1. Ukufwana na 3 Yohani 3, 4, ngimba findu fiki fikutupangisya ukuya balusekelo

NGIMBA mubaghile ukuketa muno untumiwa Yohani alipilikile mundumbula bo apilike ukuti bosa aba abatulile ukumanyila ubwanaloli, bakindililagha ukumbombela Yehova mbusubiliwa? Abene baghanagha nindamyo nyingi kangi Yohani iyipagha fiyo ukuti abakasye Abakristu aba ukuti baye nulwitiko lwamaka kangi abaketagha ukuti bali banake mwambepo. Mwakufwana itolo, tukuya balusekelo fiyo linga tukuketa abanitu pamo abandu aba tukubatula ukumanyila ubwanaloli bikwiyipa kwa Yehova nukukindilila ukumbombela umwene.​—Belenga 3 Yohani 3, 4.

2. Ngimba bwali bwighane buliku ubu Yohani alembile abakalata batatu?

² Mu 98 C.E., Yohani abaghile ukuti ikalagha nkati pamo kubupipi na ku Efesi. Umwene abaghile ukuti asamile ku malo agha bo abuliwe mu jele pa kilwa kya Patimo. Pakabalilo kala, Yehova alintulile na mbepo wake mwikemo ukuti alembe abakalata batatu aba. Ubwighane bwa bakalata aba bwali bwakubakasya Abakristu ukuti bakindilileghe ukuya nulwitiko mwa Yesu nukukindilila ukwenda mbwanaloli.

3. Ngimba tukuya pakwamula amalusyo ghaliku?

³ Yohani ali ntumiwa wabumalilo kangi atamiwagha naminong’ono nifindu ifibibi ifi abamanyisi ba matchalichi aghabutungulu bamanyisyagha nkipanga. * (1 Yoh. 2:18, 19, 26) Abakususya aba babonekagha ukuti bammenye Kyala loli bakapilikilagha indaghilo syake. Isagha tuyobesanie ubulongosi ubu Yohani abapele. Mu nkhani iyi, tukuya pakuyobesania ubulongosi ubu  Yohani abapele nukwamula amalalusyo agha: Ngimba ukukindilila ukwenda mbwanaloli sikusanusya isyafiki? Ngimba tukwaghana nindamyo siliku? Kangi tubaghile ukutulana bulebule ukuti tukindilileghe ukwenda mbwanaloli?

4. Ukufwana na 1 Yohani 2:3-6 na 2 Yohani 4, 6, ngimba tukulondiwa ukubomba isyafiki ukuti tukindilileghe ukwenda mbwanaloli?

⁴ Ukuti tukindilile ukwenda mbwanaloli, tukulondiwa ukubumanya ubwanaloli bwa mu Baibolo. Mwakongelelapo, tukulondiwa ‘ukukonga indaghilo sya Yehova’ isi sikusanusya ukumpilikila. (Belenga 1 Yohani 2:3-6; 2 Yohani 4, 6.) Yesu anangisye ikifwanikisyo ikinunu fiyo ikyakumpilikila Yehova. Yonongwa yake injila yimo iyakulondiwa fiyo iyakumpilikila Yehova, ko kukonga ikifwanikisyo kya Yesu mwakubomba syosa isi tubaghile ukufwanisya.​—Yoh. 8:29; 1 Pet. 2:21.

5. Ngimba tukulondiwa ukusubila isyafiki?

⁵ Ukuti tukindilile ukwenda mbwanaloli, tukulondiwa ukusubila ukuti Yehova yo Kyala wa bwanaloli kangi syosa isi ikutubula ukwendela mu Baibolo sya bwanaloli. Kangi tukulondiwa ukusubila ukuti Yesu yo Mesiya. Abandu bingi amasiku agha bikukayika isyakuti Yesu asaliwe ukuya Mwalafyale wa Bunyafyale bwa Kyala. Yohani abasokile ukuti kwali “abasyobi bingi” aba babasyobagha abandu aba bakabaghile ukufighilila ubwanaloli ubwakuyoba isya Yehova na Yesu. (2 Yoh. 7-11) Yohani alembile ukuti: ‘Ywani untungulu kali akaya yo uyu ikukana ukuti Yesu akaya yo Kristu?’ (1 Yoh. 2:22) Injila yimo iyi tubaghile ukukanila ukusyobiwa ko kumanyila amasyu gha Kyala. Ukufuma apo, tukuya pakummanya Yehova na Yesu. (Yoh. 17:3) Kangi tukuya pakusubila ukuti tuli mbwanaloli.

