1-2. (a) Ukufwana nulukomelesyo lwa Yesu ulu lukwaghiwa pa Matai 28:18-20, ngimba mbombo yiliku inywamu iya kipanga kya Bukristu? (b) Ngimba malalusyo ghaliku agha tukuya pakuyobesania mu nkhani iyi?

ABAFUNDIWA babaghile ukuti bahobwike fiyo bo babungene mumbali mu kyamba. Bo Yesu asyukile, abalaghile ukuti bakaghane nawe pamalo agha. (Mat. 28:16) Aka kabaghile ukuti kali ko kabalilo aka “abasetukile abitiki pakabalilo kamokene aba bakindile 500.” (1 Kor. 15:6) Nongwa yafiki Yesu ababulile abafundiwa bake ukuti bakaghane ku malo agha? Ukuti akabapepo imbombo iyakulondiwa fiyo, umwene atile: “Amubukeghe, lelo, mukabapeleghe bafundiwa abandu ifikolo fyosa.”—Belenga Matai 28:18-20.

² Abafundiwa aba bapilike amasyu gha Yesu balingisiwe mu gulu lya kipanga kya Bukristu kunyuma. Imbombo inywamu iyi ikipanga kyalondiwagha ukubomba ko kupela abafundiwa bingi aba Kristu. * Amasiku agha, filipo ifipanga fingi ifya Bakristu ba bwanaloli pa kisu kyosa, kangi imbombo inywamu iyafipanga ifi yitikuchenja. Mu nkhani iyi, tukuya pakuyobesania amalalusyo 4: Nongwa yafiki ukupela abafundiwa kwakulondiwa fiyo? Ngimba sikongelelapo isyafiki? Ngimba Abakristu bosa babaghile ukutulapo ukupela abafundiwa? Kangi nongwa yafiki tukulondiwa ukuya bololo pambombo iyi?

3. Ukufwana na Yohani 14:6 na 17:3, nongwa yafiki imbombo yakupela abafundiwa yakulondiwa fiyo?

³ Nongwa yafiki imbombo yakupela abafundiwa yakulondiwa fiyo? Panongwa yakuti abafundiwa bene ba Kristu bo babaghile ukuya bamanyani ba Kyala. Mwakongelelapo, bene aba bikunkonga Kristu bo bali nu bumi ubununu lino kangi bali nulusubilo ulwakuti bisakuhobokagha nu bumi bwa bwila na bwila nkyeni. (Belenga Yohani 14:6; 17:3.) Yesu atupele ubudindo ubwakulondiwa fiyo, loli tutikubomba imbombo iyi patwibene. Untumiwa Pauli alembile isya mwene nisya bamanyani bake ukuti: “Namanga uswe tuli babombanisi pambombo ya Kyala.” (1 Kor. 3:9) Ulu lusako lunywamu fiyo ulu Yehova na Kristu batupele twe bandu abasitabugholofu!

4. Ngimba tukumanyilako isyafiki ukufuma ku kifwanikisyo kya Ivan na Matilde?

⁴ Imbombo yakupela abafundiwa yikutupa ulusekelo ulunywamu. Inong’onela ikifwanikisyo kya Ivan nunkasi wake, Matilde, ku Colombia. Abene balimfumukisye uwakilumyana uyu ingamu yake yo Davier, uyu ababulile ukuti: “Ngulonda ukuchenja pabumi bwangu, loli ngutoliwa.” Davier amenye fiyo ukulwa, abombelagha imikota iyakusyutisya ubongo, anwagha fiyo ubwalwa, kangi ikalagha nikibwezi kyake, Erika. Ivan alingenie ukuti: “Twalyandile ukumanyila nawe Ibaibolo kangi akaya kabo kali kubutali fiyo, twendagha panjinga akabalilo akatali kangi imisebo iyi twendagha yali namatope. Bo aketile ukuti Davier ikuchenja akayilo kake, Erika yope alyandile ukumanyila Ibaibolo.” Bo akabalilo kakindilepo, Davier alekile ukunwa imikota iyakusyutisya ubongo, ukunwa ubwalwa, nukulwa. Kangi balyeghene na Erika. Matilde atile: “Bo Davier na Erika bosiwe mu 2016, twakumbukilagha amasyu gha Davier agha alighanile ukuyoba ukuti, ‘Ngulonda ukuchenja, loli ngutoliwa.’ Loli twahobwike fiyo bo achenjile nukosiwa.” Kisita kukayika, tukuya balusekelo fiyo linga tukubatula abandu ukuti baye bamanyili ba Kristu.

