Mu Baibolo tukubelenga isya banyambala bamo abasubiliwa “muno bipilikilagha bo uswe”. (Yak. 5:17) Mwakifwanikisyo, tubaghile ukupilikisya kanunu isi Pauli asanusyagha bo ikuyoba amasyu agha ghikwaghiwa pa Baroma 7:21-24 agha ghikuti: “Apa linga nikulonda ukubomba inunu, nikwagha ukuti ububibi bukuboneka m’myangu. . . . Ne mundu ne ntolwe une!” Syakukasya fiyo ukumanya ukuti Pauli uyu ali nsubiliwa yope ipilikagha bo ulu.

Loli Pauli ayobile kangi muno ipilikilagha. Pa Bagalatia 2:20, umwene atile Yesu “alinganile umwene nukwininga panongwa yake,” Pauli asimenye ukuti isi syabwanaloli! Ngimba momuno mukwipilikila nanumwe? Lumo mukaya momuno mukwipilikila utubalilo tosa.

Linga tukali tukwinong’onela ubutulanongwa ubu twabombile kunyuma, tukabaghila ukusubila ukuti Yehova atughanile kangi atuhobokile, kubaghile ukuya kukafu ukuketa ikemo lya Yesu ukuya kyabupe kumyitu. Ngimba momuno Yesu ikulondela ukuti tuliketeleghe ikemo? Linga momuno siyilile, ngimba findu fiki ifi fibaghile ukututula ukubomba isi? Isagha tuyobesanie amalalusyo mabili agha.

Bwanaloli ukuti Yesu ikulonda ukuti tuliketeghe ikemo lyake ukuya kyabupe kumyitu. Ngimba tukumanya bulebule ukuti isi syabwanaloli? Inong’onela amasyu agha ghikwaghiwa pa Luka 23:39-43. Umundu uyu akomeleliwe pampiki pabupipi na Yesu. Umwene alitikisye ubutulanongwa ubu abombagha kunyuma. Sikunangisya ukuti atulile inongwa inywamu yonongwa yake alyambilile ulufundo bo ulu. Panongwa ya isi abombile, umundu uyu apasyagha fiyo yonongwa yake alinsumile Yesu ukuti: “Ungumbukeghe bo kwingila mu Bunyafyale bwako.”

Ngimba Yesu alimwamwile bulebule? Inong’onela muno Yesu ipilikilagha ifyakubaba bo ikwinusya untu wake ukuti ankete umundu yula. Kisita kwinong’onelako ifyakubaba, Yesu alinkunkasya umundu yula mwakumbula ukuti: “Naloli nikukubula une nikuti, ghumusyughu, kuyagha nanine mu Paladaiso.” Yesu abaghile ukuti ankumbusyagha umundu yula ukuti “yope unnyamundu alisile . . . pakubika ubumi bwake ukuya kitabulilo kya bingi.” (Mat. 20:28) Ngimba muketile muno Yesu anangisyile ikisa ku mundu ukwendela mu ikemo lyake? Umwene anangisye ubumanyani ubwamaka apa ayobile ukuti “uwe” “nanine.” Kangi umwene anangisye ubumanyani bo ikumbula umundu uyu ukuti, wisakuyagha mu paladaiso pa kisu kyapasi.

Kisita kukayika, Yesu alondagha ukuti umundu uyu itikisye ukuti ikuya pakutabuliwa nikemo lyake. Linga momuno Yesu ipilikilagha nuntulanongwa uyu akali nulusako ulwakunangisya ukuti apelile pa isi abombagha, ngimba Yesu akabaghila ukunhobokela Unkristu uyu apelile imbibi syake? Ngimba findu fiki ifi fibaghile ukututula lino, ukuti tusubileghe ukuti Yesu atuhobokile imbibi isi twabombagha kunyuma?

Panongwa yakuti Yesu alimpele Pauli imbombo iyakufumusya, Pauli aketagha ukuti Yesu alimfwilile. Bulebule? Umwene atile: “Nikuwa ulupi kuli uyu ambele amaka yu Kristu Yesu Umwalafyale witu, papo ambwene ukuya nsubiliwa, apa ambikeghe pambombo napa iyolo nali ntukamahelu, nali mfwima bandu, kangi nali wamatingo.” (1 Tim. 1:12-14) Ububombeli ubu Pauli apeliwe bwalinnangisye ikisa kya Yesu, ulughano, kangi nukunsubila umwene. Mwakufwana itolo Yesu yope ikutusubila uswe, yonongwa yake atupele imbombo iyakufumusya. (Mat. 28:19, 20) Ngimba nanuswe tubaghile ukupalamasiwa bo Pauli?

Albert, uyu aghomokile kwa Yehova mwalululu bo epusiwe nkipanga kwa fyinja 34 atile: “Imbibi syangu bwila itolo sili nkyeni m’myangu. Loli linga ndi mubufumusi, ngwipilika bo untumiwa Pauli uyu atile, mbeliwe imbombo iyakufumusya ukufuma kwa Yesu. Isi syo sikumbangisya ukuya walusekelo kangi ngwipilika kanunu pabumi bwangu, kangi nguya nulusubilo lwa nkyeni.”—Sal. 51:3.

Allan, uyu abombagha ifindu fya nkhaza bo akali ukumanyila ubwanaloli atile: “Ngali ngwinong’onela ifindu ifi nababombelagha abandu. Utubalilo tumo, nguwa amaka. Loli ngundaghisya fiyo kwa Yehova ukuti ikwitikisya abandu abatulanongwa bo une ukuti bafumusyeghe amasyu amanunu ku bangi. Linga ngubaketa abandu bikupilikisya amasyu amanunu, sikungumbusya ubununu nulughano lwa Yehova. Nguhoboka fiyo panongwa yakuti Yehova ambele ulusako ulwakuti mbatule abangi ukuchenja utuyilo twabo.”

Linga tuli mubufumusi tukubomba ifindu ifinunu kangi tukuya naminong’ono amanunu. Isi sikutusimikisyila ikisa kya Yesu, ulughano nulusubilo lwake kumyitu.

Tubaghile ukukindilila ukuya nikitima panongwa ya butulanongwa ubutwabombile kunyuma. Ngimba findu fiki ifi fibaghile ukututula ukumalana naminong’ono agha?

Jean uyu ikutamiwa naminong’ono panongwa ya tuyilo utubibi utu abombagha bo mwana atile, “ngundaghisya fiyo panongwa yakuti ‘Kyala yo nkulumba ukusikinda indumbula syitu,’”. (1 Yoh. 3:19, 20) Nanuswe tubaghile ukukasiwa panongwa yakumanya ukuti Yehova na Yesu basimenye ukuti tuli batulanongwa. Tukumbukileghe ukuti, umwene mwalughano abikile ikemo, komma ku bandu abagholofu, loli ku bandu abatulanongwa aba bikupela ukufumila pasi pandumbula.—1 Tim. 1:15.

Tukukasiwa fiyo ukuketa ukuti ikemo lyabikiwe ku mundu aliwesa linga ikukonga muno Yesu abombelagha na bandu abasitabugholofu kangi linga ikughelaghela ukufwanisya imbombo iyakufumusya iyi atupele. Linga tukubomba isi, tukuya pakufwana na Pauli uyu atile: Yesu “alinganile une nukwininga panongwa yangu.”