1-2. Ngimba ndamyo siliku isi ababombi ba Yehova abasubiliwa babaghile ukwaghana nasyo?

 IFYAKUBOMBIWA ifibibi fibaghile ukuchenja mwanakalinga ubumi bwitu. Mwakifwanikisyo, unkamu Luis a balimwaghile nimbungo ya kansa. Dokotala alimbulile ukuti asyele nimyesi minandi itolo ukuti afwe. Monika nundume wake biyipagha fiyo pakumbombela Yehova. Isiku limo, Monika asyaghenie ukuti undume wake, uyu ali nkulumba, abombagha ubutulanongwa kwakabalilo akatali. Umulumbu Olivia, uyu akaya pabweghi, balimbulile ukuti asokepo pakaya kake panongwa yakuti umbelo uwamaka wayagha pakubombiwa. Bo aghomokile kukaya kake, alyaghile ukuti umbelo ghonangile inyumba yake. Ubumi bwa Luis, Monika na Olivia bwachenjile mwanakalinga. Ngimba mubaghile ukuketa isi balyaghene nasyo? Ngimba mwaghenepo nikyakubombiwa kimo iki kyapangisye ukuti ifindu fichenje mwanakalinga pabumi bwinu?

² Pakuya babombi ba Yehova abasubiliwa, tukwaghana nindamyo mwakufwana itolo nabandu bosa. Mwakongelelapo, tukulondiwa kangi ukwifimbilisya linga abandu bikutususya pamo tukufwimiwa na bandu aba bababengile ababombi ba Kyala. Nalinga ukuti Yehova akabaghila ukukanisya ukuti tungaghanagha nifindu bo ifi, loli umwene afingile ukuti ikuya pakututula. (Yes. 41:10) Nubutuli bwake, tubaghile ukukindilila ukuya balusekelo, ukusala kanunu ifyakubomba nukukindilila ukuya basubiliwa kumyake nalinga po pakabalilo akapalapala. Munkhani iyi, tukuya pakuyobesania injila 4 isi Yehova ikubombela ukuti atutule linga twaghene nindamyo pabumi bwitu. Tukuya pakuyobesania kangi isi tukulondiwa ukubomba ukuti tusayiwe nubutuli ubu ikutupa.

 YEHOVA ISAKUTUFIGHILILA

3. Linga twaghene nindamyo, ngimba kubaghile ukuya kukafu ukubomba isyafiki?

³ Indamyo. Linga twaghene nindamyo, kubaghile ukuya kukafu ukwinong’ona pamo ukusala kanunu ifyakubomba. Nongwa yafiki? Panongwa yakuti tubaghile ukuya nikitima fiyo kangi nukutamiwa naminong’ono. Tubaghile ukusofanisiwa kangi amahala ghabaghile ukutumalikila. Keta muno abalumbu babili aba tubayobile pakwanda balipilikile bo baghene nindamyo. Olivia atile, “Bo umbelo wamaka ghonangile inyumba yangu, nasofanisiwe fiyo kangi natamiwe naminong’ono.” Monika atile: “Nalinga ukuti undume wangu alimbombile ifindu ifibibi, syalimbabile fiyo mundumbula yangu. Natoliwagha nukubomba kanunu ifindu. Ngasubilagha ukuti mbaghile ukwaghana nifindu bo ifi.” Ngimba Yehova afingile ukuti ikuya pakututula bulebule linga tuwile amaka?

4. Ukufwana na Bafilipi 4:​6, 7, ngimba Yehova afingile isyafiki kumyitu?

⁴ Ngimba Yehova abaghile ukututula bulebule? Umwene afingile ukuti ikuya pakutupa isi Ibaibolo likuyoba ukuti “ulutengano lwa Kyala.” (Belenga Bafilipi 4:​6, 7.) Ulutengano ulu lukusanusya ubololo ubu tukuya nabo panongwa yakuya pabumanyani ubununu numwene. Ulutengano ulu “lughakindile ghosa amahala” lo lwakulondiwa fiyo ukukinda muno tubaghile ukwinong’onela. Ngimba mwiputilemo kwa Yehova ukufuma pasi pandumbula nukuketa ukuti mwandile ukwipilika kanunu? Mwalipilike bo ulu panongwa yakuti Yehova abapele “ulutengano” lwake.

