1. Ngimba ubwighane bwa Kyala bo bwakuti fiki amasiku agha?

 AMASIKU agha ubwighane bwa Kyala bo bwakuti amasyu amanunu gha Bunyafyale ghafumusiwe pa kisu kyosa. (Mar. 13:10; 1 Tim. 2:3, 4) Iyi mbombo ya Yehova, kangi umwene ansalile umwanake unganiwa ukuti yo alongosyeghe pambombo iyi. Kangi tuli nulusubilo losa ukuti panongwa yakuti Yesu ikutulongosya, imbombo iyakufumusya yikuya pakubombiwa ukufwana namuno Yehova ikulondela bo ubumalilo bukali ukufika.​—Mat. 24:14.

2. Ngimba tukuya pakumanyila isyafiki mu nkhani iyi?

² Mu nkhani iyi, tukuya pakumanyila muno Yesu ikumbombesyela “untumwa unsubiliwa nuwa mahala” ukubapa ifyakulya fya mwambepo nukubalongosya ababombi bake pambombo iyakufumusya ukukinda kunyuma. (Mat. 24:45) Tukuya pakumanyila kangi isi umundu aliwesa abaghile ukubomba ukuti antule Yesu nuntumwa unsubiliwa.

3. Ngimba budindo buliku ubu Yesu apeliwe?

³ Yesu yo ikulongosya pambombo iyakufumusya. Ngimba tubaghile ukusubila bulebule isi? Bo asyele panandi ukubuka kumwanya, Yesu alyaghene na bafundiwa bake bamo abasubiliwa pakyamba kya Galilai. Umwene ababulile ukuti: “Amaka ghosa mbeghiwe yuyune kumwanya na pasi.” Keta ifundo iyakukongapo: “Amubukeghe lelo mukabapeleghe bafundiwa abandu ifikolo fyosa.” (Mat. 28:18, 19) Ukongelelapo pa isi,  Yesu apeliwe ubudindo ubwakuti alongosyeghe pambombo iyakufumusya.

4. Nongwa yafiki tubaghile ukusubila ukuti Yesu yo ikulongosya pambombo iyakufumusya?

⁴ Yesu ayobile ukuti imbombo iyakufumusya nukupela abafundiwa yikuya pakufika ku “fikolo fyosa” kangi umwene isakuya na bafundiwa bake bwila “ukwakufika na kubumalikilo ikisu.” (Mat. 28:20) Ifundo iyi yikunangisya ukuti imbombo iyakufumusya yikuya pakukindilila ukulongosiwa na Yesu amasiku ghitu agha.

5. Ngimba tukutulapo bulebule pakufwanisya ubusololi ubu buli pa Salimo 110:3?

⁵ Yesu akapasyagha ukuti pisakuya ababombi banandi mmasiku ghabumalilo. Umwene asimenye ukuti amasyu gha busololi agha ghali mu buku lya masalimo ghisakufwanisiwa, aghakuti: ‘Abandu bako bisakwiyipa bene itolo mwisiku ili wisakusumukisyagha ubwite.’ (Sal. 110:3) Linga tukufumusya amasyu amanunu, tukuntula Yesu nu ntumwa unsubiliwa ukufwanisya ubusololi ubu. Imbombo iyi yikukindilila ukubuka pankyeni loli tukwaghana ni ndamyo nyingi.

6. Ngimba ndamyo yimo yiliku iyi abafumusi ba Bunyafyale bikwaghana nayo amasiku agha?

⁶ Indamyo yimo iyi abafumusi ba Bunyafyale bikwaghana nayo ko kususiwa. Abakususya, abalongosi ba matchalichi na bandyali bikubabula abandu isyabutungulu isyakufwana ni mbombo yitu. Linga aba mumbumba yitu, abandu aba tubamenye na aba tukubomba nabo imbombo bapilike inkhani isyabutungulu isyakufwana nanuswe, babaghile ukutufimbilisya ukuti tuleke ukumbombela Yehova. Mfisu fimo, abalughu bitu babaghile ukututilisya, ukutunyoza pamo ukubabika abakamu na balumbu mujele. Tutikuswigha na isi abandu bikubomba. Yesu ayobile ngani ukuti: “Mwisakubengiwagha nifikolo fyosa panongwa yangu.” (Mat. 24:9) Panongwa yakuti tukubengiwa, sikunangisya ukuti tuli kukighaba kya Yehova. (Mat. 5:11, 12) Umohesi yo ikupangisya isi. Loli Yesu ali namaka fiyo ukunkinda Setano. Nubutuli bwa Yesu, amasyu amanunu ghikubafika abandu aba mfikolo fyosa. Inong’onela isi.

