1. Ngimba Yehova ababombile isyafiki?

NGIMBA mwalipelile bulebule ukuya yumo wa Baketi ba Yehova? Ikyakwanda, mwapilike “amasyu amanunu” lumo ukufuma ku bapapi binu, uyu mwabombagha nawe imbombo, uyu mwamanyilagha nawe isukulu pamo ukwendela pambombo iyakufumusya ku nyumba ni nyumba. (Mar. 13:10) Ukufuma apo, umundu yumo aliyipile ukuti amanyileghe nanumwe Ibaibolo. Pakabalilo aka mwamanyilagha, mwalyandile ukungana Yehova kangi mwasyaghenie ukuti umwene abaghanile fiyo. Yehova abakwabile ku bwanaloli kangi panongwa yakuti lino muli mfundiwa wa Yesu Kristu, muli nulusubilo ulwakwisa kwikala nu bumi kwa bwila na bwila. (Yoh. 6:44) Kisita kukayika, mukundaghisya fiyo kwa Yehova panongwa yakumbombesyela umundu yumo ukuti abamanyisye ubwanaloli kangi abitikisye ukuti muye yumo mwa babombi bake.

2. Ngimba tukuya pakumanyila isyafiki mu nkhani iyi?

² Panongwa yakuti lino tubumenye ubwanaloli, tuli nulusako ulwakubatula abangi ukuti twendeghe nabo pampene pa njila iyakubuka ku bumi. Kubaghile ukuya kupepe kumyitu ukufumusya ku nyumba ni nyumba loli kubaghile ukuya kukafu ukuti twande ukumanyila na bandu Ibaibolo. Ngimba momuno mukwipilikila? Linga momumo, mukuya pakuketa ukuti amasakisyo ghamo mu nkhani iyi ghakutula fiyo. Tukuya pakumanyila isi sikutukasya ukuti tubatuleghe abangi ukuya bafundiwa. Tukuya pakumanyila kangi muno tubaghile ukulimbana nindamyo isi sibaghile ukututolesya ukumanyila na bandu Ibaibolo. Ikyakwanda, isagha tuyobesanie inongwa iyi tukulondiwa ukufumusya ku bandu nu kubamanyisya amasyu amanunu.

3. Nongwa yafiki tukufumusya?

³ Bo Yesu ali pa kisu, abapele abamanyili bake imbombo iya fighaba fibili. Ikyakwanda, ababulile ukuti bafumusyeghe amasyu amanunu agha Bunyafyale kangi abanangisye muno bikwakubombelagha. (Mat. 10:7; Luka 8:1) Mwakifwanikisyo, ababulile abafundiwa bake isi bikulondiwa ukubomba linga abandu bitike pamo bakanile amasyu agha Bunyafyale. (Luka 9:2-5) Kangi ababulile ukuti bikulondiwa ukufumusya ku bandu bingi na malo mingi ukuti lo luyeghe “lusisimikisyo kufikolo fyosa.” (Mat. 24:14; Imbo. 1:8) Kali abandu bitikagha pamo bakanagha isi babafumusyilagha, Yesu abalaghile abafundiwa bake ukuti bababuleghe abandu isya Bunyafyale bwa Kyala na isi bukuya pakufwanisya.

4. Ukufwana na Matai 28:18-20, ngimba tukulondiwa ukubomba isyafiki ukongelapo pakufumusya isya Bunyafyale?

⁴ Ngimba kighaba kiliku ikyabubili iki Yesu ababulile abamanyili bake ukuti babombeghe? Umwene ababulile ukuti babamanyisyeghe abandu ukukonga syosa isi abalaghile. Loli ngimba imbombo iyakufumusya nu kumanyisya yapeliwe ku Bakristu bakunyuma bene bo muno abandu bikuyobela? Hayi, Yesu anangisye ukuti imbombo iyakulondiwa fiyo iyi yikwisa kukindilila ukufika amasiku agha, “ukwakufika na kubumalikilo ikisu.” (Belenga Matai 28:18-20.) Yesu abaghile ukuti abapele ululaghilo ulu pakabalilo aka abonekile ku bitiki bake abakukinda 500. (1 Kor. 15:6) Kangi nkisetuka iki alinnangisye Yohani, Yesu anangisye ukuti abafundiwa bake bosa bikulondiwa ukubatula abangi ukumanyila isya Yehova.—Ubuset. 22:17.

