukuti babombeghe. (Belenga Luka 22:​19, 20.) Tuli nififukwa fingi fiyo ifyakwaghiwapo pakyakubombiwa iki. Isagha tukete fimo mwafifukwa ifi.

2. Ngimba fifukwa filiku ifi fikutupangisya ukuti tusaghiwepo pakukumbukila inifwa ya Yesu?

² Ukukumbukila inifwa ya Yesu kukututula ukwinong’onela ukulondiwa kwa kitabulilo. Sikutukumbusya muno tubaghile ukundaghisyila ikemo lya Yesu. (2 Kor. 5:​14, 15) Sikutupa kangi ulusako ulwakuti tuhobokeghe “nukusubisania” na bakamu na balumbu bitu. (Rom. 1:12) Ikyinja kilikyosa, abakamu na balumbu bingi aba balekile ukufika pangomano bikwaghiwapo pakukumbukila inifwa ya Yesu. Bingi bikukasiwa ukughomokela kwa Yehova panongwa yalughano ulu bikunangisiwa pakabalilo aka. Kangi abandu bingi bikwanda ukumanyila Ibaibolo panongwa ya isi baketile nukupilika pakabalilo kakukumbukila inifwa ya Yesu. Syosa isi sikupangisya ukuti ukukumbukila inifwa ya Yesu kuye kwakulondiwa fiyo.

3. Ngimba ukukumbukila inifwa ya Yesu kukututula bulebule ukuti tukolelaneghe pakisu kyosa kyapasi? (Keta kangi ikithuzi.)

³ Inong’onela kangi muno ukukumbukila inifwa ya Yesu kukututulila ukuti tukolelaneghe pakisu kyosa kyapasi. Abaketi ba Yehova pakisu kyosa bikubungana pakabalilo kakukumbukila inifwa ya Yesu linga isuba lisyele panandi ukwingila. Twesa tukupilikisya inkhani ya mu Baibolo iyi yikulingania isya kulondiwa kwa kitabulilo. Tukwimba inyimbo sibili isya kumpala Yehova, bikwendesya ikisyesye nikinwelo kangi pabumalilo tukwamula ukufuma pasi pandumbula ukuti “ameni” kunyiputo 4. Kwa maawala 24, ifipanga fyosa fikubomba munjila iyakufwana itolo. Mubaghile ukwinong’onela  ulusekelo ulu Yehova na Yesu bikuya nalo linga batubwene tubungene pampene ukuti tubapale munjila bo iyi.

4. Ngimba tukuya pakuyobesania isyafiki munkhani iyi?

⁴ Munkhani iyi, tukuya pakuyobesania amalalusyo matatu agha: Ngimba tubaghile ukwitendekesya bulebule ukukumbukila inifwa ya Yesu? Ngimba tubaghile ukubatula bulebule abangi ukuti basakasiwe? Kangi ngimba tubaghile ukubatula bulebule abakamu na balumbu aba balekile ukubungana? Abaansala ba malalusyo agha bikuya pakututula ukwitendekesya ikyakubombiwa ikya padela fiyo iki.

NGIMBA TUBAGHILE UKWITENDEKESYA BULEBULE UKUKUMBUKILA INIFWA YA YESU?

5. (a) Nongwa yafiki tukulondiwa ukwinong’onela ukulondiwa kwa kitabulilo? (Salimo 49:​7, 8) (b) Ngimba mumanyile isyafiki mu vidiyo iyakuti Nongwa Yafiki Yesu Afwile?

⁵ Yimo mwa njila isyakulondiwa fiyo isi tubaghile ukwitendekesya ukukumbukila inifwa ya Yesu kokwinong’onela ukulondiwa kwa ikemo lya kitabulilo kya Yesu Kristu. Kikalipo nakimo iki twabaghile ukubomba ukuti twipoke twibene kubutulanongwa ninifwa. (Belenga Salimo 49:​7, 8; keta kangi ividiyo iyakuti Nongwa Yafiki Yesu Afwile?) a Yonongwa yake Yehova alitikisye ukuti Yesu abike ubumi bwake ukuti atupoke. Yehova na Yesu, bosa baliyipile fiyo. (Rom. 6:23) Linga tukwinong’onela isi Yehova na Yesu batubombile, sikutupangisya ukuti tundaghisyeghe fiyo ikitabulilo. Tukuya pakuyobesania ifindu finandi itolo ifi Yehova na Yesu babombile ukuti batupe ikitabulilo. Loli ikyakwanda, ngimba ikitabulilo findu fiki?