6. Ngimba findu fiki fyayagha pakumpangisya uwakilumyana yumo ukuleka ukukindilila ukwenda mbwanaloli?

⁶ Twesa tukulondiwa ukuya maso ukuti tungasyobiwagha nifimanyisyo fya mahala gha bandu. (1 Yoh. 2:26) Abakilumyana bikulondiwa ukuya maso fiyo nubutungulu ubu. Umulumbu Alexia wa fyinja 25 atile: “Bo nili kusukulu, namanyile isyakuti abandu bachenjile ukufuma ku finyamana nifimanyisyo ifingi ifya nkisu, ifi fyambangisyagha ukuti ngayikileghe ubwanaloli. Utubalilo tumo nafimenye kanunu ifimanyisyo ifi. Loli naketile ukuti  ndikulondiwa ukukonga kilikyosa iki abamanyisi bikumanyisya.” Alexia * amanyile ibuku ilyakuti: Life—How Did It Get Here? By Evolution or by Creation? Bo abasabata banandi bakindilepo, alekile ukukayikila. Umwene atile: “Nasimenye ukuti Ibaibolo likuyoba ubwanaloli. Kangi nasyaghenie ukuti ukukonga ifundo sya mu Baibolo pabumi bwangu kwayagha pakumbangisya ukuya walusekelo.

7. Ngimba tukulondiwa ukubomba isyafiki, kangi nongwa yafiki?

⁷ Twesa tukulondiwa ukwiyipa ukumbombela Yehova nukuleka ukubomba ifindu ifibibi. Yohani ayobile ukuti tukabaghila ukukindilila ukwenda mbwanaloli linga tukubomba ifindu ifibibi. (1 Yoh. 1:6) Linga tukulonda ukuti Yehova ahobokeghe nanuswe, tukulondiwa ukukumbukila ukuti ikuketa syosa isi tukubomba.​—Hib. 4:13.

8. Ngimba tutikulondiwa ukubomba isyafiki?

⁸ Tukulondiwa ukukana muno ikisu kikuketela ubutulanongwa. Untumiwa Yohani atile: ‘Linga tukuti tukaya nu butulanongwa, bo tukwisyoba twibene.’ (1 Yoh. 1:8) Nkabalilo ka Yohani, abakususya bayobagha ukuti umundu abaghile ukubomba ifindu ifibibi nukukindilila ukuya pabumanyani ubununu na Kyala. Amasiku agha tukwikala nabandu aba bikuketa mwakufwana itolo. Abandu bingi bikuyoba ukuti bikunsubila Kyala loli batikukonga isi Yehova ikuyoba pankhani yakughonana. Silipo injila isya kughonana isi Yehova atikuhoboka nasyo loli abandu bamo bikuketa ukuti nunu itolo.

9. Nongwa yafiki kununu ukuti abakilumyana babombeghe isi Ibaibolo likumanyisya ukuti sinunu?

⁹ Kubaghile ukuya kukafu fiyo ku bakilumyana ukukindilila ukuyiketa kanunu inkhani yakughonana linga aba bikumanyila nabo isukulu pamo bikubomba nabo imbombo batikukonga isi Baibolo likuyoba isyakufwana nukughonana. Isi syo alyaghene nasyo Aleksandar uyu ali nifyinja 30. Umwene atile: “Abalindwana bamo pasukulu baghelaghelagha ukuti ngone nabo.  Abene bayobagha ukuti, panongwa yakuti ngali nikibwezi, ko kuti naghonanagha nabanyambala abinangu.” Linga mwaghene ningelo bo iyi, mukumbukeghe ukuti linga mukukonga ifundo sya mu Baibolo, mukuya pakwifighilila mwibene, aminong’ono ghinu nubumanyani bwinu na Yehova. Kangi linga akabalilo kosa mukukana ukubomba ifindu ifibibi, kubaghile ukuya kupepe ukubomba ifindu ifinunu. Tukumbukileghe ukuti abandu bali naminong’ono amabibi pa nkhani yakughonana panongwa yakuti Setano yo ikubasofania. Yonongwa yake linga tukukana ukubomba bo muno abandu ba nkisu bikwinong’onela, tukuya ‘pakuntola umbibi.’​—1 Yoh. 2:14.