5. Ukufwana na 1 Bakorinti 3:6-9, ngimba Pauli afwanikisye bulebule ukukolelana uku kulipo pakati pakufumusya nu kumanyisya?

⁵ Untumiwa Pauli afwanikisye imbombo iyakupela abafundiwa nu kufunja ifyakumela. Isi sikunangisya ukuti tukulondiwa ukubomba nyingi ukukinda itolo ukubyala imbeyu. Umwene abakumbwisye Abakristu ba ku Korinti ukuti: “Une nabyele, Apolo alinkonelela amisi . . . Umwe mwe ngunda wa Kyala.” (Belenga 1 Bakorinti 3:6-9.) Pakuya babombanisi mu “ngunda wa Kyala,” tutikubyala itolo imbeyu loli tukonelela amisi nu kuketa akabalilo kosa linga sikukula. (Yoh. 4:35) Loli tusimenye ukuti yo Kyala uyu ikupangisya ukuti imbeyu yikule.

6. Linga tukubamanyisya abandu, ngimba tukulondiwa ukubatula ukubomba isyafiki?

⁶ Tukubalonda abandu aba “bimikiliwe kubumi bwa bwila.” (Imbo. 13:48) Ukuti tubatule abandu aba ukuya bafundiwa, tukulondiwa ukubatula ukuti (1) bapilikisyeghe, (2) basubileghe kangi (3) bakongeghe isi bikumanyila mu Baibolo. (Yoh. 17:3; Kolos. 2:6, 7; 1 Tes. 2:13) Twesa nkipanga tubaghile ukubatula abamanyili ba Baibolo mwakubanangisya ulughano nu kubambilila linga bisile ku ngomano. (Yoh. 13:35) Uyu ikumanyila nu mundu Ibaibolo ikulondiwa kangi ukwiyipa ukuntula ummanyili “ukubulutula amalinga” agha isi ikusubila pamo inyiho. (2 Kor. 10:4, 5) Pabaghile ukukinda imyesi mingi ukuti tuntule umundu ukuchenja pabumi bwake ukuti osiwe. Loli ukubomba isi kwakutula fiyo.

7. Ngimba findu fiki fikutukasya ukuti tubombeghe imbombo iyakufumusya nu kupela abafundiwa?

⁷ Nongwa yafiki tukubomba imbombo iyakufumusya nu kupela abafundiwa? Ikyakwanda, panongwa yakuti tunganile Yehova. Linga mukughelaghela ukupilikila ululaghilo ulwakuti mufumusyeghe kangi mupeleghe abafundiwa, mukunangisya ulughano lwinu kwa Kyala. (1 Yoh. 5:3) Inong’onela isi: Ulughano lwinu kwa Yehova lukubapangisya ukuti mufumusyeghe ku nyumba ni nyumba. Ngimba kupepe ukupilikila ululaghilo ulu? Hayi. Ngimba bo mubukile ukwakufumusya akakwanda mwali nubogha?  Kisita kukayika mwali nubogha. Loli mwasimenye ukuti iyi yo mbombo iyi Yesu ikulonda ukuti mubombeghe kangi mwapilikile ululaghilo ulu. Kangi lumo bo mufumwisye kwa kabalilo, mwalyandile ukuketa ukuti ukufumusya kupepe. Loli bule pakuyoba isyakumanyila nu mundu Ibaibolo? Ngimba mukuya nubogha linga mukwinong’onela isi? Linga munsumile Yehova ukuti abatule ukumalana nubogha ukuti mumanyileghe nu mundu Ibaibolo, Yehova abaghile ukubatula ukuti mufwanisyeghe ukupela abafundiwa.

