1. Ngimba findu fiki ifi fichenjile mfyisu fimo mfyinja ifi fikindilepo mwalulu?

KWA fyinja fingi, abandu bingi pa kisu kyosa ikyapasi bikuboneka ukuti bali nulusubilo ulwakukindanakindana pankhani iyakwiputa. Loli amasiku agha ifindu fichenjile fiyo. Abandu bingi bakaya nitchalichi ilyakwiputa. M’malo mwake, mfyisu fimo abandu bingi bikuyoba ukuti bakaya nitchalichi ilya kwiputa. *—Mat. 24:12.

2. Ngimba fifukwa filiku fimo ifi fikupangisya ukuti abandu bingi bangiputagha?

² Nongwa yafiki abandu bingi bikuyoba ukuti bakaya nitchalichi? * Bamo bikusyobiwa nifindu ifyakumbili ifi bali nafyo pamo panongwa yandamyo isi bikwaghana nasyo. (Luka 8:14) Bamo aba biputagha lino balekile ukusubila ukuti Kyala aliko. Abangi bikusubila ukuti Kyala aliko loli bikwinong’ona ukuti itchalichi likaya nimbombo, litikuhobosya, litikukolelana ni sayansi kangi likuyoba ifindu ifyakufwana itolo. Babaghile ukupilika ku binabo, ku bamanyisi, m’mabuku pamo pa intaneti ukuti ifindu fyabumi fyachenjile, loli abene utubalilo twingi batikuya nififukwa ifyakupilikiwa ifyakuleka ukusubila ukuti Kyala aliko. Abangi bikusyobiwa nabakulumba bamatchalichi aba bikubalyela indalama. Mfyisu fimo, abalaghili ba boma bikubakanisya abandu ukwiputa.

3. Ngimba inkhani iyi yikuya pakututula bulebule?

³ Yesu ikutughulila uswe ukuti “tubapeleghe abafundiwa abandu ifikolo fyosa.” (Mat. 28:19) Ngimba tubaghile ukubatula bulebule abandu aba batikwiputa ukuti bamanyile ukungana Kyala nukuya bafundiwa ba Kristu? Tukulondiwa ukumanya muno umundu ikwipilikila  na masyu amanunu agha tukumfumukisya, isi sibaghile ukupalamasya amalo agha akulile. Mwakifwanikisyo, abandu aba bakulile ku Europe bakabaghila ukupilikisya amasyu amanunu agha tukufumusya ukukinda abandu aba bakulile ku Asia. Nongwa yafiki? Nongwa yakuti ku Europe, abandu bingi basimenye ifundo simo isya mu Baibolo kangi basyaghenie ukuti Kyala yo apelile ifindu fyosa. Loli ku Asia, abandu bingi basimenye panandi kangi bamo bakasimanya nasimo isyakufwana ni Baibolo, abene batikunsubila Kyala. Inkhani iyi yikuya pakututula muno tubaghile ukubombela ukuti tubafike pandumbula bosa aba tukwaghana nabo mubufumusi, kisita kwinong’onela kuno bakulile pamo isi bikusubila.

4. Nongwa yafiki tukulondiwa ukukindilila ukuya naminong’ono amanunu?

⁴ Tuyeghe naminong’ono amanunu. Ikyinja kilikyosa, abandu bingi aba batikwiputa bikuchenja nukuya Baketi ba Yehova. Abandu bingi bali nutuyilo utwabulowe kangi bamo bikusyobiwa nifundo isya butungulu isya matchalichi. Abangi babombagha utuyilo utwabulowe kangi bamo bali nutuyilo utubibi utu balondiwagha ukuleka. Nubutuli bwa Yehova, tuli nulusubilo losa ukuti tukuya pakubagha abandu bosa aba “bimikiliwe kubumi bwa bwila.”—Imbo. 13:48; 1 Tim. 2:3, 4.