5. Ngimba ulutengano lwa Kyala lukufighilila bulebule aminong’ono nindumbula yitu?

⁵ Pa Bafilipi 4:​7, pikuyoba kangi ukuti ulutengano lwa Kyala “lukuya pakutufighilila” pamo ‘ukusyubatila indumbula syitu ninyinong’ono syitu.’ Amasyu aghakuti “ukufighilila” baghabombelagha imbombo pakulingania isya basilikali aba balindililagha pilinga nukuketesya ukuti abalughu bangingilagha. Abandu aba bikalagha nkaya aka bipilikagha ukuti bafighililiwe panongwa yakuti bamenye ukuti abasilikali babafighililagha. Mwakufwana itolo, linga ulutengano lwa Kyala lukufighilila indumbula ninyinong’ono syitu, tukwipilika kanunu panongwa yakumanya ukuti tufighililiwe. (Sal. 4:8) Bo muno syayilile na Hana, tubaghile ukukindilila ukuya nulutengano nalinga ukuti ifindu fitikuchenja mwanakalinga. (1 Samu. 1:​16-18) Linga tukwipilika ukuti tufighililiwe, utubalilo twingi kukuya kupepe ukwinong’ona nukusala mwamahala ifyakubomba.

6. Ngimba tukulondiwa ukubomba isyafiki ukuti tusayiwe nulutengano lwa Kyala? (Keta kangi ikithuzi.)

⁶ Ngimba tukulondiwa ukubomba isyafiki? Linga twaghene nindamyo, tunsumeghe Yehova ukuti atufighilile. Bulebule? Mwiputeghe ukuti muye nulutengano lwa Kyala. (Luka 11:9; 1 Tes.  5:17) Luis, uyu tunjobile pakwanda, alingenie muno umwene nunkasi wake Ana, bafwanisyile ukwifimbilisya bo basyaghenie ukuti Luis asyele nimyesi minandi itolo ukuti afwe. Luis atile: “Pakabalilo bo aka, kukuya kukafu fiyo ukusala ifyakubomba pankhani ya muno ubaghile ukubupwelelela ubumi bwako nifindu ifingi. Loli twalwaghile ulutengano pakabalilo akapalapala aka panongwa yakuti twiputagha.” Luis nunkasi wake bayobile ukuti biputagha ukufuma pasi pandumbula kisitakuleka. Bansumagha Yehova ukuti abape ulutengano lwamundumbula, indumbula ya bololo namahala ukuti basaleghe kanunu ifyakubomba. Kangi baketile muno Yehova abatulile. Linga mukwaghana nindamyo, mwiputeghe kisitakuleka kangi Yehova ikuya pakubapa ulutengano ulu lubaghile ukufighilila indumbula naminong’ono ghinu.​—Rom. 12:12.

YEHOVA ISAKUTUKASYA

7. Ngimba tubaghile ukwipilika bulebule linga twaghene nindamyo?

⁷ Indamyo. Linga tukwaghana nindamyo, tukabaghila ukwipilika, ukwinong’ono pamo ukubomba kanunu ifindu bo muno twabombelagha. Bo muno iboti likughutiwa numbelo wamaka nukulabila uku na uku panongwa yamayigha, nanuswe tubaghile ukusofanisiwa naminong’ono aghakukindanakindana. Ana, uyu tunjobile pakwanda, ayobile ukuti atamiwagha fiyo naminong’ono bo Luis afwile. Umwene atile: “Utubalilo tumo nakalalagha fiyo kangi nipelelagha ikitima. Kangi nakalalagha linga ngwinong’onela isya nifwa yake.” Utubalilo tumo, Ana ipilikagha ukuti ali mwene kangi atamiwagha ukusala ifyakubomba pa findu ifi Luis abombagha kanunu. Utubalilo tumo afwanagha ali mwasumbi uyu asambwike. Ngimba Yehova ikututula bulebule linga twandile ukutamiwa naminong’ono bo agha?

