INKHANI IYAKUMANYILA 4
ULWIMBO 30 Dada Wane, Chiuta Wane na Mubwezi Wane
Yehova wa Kibabilisi Ikikulumba
“Yehova wa kibabilisi ikikulumba.”—YAK. 5:11.
INONG’ONELA
Ngimba ulughano lwa Yehova lukututula bulebule ukuti tuseghelele kumyake nukwipilika ukuti ikutufighilila, ikutupasikisya kangi ikutupa ubutusyo?
1. Ngimba syafiki sikwisa mminong’ono ghinu linga mukwinong’onela isya Yehova?
NGIMBA mwilalusisyemo ukuti Yehova ali bulebule? Linga mukuyoba nawe ndwiputo, ngimba syafiki sikwisa mminong’ono ghinu? Nalinga ukuti tukabaghila ukumbona Yehova, loli Ibaibolo likundingania munjila isyakukindanakindana. Yehova ikuyobiwa ukuya “yo isuba lyitu kangi yo ngulu yitu” kangi likuti umwene “moto ughu ghukulya fyosa.” (Sal. 84:11; Hib. 12:29) Ukwendela nkisetuka, Ezekieli aketile ukuti Yehova afwene nilibwe lya safiri, afwanagha moto ghukwaka, kangi afwanagha ipingafula. (Eze. 1:26-28.) Lumo mubaghile ukuswigha linga mukuketa isi Ibaibolo likuyoba isyakufwana namuno Yehova ayilile.
2. Ngimba findu fiki fibaghile ukupangisya ukuti kuyeghe kukafu ukuseghelela kwa Yehova?
2 Panongwa yakuti tukabaghila ukumbona Yehova, kubaghile ukuya kukafu ukusubila ukuti atughanile fiyo. Lumo tubaghile ukutoliwa ukusubila ukuti Yehova atughanile panongwa ya findu ifi fyatubonekile pabumi bwitu. Lumo abapapi bitu batubombelagha ifyankhaza. Yehova ikupilikisya muno tukwipilikila kangi asimenye ukuti kubaghile ukuya kukafu ukuseghelela kumyake. Ukuti atutule, ikubombela Ibaibolo ukuti tumanye utuyilo twake.
3. Nongwa yafiki tukulondiwa ukwinong’onela fiyo isya lughano lwa Yehova?
3 Akayilo kamo aka Yehova ikumanyiwa nako fiyo lo lughano. Ibaibolo likuti “Kyala yo lughano.” (1 Yoh. 4:8) Fyosa ifi ikubomba ikubombela ndughano. Ulughano lwa Kyala luli nikisa kangi lwamaka. Umwene ikubanangisya ulughano nabandu aba bakangana. (Mat. 5:44, 45) Munkhani iyi, tukuya pakuyobesania isya Yehova nulughano lwake. Linga tukumanyila nyingi isya Kyala po apa tukungana fiyo.
YEHOVA ATUGHANILE FIYO
4. Ngimba ikibabilisi kya Yehova kikubapangisya ukuti mwipilikeghe bulebule? (Keta kangi ikithuzi.)
4 “Yehova wa kibabilisi ikikulumba.” (Yak. 5:11) Ibaibolo likumfwanikisya Yehova namama uyu ali nikibabilisi kumwanake. (Yes. 66:12, 13) Ngimba mama ikumpwelelela bulebule umwanake unnandi mwalughano? Ikumpaghata pamalundi ghake mwalughano kangi ikuyoba nawe mmasyu amololo. Linga ikulila pamo abinile, mama ikuketesya ukuti umwanake atuliwe munjila inunu. Linga twaghene nindamyo, Yehova ikutunangisya ulughano lwake. Uwamasalimo yumo alembile ukuti: “Apa linga isya kwiyaya sya mu ndumbula yangu nyingi, yo uwe kunsangalusya nukumba amaka.”—Sal. 94:19.