8. Ukufwana na Marko 6:34, ngimba kindu kiliku ikingi iki kikutupangisya ukuti tubamanyisyeghe abangi?

⁸ Ikyabubili, ulughano lwitu ku bandu lukutupangisya ukuti tubamanyisyeghe ubwanaloli. Pakyakubombiwa kimo, Yesu na bafundiwa bake bakatele panongwa yakuti bafumwisye fiyo. Abene balondiwagha amalo aghakuti bakatusye loli ikilundilo kya bandu kyabakongile. Panongwa ya kisa, Yesu alinkwanda ukubamanyisya abandu “si nyingi.” (Belenga Marko 6:34.) Umwene aliyipile fiyo nalinga ukuti akatele. Nongwa yafiki? Yesu asimenye muno abandu aba bipilikilagha. Alondagha ukubatula panongwa yakuti aketile ukuti batamiwagha kangi balondiwagha ukusubisiwa. Amasiku agha, abandu bikwaghana ni ndamyo kangi bikulondiwa ukusubisiwa nalinga ukuti babaghile ukuboneka ukuti bali nulusekelo kangi bali nifindu ifyakulondiwa pa bumi bwabo. Abene bali bo ing’osi isi siyongile kangi bakaya nuntimi uwakuti abalongosyeghe. Untumiwa Pauli atile, abandu bo aba bakammanya Kyala kangi bakaya nulusubilo. (Ef. 2:12) Abene ‘bikwenda pa njila iyi yikubuka kulonangiko.’ (Mat. 7:13) Linga tukwinong’onela isya bumi bwa mwambepo ubwa bandu ba nkighaba kitu, ulughano ni kisa fikutupangisya ukuti tubatule. Kangi injila yimo iyi tubaghile ukubatula ko kwanda ukumanyila nabo Ibaibolo.

9. Ukufwana na Bafilipi 2:13, ngimba Yehova abaghile ukubatula bulebule?

⁹ Lumo muli nubogha ukuti mwande ukumanyila Ibaibolo nu mundu panongwa yakuti mukwinong’onela isya kabalilo aka mukuya pakumalila pakumanyila. Linga momuno siyilile, mumbuleghe Yehova muno mukwipilikila. Munsumeghe ukuti abatule ukumwagha umundu yumo uwakuti mumanyileghe nawe Ibaibolo. (Belenga Bafilipi 2:13.) Untumiwa Yohani ikutusimikisyila ukuti Kyala ikuya pakwamula inyiputo isi sikukolelana nu bwighane bwake. (1 Yoh. 5:14, 15) Yonongwa yake mubaghile ukuya nulusubilo losa ukuti Yehova ikuya pakubatula ukuya nubwighane ubwakuti mupele abafundiwa.

10-11. Ngimba findu fiki fibaghile ukututolesya ukumanyila Ibaibolo nu mundu?

¹⁰ Tukupilikila fiyo ululaghilo ulwa kumanyisya nalinga ukuti tukwaghana ni ndamyo isi sibaghile ukutupangisya ukuti tungabombagha nyingi pakupela abafundiwa. Isagha tuyobesanie simo mwa ndamyo isi na muno tubaghile ukulimbana nasyo.

¹¹ Tukutoliwa ukubomba nyingi panongwa ya ndamyo isi tukwaghana nasyo. Mwakifwanikisyo, abafumusi bamo bakangale pamo bikubina. Ngimba momuno siyilile ku myinu? Linga momuno siyilile, inong’onela kimo mwa fimanyilo ifi tumanyile ku mbungo ya COVID-19. Tuketile ukuti tubaghile ukumanyila nu mundu Ibaibolo mwakubombela amafoni ghitu pamo ifibombelo ifingi. Yonongwa yake kupepe ukwanda ukumanyila nu mundu Ibaibolo bo muli kukaya kinu. Kangi bulipo ubununu ubungi. Bamo bikulonda ukumanyila Ibaibolo, loli linga akabalilo kafwene batikwaghiwa pakaya. Utubalilo twingi abakamu bitu bikufumusya ku bangi. Loli abene bikwaghiwa nulubunju fiyo pamo pakilo. Ngimba mubaghile ukumanyila nu mundu  yumo Ibaibolo pakabalilo bo aka? Yesu ammanyisyagha Nikodemu pakilo, akabalilo aka Nikodemu ahobokagha nako.—Yoh. 3:1, 2.

