Bwanaloli ukuti Yehova ikulonda ukuti abandu babili aba beghene bahobokeghe nu kuya pabumanyani ubwamaka numwinake uwambweghi. (Mat. 19:4-6) Linga mukulonda ukwegha pamo ukweghiwa, ngimba mubaghile ukumwagha bulebule umwininu unnunu uwakuti mweghane nawe? Pakuya Mpeli witu, Yehova ikumanya isi tukulondiwa ukubomba ukuti tusaye nubweghi ubwalusekelo. Yonongwa yake linga tukukonga ubulongosi ubu ikutupa, tukuya pakuya balusekelo. Inong’onela bumo mwa bulongosi ubu.

Ikyakwanda, tukulondiwa ukupilikisya ifundo iyi yikuti: “Indumbula ya mundu nsyobi fiyo ukukinda fyosa.” (Yere. 17:9) Linga aba bikulonda ukweghana baghene nu kwanda ikibwezi, mwanakalinga babaghile ukwanda ukuya nikinyonywa ku nnine. Linga isi sibombiwe kubaghile ukuya kukafu ku bene ukusala ifyakubomba mwamahala. Linga abandu bikulonda ukweghana panongwa yakuti bali nifinyonywa, pabumalilo babaghile ukusulumania. (Mbu. 28:26) Yonongwa yake kukaya kwa mahala ukuti aba bali pakibwezi babulaneghe muno bikwipilikila nu kufinga isi aliwesa ikulonda bo bakali ukumanyana kanunu.

Pa Isya Mbupingamu 22:3 pikuti: “Umundu uwa mahala linga abubwene ubutolwe bukwisa pabutali ikwibilila, loli umwene unkonyofu yo atikubikilako numoyo bunobuno ikwenda nukufulala.” Ngimba bubibi buliku ubu bubaghile ukuyapo linga tukubombela iwebusayiti iyi abandu bikubagha abinabo abakweghana nabo? Syakitima ukuti bamo babaghile abandu bakihesya pa webusayiti, nukuya nabo pakibwezi loli bo akabalilo kakindilepo abandu aba basyaghenie ukuti babasyobagha. Kangi abandu abasyobi bikuya ninambala isyabutungulu isya ku banki ukuti babahiyileghe indalama. Utubalilo tumo abandu aba bikuyoba ukuti Baketi ba Yehova.

Inong’onela ububibi ubungi. Bamo bikulonda umundu uwakweghana nawe pa webusayiti iyi bikubika ulubatiko lwa bandu aba babaghile ukuya pakibwezi. Loli bukayapo ubuketi ubu bukunangisya ukuti ukubomba isi kukutula naloli. Kukabaghila ukuya kwamahala ukubombela ipulogilamu ya pa kompyuta iyi yikupangiwa na bandu ukuti tusale kanunu ifyakubomba bo ukumwagha umundu unnunu uwakweghana nawe. Tukabaghila ukughasubila amapulogilamu agha pa kompyuta  bo muno tukusubilila ifundo sya mu Baibolo.—Mbu. 1:7; 3:5-7.

Ifundo iyi yikwaghiwa pa Isya Mbupingamu 14:15 yikuti: “Umundu unkonyofu yo ikwitika syosa itolo, loli umundu wa mahala yo ikwinong’ona tasi ninjila iyi abaghile ukwendamo.” Bo mukali ukusala umundu uyu mukulonda ukuti museghane nawe, mukulondiwa ukummanya kanunu. Loli ukwaghana nawe pa webusayiti kubaghile ukuya kukafu ukuti mummanye kanunu. Nalinga ukuti mukuyobesania, mukutumilana ifithuzi namameseji, ngimba mubaghile ukuyoba ukuti mummenye umundu uyu? Bamo aba babaghile abinabo pa webusayiti baswighile fiyo bo baketile utuyilo twa mundu uyu bo baghene nawe maso na maso.

Uwamasalimo atile: “Ngaya mbulilanisi nabatungulu nalinga ko kwenda na bandu abasyobi.” (Sal. 26:4) Abandu bingi bikuketa ukuti kununu ukuyoba ubutungulu pa webusayiti yabo nukubika ikithuzi iki bikuboneka kanunu. Abene babaghile ukufisa utuyilo twabo utubibi linga bikutuma amameseji pa webusayiti ku bangi. Nalinga bamo bikwiyoba ukuti Baketi ba Yehova loli ngimba bosiwe? Ngimba bali pabumanyani ubwamaka na Yehova? Ngimba abakamu na balumbu bikungindika kukipanga kyake? Pamo ngimba ali nikifwanikisyo ikibibi pamo “abamanyani” ababibi? (1 Kor. 15:33; 2 Tim. 2:20, 21) Kangi ngimba ikulonda ukwegha mwakukolelana ni fundo sya mu Baibolo? Mukulondiwa ukumanya amaansala gha malalusyo agha. Loli kubaghile ukuya kukafu ukubagha aba ansala kisita kulalusya ku Baketi abangi aba bammenye kanunu umundu uyo. (Mbu. 15:22) Bwanaloli ukuti umbombi unsubiliwa wa Yehova akabaghila ukweghana nu mundu uyu akaya Nketi wa Yehova.—2 Kor. 6:14; 1 Kor. 7:39.

Panongwa yakuti kubibi ukubombela iwebusayiti ukuti tumwaghe uwakweghana nawe, silipo injila inunu isi tubaghile ukukonga ukuti tummanye kanunu umundu uyu tubaghile ukweghana nawe. Ngimba mubaghile ukumwagha kughu umundu unnunu uwakuti mweghane nawe? Pakabalilo aka twaghanagha, twayagha nulusako ulwakumanyana na bangi maso namaso linga tuli kungomano isya kipanga, kungomano isya kighaba kangi linga tukwangala na bangi.

Panongwa yakuti tutikubungana pampene nkabalilo ka mbungo ya COVID-19 aka, tukubombela amafoni na matabuleti ukuti tupange ingomano, tubaghile ukuya nulusako ulwakumanyana na Baketi abangi aba bakaya pabweghi. Mubaghile ukubapilika muno bikuyobela inkhani ya mu Baibolo pangomano namuno bikunangisyila ulwitiko lwabo mwakwamulapo pangomano. (1 Tim. 6:11, 12) Kangi mubaghile ukwaghana pabumalilo bwa ngomano. Linga abakamu na balumbu baghene pampene, mubaghile ukumanya utuyilo twa mundu uyu mukulonda ukweghana nawe na muno ikubombela ifindu na bangi. (1 Pet. 3:4) Linga akabalilo kakindilepo, linga mumanyene kanunu mubaghile ukuketa linga muli nubwighane ubwakufwana itolo kangi linga abaghile ukuya mwininu uwakuti mweghane nawe.

Linga abandu aba bakaya pabweghi bikukonga ubulongosi bwa mu Baibolo ukuti bubatule ukumwagha umundu uwakweghana nawe, babaghile ukuya nubweghi bwa lusekelo. Sifwene itolo namuno ilemba lya Isya Mbupingamu 18: 22 likuyobela, ili likuti: ‘Uyu linga amwaghile unkikulu bo akaghile akandu akapala namanga lo lughano ulu ambilile kwa Yehova.’—Mbu. 18:22.