8. Ukufwana na Yesaya 33:​6, ngimba Yehova ikutusimikisyila isyafiki?

⁸ Ngimba Yehova abaghile ukututula bulebule? Umwene ikutusimikisyila ukuti ikuya pakututula. (Belenga Yesaya 33:6.) Linga pasumbi ghulipo umbelo wamaka, iboti libaghile ukwanda ukuyughanika uku na uku. Ukuti ghaleke ukuyughanika, amaboti mingi ghikuya nimyenda iyi yikubaluliwa imbali syosa linga ghali pamisi. Imyenda iyi yikutula ukuti iboti lileke ukuyughanika. Isi sikupangisya ukuti abandu aba bali mu boti baye bakufighililiwa nukufika kanunu. Loli imyenda iyi yikubomba kanunu imbombo linga iboti likubuka nkyeni. Mwakufwana itolo, Yehova ikuya pakututula linga tukukindilila ukumbombela mbusubiliwa ntubalilo utupalapala.

9. Ngimba ifibombelo fitu ifyakufufuzila fibaghile ukututula bulebule ukuya naminong’ono amanunu? (Keta kangi ikithuzi.)

⁹ Ngimba tukulondiwa ukubomba isyafiki? Linga mukutamiwa naminong’ono panongwa ya ndamyo isi mukwaghana nasyo, mughelegheleghe ukubomba ifindu ifyamwambepo. Bwanaloli  ukuti mukabaghila ukubomba bo muno mwabombelagha pakwanda, loli mukumbukeghe ukuti Yehova atikughulila ukuti mubombeghe nyingi isi mukabaghila ukufwanisya. (Fwanikisya na Luka 21:​1-4.) Kangi muyeghe nakabalilo kakumanyila pamwibene nukwinong’onelapo. Nongwa yafiki? Ukwendela mugulu lyake, Yehova ikutupa ifindu fingi fyamwambepo ifi fibaghile ukututula ukuti tungatamiwagha fiyo naminong’ono. Ukuti musyaghe ifundo isyakukasya, mubaghile ukubombela ifibombelo fyakufufuzila ifi fikwaghiwa munjobelo yinu. Mwakifwanikisyo, mubaghile ukubombela JW Library® app, Watch Tower Publications Index kangi Buku Lakupenjera Nkhani la Ŵakaboni ŵa Yehova. Monika, uyu tunjobile pakwanda, ayobile ukuti abombile ifibombelo ifi ukuti abwaghe ubulongosi pakabalilo aka atamiwagha naminong’ono. Mwakifwanikisyo, afufuzile amasyu aghakuti “ukukalala.” Utubalilo tumo, afufuzagha amasyu aghakuti, “ifindu ifisitabugholofu” pamo “ukusubiliwa.” Ukufuma apo, abelengagha kangi pabumalilo andagha ukwipilika kanunu. Umwene atile: “Linga nandile ukufufuza, napasyagha fiyo. Loli linga ngukindilila ukubelenga, nafwanagha ngubatiliwa na Yehova. Bo ngukindilila ukubelenga, nasyaghenie ukuti Yehova ikumanya muno ngwipilikila kangi umwene andulagha fiyo.” Ubutuli ubwakufuma kwa Yehova bo ubu, bubaghile ukubatula nanumwe ukukindilila ukuya nulutengano lwamundumbula.​—Sal. 119:​143, 144.

YEHOVA ISAKUTUTULA

10. Ngimba tubaghile ukwipilika bulebule linga twaghene nikindu ikyakutilisya?

¹⁰ Indamyo. Linga twaghene nikindu ikyakutilisya, utubalilo tumo tukuwa amaka nukutamiwa aminong’ono. Tubaghile ukwipilika bo umundu uwakubopa uyu afulele uyu pakwanda abopagha fiyo loli lino ikutamiwa ukwenda. Tubaghile ukutamiwa ukubomba imbombo simo isi pakwanda twafwanisyagha ukubomba pamo tukabaghila ukubomba ifindu ifi pakwanda fyatuhobosyagha. Mwakufwana itolo na Eliya, tubaghile ukuketa ukuti kukafu ukusumuka. Tukulonda ukulambalala itolo. (1 Banyaf. 19:​5-7) Ngimba Yehova afingile ukuti ikuya pakubomba isyafiki linga tuwile amaka?

