1. Ngimba tukulondiwa ukuketa bulebule ulusako ulwakwiputa kwa Yehova?

 YEHOVA atupele ikyabupe ikyapamwanya fiyo. Umwene atwitikisye ukuti tumwiputeghe. Inong’onela isi: Tubaghile ukumbula isya mundumbula yitu akabalilo kalikosa kangi munjobelo yiliyosa. Tubaghile ukwiputa kwa Yehova linga tuli kukipatala pamo mujele, mwakuya nulusubilo ukuti Tata witu walughano ikuya pakupilika. Tukundaghisya fiyo panongwa ya kyabupe iki.

2. Ngimba Umwalafyale Davidi anangisyagha bulebule ukuti andaghisyagha ikyabupe kya lwiputo?

² Umwalafyale Davidi andaghisye fiyo ikyabupe kya lwiputo. Umwene atile: “Ulwiputo lwangu luyeghe bo tu twa kufukisya nkyeni mmyako.” (Sal. 141:1, 2) Nkabalilo ka Davidi, ifyakufukisya ifi abaputi babombelagha pakwiputa kwa bwanaloli bafipwelelelagha fiyo. (Kuso. 30:34, 35) Davidi inong’onelagha kanunu isi ikuya pakuyoba linga ikwiputa kwa Yehova mwakufwana itolo na aba babikagha ifyakufukisya mwakufipwelelela. Syo isi nanuswe tukulondiwa ukubomba. Tukulonda ukuti inyiputo syitu sinhobosyeghe Yehova.

3. Ngimba tukulondiwa ukunangisya akayilo kaliku linga tukwiputa kwa Yehova, kangi nongwa yafiki?

³ Linga tukwiputa kwa Yehova, tukulondiwa ukuya nulughindiko. Inong’onela isya fisetuka ifyakuhobosya ifi Yesaya, Ezekieli, Danieli na Yohani bafibwene. Ifisetuka ifi fyakindene loli fyafwene munjila yimo. Fyosa fyanjobagha Yehova ukuya Mwalafyale wamaka fiyo. Yesaya “alimbwene Yehova bo itughesye pa kikota kyake kya Bunyafyale.”  (Yes. 6:1-3) Ezekieli alimbwene Yehova itughesye pa kikota kyake kya Bunyafyale, iki kyasyungutiliwe “nulumuli . . . ulu lwafwanagha kipingafula.” (Eze. 1:26-28) Danieli alimbwene “Yumo uyu ali mumi bwila na bwila” afwele unselekesye umwelu, kangi indapi sya moto silinkufuma kukikota kyake kya Bunyafyale. (Dan. 7:9, 10) Yohani alimbwene Yehova itughesye pa kikota kya Bunyafyale asyungutiliwe ni kindu kimo iki kyabonekagha bo kipingafula kya emeladi. (Ubuset. 4:2-4) Bo tukwinong’onela isya bukulumba bwa Yehova, tukundaghisya fiyo panongwa ya lusako ulwakwiputa kumyake nukulondiwa kwakubomba isi mwalughindiko. Loli ngimba tukulondiwa ukusuma isyafiki ndwiputo?

4. Ngimba tukumanyilako isyafiki ku lwiputo lwakifwanikisyo ulu Yesu ayobile pa Matai 6:9, 10?

⁴ Belenga Matai 6:9, 10. Bo ali Pabufumusi bwa Pakyamba, Yesu abamanyisye abafundiwa bake muno babaghile ukwiputila munjila iyi yikunhobosya Kyala. Bo ayobile ukuti “umwe lelo bo mukwiputa mutighi,” ikyakwanda Yesu ayobile ifindu ifyakulondiwa fiyo ifi fikukolelana nubwighane bwa Yehova, ifindu ifi fyo: ukuyikemesya ingamu yake; ukwisa kwa Bunyafyale bwake ubu bwisakonanga aba bikunsusya; nifindu ifinunu ifi ikuya pakubabombela abandu pa kisu. Linga tukuyoba ifindu bo ifi mu nyiputo syitu, tukunangisya ukuti ubwighane bwa Kyala bwakulondiwa fiyo kumyitu.