10. Ngimba ilemba lya 1 Yohani 1:9 likututula bulebule ukuti tumbombeleghe Yehova namabyebye amanunu?

¹⁰ Tusimenye ukuti Yehova ali nubwabuke ubwakuyoba isyakufwana nu butulanongwa. Kangi tukughelaghela ukubomba syosa isi tubaghile ukufwanisya ukuti tungabombagha ubutulanongwa. Loli linga tonangile, tukunsuma Yehova ndwiputo ukuti atuhobokele. (Belenga 1 Yohani 1:9.) Kangi linga tubombile ubutulanongwa ubunywamu tukusuma ubutuli ku bakulumba bakipanga aba Yehova abasalile ukuti batutule mwambepo. (Yak. 5:14-16) Loli tutikulondiwa ukukindilila ukwinong’onela isi twabombile kunyuma. Nongwa yafiki? Panongwa yakuti Tata witu walughano atupele ikemo lya Mwanake ukuti atuhobokele ku butulanongwa bwitu. Linga Yehova ayobile ukuti ikuya pakubahobokela abatulanongwa aba balapile, umwene ikubahobokela naloli. Yonongwa yake kikayapo ikindu nakimo iki kibaghile ukututolesya ukumbombela Yehova namabyebye amanunu.—1 Yoh. 2:1, 2, 12; 3:19, 20.

11. Ngimba tubaghile ukwifighilila bulebule ku fimanyisyo ifi fibaghile ukonanga ulwitiko lwitu?

¹¹ Tukulondiwa ukukana ifimanyisyo fya bakususya. Ukufuma pakabalilo ka Bakristu bakwanda, Umohesi ikubombela abasyobi ukubika aminong’ono amabibi ku babombi  abasubiliwa ba Kyala. Ifyakukongapo fyake, tukulondiwa ukumanya muno tubaghile ukukindanisya isyabwanaloli ni syabutungulu. * Abalughu bitu babaghile ukubombela intaneti ukuti bafumusye isyabutungulu isyakufwana na uswe. Tungasubilagha ubutungulu ubu, panongwa yakuti bukufuma kwa Setano!—1 Yoh. 4:1, 6; Ubuset. 12:9.

12. Nongwa yafiki tukulondiwa ukundaghisya panongwa ya bwanaloli ubu tumanyile?

¹² Ukuti tukane ingelo sya Setano, tukulondiwa ukuya nulwitiko mwa Yesu kangi nubudindo ubu ali nabo pakufwanisya ubwighane bwa Kyala. Tukulondiwa kangi ukusubila injila yimoyene iyi Yehova ikubombela amasiku agha ukuti alongosye igulu lyake. (Mat. 24:45-47) Tukuya pakuya nulusubilo lwamaka mwakumanyila amasyu gha Kyala. Ukufuma apo ulwitiko lwitu lukuya pakufwana itolo numpiki ughu imisisi yake yikubuka pasi fiyo. Pauli ayobile ikindu ikyakufwana itolo bo ikubalembela Abakristu ba ku Kolosi. Umwene atile: “Bo mumo mumwambilile Kristu Yesu Umwalafyale, mo mumo mwendeleghe muli yuyo, mwikumbileghe nukwiyenga mu mmyake, mwitotekeghe ndwitiko.” (Kolos. 2:6, 7) Linga tukwiyipa ukukasya ulwitiko lwitu, Setano nabandu bake bakabaghila ukututolesya ukukindilila ukwenda mbwanaloli.​—2 Yoh. 8, 9.

13. Ngimba tukulondiwa ukughulila isyafiki, kangi nongwa yafiki?

¹³ Tukulondiwa ukughulila ukuti tukuya pakubengiwa nikisu. (1 Yoh. 3:13) Yohani ikutukumbusya ukuti ‘ikisu kyosa kikulaghiliwa nu mbibi’ (1 Yoh. 5:19) Bo tukuseghelela fiyo kubumalilo bwa kisu, Setano ikukalala fiyo. (Ubuset. 12:12) Umwene ikubombela injila nyingi ukuti atusambukile, bo ifyabulowe pamo ubutungulu ubwakufuma ku bakususya. Umwene atikubombela fyene ifyabulowe nubutungulu ubwakufuma kubakususya loli ikubanyoza kangi ababombi ba Yehova. Setano asimenye ukuti asyele nakabalilo akapimba akakuti akanisye imbombo iyakufumusya nukuti tungayagha nulwitiko lwamaka. Sikaya syakuswighisya ukuti imbombo yitu yikanisiwe mfisu fingi. Nalinga mo siyilile, loli abakamu na balumbu mfisu fingi bikwifimbilisya. Kisita kwinong’onela isi Setano ikutubombela loli tukukindilila ukuya nulwitiko lwamaka.