“Nisakubasangalusya umwe, bo muno unna ikubombela numwanake” (Keta ipalagilafu 4)
5. Ngimba ulughano ulusubiliwa ulwa Yehova lukubatula bulebule?
5 Yehova nsubiliwa. (Sal. 103:8) Umwene atikuya pakuleka ukutunangisya ulughano nalinga tubombile ikindu kimo ikibibi. Abaisraeli bansambukilagha Yehova utubalilo twingi. Loli linga bipilike ikitima pambibi isi babombile nukusileka, Kyala abanangisyagha ulughano. Mwakifwanikisyo, ababulile Abaisraeli ukuti: “Papo uli wa ntengo fiyo kumyangu, uli ngindikiwa kumyangu kangi uli nganiwa.” (Yes. 43:4, 5) Yehova atughanile nanuswe mwakufwana itolo. Tukulondiwa ukunsubila utubalilo tosa. Nalinga tubaghile ukubomba ubutulanongwa ubunywamu, Yehova atikutuleka. Linga tulapile nukughomokela kumyake, tukuya pakuketa ukuti akali atughanile. Umwene afingile kuntulanongwa ukuti “isakunhobokela fiyo.” (Yes. 55:7) Ibaibolo likuti ukuhobokeliwa kukutwala “utubalilo twa kukabilamo amaka ukufuma kwa Yehova.”—Imbo. 3:20.
6. Ngimba ilemba lya Zekariya 2:8, likutumanyisya isyafiki isya Yehova?
6 Belenga Zekariya 2:8. Panongwa yakuti atughanile, Yehova ikutupilikisya mwanakalinga muno tukwipilikila kangi itendekisye ukutufighilila. Umwene sikumbaba fiyo linga tukutamiwa. Yonongwa yake tukusubila ukuti ikuya pakwamula ulwiputo lwitu ulwakuti: “Umbike bununu bo yi mboni ya nkisighe.” (Sal. 17:8) Ikisighe kyonywa kangi kighaba kyakulondiwa fiyo pambili wa mundu. Fifwene itolo ukuti Yehova atighi, ‘Uyu linga ikubafulasya umwe mwe bandu bangu, ikukifulasya ikindu ikya padela kumyangu.’
7. Nongwa yafiki tukulondiwa ukukasya ulusubilo lwitu ndughano lwa Yehova?
7 Yehova ikulonda ukuti musubileghe ukuti abaghanile umwe. Loli asimenye kangi ukuti panongwa ya findu ifi fyabombiwe kunyuma, tubaghile ukukayikila linga atughanile naloli. Lumo lino tukwaghana nindamyo yimo iyi yikutupangisya ukuti tutoliweghe ukusubila ukuti Yehova atughanile. Ngimba findu fiki fibaghile ukututula ukuti tunsubileghe fiyo? Tuketeghe muno Yehova ikunangisyila ulughano lwake kwa Yesu, abapakiwa nakumyitu twesa.
MUNO YEHOVA IKUNANGISYILA ULUGHANO LWAKE
8. Nongwa yafiki Yesu asubilagha ukuti Tata wake anganile?
8 Kwa fyinja fingi, Yehova nu Mwanake unganiwa bakusyagha ubumanyani bwabo nulughano. Ubumanyani bwabo bulipo kwa fyinja fingi. Yehova ayobile mwakupilikiwa kanunu muno anganile umwanake Yesu, bo muno tukubelengela pa Matai 17:5. Yehova abaghile ukuyoba itolo ukuti, ‘Uyu yo nkundwe.’ Mmalo mwake, umwene alondagha ukuti uswe tumanye muno anganile fiyo Yesu. Yonongwa yake atile, “Mwanangu unkundwe.” Yehova ahobokagha fiyo na Yesu panongwa yakuti aliyipile ukubika ubumi bwake. (Ef. 1:7) Yesu ali nulusubilo losa ukuti Tata wake anganile. Utubalilo twingi Yesu ayobagha nulusubilo losa ukuti Tata wake anganile.—Yoh. 3:35; 10:17; 17:24.