11. Ngimba njila yiliku iyingi iyi Yehova ikututulila? (Salimo 94:18)

¹¹ Ngimba Yehova abaghile ukututula bulebule? Umwene afingile ukuti ikuya pakututula. (Belenga Salimo 94:18.) Mwakufwana itolo numundu uyu afulele uyu ikulondiwa ubutuli ukuti ande kangi ukwenda kanunu, nanuswe tubaghile ukulondiwa ubutuli ukuti tukindilile ukumbombela Yehova. Utubalilo bo utu, Yehova  ikutusimikisyila ukuti: “Yo une Yehova Kyala winu, nikubakakisya umwe nikubabula nikuti, ‘Mungatilagha. Nisakubatula umwe.’” (Yes. 41:13) Umwalafyale Davidi atuliwe munjila bo iyi. Pakabalilo aka aghanagha nindamyo, umwene ambulagha Yehova ukuti: “Ikiboko kyako ikililo kilinkungasya.” (Sal. 18:35) Loli ngimba Yehova ikututula bulebule?

12. Ngimba Yehova abaghile ukubombesyela abanani ukuti batutule linga tuwile amaka?

¹² Utubalilo twingi, Yehova ikututula mwakubakasya abangi ukuti batutule. Mwakifwanikisyo, bo Davidi awile amaka, ummanyani wake Yonatani alimwendile ukuti akantule namasyu ghakukasya. (1 Samu. 23:​16, 17) Mwakufwana itolo, Yehova alinsalile Elisha ukuti akampe ubulongosi ubununu Eliya. (1 Banyaf. 19:​16, 21; 2 Banyaf. 2:2) Amasiku agha, Yehova abaghile ukubombela abamumbumba, abamanyani pamo abakulumba bakipanga ukuti batutule. Loli linga tusulumenie, tubaghile ukulonda ukuya pabutali nabangi. Tukulonda itolo ukuya twibene. Mo muno bingi bikwipilikila. Ngimba tubaghile ukubomba isyafiki ukuti twambilile ubutuli ubwakufuma kwa Yehova?

13. Ngimba tukulondiwa ukubomba isyafiki ukuti tusayiwe nubutuli ubwakufuma kwa Yehova? (Keta kangi ikithuzi.)

¹³ Ngimba tukulondiwa ukubomba isyafiki? Mughelegheleghe ukuti mungipaghulagha. Linga tukwipaghula, tubaghile ukwanda ukwiyinong’onela itolo twibene nindamyo isi tukwaghana nasyo. Isi sibaghile ukutupangisya ukuti tungasalagha kanunu ifyakubomba. (Mbu. 18:1) Bwanaloli ukuti twesa, utubalilo tumo tukulonda ukuti tuye twibene, fiyofiyo linga ifindu fimo ifibibi fibombiwe pabumi bwitu. Loli linga twipawile kwakabalilo akatali, tubaghile ukukana ubutuli ubwakufuma kubandu aba Yehova ikubabombela ukuti batutule. Yonongwa yake mulibosa muno sibaghile ukuyila, linga mwaghene nindamyo mwambilileghe ubutuli ubwakufuma ku bandu bamumbumba yinu, abamanyani nabakulumba bakipanga. Muketeghe ukuti Yehova ikubabombesyela abene ukuti babatule.​—Mbu. 17:17; Yes. 32:​1, 2.