5. Ngimba Yehova ikupilikisya linga tukunsuma ifindu ifi tukulondiwa?

⁵ Ikighaba ikyakukongapo ikya lwiputo lwake, Yesu ayobile ukuti tusumeghe ifindu ifi tukulondiwa. Tubaghile ukunsuma Yehova ukuti atupe ifyakulya, atuhobokele ubutulanongwa bwitu, atufighilile ku ngelo nu kutupoka ku mbibi. (Mat. 6:11-13) Linga tukunsuma Yehova ifindu ifi, tukunangisya ukuti tukulondiwa ubutuli kangi tukulonda ukunhobosya.

6. Ngimba tukulondiwa ukusuma ifindu fyene ifi fiyobiwe mulwiputo lwakifwanikisyo? Lingania.

⁶ Yesu akalondagha ukuti abafundiwa bake begheleleghe itolo amasyu agha ghali mulwiputo ulwakifwanikisyo. Utubalilo tumo linga Yesu ikwiputa, ayobagha ifindu  ifyakukindana ifi fyali fyakulondiwa fiyo kumyake. (Mat. 26:39, 42; Yoh. 17:1-26) Mwakufwana itolo, nanuswe tubaghile ukunsuma kilikyosa iki tukwiyaya nakyo. Linga tukulonda ukusala ifyakubomba, tubaghile ukunsuma Yehova ukuti atupe amahala nukupilikisya kanunu ifindu. (Sal. 119:33, 34) Linga batupele ububombeli ubwakutamya, tukulondiwa ukusuma ubutuli ukuti tupilikisye kanunu muno tubaghile ukubombela. (Mbu. 2:6) Abapapi babaghile ukubiputila abanabo, abana babaghile ukubiputila abapapi babo, kangi twesa tukulondiwa ukubiputila abamanyili bitu ba Baibolo na aba tukubafumukisya. Loli linga tukwiputa, tutikulondiwa ukusuma itolo ubutuli kwa Yehova.

7. Nongwa yafiki tukulondiwa ukumpala Yehova ndwiputo?

⁷ Tukulondiwa ukukumbuka ukumpala Yehova mu nyiputo syitu. Akayapo uyu ikulondiwa ukupaliwa ukukinda Kyala witu. Umwene “nnunu fiyo kangi ikuhobokela. Wakisa, mfisalyoyo kangi iswile nipyana nubusubiliwa.” (Sal. 86:5, 15) Tuli nififukwa ifinunu fiyo ifyakumpala Yehova panongwa ya muno ayilile kangi na isi ikubomba.

8. Ngimba findu fimo filiku ifi tukulondiwa ukunndaghisya Yehova? (Salimo 104:12-15, 24)

⁸ Ukongelela pakumpala Yehova mu nyiputo syitu, tukukasiwa kangi ukuti tunndaghisyeghe panongwa ya findu ifinunu ifi ikutupa. Mwakifwanikisyo, tubaghile ukundaghisya panongwa yaluko ulununu ulwa maluba, ifyakulya ifinunu ifya luko nu luko nulusekelo ulu tukuya nalo panongwa yakuya nabamanyani abanunu. Tata witu walughano ikutupa ifindu fingi ukuti tuhobokeghe. (Belenga Salimo 104:12-15, 24.) Ikindu ikyakulondiwa fiyo kyo kyakuti, tukunndaghisya Yehova panongwa ya fyakulya fyamwambepo ifi ikutupa nulusubilo ulununu ulwa nkyeni ulu tuli nalo.

9. Ngimba findu fiki fibaghile ukututula ukuti tunndaghisyeghe Yehova? (1 Batesalonike 5:17, 18)

⁹ Kubaghile ukuya kupepe ukwibwa ukunndaghisya Yehova pa fyosa ifi ikutubombela. Ngimba findu fiki fibaghile ukututula ukuti tungibwagha? Mubaghile ukulemba ifindu  ifyakukindanakindana ifi mwasumile kwa Yehova nukuketa muno Yehova amulile inyiputo syinu. Ukufuma apo mwipute kumyake nukunndaghisya panongwa yabutuli bwake. (Belenga 1 Batesalonike 5:17, 18.) Amwinong’onele isi: Tukuhoboka fiyo linga abangi bikutundaghisya. Mwakufwana itolo, linga tukukumbuka ukunndaghisya Yehova panongwa yakwamula inyiputo syitu, sikunhobosya fiyo. (Kolos. 3:15) Loli ngimba kifukwa kiliku ikingi ikyakulondiwa fiyo ikyakunndaghisya Kyala?