9. Ngimba masyu ghaliku agha ghikunangisya ukuti Yehova abaghanile abapakiwa? Lingania. (Baroma 5:5)
9 Yehova ikunangisya kangi ukuti abaghanile abapakiwa. (Belenga Baroma 5:5.) Inong’onela amasyu aghakuti “onile itolo.” Ibuku limo lighalingenie amasyu agha ukuti “onile itolo ukufwana lusoko.” Amasyu agha ghikunangisya pabwelu ukuti Yehova abaghanile fiyo abapakiwa. Abapakiwa basimenye ukuti “bali ndughano lwa Kyala.” (Yuda 1) Untumiwa Yohani alingenie muno abapakiwa bikwipilikila apa alembagha ukuti: “Keta ko kutughana kuki Tata, ukuti uswe tuyobiweghe ukuya banake.” (1 Yoh. 3:1) Ngimba Yehova abaghanile bene abapakiwa? Hayi. Yehova ikunangisya ukuti atughanile twesa.
10. Ngimba buketi buliku ubunywamu ubu bukunangisya ukuti Yehova atughanile?
10 Ngimba njila yiliku iyakwanda iyi Yehova ikunangisya ukuti atughanile? Ikitabulilo, yo njila yakwanda iyi Yehova anangisye ukuti atughanile ukukinda umundu aliwesa. (Yoh. 3:16; Rom. 5:8) Yehova alintumile umwanake uwa padela kangi alitikisye ukuti asabafwile abandu ukuti imbibi syabo, sihobokeliwe nukuya nawe pabumanyani. (1 Yoh. 4:10) Linga tukwinong’onela fiyo untengo ughu Yehova na Yesu bahombile, tukupilikisya kanunu ukuti banganile fiyo umundu aliwesa pamwene. (Gal. 2:20) Ikitabulilo kyabikiwe panongwa yakuti Yehova anangisye ubugholofu bwake. Ikyabupe iki kikunangisya ukuti atughanile fiyo. Yehova anangisye ukuti atughanile mwakubika ikindu iki kyali kyapamwanya fiyo kumyake ukuya ikemo. Yehova alitikisye ukuti Umwanake atamiwe nukufwa mmalo mwa uswe.
11. Ngimba tukumanyilapo isyafiki pa Yeremiya 31:3?
11 Bo muno tuketile, Yehova atughanile kangi ikutubula muno atughanile. (Belenga Yeremiya 31:3.) Yehova atukwabile kumyake panongwa yakuti atughanile. (Fwanikisya na Ukukumbusya Indaghilo 7:7, 8.) Nakimo ikindu pamo umundu uyu abaghile ukutupaghula kulughano ulu. (Rom. 8:38, 39) Ngimba ulughano ulu lukupangisya ukuti umwe mwipilikeghe bulebule? Belenga Salimo chaputala 23 ukuti mukete muno Davidi alipilikile panongwa yakuti Yehova alinganile.
NGIMBA ULUGHANO LWA YEHOVA LUKUBAPANGISYA UKUTI MWIPILIKEGHE BULEBULE?
12. Ngimba mubaghile ukulingania bulebule mbupimba Salimo chaputala 23?
12 Belenga Salimo 23:1-6. Salimo chaputala 23, lwimbo ulu lukunangisya ulusubilo ulwakuti Yehova atughanile kangi ali nikibabilisi kumyitu. Davidi uyu alembile salimo ili, alingenie ubumanyani ubu ali nabo na Yehova uyu alinjobile ukuti Ntimi wake. Davidi ipilikagha ukuti afighililiwe panongwa yakuti alimwitikisye Yehova ukuti andongosyeghe kangi ansubilagha fiyo. Davidi asimenye ukuti Yehova ayagha pakukindilila ukunnangisya ulughano pabumi bwake bosa. Nongwa yafiki Davidi asubilagha isi?
13. Nongwa yafiki Davidi asubilagha ukuti Yehova ikumpwelelela?
13 “Ndikupondwagha nakamo.” Davidi ayobile amasyu agha panongwa yakuti akabalilo kosa, Yehova ampagha ifi alondagha. Davidi asimenye kangi ukuti ali mmanyani wake papo Yehova alinganile. Yonongwa yake asubilagha ukuti fyosa ifi fibaghile ukwisakumbonekela nkyeni, Yehova ikuya pakukindilila ukumpwelelela. Panongwa yakuti Davidi asubilagha ukuti Yehova anganile kangi ikuya pakumpwelelela, fyalintulile ukuti aleke ukutila. Mmalo mwake, ali walusekelo kangi ikutisiwagha na ifi ali nafyo.—Sal. 16:11.