12. Ngimba njila siliku isi sikutupa ulusubilo ukuti tubaghile ukuya bamanyisi banunu?

¹² Tubaghile ukwinong’ona ukuti tukabaghila ukumanyila nu mundu Ibaibolo. Lumo tubaghile ukwinong’ona ukuti tukulondiwa ukuya na mahala pamo uluso pakuya mmanyisi bo tukali ukwanda ukumanyila nu mundu. Linga momuno mukwinong’onela, keta injila sitatu isi sibaghile ukubatula ukuya nulusubilo losa ukuti mubaghile ukumanyila nu mundu yumo. Iyakwanda, Yehova ikuketa ukuti mubaghile ukufwanisya ukubamanyisya abangi. (2 Kor. 3:5) Iyabubili, Yesu, uyu ali ‘namaka ghosa kumwanya na pasi,’ abapele ululaghilo ulwakuti mumanyisyeghe. (Mat. 28:18) Kangi iyabutatu, mubaghile ukubasuma abangi ukuti babatule. Yesu asubilagha isi Tata wake ammanyisyagha, syo isi nanumwe mukulondiwa ukubomba. (Yoh. 8:28; 12:49) Mwakongelelapo, mubaghile ukundalusya uyu ikuketesya akagulu kinu ka bufumusi, umpayiniya pamo umfumusi uwamaluso ukuti abatule ukuti mwande ukumanyila nu mundu Ibaibolo. Injila yimo iyi mubaghile ukumanyila ukuya mmanyisi nnunu ko kuyapo pakabalilo aka abafumusi bikumanyila nu mundu Ibaibolo.

13. Nongwa yafiki tukulondiwa ukwiyipa ukuti tumanyisyeghe mu njila isyakukindanakindana?

¹³ Tubaghile ukuketa ukuti kukafu ukubombela injila imbya ni fibombelo ifipya. Lino tuchenjile muno twamanyililagha Ibaibolo na bandu. Ibuku litu ilyakuti, Amuhobokeghe nu Bumi kwa Bwila na Bwila, likulonda ukuti twitendekesyeghe isi tukwakumanyila loli tukumanyilagha nabo mwakukindana na muno twabombelagha kunyuma. Tukubelenga amapalagilafu manandi itolo nu kwanda ukuyobesania nyingi nummanyili. Linga tukumanyisya, tukubombela amavidiyo mingi na mapulogilamu aghangi bo JW Library^®. Linga mukamanya muno mubaghile ukubombela ifibombelo ifi, munsume yumo ukuti abatule muno mubaghile ukubombela. Twe bandu tukwipilika kanunu linga tukubomba ifindu munjila iyi twalisibile. Kukaya kupepe kumyitu ukwisibila injila imbya isya muno tubaghile ukubombela ifindu. Loli nubutuli bwa Yehova na bangi, mukuya pakuketa ukuti kupepe ukuchenja kangi kwakuhobosya fiyo ukumanyila na bandu. Umpayiniya yumo atile, “ukumanyila munjila bo iyi kukuya kwakuhobosya fiyo ku mmanyili na kummanyisi wake.”

14. (a)Ngimba tukulondiwa ukukumbuka isyafiki linga tukufumusya nkighaba iki abandu batikupilikisya? (b)Ngimba ilemba lya 1 Bakorinti 3:6, 7 likutukasya bulebule?