6. Ngimba ikitabulilo findu fiki?

⁶ Ikitabulilo gho ntengo ughu abandu bikuhomba ukuti batabule ikindu kimo. Umundu uwakwanda, Adamu, alingolofu pakabalilo aka apeliwagha. Bo abombile ubutulanongwa, ataghile ulusako ulwakwikala nubumi kwa bwila na bwila komma mwene loli nabanake bosa. Ukuti aghomokesye isi Adamu ataghile, Yesu abikile ubumi bwake ubugholofu ukuya kitabulilo. Bo ali pakisu kyapasi, Yesu “akatulilemo inongwa yimo, lope nulusyobo lukabonikemo nkanwa mmyake.” (1 Pet. 2:22) Bo Yesu afwile, umwene ali ngolofu bo muno Adamu ayilile bo akali ukubomba ubutulanongwa. Yonongwa yake bo Yesu abikile ubumi bwake, ahombile ubumi ubu Adamu ataghile.—1 Kor. 15:45; 1 Tim. 2:6.

7. Ngimba Yesu agheliwe munjila siliku bo ali pakisu kyapasi?

⁷ Yesu akindilile ukumpilikila Tata wake wakumwanya nalinga ukuti agheliwe fiyo bo ali pakisu. Pakuya mwana, Yesu alondiwagha ukubapilikila abapapi bake aba bakali bagholofu nalinga ukuti umwene ali ngolofu. (Luka 2:51) Pakuya wakilumyana, alondiwagha ukwepuka kungelo yiliyosa iyi yayagha pakumpangisya ukuti aleke ukubapilikila abapapi bake nukuleka ukuya nsubiliwa kwa Yehova. Kangi pakuya mundu nkusi, Yesu alondiwagha ukwepuka ku ngelo isya Setano Umohesi uyu alondagha ukuti abombe ubutulanongwa nukuleka ukuya nsubiliwa kwa Kyala. (Mat. 4:​1-11) Setano aghelaghelagha ukumpangisya Yesu ukuti abombe ubutulanongwa ukuti atoliwe ukubika ikitabulilo.

8. Ngimba ngelo siliku isingi isi Yesu alifimbilisye?

⁸ Bo ali pakisu kyapasi, Yesu alifimbilisye ku ngelo isingi. Umwene afwimiwagha kangi balondagha ukungogha. (Luka 4:​28, 29; 13:31) Umwene alondiwagha ukwifimbilisya ku isi abafundiwagha bake basobagha. (Mar. 9:​33, 34) Pakabalilo aka, Yesu alongiwagha panongwa ya bumi bwake, anyoziwagha nukususiwa fiyo. Ukufuma apo, afwile inifwa iyakubaba fiyo kangi yali yakukosya isoni. (Hib. 12:​1-3) Umwene alondiwagha ukwifimbilisya akabumalilo pabumi bwake  kisita butuli bwakufuma kwa Yehova. b—Mat. 27:46.

9. Ngimba tukwipilika bulebule panongwa ya ikemo lya Yesu? (1 Peteri 1:8)

⁹ Ukuyoba ubwanaloli, Yesu atamiwe fiyo ukuti abike ikitabulilo. Linga tukwinong’onela ifindu fyosa ifi Yesu aliyipile ukutubombela, tukwanda ukungana fiyo.—Belenga 1 Peteri 1:8.

10. Ngimba Yehova aliyipile bulebule ukuti Yesu abikiwe ukuya ikemo?

¹⁰ Ngimba Yehova aliyipile bulebule ukuti Yesu abikiwe ukuya ikemo? Yehova na Yesu bali pabumanyani ubununu fiyo bo muno sikuyila pakati pa tata numwana. (Mbu. 8:30) Inong’onela muno Yehova alipilikile bo ikumbona Yesu ikwifimbilisya kundamyo nyingi bo ali pakisu. Kisita kukayika, syalimbabile fiyo Yehova ukunketa Umwanake ikunyoziwa, ikukaniwa nukutamiwa.

11. Yoba ikifwanikisyo iki kikunangisya muno Yehova alipilikile bo Yesu ikughoghiwa.

¹¹ Umpapi aliwesa uyu umwanake afwile ikumanya muno sikuyila syakubaba. Tuli nulusubilo ulwamaka ukuti aba bafwile bisakusyuka loli isi sitikutupangisya ukuti tungayagha nikitima linga unkamu witu afwile. Ikifwanikisyo iki kikututula ukumanya muno Yehova alipilikile bo ikunketa umwanake unganiwa ikutamiwa nukufwa pisiku lila mu 33 C.E. c—Mat. 3:17.