14. Ngimba Yehova abaghile ukutupwelelela bulebule mwalughano?
14 Yehova ikutupwelelela mwalughano, fiyofiyo linga ifindu ifibibi fitubonekile pabumi bwitu. Umulumbu Claire, a uyu abombile pa Beteli kwa fyinja 20, amahala ghalimmalikile bo indamyo inywamu sitikumalika kumbumba yabo. Umbili wa tata wake wafwile ulubafu lumo, unnung’una wake alyepusiwe nkipanga, ibizinesi iyi abapapi bake babombagha yamalike kangi bakali ninyumba. Ngimba Yehova abapwelelile bulebule mwalughano? Claire atile: “Yehova aketesyagha ukuti imbumba yitu yali nafyo fyosa ifi twalondiwagha isiku lililyosa. Utubalilo twingi, Yehova atupagha ifindu fingi ukukinda ifi twalondiwagha. Ngwinong’onela muno Yehova atutulilagha kangi ndikwibwa ukuti atughanile. Ukukumbuka ifindu ifi kukundula ukuti ngindilileghe ukumbombela Yehova ndusekelo linga naghene nindamyo pabumi bwangu.”
15. Nongwa yafiki Davidi alipilike kanunu? (Keta kangi ikithuzi.)
15 “Ikughunyaghalusya umoyo wangu.” Utubalilo tumo, Davidi atamiwagha naminong’ono panongwa yandamyo isi aghanagha nasyo. (Sal. 18:4-6) Loli ulughano nikibabilisi kya Yehova, fyampangisyagha ukuti ipilikeghe kanunu mundumbula yake. Yehova andongolelagha ummanyani wake uyu ikutamiwa “pa lukubo lwa ndeka inunu” na “ku misi amatalalifu.” Ifyakukongapo fyake, Davidi akabagha amaka nukukindilila ukumbombela Yehova ndusekelo.—Sal. 18:28-32.
Nalinga ukuti Davidi atamiwagha naminong’ono, ikibabilisi nulughano lwa Yehova fyampagha amaka (Keta ipalagilafu 15)
16. Ngimba ulughano lwa Yehova lwabatulile bulebule umwe?
16 Momuno siyilile amasiku agha. Ibaibolo likuti, “Ikisa kya Yehova nulughano lwake fyo fitikumalika” linga tukwaghana nindamyo pabumi bwitu. (Ingu. 3:22; Kolos. 1:11) Inong’onela isi alyaghene nasyo Rachel. Syalimbabile fiyo bo undume wake andekile umwene na Yehova nkabalilo ka mbungo ya COVID-19. Ngimba Yehova alimbombile isyafiki umulumbu uyu? Rachel atile: “Yehova aketesyagha ukuti ngwipilika ukuti nganiwe. Alimbele abamanyani bingi aba nangalagha nabo, bandumilagha amameseji namalemba aghakukasya, bamwemwetelagha kangi bakindililagha ukungumbusya ukuti Yehova ikumbwelelela. Ngunndaghisya Yehova utubalilo twingi panongwa yakumba imbumba iyalughano iyi.”
17. Nongwa yafiki Davidi akatilagha “nakalughu nakamo”?
17 “Ndikutila nakalughu nakamo; papo uwe uli nanine.” Utubalilo twingi ubumi bwa Davidi bwayagha pangozi kangi ayagha nabalughu bingi abamaka. Loli panongwa yakuti Yehova alinganile, umwene iketagha ukuti afighililiwe fiyo. Davidi aketagha ukuti Yehova ayagha nawe pandamyo yiliyosa kangi alinsimikisyile ukuti ikuya pakuntula. Yonongwa yake alimbile ukuti: “[Yehova] alinkumboka une kuli fyosa ifi nafitilagha.” (Sal. 34:4) Nalinga ukuti Davidi atilagha fiyo, loli afwanisye ukumasya ubogha bwake panongwa yakuti asimenye ukuti Yehova anganile.