¹⁴ Lumo tukwikala nkighaba iki kukafu ukwanda ukumanyila na bandu Ibaibolo. Abandu bamo batikuhoboka na masyu agha tukubafumukisya kangi lumo babaghile ukutususya. Ngimba findu fiki fibaghile ukututula ukuya naminong’ono amanunu nkighaba bo iki? Tukumbukeghe ukuti ifindu pa bumi bwa bandu fibaghile ukuchenja mwanakalinga nkisu ikibibi iki. Kangi aba pakwanda bakahobokagha babaghile ukusyaghania ukuti bikulondiwa ukulongosiwa na Kyala pa bumi bwabo. (Mat. 5:3) Bamo aba kunyuma bakanagha ukwambilila amabuku ghitu, bo akabalilo kakindilepo balitike ukumanyila Ibaibolo. Kangi tusimenye ukuti Yehova yo Mwalafyale wa ntondolo. (Mat. 9:38) Kyala ikulonda ukuti tukindilileghe ukubyala nu konelela amisi loli umwene yo ali nubudindo ubwakumesya. (1 Kor. 3:6, 7) Kangi syakukasya fiyo linga tukukumbuka ukuti nalinga tukabaghila ukufwanisya ukumanyila nu mundu Ibaibolo lino, loli Yehova ikutusaya panongwa ya kwiyipa kwitu ukuti tubatule abandu. *

15. Ngimba Yehova ikwipilika bulebule linga yumo itike ukumanyila Ibaibolo nukukonga isi ikumanyila?

¹⁵ Yehova ikuhoboka fiyo linga umundu itike ubwanaloli nu kubabulako abangi isi amanyile. (Mbu. 23:15, 16) Yehova abaghile ukuti ikuya walusekelo fiyo linga ikuketa ababombi bake bikwiyipa ukufumusya nu kumanyisya amasiku agha. Mwakifwanikisyo, nalinga ukuti nkyinja kya bubombeli ikya 2020 imbungo yatamisye fiyo pa kisu kyosa, loli twamanyile Ibaibolo na bandu abakufwana 7,705,765, isi syatulile ukuti abandu abakufwana 241,994 biyipe kwa Yehova nu kosiwa. Abafundiwa abapya aba bikuya pakwanda ukumanyila Ibaibolo na bandu nu kupela abafundiwa bingi. (Luka 6:40) Kisita kukayika, tukunhobosya fiyo Yehova linga tukwiyipa pambombo iyakupela abafundiwa.

16. Ngimba ubwighane ubununu bo buliku?

¹⁶ Imbombo iyakupela abafundiwa yakutamya fiyo. Loli nubutuli bwa Yehova tubaghile ukweghapo ikighaba pambombo iyakubamanyisya abapya ukuti banganeghe Tata witu wakumwanya. Ngimba tukuya pakuya nubwighane ubwakuti tumanyileghe Ibaibolo nu mundu yumo? Tubaghile ukuhoboka fiyo na isi sibaghile ukubombiwa linga tukubasuma aba tukwaghana nabo ukuti tumanyileghe nabo Ibaibolo. Tuli nulusubilo losa ukuti Yehova ikuya pakutusaya panongwa yakwiyipa kwitu.

17. Ngimba tukuya pakwipilika bulebule linga tukufwanisya ukumanyila na bandu Ibaibolo?

¹⁷ Tuli nulusako ulunywamu fiyo ulwa kufumusya kangi nu kumanyisya ubwanaloli ku bangi. Imbombo iyi yikutupangisya ukuya balusekelo fiyo. Untumiwa Pauli, uyu abatulile Abakristu bingi aba ku Tesalonike ukuya bafundiwa, alingenie muno ipilikilagha. Umwene atile: ‘Namanga ywani uyu yo lusubilo lwitu, yo lusekelo lwitu, pamo uyu tukwakwitukifyamo, ubutoli bwitu nkyeni mu Mwalafyale Yesu bo ikwisa, kali mukaya yo yuyumwe? Namanga yo yuyumwe mwe tukwitukifyamo kangi mwe lusekelo lwitu.’ (1 Tes. 2:19, 20; Imbo. 17:1-4) Bingi amasiku agha bikwipilika bo ulu. Umulumbu Stéphanie pampene nundume wake, babatulile abandu bingi ukuti bosiwe. Abene batile, “Kikayapo ikindu ikyakuhobosya fiyo ukukinda ukubatula abandu ukuti biyipe kwa Yehova nu kosiwa.”