12. Ngimba tukulondiwa ukubomba isyafiki bo kusyele abasabata banandi ukuti tukumbukile inifwa ya Yesu?

¹² Lino kangi napakabalilo kakukumbukila inifwa ya Yesu, mumanyileghe nyingi isyakufwana nikitabulilo kya Yesu linga mukumanyila pamwibene na pambumba yinu. Mubaghile ukubombela Buku Lakupenjera Nkhani la Ŵakaboni ŵa Yehova pamo amabuku aghangi agha ghikulingania nyingi isyakufwana nikitabulilo. d Kangi mukongeghe imbatiko iyakubelenga Ibaibolo pakabalilo kakukumbukila inifwa ya Yesu iyi yikwaghiwa mu kabuku ka Ukufumusya nu Bumi Bwitu Bwabukristu—Imbatiko ya Ngomano Syitu. Kangi pisiku lya kukumbukila inifwa ya Yesu, mukumbukileghe ukuketelela ipulogilamu ya padela iya Kwiputa kwa Nulubunju. Linga twitendekisye isiku ilya kukumbukila inifwa ya Yesu, twisakufwanisya ukubatula abangi ukuti bope basakasiwe.—Ezra 7:10.

TUBATULEGHE ABANGI UKUTI BASAKASIWE

13. Ngimba kindu kiliku ikyakwanda iki tubaghile ukubomba ukuti tubatule abangi ukuti basakasiwe pakukumbukila inifwa ya Yesu?

¹³ Ngimba tubaghile ukubatula bulebule abangi ukuti basakasiwe pakukumbukila inifwa ya Yesu? Ikindu ikyakwanda ko kubakolela ukuti  bope basaghiwepo. Ukongelela pa bandu aba tukuyobesania nabo linga tuli mubufumusi, tubaghile ukulemba kangi ingamu sya bandu aba tukulonda ukuti basaghiwepo. Abandu aba bikongelelapo abakamu bitu bakumbili, aba tukubomba nabo imbombo, aba tukumanyila nabo isukulu nabangi. Nalinga ukuti tukabaghila ukuya nutumapepala twingi utwakubakolela pakukumbukila inifwa ya Yesu, loli tubaghile ukubatumila ilinki pa foni yabo. Tubaghile ukuhoboka panongwa ya bwingi bwa bandu aba babaghile ukwaghiwapo.—Ndumbi. 11:6.

14. Yoba ikifwanikisyo iki kikunangisya ukulondiwa kwakunkolela umundu aliwesa pakukumbukila inifwa ya Yesu.

¹⁴ Linga munkolile umundu yumo pakukumbukila inifwa ya Yesu, abaghile ukuhoboka fiyo ukuti asaghiwepo. Isiku limo, umulumbu yumo uyu undume wake akaya Nketi, aswighile fiyo bo undume wake ambulile ukuti ikuya pakubuka nawe pakukumbukila inifwa ya Yesu. Nongwa yafiki umulumbu uyu aswighile? Panongwa yakuti utubalilo twingi kunyuma linga ansumile ukuti abuke nawe, akanagha. Ngimba pakabalilo aka findu fiki fyalimpangisye ukuti itike? Unnyambala uyu atile, “Nalyambilile akapepala,” aka unkulumba wakipanga yumo uyu alimmenye alimpele. Unnyambala uyu abukile pakukumbukila inifwa ya Yesu ikyinja kila kangi kwa fyinja fingi ikwaghiwapo.

15. Ngimba tukulondiwa ukukumbuka isyafiki linga tukubakolela abandu pakukumbukila inifwa ya Yesu?

¹⁵ Tukumbukeghe ukuti aba tukubakolela babaghile ukuya namalalusyo aghakufwana nukukumbukila inifwa ya Yesu fiyofiyo linga bakafikamo pangomano syakipanga. Yonongwa yake tukulondiwa ukwinong’onela amalalusyo agha babaghile ukutulalusya namuno tubaghile ukubamulila. (Kolos. 4:6) Mwakifwanikisyo, bamo babaghile ukulalusya ukuti: ‘Ngimba findu fiki fisakubombiwa pakyakubombiwa iki?’ ‘Ngimba kisakubombiwa kwa butali buliku?’ ‘Ngimba ngulondiwa ukwisakufwala ifindu fiki?’ ‘Ngimba ngulondiwa ukwisakubika indalama ukuti nsaghiwepo?’ ‘Ngimba imbale ya fyabupe yisakuyako?’ Linga munkolile umundu yumo pakukumbukila inifwa ya Yesu, mubaghile ukundalusya ukuti, “Ngimba muli namalalusyo ghalighosa?” ukufuma apo mwamule amalalusyo agha abaghile  ukubalalusya. Mubaghile kangi ukunnangisya ividiyo iyakuti Ukukumbukila Inifwa ya Yesu niyakuti Ngimba Findu Fiki Fikubombiwa Panyumba ya Bunyafyale? ukuti muntule ukumanya muno tukubombela ingomano syitu. Kangi nkimanyilo 28 mu buku ilyakuti Amuhobokeghe nu Bumi kwa Bwila na Bwila, mukwaghiwa ifundo nyingi isi mubaghile ukuyobesania nawe.