YEHOVA ISAKUTUSUBISYA

14. Ngimba findu filiku ifi fibaghile ukutupangisya ukuya nubogha?

¹⁴ Indamyo. Utubalilo tumo tubaghile ukwanda ukutila. Mu Baibolo, ababombi ba Kyala abasubiliwa bayobile akabalilo aka baghanagha nindamyo panongwa ya balughu babo nifindu ifingi. (Sal. 18:4; 55:​1, 5) Mwakufwana itolo, nanuswe tubaghile ukususiwa kusukulu, kumbombo, abandu bamumbumba yitu pamo nababoma. Kangi tubaghile ukutila ukufwa panongwa  yabubine. Utubalilo bo utu, tubaghile ukusoba ikyakubomba bo umwana unnandi. Ngimba Yehova abaghile ukututula bulebule patubalilo bo utu?

15. Ngimba Yehova ikuya pakutubombela isyafiki ukufwana na Salimo 94:19?

¹⁵ Ngimba Yehova abaghile ukututula bulebule? Umwene ikutusubisya. (Belenga Salimo 94:19.) Uwamasalimo uyu ikututula ukwinong’onela isya mwana undindwana uyu ikutila kangi ikutoliwa ukulambalala panongwa ya mbelo uwamaka. Mubaghile ukwinong’onela bo tata wake ikwisa kumyake, ikumpimba nukumubatila mmaboko ghake ukufika apa ikughonela utulo. Nalinga ukuti umbelo wamaka ghubaghile ukukindilila loli umwana uyu abaghile ukwipilika ukuti afighililiwe mmaboko gha tata wake. Linga twaghene nindamyo isyakutilisya, tubaghile ukulonda ukuti Tata witu wakumwanya atubatile mpaka pakabalilo aka tubaghile ukwanda ukwipilika kanunu. Ngimba tubaghile ukwambilila bulebule ulusubisyo bo ulu ukufuma kwa Yehova?

16. Ngimba tukulondiwa ukubomba isyafiki ukuti tusayiwe nulusubisyo ulwakufuma kwa Yehova? (Keta kangi ikithuzi.)

¹⁶ Ngimba tukulondiwa ukubomba isyafiki? Utubalilo tosa muyeghe nakabalilo akakwiputa kwa Yehova nukubelenga Amasyu ghake. (Sal. 77:​1, 12-14) Ukufuma apo, linga mwandile ukutamiwa naminong’ono, ikyakwanda mukuya pakwinong’onela isyakusuma ubutuli kwa Tata winu wakumwanya. Mumbule Yehova isi mukutila na isi mukupasya. Ukufuma apo, mupilikisyeghe kumyake mwakubelenga Amasyu ghake, pabumalilo mukuya pakuketa muno ikuya pakubasubisyila. (Sal. 119:28) Mukuya pakuketa ukuti amabuku ghamo agha mu Baibolo ghakukasya fiyo pakabalilo aka mukutila. Mwakifwanikisyo, mubaghile ukusyagha ifundo isyakukasya mu buku lya Jobu, Masalimo nilya Isya Mbupingamu ukongelela na isi Yesu ayobile mu chaputala 6 ikya buku lya Matai. Bo mukwiputa kwa Yehova nukubelenga Amasyu ghake, mukuya pakusubisiwa numwene.

17. Ngimba tubaghile ukuya nulusubilo luliku?

¹⁷ Tubaghile ukuya nulusubilo losa ukuti Yehova ikuya pakuya nanuswe pakabalilo aka twaghene nindamyo pabumi bwitu. Tutikuya pakuya twibene. (Sal. 23:4; 94:14) Yehova afingile ukuti ikuya pakutukasya, pakututula nukutusubisya. Pakuyoba isya Yehova, ilemba lya Yesaya 26:3 likuti: “Yo uwe kubapa ulutengano ulwa naloli bosa aba indumbula syabo sitotike pamyako kangi bikusubila mmyako.” Yonongwa yake mukulondiwa ukunsubila Yehova nukubomba syosa isi mubaghile ukufwanisya ukuti musayiwe nubutuli ubwakufuma kumyake. Linga mukubomba isi, mukuya pakuya bamaka nalinga po pakabalilo aka mwaghene nindamyo.