5. Ngimba utubalilo twingi findu fiki ifi fikubapangisya abandu ukuti bitikisyeghe isi tukubafumukisya?

⁵ Tuyeghe Bakisa Kangi Tubatuleghe Abandu. Utubalilo twingi, abandu bikwitikisya amasyu amanunu agha tukufumusya, komma panongwa ya isi tukuyoba, loli panongwa yamuno tukuyobela. Abene bikundaghisya fiyo linga tukubanangisya ikisa, tukubatula kangi linga tukubanangisya ulughano. Tutikubafimbilisya ukuti bapilikisye ifundo sya mu Baibolo isi tukubalingania. M’malo mwake, tukughelaghela ukubatula ukuti baye naminong’ono amanunu pankhani iyakwiputa. Mwakifwanikisyo, tukumanyila ukuti bamo bakighana ukuyoba isya kwiputa linga baghene numundu uyu bakam’manya. Abangi bikuketa ukuti kakaya kayilo kanunu ukundalusya umundu isi ikwinong’ona isyakufwana na Kyala. Kangi bamo bali nisoni linga abangi bikubabona bikubelenga Ibaibolo, fiyofiyo na Baketi ba Yehova. Mulimosa muno siyilile, tukughelaghela ukumanya kanunu muno abandu aba bikwipilikila.—2 Tim. 2:24.

6. Ngimba untumiwa Pauli anangisyagha bulebule ukuti achenjagha linga ikufumusya kubandu, kangi ngimba tubaghile ukunkonga bulebule?

⁶ Ngimba tubaghile ukubomba isyafiki linga umundu yumo atikuhoboka namasyu agha tukubombela pakufumusya bo “Ibaibolo,” ikipeliwa,” “Kyala,” pamo “itchalichi”? Tubaghile ukunkonga untumiwa Pauli nukuchenja muno tukuyobela nawe. Linga ikuyoba na Bayuda, Pauli abombelagha amalemba. Loli, linga ikuyoba na ba Giliki abamanya ndaghilo aba ku Areopagi, akayobagha ukuti isi alinganiagha syafumagha mu Baibolo. (Imbo. 17:2, 3, 22-31) Ngimba tubaghile ukukonga bulebule ikifwanikisyo kya Pauli? Linga twaghene nu mundu uyu atikulisubila Ibaibolo, kubaghile ukuya kununu ukuti tuleke ukunangisya ukuti isi tukuyobesania nawe sikufumila mu Baibolo. Linga tusyaghenie ukuti umundu atikuhoboka ukuti abangi bambone ukuti tukubelenga nawe Ibaibolo, tughelegheleghe ukunnangisya amalemba munjila imbepe iyi abangi bakabaghila ukumanya, bo ukubombela ifoni pamo itabuleti.

7. Ukufwana na 1 Bakorinti 9: 20-23 ngimba tukulondiwa ukubomba isyafiki ukuti tunkonge Pauli?

⁷ Tubamanyeghe nukubapilikisya kanunu. Tukulondiwa ukughelaghela ukumanya kanunu muno abandu aba tukwaghana nabo bikwinong’onela nukubomba ifindu pabumi bwabo. (Mbu. 20:5) Inong’onela kangi isya kifwanikisyo kya Pauli. Umwene akulile Mbayuda. Loli alondiwagha ukuchenja linga ikufumusya kubandu aba bakali Bayuda, aba bakasimenye nyingi pamo aba bakasimenye nasimo isyakufwana na Yehova na Masyu ghake. Tukulondiwa ukufufuza pamo ukundalusya yumo nkipanga ukuti tumanye kanunu muno abandu bikwinong’onela nukwipilikila nkighaba kyitu.—Belenga 1 Bakorinti 9:20-23.

8. Ngimba njila yiliku yimo iyi tubaghile ukubombela ukuti twande ukuyobesania nabandu isyakufwana ni Baibolo?

⁸ Ubwighane bwitu ko kubagha abandu aba  “babaghile”. (Mat. 10:11) Ukuti tubafikeghe abandu pandumbula, tukulondiwa ukubapa ulusako ukuti bayobe aminong’ono ghabo nukubapilikisya kanunu isi bikulingania. Unkamu yumo ku England linga ikufumusya ikubasuma abandu ukuti bayobepo aminong’ono ghabo pankhani ya muno babaghile ukuyila nimbumba yalusekelo, muno babaghile ukulelela abanabo, pamo muno babaghile ukumalana nubusitabugholofu. Linga apilikisye kanunu aminong’ono ghabo, umwene ikuti, “Ngimba mukwinong’ona isyafiki isyakufwana nubulongosi ubu bwalembiwe mfyinja fya m’ma 2,000 ifi fikindilepo?” Ukufuma apo, umwene atikuyoba ukuti isagha tukete mu “Baibolo,” loli ikubanangisya pa foni amalemba agha asalile ngani agha ghikukolelana ninkhani iyi bikuyobesania.