10. Ukufwana na 1 Peteri 2:21, nongwa yafiki tukulondiwa ukunndaghisya Yehova panongwa yakuntuma umwanake Yesu pa kisu?

¹⁰ Belenga 1 Peteri 2:21. Tukulondiwa ukunndaghisya Yehova panongwa yakuntuma umwanake unganiwa ukuti asatumanyisye. Tukumanyila nyingi isya Yehova na muno tubaghile ukunhobosyela mwakumanyila isya Yesu. Linga tukunangisya ulwitiko mu ikemo lya Kristu, tubaghile ukuya pabumanyani ubununu na Yehova Kyala kangi nukuya balusekelo.​—Rom. 5:1.

11. Nongwa yafiki tukwiputa ukwendela mwa Yesu?

¹¹ Tukundaghisya fiyo kwa Yehova panongwa yakwiputa ukwendela mwa Yesu. Yehova ikutupa fyosa ifi tunsumile ukwendela mwa Yesu. Yesu atile: “Fyosa ifi linga mukusumila mu ngamu yangu, fyo nikubombagha ukuti Tata akabileghe ubukulumba mu mmwana.”​—Yoh. 14:13, 14.

12. Ngimba kifukwa kiliku ikingi iki tukulondiwa ukunndaghisya Yehova panongwa ya mwanake?

¹² Yehova ikutuhobokela ubutulanongwa panongwa ya ikemo lya Yesu. Amalemba ghikunjoba Yesu ukuti “tuli nawe umputi unkulumba yuyuyu uyu itughesye kumwanya kukiboko ikililo kya Bunyafyale.” (Hib. 8:1) Yesu yo “uwakutwimila kwa Tata.” (1 Yoh. 2:1) Tukunndaghisya fiyo Yehova panongwa yakutupa umputi unkulumba uyu ikutupilikisya kangi “ikutupyelekesya.” (Rom. 8:34; Hib. 4:15) Tuli basitabugholofu, kangi kisita ikemo lya Yesu tukabaghila ukufwanisya ukuyobesania na Yehova ndwiputo. Kisita kukayika, tukabaghila ukufwanisya ukunndaghisya Yehova panongwa ya kyabupe kya mwanake unganiwa iki atupele.

13. Ikilo ikyakuti kilabo ikuya pakufwa, ngimba Yesu anangisye bulebule ukuti abaghanile abafundiwa bake?

¹³ Ikilo ikyakuti kilabo ikuya pakufwa, Yesu abiputile abafundiwa bake kwa kabalilo akatali, alinsumile Tata wake ukuti “ububatileghe ku mbibi.” (Yoh. 17:15) Isi sikunangisya ukuti Yesu abaghanile fiyo abafundiwa bake. Nalinga asimenye ukuti ikuya pakutamiwa fiyo loli umwene akindilile ukubapasikisya abafundiwa bake.

14. Ngimba tubaghile ukunangisya bulebule ukuti tubaghanile abakamu na balumbu bitu?

¹⁴ Panongwa yakuti tukunkonga Yesu, tutikwinong’onela itolo isi tukulonda. Mmalo mwake, utubalilo tosa tukubiputila abakamu na balumbu bitu. Linga tukubomba isi, tukupilikila ululaghilo lwa Yesu ulwakuti tughananeghe kangi tukunangisya kwa Yehova muno tubaghanile Abakristu abinitu. (Yoh. 13:34) Ukubiputila abakamu na balumbu bitu, kukubatula fiyo. Amasyu gha Kyala ghikuti, “Ulwiputo lwa mundu ungolofu luli namaka fiyo ukubomba simo.”​—Yak. 5:16.

15. Nongwa yafiki Abakristu abinitu bikulondiwa inyiputo syitu?

¹⁵ Abakristu abinitu bikulondiwa inyiputo syitu panongwa yakuti bikwaghana ni  ndamyo nyingi. Tubaghile ukunsuma Yehova ukuti abatule ukwifimbilisya kububine, ingozi syakipeliwa, ubwite, ukufwimiwa pamo ni ndamyo isingi. Tukulondiwa kangi ukubiputila abakamu na balumbu aba bikwiyipa ukuti babatule aba bikulondiwa ubutuli. Lumo tubaghile ukubamanya bamo aba bikwaghana ni ndamyo bo isi. Tubaghile ukubiputila mwakuyoba ingamu syabo ndwiputo. Tukunangisya ulughano lwanaloli ku bakamu na balumbu bitu mwakunsuma Yehova ukuti abatule ukwifimbilisya.

