Napapiwe ku St. Paul, Minnesota, U.S.A., mu 1954 mumbumba iyi yikali ngabi fiyo iyi yiputagha mutchalichi lya Katolika. Tulipo twebana 5 mumbumba yitu, une nili wabubili ukupapiwa. Bo ndimwana namanyilagha isukulu ya Katolika kangi nantulagha umputi pakabalilo kakwiputa. Loli ngasimenye nyingi isyakufwana ni Baibolo. Nalinga ukuti nasubilagha ukuti Kyala aliko uyu apelile ifindu fyosa loli ngasubilagha ukuti Itchalichi lya Katolika lyayagha pakundula ukuti numwiputeghe Kyala.

Ikyinja kya kwanda bo ndi ku koleji iyi yamanyiwagha ukuti William Mitchell kuno namanyilagha isya ndaghilo, Abaketi ba Yehova balinyaghile pakaya. Nali bize nukutchapa imyenda abene mwakisa batile bikuya pakwisa kangi. Bo bisile, nalyandile ukubalalusya ukuti: “Nongwa yafiki abandu ababibi bikusayiwa fiyo pabumi bwabo ukukinda abandu abanunu”? kangi “Ngimba abandu babaghile ukuya bulebule nulusekelo?” Nalyambilile ibuku lyakuti Coonadi Cimene Cimatsogolera ku Moyo Wamuyaya ni Baibolo lya Malemba  Ghakupatulika mu Mang’anamuliro gha Charu Chiphya ili lyali nikikope kya gilini. Kangi nalitikisye ukumanyila Ibaibolo. Isi syalindulile fiyo pabumi bwangu. Nahobwike fiyo ukumanyila ukuti Ubunyafyale bwa Kyala lyo boma ili lisakulaghilagha pa kisu kyapasi. Naketile ukuti ubulaghili bwa bandu bukutoliwa ukulaghila kanunu kangi isi sikutwala indamyo nyingi pa kisu kyapasi.

Naliyipile kwa Yehova nukosiwa mu 1982 palukomano ulunywamu ulu lwabombiwe ku St. Paul Civic Center ulwakuti “Kingdom Truth.” Naghomokile ku St. Paul Civic Center sabata wakukongapo ukuti ngalembe amaghesyo aghakuti nsaye loya. Kubwandilo bwa Okutobala, napilike ukuti ngwelile amaghesyo kangi nalyandile imbombo ya buloya.

Palukomano ulunywamu ulu lwabombiwe ulwakuti “Kingdom Truth” nalyaghene na Mike Richardson uyu abombelagha pa Beteli ya ku Brooklyn, kangi umwene alingenie ukuti ofesi ya legal yiyengiwe ku maofesi ghitu amanywamu. Nakumbukile amasyu gha Umwitiopia umfule agha ghali pa Imbombo Sya Batumiwa 8:36 kangi nalilalusisye ukuti, ‘Ngimba findu fiki fikundolesya ukuti ngambombeleghe Yehova ku ofesi iyi?’ Yonongwa yake nalembile kalata yakusuma ububombeli bwa pa Beteli.

Abapapi bangu bakahobwike pakuya yumo wa Baketi ba Yehova. Tata wangu alindalusisye linga ububombeli bwa pa Beteli bwayagha pakundula panongwa yakuti nali loya. Nalimbulile ukuti nguya pakubomba imbombo iyi mwakutulapo itolo. Nalimbulile ukuti bikuya pakumbagha $75 umwesi ghulighosa, iyi yali ndalama yakufuma ku Beteli.

Panongwa yakuti nalitikisye kale ukuti nguya pakubomba ku khoti ngabukile mwanakalinga ku Beteli, yonongwa yake nalyandile ukubombela ku Beteli ya ku Brooklyn, New York, mu 1984. Balimbikile ku ofesi ya Legal. Ubumanyi ubu nali nabo pakabalilo aka nabombagha ku khoti bwalindulile ukuti nitendekesye ukubomba nyingi.

Inyumba ya Stanley iyi bapangilako inyangalo nkaya ka New Jersey, yalyuliwe mu Novembala 1983. Abakamu basumile ububombeli ubwakutendekesya amalo agha. Bo baghene na balongosi ba boma, abakamu aba bababulile ukuti bikuya pakubombelangamo ulukomano  lwa Baketi ba Yehova mu kipatala iki. Isi syalyandisye indamyo. Indaghilo sya nkaya ka Jersey isyakufwana namuno babaghile ukubombela inyumba yakwiputilamo yalondiwagha ukuya kuno abandu bikwikala. Inyumba ya Stanley yali nkaya aka babombelangako ibizinesi. Abakamu aba bapangile apilu loli isi syatoliwe.