7. Ngimba buketi buliku ubu bukunangisya ukuti ubusololi ubu buli pa Ubusetuli 14:6, 7 bukufwanisiwa?

⁷ Pakuya bafumusi ba Bunyafyale, tukwaghana ni ndamyo iyakumanyila injobelo iyingi. Nkisetuka iki alinnangisye untumiwa Yohani, Yesu ayobile ngani ukuti mmasiku agha amasyu amanunu ghikuya pakututula ukumanyila injobelo isingi. (Belenga Ubusetuli 14:6, 7.) Bulebule? Tukubatula abandu bingi ukuti bamanyileghe amasyu gha Bunyafyale. Amasiku agha, abandu pa kisu kyosa babaghile ukubelenga amabuku aghakulingania isya Baibolo pa jw.org panongwa yakuti pikwaghiwa injobelo isyakukinda 1,000. Aba Nkabughatila Kakulongosya balitikisye ukuti tusanusye ibuku ilyakuti Amuhobokeghe nu Bumi kwa Bwila na Bwila, ili tukubombela pakubamanyisya abandu munjobelo isyakukinda 700. Ifundo sya mu Baibolo isya bandu aba batikuketa na aba batikupilika sikwaghiwa kangi mu mavidiyo aghakupilikisya na mmabuku. Isi sikututula ukuketa ukufwanisiwa kwa busololi bwa mu Baibolo. Abandu “aba njobelo syosa nifikolo fyosa” bikumanyila ubwanaloli bwa mu Baibolo. (Zeka. 8:23; Zefa. 3:9) Syosa isi sikufwanisiwa panongwa yakuti Yesu Kristu yo ikulongosya.

8. Ngimba fyakukongapo filiku ifi fibombiwe panongwa ya mbombo yakufumusya?

⁸ Amasiku agha, abandu abakukinda 8,000,000 mfisu 240 bali mu gulu lya Yehova kangi bingi bikosiwa ikyinja kilikyosa. Loli  ikindu ikyakulondiwa fiyo to tuyilo utununu utwa Bukristu utu bikunangisya, uyu yo “mundu umpya.” (Kolos. 3:8-10) Bingi balekile utuyilo utwa bulowe, inkhaza nukubasala abangi. Ubusololi ubu buli pa Yesaya 2:4 bukufwanisiwa; abene ‘batikulwa ubwite.’ Panongwa yakuti tukughelaghela ukumfwala umundu umpya, tukubatula abandu ukuti bise ku gulu lya Yehova kangi tukunangisya ukuti tukunkonga undongosi witu Yesu Kristu. (Yoh. 13:35; 1 Pet. 2:12) Nongwa yafiki isi sikubombiwa? Panongwa yakuti Yesu ikutupa ubutuli ubu tukulondiwa.

9. Ukufwana na Matai 24:45-47, ngimba findu fiki ifi fyayobiwe ngani ifyakufwana na mmasiku ghabumalilo?

⁹ Belenga Matai 24:45-47. Yesu ayobile ngani ukuti mmasiku ghabumalilo ikuya pakumwimika “untumwa unsubiliwa nuwa mahala” ukuti atupeghe ifyakulya ifyamwambepo. Yonongwa yake untumwa uyu ikwiyipa fiyo amasiku agha. Ifundo iyi yabwanaloli. Undongosi witu Yesu ikubombela akagulu akanandi akabapakiwa ukubapa “ifyakulya pakabalilo kake” ababombi ba Kyala na bandu aba bikulonda ukumanya nyingi. Abanyambala aba batikwiketa ukuya banyafyale palwitiko lwa bangi. (2 Kor. 1:24) Mmalo mwake basimenye ukuti Yesu Kristu yo “ndongosi nundaghili” witu.​—Yes. 55:4.