5. Ngimba yo njila yiliku iyakwanda iyi tukulondiwa ukubomba ukuti tupele abafundiwa?

⁵ Injila iyakwanda iyi tukulondiwa ukubomba ukuti tupele abafundiwa ko “kulonda” abandu aba bikulonda ukumanyila isya Yehova. (Mat. 10:11). Tukunangisya kuti tuli Baketi ba Yehova, linga tukufumusya ku bandu bosa aba tukwaghana nabo. Tukunangisya kangi ukuti tuli Bakristu ba bwanaloli mwakukonga ululaghilo lwa Yesu ulwakuti tufumusyeghe.

6. Ngimba findu fiki ifi fibaghile ukututula ukuti tufumusyeghe kanunu?

⁶ Abandu bamo bikulonda fiyo ukumanyila ubwanaloli bwa mu Baibolo, loli bingi aba tukwaghana nabo akakwanda babaghile ukuboneka ukuti batikulonda ukumanyila. Loli tukulondiwa ukubakasya ukuti bamanyile nyingi. Linga tukulonda ukuti tufwanisyeghe ukufumusya kanunu, tukulondiwa ukwitendekesya kanunu. Tusaleghe inkhani isyakulondiwa isi sibaghile ukubahobosya abandu aba tukwaghana nabo. Pabumalilo mwitendekesye muno mukwakuyobela inkhani isi musalile.

7. Ngimba tubaghile ukwanda bulebule ukuyobesania nu mundu, kangi nongwa yafiki kwakulondiwa fiyo ukupilikisya nukunangisya ulughindiko?

⁷ Mwakifwanikisyo mubaghile ukundalusya umwenenyumba ukuti: “Ngimba ubaghile ukuyobapo aminong’ono ghako pankhani iyi? Indamyo nyingi isi tukwaghana nasyo amasiku agha sikubapalamasya abandu bosa pa kisu kyosa. Ngimba kwinong’ona ukuti tukulondiwa iboma lya bandu ukuti limasye indamyo isi tukwaghana nasyo?” Ukufuma apo mubaghile ukuyobesania ilemba lya Danieli 2:44. Pamo  mubaghile ukundalusya umundu yumo ukuti: “Ngimba kwinong’ona ukuti yo njila yiliku inunu iyakubamanyisya abana ukuti baye na kayilo akanunu? Ngulonda ukupilika aminong’ono ghako pankhani iyi.” Pabumalilo muyobesanie ilemba lya Ukukumbusya Indaghilo 6:6, 7. Inkhani yiliyosa iyi musalile ukuti muyobesanie, mwinong’oneleghe tasi isya bandu aba bikuya pakubapilikisya. Mwinong’oneleghe muno sibaghile ukubatulila linga bamanyile isi Ibaibolo likumanyisya. Linga mukuyobesania nabo, mukulondiwa ukubapilikisya fiyo nukughindika aminong’ono ghabo. Ukubomba isi kukuya pakututula ukubapilikisya kanunu, kangi bope kubaghile ukuya kupepe ukupilikisya kanunu linga mukuyoba nabo.

8. Nongwa yafiki tukulondiwa ukughelaghela ukukindilila ukupanga amabulendo aghakughomokelako?

⁸ Bo umundu akali ukusala ukumanyila Ibaibolo, mukulondiwa ukuya nakabalilo kangi nukwiyipa ukupanga amabulendo aghakughomokelako. Nongwa yafiki? Panongwa yakuti utubalilo tumo abandu bakabaghila ukwaghiwa pakaya kabo linga tukughomokelako akabubili. Kangi mukulondiwa ukughomokelako utubalilo twingi bo umwenenyumba akali ukusala ukuti mumanyileghe nawe Ibaibolo. Tukumbukeghe ukuti imbeyu yikukula mwanakalinga linga yikoneleliwa amisi kabilikabili. Mwakufwana itolo, umundu uyu ikulonda ukumanya nyingi, ulughano lwake kwa Yehova na Yesu lukukula fiyo linga tukuyobesania nawe Amasyu gha Kyala kabilikabili.

9-10. Nongwa yafiki Unkristu aliwesa ikulondiwa ukutulapo ukubagha abandu abandumbula inunu?