18. Ngimba amasyu gha Yehova agha ghikutusimikisyila ukuti atughanile ghabaghile ukutukasya bulebule linga tukutila?
18 Ngimba ukusubila ukuti Yehova atughanile kukutukasya bulebule linga tukutetemesiwa nindamyo yimo? Susi uyu ikubomba ubupayiniya alingenie muno umwene nundume wake balipilikile bo umwanabo undumyana ighoghile mwene. Susi atile, “Linga ikindu ikyakitima kikubonekile pabumi bwako, fikubaba fiyo kangi kwanda ukutila ukuti ifindu fimo ifibibi fiyo fikuya pakukubonekela. Loli ikibabilisi kya Yehova kitupangisye ukuti twipilikeghe ukuti tufighililiwe fiyo.” Rachel, uyu tunjobile pakwanda, atile: “Isiku limo pakilo bo ikitima kingolile fiyo kangi bo ngutila fiyo nukwiyaya, naliputile kwa Yehova. Bo mmalile itolo ukwiputa, nalipilike ukuti Kyala ayisubisye indumbula yangu. Nalekile ukulila bo muno mama ikubombela numwanake kangi pabumalilo naghonile utulo. Ndisakwibwamo isi alimbombile pisiku lila.” Unkamu Tasos uyu nkulumba wakipanga, alikele mujele kwa fyinja 4 panongwa yakukana ukwingila ubusilikali. Ngimba aketile bulebule ukuti Yehova anganile kangi ikumpwelelela? Umwene atile: “Yehova alimbele ifindu fingi ukukinda ifi nalondagha. Isi syalindulile ukuti nunsubileghe nindumbula yosa. Mwakongelelapo, ukwendela mwambepo wake, Yehova alimbele ulusekelo nalinga ukuti mujele ghali malo mabibi. Isi syalinsimikisyile ukuti linga ngunsubila fiyo Yehova, po apa nguketa naloli ukuti anganile. Yonongwa yake nalyandile ukubomba ubupayiniya bo ndi mujele.”
TUSEGHELELEGHE KWA KYALA WITU UWA LUSUBISYO
19. (a) Ngimba tubaghile ukwiputa bulebule linga tusimenye ukuti Kyala atughanile? (b) Ngimba masyu ghaliku agha ghikutuhobosya pakuyoba isya muno Yehova atughanile? (Keta ibokosi ilyakuti “ Amasyu Agha Ghikututula Ukuti Twipilikeghe Ukuti Yehova Atughanile.”)
19 Ifyakubombiwa fyosa ifi fyababonekile abandu aba tuyobesenie, fikunangisya ukuti Yehova, “Kyala uwa lughano,” ali nanuswe. (2 Kor. 13:11) Anganile umundu aliwesa pamwene. Tukusubila ukuti “ikisa kyo kikunsyungutila uyu ikunsubila Yehova.” (Sal. 32:10) Linga tukuketa nukwinong’onela fiyo muno ikutupwelelela, po apa tukuseghelela fiyo kumyake. Tukulondiwa ukunsuma kisitakutila nukumbula ukuti tukulonda ukuti atunangisyeghe ulughano lwake. Tumbuleghe syosa isi tukupasya pamo ukwiyaya nasyo panongwa yakuti tukusubila ukuti ikupilikisya kangi ikulonda ukututula.—Sal. 145:18, 19.
20. Ngimba ulughano lwa Yehova lukutukwabila bulebule kumyake?
20 Bo muno tukuseghelela kumoto pisiku ili kutalele, nanuswe tukuseghelela kulughano lwa Yehova. Ulughano lwa Yehova lwamaka kangi lwakibabilisi. Yonongwa yake mukulondiwa ukuya balusekelo panongwa yakuti Yehova abaghanile. Kangi nanumwe mutighi: “Nunganile Yehova.”—Sal. 116:1.
NGIMBA MUBAGHILE UKWAMULA BULEBULE?
-
Ngimba ulughano lwa Yehova luli bulebule?
-
Nongwa yafiki mukusubila ukuti Yehova abaghanile fiyo?
-
Ngimba mukwipilika bulebule panongwa yakuti Yehova abaghanile?
ULWIMBO 108 Chitemwa cha Chiuta
a Ingamu simo sichenjile.