14. Ngimba tubaghile ukubomba isyafiki ukuti tubatule abakamu na balumbu bitu ukukindilila ukuya mbwanaloli?

¹⁴ Ukuti tubatule abakamu na balumbu bitu ukukindilila ukuya mbwanaloli, tukulondiwa ukubanangisya ikisa. (1 Yoh. 3:10, 11, 16-18) Tutikulondiwa ukuti tunangisanieghe ulughano pene apa linga ifindu fili kanunu loli napakabalilo kandamyo. Mwakifwanikisyo, ngimba mummenye umundu yumo uyu unkamu wake afwile kangi ikulondiwa ukusubisiwa nukumpa ubutuli? Pamo ngimba tupilike ukuti Abakristu abinitu katundu wabo onangike panongwa ya ngozi sya kipeliwa kangi bikulondiwa ubutuli ukuti batendekesye inyumba ya Bunyafyale pamo inyumba syabo? Tukunangisya ulughano nikisa ku bakamu na balumbu bitu komma pa isi tukuyoba loli pa isi tukubomba.

15. Ukufwana na 1 Yohani 4:7, 8, ngimba tukulondiwa ukubomba isyafiki?

¹⁵ Tukunkonga Tata witu walughano linga tukunangisania ulughano. (Belenga 1 Yohani 4:7, 8.) Injila yimo iyakulondiwa fiyo iyi tukunangisyila ulughano ko kuhobokelana. Mwakifwanikisyo, umundu yumo abaghile ukutukalalisya loli abaghile ukupepesya ukuti tunhobokele. Tukunangisya ulughano mwakunhobokela nukwibwa ifi atubombile.  (Kolos. 3:13) Unkamu Aldo akalele bo unkamu uyu angindikagha ayobile ifindu ifibibi ifya luko lwake. Aldo atile: “Mwanakalinga naliputile kwa Yehova ukuti andule ukuti ninginong’onelagha ifindu ifibibi ifya nkamu uyu.” Loli Aldo abombile ikindu kimo. Umwene alinong’wine isyakubuka nunkamu uyu mubufumusi. Bo bikufumusya pampene, Aldo alingenie muno ipilikilagha na isi unkamu ayobile. Umwene atile: “Bo unkamu asyaghenie muno nipilikilagha na isi ayobile asumile ukuti nunhobokele. Ukufwana namuno ayobile, nasimenye ukuti akipilikagha kanunu mundumbula. Ukufuma apo, twali kangi pabumanyani ubwamaka.

16-17. Ngimba tukulondiwa ukubomba isyafiki?

¹⁶ Untumiwa Yohani abaghanile fiyo abakamu na balumbu kangi alondagha ukuti baye nulwitiko lwamaka. Umwene anangisye ulughano lwake ukwendela mu bakalata bake batatu aba alembile. Syakuhobosya fiyo ukumanya ukuti abanyambala na bakikulu aba bisakulaghilagha kumwanya na Yesu, bikunangisya ulughano bo muno Yohani abombelagha.—1 Yoh. 2:27.

¹⁷ Tukulondiwa ukukonga ubulongosi ubu tumanyile mu nkhani iyi. Twesa tukulondiwa ukukindilila ukwenda mbwanaloli nukumpilikila Yehova pabumi bwitu. Tumanyileghe amasyu ghake nukughasubila. Tuyeghe nulwitiko lwamaka mwa Yesu. Tukaneghe amahala gha bandu nifimanyisyo fya bandu bakususya. Tutikulondiwa ukumbombela Yehova nukubomba ifindu ifibibi pakabalilo kamokene kangi tutikulondiwa ukubapilikila aba bikutukasya ukubomba ifindu ifibibi. Tukongeghe ifundo sya Yehova isya bugholofu. Kangi isagha tubatuleghe abakamu na balumbu ukuti bakindilileghe ukuya nulwitiko mwakubahobokela bosa aba bikutukalalisya nukubatula aba bikulondiwa ubutuli. Nalinga tukwaghana nindamyo tukuya pakukindilila ukwenda mbwanaloli.