9. Ngimba tubaghile ukubatula bulebule abandu aba batikulonda ukuyoba isya Kyala?

⁹ Tubaghile ukubafika abandu pandumbula aba utubalilo twingi batikulonda ukuti tuyobe nabo isya Kyala. Mwakifwanikisyo, abandu bingi bikuswigha nikipeliwa. Tubaghile ukwanda ukuyobesania nabo ififwanikisyo bo ifi: “Mubaghile ukubabula ukuti linga abasayansi bapangile ifindu fimo ifi mukafibonamo kokuti abene beghelile kufindu ifi Kyala apelile. Ikifwanikisyo ikingi, abandu aba bapangile mayikofoni balyeghelile muno imbulukutu yikubombela imbombo, kangi aba bapangile ikamela balyeghelile muno amaso ghikubombela imbombo. Ngimba findu fiki ifi fikwisa muminong’ono ghinu linga mukwinong’onela isya kipeliwa? Ngimba mukwinong’ona ukuti fikubombiwa fyene, numundu, pamo nikindu kimo?” Linga apilikisye kanunu, tubaghile ukongelelapo ukuti: “Linga abasayansi bikufwanisya ukumanyila muno imbulukutu na maso ghikubombela imbombo, tubaghile ukuswigha ukuti bikumanyila ukufuma kughu. Naswighile fiyo na isi uwakulemba amapowemu alembile, umwene alembile ukuti: ‘Uyu amesisye imbulukutu, kali atikupilika? Uyu aghapelile amaso, ngimba atikuketa? . . . Yo uyu ikubamanyisya abandu amahala!’ Abasayansi bamo bikukolelana na masyu agha kangi bikusubila ukuti Kyala yo apelile ifindu.” (Sal. 94:9, 10 NWT) Ukufuma apo tubaghile ukubanangisya ividiyo ukufuma pa jw.org^® pakighaba ikyakuti “Kufumba Ŵanthu na Ivyo Vikaŵachitikira” pankhani zakuti “Umoyo Ukawako Ŵuli.” (Lutani pa MABUKU > MAVIDIYO.) pamo tubaghile ukubapa ibulosha ilyakuti Kasi Vyamoyo Vikachita Kulengeka? pamo ibulosha ilyakuti Umoyo Ukaŵako Ŵuli—Mafumbo 5 Agho Tikwenera Kujifumba.

10. Ngimba tubaghile ukwanda ukuyobesania bulebule numundu uyu atikulonda ukuti tuyobesanie nawe isya Kyala?

¹⁰ Abandu bingi bikulonda ukuya nubumi ubununu. Loli, bingi bikutila ukuti ikisu kikuya pakonangiwa kangi nukusoba amalo aghakwikala. Uwakwendela idela yumo uwa ku Norway atile, abandu aba batikulonda ukuti tuyobesanie nabo isya Kyala,  utubalilo twingi bighanile ukuyoba isi sikubombiwa nkisu. Linga abaponisye abandu aba, umwene ikubalalusya ukuti: “Ngimba mukwinong’ona isyafiki isyakufwana nubumi ubununu ubwa nkyeni? Ngimba kununu ukuti tubasubileghe abandyali, abasayansi pamo umundu yumo?” Linga apilikisye kanunu, umwene ikubelenga ilemba ili likulingania isya bumi ubununu ubwa nkyeni. Bamo bikuhoboka nulufingo ulwa mu Baibolo ulwakuti ikisu kyapasi kikuya pakukindilila ukuyako kangi abandu abanunu bisakwikalagha nkisu iki bwila na bwila.—Sal. 37:29; Ndumbi. 1:4.

11. Ukufwana na Baroma 1:14-16 ngimba tubaghile ukukonga bulebule ikifwanikisyo kya Pauli ukuti tufumusyeghe munjila isyakukindanakindana?