⁹ Unkristu aliwesa ikulondiwa ukutulapo ukubagha abandu abandumbula inunu. Imbombo iyi tubaghile ukuyifwanikisya na bandu aba bikulonda umwana uyu ayongile. Munjila yiliku? Inong’onela isya mwana uwa fyinja fitatu uyu  ayongile pakaya. Abandu bakufwana 500 balyandile ukundonda umwana uyu. Bo ghakindilepo amaawala 20 ukufuma apa umwana uyu ayongile, umundu yumo alimwaghile mu ngunda wafilombe. Umundu uyu akalondagha ukuti abandu bampale panongwa yakuti alimwaghile umwana. Umwene atile: “Balipo abandu bingi aba baliyipile ukuti umwana uyu aghiwe.”

¹⁰ Abandu bingi aba bali bo umwana uyu. Bikwiketa ukuti bayongile. Bakaya nulusubilo nalumo, loli bikulonda ubutuli. (Ef. 2:12) Twebandu abakukinda 8,000,000 tukubomba pampene ukuti tubaghe abandu aba. Mukabaghila ukumwagha pamwibene umundu uyu ikulonda ukuti mumanyileghe nawe Ibaibolo. Loli, abafumusi abangi aba mukufumusya nabo nkighaba kimokyene babaghile ukumwagha umundu uyu ikulonda ukumanyila ubwanaloli ubu buli M’masyu gha Kyala. Linga unkamu pamo umulumbu amwaghile umundu uyu ikulonda ukuya m’manyili wa Kristu, ikuhoboka fiyo.

11. Nalinga ukuti mutikumanyila Ibaibolo nu mundu, ngimba mo munjila siliku isingi isi mubaghile ukutulapo ukupela abafundiwa?

¹¹ Nalinga ukuti mutikumanyila Ibaibolo nu mundu lino, loli mubaghile ukutulapo ukupela abafundiwa munjila isingi. Mwakifwanikisyo, mubaghile ukubambilila abapya nukuya nabo pabumanyani linga bisile ku Nyumba ya Bunyafyale. Linga mukubanangisya ulughano munjila bo iyi, mubaghile ukubatula ukumanya ukuti tuli Bakristu ba bwanaloli. (Yoh. 13:34, 35) Isi mukwamula pakabalilo ka ngomano, nalinga ukuti mukwamula mbupimba, mubaghile ukubatula abapya muno babaghile ukunangisyila ulwitiko lwabo munjila inunu. Mubaghile kangi ukwingila numfumusi umpya mubufumusi nukuntula muno abaghile ukubombela amalemba pakumanyila na bandu. Linga tukubomba isi, tukuya pakum’manyisya ukuti ankongeghe Kristu.—Luka 10:25-28.

12. Ngimba tukulondiwa ukuya na maluso aghapadela ukuti tupele abafundiwa? Lingania.

¹² Tutikulondiwa ukwinong’ona ukuti tukulondiwa ukuya na maluso aghapadela ukuti tubamanyisye abangi ukuya bamanyili ba Yesu. Nongwa yafiki? Inong’onela ikifwanikisyo kya Faustina, uyu ikwikala ku Bolivia. Umwene akamenye ukubelenga bo andile ukubungana na Baketi ba Yehova. Ukufika lino, umwene amanyile panandi ukubelenga. Lino osiwe, kangi ikuhoboka ukubamanyisya abangi. Utubalilo twingi, umwene ikubamanyisya Ibaibolo abandu 5 sabata aliwesa. Nalinga ukuti Faustina atikubelenga kanunu ukufwana na bamanyili bake aba Baibolo, loli umwene abatulile abandu 6 ukuti bosiwe.—Luka 10:21.

13. Nalinga ukuti tukuya bize, ngimba lusayo luliku ulu tubaghile ukuya nalo linga tukupela abamanyili?

¹³ Abakristu bingi bikuya bize fiyo panongwa yakuti bali nifindu fingi ifyakulondiwa ukuti babombe. Nalinga mo siyilile, abene bikufwanisya ukuya nakabalilo akakumanyila na bandu  Ibaibolo kangi pabumalilo bikuya balusekelo fiyo. Inong’onela ikifwanikisyo kya Melanie. Umwene alelagha mwene umwana undindwana uwa fyinja 8, ku Alaska. Kangi abombagha imbombo nunkupwelelela umpapi wake uyu ali na kansa. Melanie ali Nketi mwene wa Yehova uyu ali mu tawuni yabo. Umwene akabalilo kosa iputagha kwa Kyala ukuti ampeko amaka aghakubukila mubufumusi nalinga ukuti kwatalalagha, umwene alondagha ukumwagha umundu yumo uwakuti amanyileghe nawe Ibaibolo. Pabumalilo alyaghene na Sara, uyu ahobwike fiyo ukumanya ukuti Kyala ali ningamu. Bo akabalilo kakindilepo, Sara alitikisye ukumanyila Ibaibolo. Melanie atile: “Pachihano namayolo, nakatele fiyo, loli nabukile numwanangu ukwakumanyila na Sara Ibaibolo kangi twesa twasayiwe fiyo. Twahobwike fiyo ukwamula amalalusyo agha Sara alalusyagha, kangi twali nulusekelo bo andile ukuya pabumanyani na Yehova.” Mwabukifu Sara alifimbilisye ukususiwa, alekile ukubuka ku tchalichi lyake, pabumalilo alyosiwe.

