Ubuketi bukunangisya ukuti Yesu ali Mputi Unkulumba bo ikosiwa mu 29 C.E. Ngimba tusimenye bulebule? Bo umwene ikosiwa, anangisye ukuti ikulonda ukubika ubumi bwake ukuya ikemo isi syasanusyagha ukubomba “ubwighane” bwa Kyala. (Gal. 1:4; Hib. 10:5-10) Panongwa yakuti amalo aghakwikemekesyapo ghali malo ghakulondiwa fiyo mu tempile, itempile ilya mwambepo lyalyandile ukuboneka bo Yesu osiwe. Itempile lya Yehova lya mwambepo limilagha kilikyosa iki kikututula ukuti tumwiputeghe munjila inunu ukwendela mu ikemo lya Yesu.—Mat. 3:16, 17; Hib. 5:4-6.

Itempile ili lyalondiwagha umputi unkulumba. Ukuti afwanisye isi, Yesu apakiwe ‘na mbepo mwikemo namaka.’ (Imbo. 10:37, 38; Mar. 1:9-11) Loli ngimba tubaghile ukusubila bulebule ukuti Yesu asaliwe ukuya Mputi Unkulumba bo akali ukufwa nukusyuka? Tukuya pakumwagha ansala linga tukwinong’onelapo ikifwanikisyo kya Aron na aba apokelene nabo aba babombagha bo abaputi abakulumba pasi pandaghilo sya Mose.

Indaghilo isi Yehova alimpele Mose syayobagha ukuti bene abaputi abakulumba bo balondiwagha ukwingila mu Malo amikemo fiyo mu hema kangi ukufuma apo mu Malo amikemo fiyo mu tempile. Amalo amikemo fiyo agha ghapaghuliwe ukufuma ku Malo amikemo numwenda wakusigha. Umputi unkulumba ingilagha nkati pene pisiku ilyakukemesya amakemo. (Hib. 9:1-3, 6, 7) Aron na aba apokelene nabo bapakiwe ukuya baputi bakulumba bo bakali ukwingila mu Malo Amikemo. Yonongwa yake Yesu yope, alondiwagha ukupakiwa ukuya Mputi Unkulumba bo akali ukufwa kangi ukufuma apo alondiwagha ‘ukwingila mmwenda wakusigha ughu gho mbili wake’ ukuti abuke kumwanya. (Hib. 10:20) Pakifukwa iki, untumiwa Pauli ayobile isya kwisa kwa Yesu “ukuya mputi unkulumba” kangi “isakubombagha mu hema ingulumba iyi yikindilepo ubupelelesye yo yikatendekesiwa na maboko gha bandu.”​—Hib. 9:11, 24.

Kukayapo ukukindana pakati pakabalilo aka ulufingo ulupya lwalitikisiwe na apa lwandagha. Nongwa yafiki sikaya bo ulu? Bo Yesu ikubuka kumwanya kangi ikubika ubumi bwake ubugholofu panongwa ya uswe, umwene akongile injila sitatu isi syabikiwe ukuti afwanisye ulufingo. Injila sitatu isi syope syalwimike ulufingo. Ngimba injila isi syo siliku?

Iyakwanda, Yesu abonike pankyeni pa Yehova; iyabubili, Yesu abikile ubumi bwake ukuya ikemo kwa Yehova; kangi iyabumalilo, Yehova alitikisye ikemo lya Yesu. Bo syosa isi sibombiwe, ulufingo ulupya lwakali ukwanda ukubomba imbombo.

Ibaibolo litikuyoba akabalilo aka Yehova alitikisye ikemo lya Yesu. Mwakufwana itolo, nanuswe tukabaghila ukuyoba akabalilo aka ulufingo ulupya lwalyandile ukubomba imbombo. Mwakongelelapo, tusimenye ukuti Yesu abukile kumwanya bo kusyele amasiku 10 bo pakali ukufika pa Pentekositi. (Imbo. 1:3) Lumo akabalilo akapimba aka, umwene abaghile ukuti abikile ikemo lyake kwa Yehova uyu alyambilile. (Hib. 9:12) Tusimenye isi ukuya syabwanaloli panongwa ya isi syabombiwe pa Pentekositi 33 C.E. (Imbo. 2:1-4, 32, 33) Ukufuma apo ulufingo lwabikiwe kangi lwalyandile ukubomba imbombo.

Mbupimba, tubaghile ukuyoba ukuti ulufingo ulupya lwalimikiwe kangi lwalitikisiwe bo Yesu abikile ubumi bwake ukuya ikemo. Ukufuma apo, ulufingo lwalyandile ukufwanisiwa nu Mputi unkulumba, Yesu, mwakubomba bo Nsayanisi.​—Hib. 7:25; 8:1-3, 6; 9:13-15.