16. Nongwa yafiki tukulondiwa ukubiputila aba bikutulongosya?

¹⁶ Aba bikulongosya nkipanga bikundaghisya fiyo linga tukubayoba mu nyiputo syitu kangi sikubatula fiyo. Untumiwa Pauli asimenye ukuti kwakulondiwa ukuti abangi bamwiputileghe. Umwene atile: “Munyiputileghe nanine, ukuti Kyala ambeghe isyakuyoba, ko kuti nsifumusyeghe nubukifu isya kubutitu isya mmasyu amanunu.” (Ef. 6:19) Nanuswe amasiku agha, tuli na bakamu bingi abakwiyipa aba bikutulongosya. Tukunangisya ulughano kumyabo mwakunsuma Yehova ukuti abasaye panongwa ya budindo ubu bali nabo.

17-18. Ngimba po pakabalilo kaliku aka tubaghile ukusumiwa ukuti twipute, kangi tukulondiwa ukukumbuka isyafiki?

¹⁷ Utubalilo tumo, babaghile ukutusuma ukuti twipute. Mwakifwanikisyo, umulumbu uyu ikumanyila nu mundu Ibaibolo abaghile ukunsuma umulumbu uyu endile nawe mubufumusi ukuti ipute. Umulumbu uyu asumiwe lumo akabaghila ukummanya kanunu ummanyili wa Baibolo yonongwa yake abaghile ukusuma ukuti ipute linga bamalile ukumanyila. Ukubomba bo ulu, kubaghile ukuntula ukumanya isi abaghile ukuyoba ndwiputo isyakufwana nu mmanyili.

¹⁸ Unkamu abaghile ukusumiwa ukuti ipute pakabalilo kakwitendekesya ukwingila mubufumusi pamo pangomano sya kipanga. Abakamu aba bali nulusako bo ulu bikulondiwa ukukumbuka isi bikulondiwa ukuyoba ndwiputo pakabalilo aka babungene. Ulwiputo yikaya yo njila iyakuti tubape abangi ubulongosi, ukumanyisya nkipanga pamo ukufumusya  inkhani yimo. Pangomano nyingi isya kipanga, amaminiti 5 ghikuya gha lwimbo nulwiputo, yonongwa yake unkamu uyu ikwiputa atikulondiwa ukuyoba “amasyu mingi,” fiyofiyo kubwandilo bwa ngomano.​—Mat. 6:7.

19. Ngimba findu fiki fikuya pakututula ukwitendekesya isiku lya bulongi bwa Yehova?

¹⁹ Tukulondiwa ukuketa ulwiputo ukuya lwakulondiwa fiyo pa bumi bwitu panongwa yakuti isiku lya bulongi bwa Yehova liseghelile. Yonongwa yake Yesu atile: “Amuyeghe maso mwiputeghe bwila, ukuti mwisemubwaghe ubuponelo muli syosa isi sikuya pakwipela.” (Luka 21:36) Linga tukwiputa akabalilo kosa, ulwitiko lwitu lukuya pakuya lwamaka kangi tukuya pakwitendekesya isiku lya bulongi bwa Kyala.

20. Ngimba inyiputo syitu sibaghile ukuya bulebule luma lununu?

²⁰ Ngimba tumanyile isyafiki? Tumanyile ukuti ulwiputo lwakulondiwa fiyo. Ifindu ifyakulondiwa fiyo ifi tukulondiwa ukusuma ndwiputo fikulondiwa ukuti fikolelaneghe nubwighane bwa Yehova. Kangi tukunangisya ukundaghisya panongwa yakutupa umwanake nu Bunyafyale nukubiputila Abakristu abinitu. Kangi Yehova ikulonda ukuti tusumeghe ifindu ifi tukulondiwa pa bumi kangi ukuti atutule ukuya nulwitiko lwamaka. Linga tukwinong’onela fiyo isi tukuyoba ndwiputo, tukunangisya ukuti tukundaghisya ikyabupe kyapamwanya iki. Amasyu ghitu ghikuya pakufwana bo uluma ulununu kwa Yehova, “ulu lukunkyela.”​—Mbu. 15:8.