14. (a) Ngimba aba bikupela abamanyili bafwene bulebule nabalobi? (b) Ngimba amasyu gha Pauli agha ghali pa 2 Timoti 4:1, 2 ghikubakasya bulebule?

¹⁴ Nalinga ukuti mukamwagha umundu uyu ikulonda ukuya m’manyili, komma ukuwa amaka mukindilileghe ukulonda abamanyili. Mukumbukeghe ukuti Yesu afwanikisye ukupela abamanyili nukuloba. Abalobi babaghile ukuloba akabalilo akatali kisita kukola iswi. Utubalilo tumo bikuloba pakilo pamo nulubunju fiyo, kangi utubalilo tumo bikulondiwa ukwenda ubulendo ubutali. (Luka 5:5) Mwakufwana itolo, abafumusi bamo bikumalila akabalilo akatali “ukulonda abandu” pakabalilo na malo  aghakukindanakindana. Nongwa yafiki? Ukuti baghane na bandu bingi. Bosa aba bikwiyipa munjila bo iyi, bikusayiwa fiyo panongwa yakuti bikwaghana na bandu aba bikulonda ukupilika amasyu gha Kyala. Ngimba mubaghile ukughela ukufumusya pakabalilo aka mubaghile ukwaghana na bandu pamo kumalo kuno abandu bingi bikwaghiwako?—Belenga 2 Timoti 4:1, 2.

15. Nongwa yafiki tukulondiwa ukuya bololo linga tukumanyila Ibaibolo na bandu?

¹⁵ Nongwa yafiki tukulondiwa ukuya bololo linga tukumanyila Ibaibolo na bandu? Ikifukwa kimo kyo kyakuti tukulondiwa ukubomba nyingi ukukinda ukuntula itolo ukumanya nukukonga isi tukusubila ukufuma mu Baibolo. Tukulondiwa kangi ukuntula um’manyili ukum’manya nukungana Yehova. Kangi ukongelelapo pakum’manyisya um’manyili isi Yesu ikulonda ku babombi bake, tukulondiwa ukuntula ukumanya muno abaghile ukuyila Nkristu wanaloli. Tukulondiwa ukuntula mbololo linga ikutamiwa ukukonga ifundo sya mu Baibolo. Abamanyili bamo babaghile ukuchenja mwanakalinga utuyilo twabo namuno bikwinong’onela. Loli bamo babaghile ukwegha akabalilo akatali ukuti bachenje.

16. Ngimba mumanyileko isyafiki ukufuma kukifwanikisyo kya Raúl?

¹⁶ Umishonale yumo ku Peru ali nifyakukongapo ifinunu panongwa yakuti ali mololo. Umwene atile “Namanyile amabuku mabili nu m’manyili wa Baibolo uyu ingamu yake yo Raúl. “Loli akindilile ukwaghana nindamyo pabumi bwake. Imbumba yake yali nindamyo nyingi, bayobagha amasyu aghakutuka, kangi ali na bana aba bakangindikagha. Umwene isagha ku ngomano akabalilo kosa, yonongwa yake nakindilile ukuntula pampene nimbumba yake. Bo ifyinja fitatu fikindilepo nalyaghene nawe, umwene alitikisiwe ukosiwa.”

17. Ngimba tukwisa pakuyobesania isyafiki mu nkhani iyakukongapo?

¹⁷ Yesu atubulile ukuti “amubukeghe . . . mukabapeleghe bafundiwa abandu ifikolo fyosa.” Ukuti tufwanisye imbombo iyi, tukulondiwa ukuyobesania na bandu aba tukindene nabo aminong’ono, ukongelapo aba batikwiputa pamo aba batikusubila ukuti Kyala aliko. Mu nkhani iyakukongapo yikwisa pakulingania muno tubaghile ukufumukisya amasyu amanunu ku bandu abakukindanakindana.