¹¹ Tukubomba kanunu fiyo linga tukughelaghela ukubombela injila isyakukindanakindana ukuti twande ukuyobesania nabandu aba tukwaghana nabo. Nongwa yafiki? Panongwa yakuti abandu bakindene. Mwakifwanikisyo, amasyu agha tukumfumukisyila umundu yumo abaghile ukuhoboka nagho loli uyungi abaghile ukukana ukupilikisya. Bamo bikwitikisya ukuyobesania nabo isyakufwana na Kyala kangi na Masyu ghake loli abangi bikuhoboka ukwanda ukuyobesania nabo tasi ifindu fimo. Munjila iyingi, tukulondiwa ukuya nulusako ulwakuyoba na bandu bosa amasyu gha Kyala kisita kusala. (Belenga Baroma 1:14-16.) Momumo, tukulondiwa ukukumbukila kangi ukuti Yehova yo ikumesya ubwanaloli mundumbula sya bandu bosa aba bikulonda ukumanyila ubwanaloli.—1 Kor. 3:6, 7.

12. Ngimba tubaghile ukubomba isyafiki ukuti tubatule abandu abakufuma mfyisu fya ku Asia aba batikwinong’ona ukuti Umpeli aliko?

¹² Pa kisu kyosa ikyapasi, abafumusi bingi bikwaghana nabandu abakufuma mfyisu fya ku Asia, ukongelelapo aba bikufuma mfyisu ifingi kuno amaboma ghikukanisya abandu ukwiputa. Abandu bingi mfyisu fya ku Asia, bakinong’onelapo lumo isyakuti Umpeli aliko. Bamo bikulonda ukumanya nyingi kangi bikwitikisya ukumanyila Ibaibolo, loli abangi batikulonda ukumanyila amasyu gha Kyala. Ngimba tubaghile ukubatula bulebule? Abafumusi bamo baketile ukuti injila inunu iyakwanda ukuyobesania nabandu amasyu gha Kyala, ko kubanangisya ukuti bikubapasikisya nukubalingania kanunu muno ukukonga ifundo sya mu Baibolo syabatulile pabumi bwabo.

13. Ngimba findu fiki ifi fibaghile ukubatula abandu ukuti bahobokeghe na masyu gha Kyala? (Keta ikithuzi kya pakikope.)

¹³ Abandu bingi bikuhoboka nifundo isyakulondiwa fiyo isi sikwaghiwa mu Baibolo. (Ndumbi. 7:12) Ku New York, umulumbu yumo uyu ikubendela abandu aba bikuyoba injobelo iya Chimandarini atile: “Ngughelaghela ukuya pabumanyani nabandu bosa kangi ngubapilikisya kanunu linga bikuyoba. Linga nsyaghenie ukuti bafumile nkisu ikingi, Ngubalalusya ukuti: ‘Ngimba mufwanisye bulebule ukufika nkisu iki? Ngimba muyaghile imbombo? Ngimba abandu aba nkisu iki bikubabombela kanunu ifindu?’” Utubalilo tumo isi sikuntula ukuti ande ukuyobesania nabandu aba amasyu gha Kyala. Linga akabalilo kalipo umulumbu uyu ikubalalusya ukuti: “Ngimba mukwinong’ona ukuti kindu kiliku ikyakulondiwa ukuti tuye pabumanyani ubununu nabandu? Ngimba mbaghile ukubanangisya ilemba limo ukufuma mu Baibolo? Likuti: ‘Ulukani luliti bo gha misi agha baghighulile injila; kununu ukukanisya ulukani bo lukali nukukula.’ Ngimba mukwinong’ona ukuti ubulongosi ubu bubaghile ukututula ukuti tuye pabumanyani nabangi?” (Mbu. 17:14) Ukuyobesania bo uku kubaghile ukututula ukuti tubamanye abandu aba bikulonda ukumanya nyingi isyakufwana na Kyala.

14. Ngimba unkamu yumo uwakufuma Mfyisu ifya kubutali ifya kubusokelo ilisuba ku Asia ikubatula bulebule abandu aba bikuyoba ukuti batikunsubila Kyala?