Sabata wakwanda bo nili pa Beteli, igulu lyabukile ninkhani iyi ku khoti. Panongwa yakuti nabombile imbombo ku khoti kwa fyinja fibili ku St. Paul, Minnesota nayimenye kanunu inkhani iyi. Umwinangu yumo asusisye ukuti inyumba ya Stanley babombelangako ifindu ifyakukindanakinda. Nongwa yafiki mukukanisya ukuti tungiputilangamo? Ikhoti lyayobile ukuti akaya ka Jersey katikughindika ubwabuke bwitu ubwa kwiputa. Ikhoti ili lyayobile ukuti akaya aka kalondiwagha ukubitikisya ukwiputa kangi nalyandile ukuketa muno Yehova asayile igulu ukuti ubwighane bwake bufwanisiwe. Nahobwike fiyo ninkhani iyi.

Abakamu balyandile imbombo iyakutendekesya kangi igalajuweshoni iya sukulu ya Gilead iya nambala 79 yabombiwe nkaya ka Jersey pa malo aghakupangilapo ulukomano pa 8 Seputembala 1985, bo imbombo yakutendekesya yandile itolo. Nahobwike fiyo ukutulapo pambombo ya Yehova iyi ukukinda imbombo iyi nabombagha iya buloya bo ngali ukwisa pa Beteli. Ngali nubumanyi nabumo kangi ngasimenye ukuti Yehova ayagha pakumbombesyela imbombo munjila isyakukindanakindana.

Mu 1980, utubalilo twingi abadokotala baghindikagha ubwabuke bwitu ubwakukana ukubikiwa ilopa. Abakikulu aba bali nulwanda baghanagha nindamyo inywamu fiyo panongwa yakuti abalongi binong’onagha ukuti abakikulu aba bali nulwanda bakali nubwabuke ubwakukana ukubikiwa ilopa. Abalongi batighi linga unkikulu akabikiwa ilopa umwene ayagha pakufwa kangi umwanake ayagha pakukula kisita mama wake.

Pa 29 Disembala 1988, umulumbu Denise Nicoleau alyonile ilopa lingi fiyo bo apapile umwana. Panongwa yakuti ubumi bwake bwali pangozi, dokotala alondagha ukuti abikiwe ilopa. Loli umulumbu Nicoleau akanile ukubikiwa ilopa. Ilisiku ilyakukongapo, dokotala alimbulile undongi ukuti ambule umulumbu Nicoleau ukuti abikiwe ilopa. Undongi uyu akalimpele ulusako umulumbu Nicoleau pampene nundume wake ukuti bayobepo aminong’ono ghabo kangi akabamanyisye ukuti ambulile dokotala ukuti abikiwe ilopa.

 Pa Kihano pa 30 Disembala, dokotala alimbikile ilopa umulumbu Nicoleau nalinga ukuti undume wake na ba mumbumba yake aba bapwelelelagha bakanile. Ilisiku lilalila namayolo aba mumbumba yake na bakulumba bamo abakipanga bapinyiwe panongwa yakuti bakanile ukuti umulumbu uyu angabikiwagha ilopa. Pa chobeluka nulubunju, pa 31 Disembala nkaya ka New York bafumwisye munyuzipepala, pa TV na pa lediyo isya kupinyiwa kwa bandu aba.

Pa Mande nulubunju, nayobile nundongi unkulumba uyu ingamu yake ali yo Milton Mollen. Nalingenie kanunu ifundo isyakufwana ninkhani iyi ukuti undongi alitikisye ukuti umulumbu abikiwe ilopa kisita kupilika aminong’ono ghake. Undongi Mollen alimbulile ukuti mbuke ku ofesi yake pamusi ukuti tukayobesania inkhani iyi. Twabukile pampene na Philip Brumley ukuti tukaghane nundongi Mollen. Undongi uyu alinkolile dokotala attorney ukuti yope ayepo. Inkhani iyi yakindilile. Unkamu Brumley alembile ifundo simo mu buku kangi alimbulile ukuti “ningapasyagha.” Isi alimbulile syali syakulondiwa fiyo panongwa yakuti ngahobwike na isi attorney abombile.

Bo akabalilo kakindilepo, Mollen atile inkhani iyi yo yisaye yakwanda ukuyobesania kilabo nulubunju. Bo tukusokamo mu ofesi ya Mollen umwene atile dokotala Attorney ali “nimbombo ingafu kilabo.” Isi syasanusyagha ukuti Attorney akabaghile ukwifighilila ukufwana na isi abombile. Naketile ukuti Yehova ikuya pakututula ukuti tuwine inongwa iyi. Nahobwike fiyo bo nguketa ukuti Yehova ikutubombesyela imbombo ukuti tufwanisye ubwighane bwake.