16. Ngimba malalusyo ghaliku aghangi agha aba balyaghiwepo pakukumbukila inifwa ya Yesu babaghile ukuya nagho?

¹⁶ Linga baghiwepo pakukumbukila inifwa ya Yesu, aba bikulonda ukumanya nyingi babaghile ukuya namalalusyo aghangi. Abene babaghile ukwilalusya ukuti, nongwa yafiki abandu banandi itolo bo aba balile ikisyesye nukunwa ikinwelo? Nongwa yafiki bikukumbukila inifwa ya Yesu kamokene itolo pakyinja? Kangi babaghile ukulonda ukumanya linga momuno Abaketi ba Yehova bikubombela ingomano syosa. Nalinga ukuti ifundo nyingi bikusilingania munkhani pakabalilo kakukumbukila inifwa ya Yesu loli abene babaghile ukulonda ukuti babalinganie kanunu ifundo nyingi. Inkhani iyi yikwaghiwa pa jw.org iyamutu uwakuti “Chifukwa Wuli Ŵakaboni ŵa Yehova Ŵakupanga Mugonero wa Fumu Mwakupambana na Matchalitchi Ghanyake?” yibaghile ukututula ukwamula ghamo mwamalalusyo ghabo. Bo ukukumbukila inifwa ya Yesu kukali, kulinkati kangi kubombiwe, tukulonda ukubomba syosa isi tubaghile ukufwanisya ukuti tubatule bosa aba “bimikiliwe” ukuti basakasiwe nikyakubombiwa iki.—Imbo. 13:48.

TUBATULEGHE ABA BALEKILE UKUBUNGANA

17. Ngimba abakulumba bakipanga babaghile ukubatula bulebule aba balekile ukubungana? (Ezekieli 34:​12, 16)

¹⁷ Nkabalilo kakukumbukila inifwa ya Yesu, ngimba abakulumba bakipanga babaghile ukubatula bulebule aba balekile ukubungana? Munangisyeghe ukuti mukubapasikisya. (Belenga Ezekieli 34:​12, 16.) Bo ukukumbukila inifwa ya Yesu kukali ukubombiwa, muketesyeghe ukuti mubakolile bingi. Mubabuleghe ukuti mukubapasikisya fiyo kangi mukulonda ukubatula muno mubaghile ukufwanisyila. Mubakolele ukuti basaghiwepo pakukumbukila inifwa ya Yesu. Linga bafikile, mubambilileghe mwalughano. Linga ukukumbukila inifwa ya Yesu kubombiwe, mukindilileghe ukubendela pamo ukubimbila ifoni  abakamu na balumbu aba nukubatula mwambepo ukuti baghomokele kwa Yehova.—1 Pet. 2:25.

18. Ngimba twesa tubaghile ukubatula bulebule aba balekile ukubungana? (Baroma 12:10)

¹⁸ Twesa nkipanga tubaghile ukubatula aba balekile ukubungana aba balyaghiwepo pakukumbukila inifwa ya Yesu. Bulebule? Mwakubanangisya ulughano, ikisa nulughindiko. (Belenga Baroma 12:10.) Tukumbukeghe ukuti kwali kukafu fiyo ku bakamu bitu abaghaniwa aba ukuti bande kangi ukufika pangomano. Lumo batilagha ukuti bakabaghila ukubambilila kanunu. e Yonongwa yake tutikulondiwa ukubalalusya amalalusyo agha ghabaghile ukubakosya isoni pamo ukuyoba simo isi sibaghile ukubakalalisya. (1 Tes. 5:11) Abakamu na balumbu aba, Bakristu binitu. Tuli balusekelo fiyo ukubungana nabo kangi.—Sal. 119:176; Imbo. 20:35.

19. Ngimba tukusayiwa bulebule linga tukukumbukila inifwa ya Yesu?

¹⁹ Tukundaghisya fiyo panongwa yakuti Yesu atubulile ukuti tukumbukileghe inifwa yake ikyinja kilikyosa, kangi tukupilikisya inongwa iyi kwakulondiwa ukubomba isi. Linga twaghiwepo pakukumbukila inifwa ya Yesu, uswe na bangi tukusayiwa munjila nyingi. (Yes. 48:​17, 18) Ulughano lwitu kwa Yehova na Yesu lukukula fiyo. Tukunangisya ukundaghisya pa isi batubombile. Tukuya pabumanyani ubwamaka fiyo na bakamu na balumbu bitu. Kangi tubaghile ukubatula abangi ukumanya muno bope babaghile ukuyila balusekelo nulusayo ulu bikulwagha panongwa yakitabulilo. Isagha tubombeghe syosa isi tubaghile ukufwanisya ukuti twitendekesye nukwisakwaghiwapo pakukumbukila inifwa ya Yesu ikyinja iki, ili lyo isiku lyakulondiwa fiyo pakyinja.