¹⁴ Bule pakuyoba isya bandu aba bikuyoba ukuti batikunsubila Kyala? Unkamu uyu afumwisye amasyu amanunu kwa fyinja fingi kubandu aba batikumwiputa Kyala Mfyisu ifya kubutali ifya kubusokelo ilisuba ku Asia ikuti: “Utubalilo twingi, linga umundu ikuyoba ukuti, ‘Ndikusubila mwa Kyala,’ umwene ikusanusya ukuti atikusubila ukwiputa kufifwani. Yonongwa yake akabalilo kosa ngwitikisya ukuti abakyala bingi bapangiwe nabandu  kangi bakaya banaloli. Utubalilo twingi ngubelenga ilemba lya Yeremiya 16:20 ili likuti: ‘Ngimba naloli umundu abaghile ukwitendekekesya abakyala aba bakaya bakyala bene?’ Ukufuma apo ngubalalusya ukuti: ‘Ngimba tubaghile ukum’manya bulebule Kyala uwabwanaloli kangi nabakyala aba bapangiwe na bandu?’ Ngupilikisya kanunu kangi ngubelenga ilemba ilya Yesaya 41:23 ili likuti: ‘Oko mutubule isya nkyeni, po twisakusyaghania ukuti yo umwe bakyala naloli.’ Pabumalilo ngulingania isi Yehova afingile ukuti ikuya pakufwanisya nkyeni.”

15. Ngimba tubaghile ukumanyilako isyafiki kukifwanikisyo ikya nkamu uwakufuma kubusokelo ilisuba ku Asia?

¹⁵ Unkamu yumo uwakufuma kubusokelo ilisuba ku Asia ikubombela ikifwanikisyo iki linga ikupanga amabulendo aghakughomokelako. Umwene ikuti: “Ngubanangisya ifundo isyakulondiwa fiyo isya mu Baibolo, amabusololi gha mu Baibolo agha ghafwanisiwe kangi nindaghilo sya Kyala. Pabumalilo ngubanangisya muno syosa isi sikunangisyila ukuti alipo yumoywene Umpeli witu uwamahala. Linga umundu itikisye ukuti Kyala aliko, ngwanda ukuyobesania nawe isi Ibaibolo likuyoba isyakufwana na Yehova.”

16. Ukufwana na Bahiburi 11:6, nongwa yafiki abamanyili ba Baibolo bikulondiwa ukuya nulwitiko mwa Kyala na m’masyu ghake, kangi ngimba tubaghile ukubatula bulebule?

¹⁶ Linga tukumanyila Ibaibolo nabandu aba batikumwiputa Kyala, akabalilo kosa tukulondiwa ukubatula ukuti bakasyeghe ulwitiko lwabo ulwakuti Kyala aliko. (Belenga Bahiburi 11:6.) Kangi tukulondiwa ukubatula ukuti bakusye ulwitiko lwabo m’masyu gha Kyala. Ukuti tufwanisye isi tukulondiwa ukughomokelamo ukuyobesania nabo ifundo isi tumanyile. Akabalilo kosa aka tukumanyila nabo, tukulondiwa ukuyobesania nabo ubuketi ubu bukunangisya ukuti Ibaibolo Masyu gha Kyala. Isi sibaghile ukongelelapo ukuyobesania nabo mbupimba, amabusololi agha mu Baibolo agha ghafwanisiwe, isyakufwana ni sayansi ni nkhani isingi isya mu Baibolo kangi namuno Ibaibolo likututulila pabumi bwitu.

17. Ngimba ulughano lwitu lubaghile ukubapalamasya bulebule abandu?

¹⁷ Tukubatula abandu ukuti baye bafundiwa ba Kristu mwakubanangisya ulughano, bosa aba bikwiputa na aba batikwiputa. (1 Kor. 13:1) Linga tukubamanyisya, ubwighane bwitu buyeghe bwakubatula ukumanya ukuti Kyala atughanile kangi ikulonda ukuti tunganeghe fiyo umwene. Ikyinja kilikyosa abandu bosa aba pabwandilo basimenye panandi isyakufwana na Kyala pamo aba bakiputagha lino bosiwe panongwa yakuti bamanyile ukungana Kyala. Yonongwa yake tukulondiwa ukuya naminong’ono amanunu ukuti tubatule abandu kangi tunangisyeghe ulughano kubandu bosa. Tubapilikisyeghe kanunu linga bikuyoba. Tughelegheleghe ukumanya muno bikwipilikila namuno bikubombela ifindu. Ukwendela nkifwanikisyo kyinu, mubamanyisyeghe ukuti baye bafundiwa ba Kristu.