Twalitendekisye ikilo kyosa isi twayagha pakuyoba nulubunju ku khoti. Ikhoti ili lili pabupipi ni Beteli ya ku Brooklyn yonongwa yake bosa aba babombagha ku ofesi ya Legal balisile ukuti basapilikisye inkhani iyi. Bo abalongi 4 bapilikisye isi twayobile, baketile ukuti ukubikiwa ilopa kukali kwakulondiwa. Ikhoti inywamu lyatile isi syabombiwe sikakolelene nubwabuke bwa mundu ukwitikisya ukumbika umbine ilopa kisita kupilika aminong’ono ghake.

Bo balongile inongwa iyi, Ikhoti inywamu ilya ku New York lyalinkasisye umulumbu Nicoleau ukuti ali nubwabuke ubwakwambilila imikota kisita kubikiwa ilopa. Inkhani iyakufwana nilopa  iyi yali ya yakwanda ukuyobesania pankhani 4 ukuti ikhoti inywamu lilonge kangi nali nulusako ulwakuyobapo. (Keta ibokosi ilyakuti “ Ukutola Inongwa ku Khoti Ilikulumba.”) Nalyeghilepo ikighaba kangi panongwa isingi isyakukindanakindana.

Bo naghene nunkasi wangu Dawn, umwene unnyambala alindekile kangi ali nabana batatu. Umwene aghelaghelagha ukubafighilila abanake kangi ali mpayiniya. Dawn aghanagha nindamyo pabumi bwake kangi nahobwike bo ngetile ukwiyipa kwake pakumbombela Yehova. Mu 1992, bo twaghene palukomano ulunywamu ku New York, nalinsumile ukuti tumanyane kanunu. Bo ikyinja kikindilepo twalyeghene. Nahobokagha pakuya nunkikulu uyu abikagha ifindu ifyamwambepo pamalo aghakwanda. Dawn alindulile fiyo pabumi bwangu.—Mbu. 31:12.

Pakabalilo aka tweghanagha, abana aba bali nifyinja 11, 13 na 16. Nalondagha ukuya tata nnunu ku bana aba, yonongwa yake naghelaghelagha ukubomba kilikyosa iki nayagha pakufwanisya ukuti mbatule. Nalinga ukuti naghanagha nindamyo, loli nahobokagha linga nguketa abana bikunsubila. Abamanyani ba banitu bisagha pakaya akabalilo kosa kangi twahobokagha fiyo nabo.

Mu 2013, une na Dawn twasamile ku Wisconsin ukuti tukabatuleghe abapapi bitu. Loli nahobwike fiyo panongwa yakuti ububombeli bwangu bukamalike. Balinsumile ukuti ngindilile ukutula pabumbombeli ubwakukindanakindana.

Mu Seputembala 2018, nalyandile ukutamiwa pammilo, isi syambangisyagha ukuti ndoliweghe ukuyoba kanunu. Nalyaghene na dokotala loli umwene atoliwe ukumanya isi syapangisye ububine ubu. Pabumalilo dokotala uyungi alimbulile ukuti ngaghane na uyu ikuketesya isya bubine ubu. Mu Januwale 2019 dokotala uyungi alimbulile ukuti nali nindamyo iyabubine iyi pabumalilo yayagha pakupalamasya umbili wangu ghosa.

Bo amasiku matatu ghakindilepo pakabalilo aka napangagha amafizo nawile nukufulala ikiboko. Isi syalimbangisye ukuti ndoliweghe ukubomba kanunu amafizo. Naghaghanile fiyo amafizo agha kangi nabombagha kanunu. Naswighile fiyo muno ububine ubu bwakindilile ukukula. Natamiwagha fiyo ukuyoba, ukwenda nu kumila ifyakulya.

Ndinulusekelo fiyo panongwa yakulitula igulu lya Yehova ukufwana nimbombo yangu iyi nabombagha iya buloya. Kangi nguhoboka fiyo panongwa yakuti ndembile inkhani nyingi mu magazine isi sibaghile ukubatula abadokotala, abaloya kangi nabalongi. Kangi nabatulile ababombi ba Yehova ukusala imikota iyi yibaghile ukubatula pabubine bwabo kisita kubikiwa ilopa. Kangi nguyoba bo Luka undembi uyu alembile Ibaibolo ukuti: ‘Une nili mbombi unsitakubaghila, buno mbombile syene sisyo syalimbaghile ukusibomba.’​—Luka 17:10.