10. Ngimba buku liliku ili lyabatulile ukwanda ukumbombela Yehova?

¹⁰ Ukufuma mu 1919, untumwa unsubiliwa ikutupa amabuku agha ghikubapa abandu ulusako ulwakumanyila ubwanaloli. Mu 1921, untumwa asosisye ibuku ilyakuti The Harp of God ukuti libatule aba bikulonda ukumanyila Ibaibolo. Bo akabalilo kakindilepo basosisye amabuku aghangi. Ngimba buku liliku ili lyabatulile ukummanya nukungana Tata witu wakumwanya? Ngimba lyali buku lya “Mulungu  Akhale Woona,” Unenesko Weneuwo Ukulongozgera ku Umoyo Wamuyirayira, Mungathe Kukhala ndi Moyo Kosatha M’paradaiso pa Dziko Lapansi, Chimanyisko Cheneicho Chikulongozgera ku Umoyo Wamuyirayira, Kasi Baibolo Likusambizgachi Chomenechomene?, Ngimba Ibaibolo Likutumanyisya Isyafiki? pamo ibuku litu ilipya ilyakuti, Amuhobokeghe nu Bumi kwa Bwila na Bwila. Amabuku ghosa agha ghapangiwe ukuti ghatutule ukupela abafundiwa kangi gho agha twalondiwagha.

11. Nongwa yafiki twesa tukulondiwa ukumanya nyingi isyakufwana na Yehova ni Baibolo?

¹¹ Twesa tukulondiwa ukumanya nyingi isyakufwana na Yehova ni Baibolo. Untumiwa Pauli atile: “Ifyakulya ifikafu fyo fya bakusi.” Pauli alyongelile ukuti linga tukukonga isi tukumanyila mu Baibolo sikuya pakututula “ukufipaghulania ifinunu ni fibibi.” (Hib. 5:14) Ntubalilo utupalapala utu kubaghile ukuya kukafu ukupilikila ifundo sya Yehova panongwa yakuti abandu bingi bali nutuyilo utubibi. Loli Yesu ikuya pakututula ukumanya ifundo sya mu Baibolo isi sibaghile ukututula ukuti tukindilileghe ukuya nulwitiko lwamaka. Tukwambilila ubulongosi ubu ukufuma mmasyu ghake, Ibaibolo. Untumwa unsubiliwa ikutendekesya nukutupa ifyakulya ifi ukwendela mwa Yesu.

12. Mwakufwana itolo na Yesu, ngimba tukuyighindika bulebule ingamu ya Kyala?

¹² Mwakufwana itolo na Yesu, tukuyipa ingamu ya Kyala ulughindiko ulu lumbaghile. (Yoh. 17:6, 26) Mwakifwanikisyo, mu 1931 twalyandile ukumanyiwa ni ngamu iyakufuma mmalemba iyakuti Baketi ba Yehova, isi sikunangisya muno tukuketela ukulondiwa kwa ngamu ya Tata witu uwakumwanya. (Yes. 43:10-12) Kangi ukufuma mu Okutobala 1931, ingamu ya Kyala yalyandile ukuboneka pakikope kya magazini. Mwakongelelapo, Ibaibolo lya Malemba Ghakupatulika mu  Mang’anamuliro gha Charu Chiphya baghomokisye ingamu ya Kyala. Isi sikindene fiyo na isi amatchalichi ghabutungulu ghikubomba, abene basosisyemo ingamu ya Kyala mu ma Baibolo ghabo.

13. Ngimba findu fiki ifi fikubasimikisyila ukuti Yesu ikumbombesyela “untumwa unsubiliwa nuwa mahala” amasiku agha? (Yohani 6:68)

¹³ Ukwendela “muntumwa unsubiliwa nuwa mahala,” Yesu alyandisye igulu pa kisu kyapasi ukuti likasyeghe ukwiputa kwa bwanaloli. Ngimba mukwipilika bulebule isyakufwana ni gulu ili? Lumo mubaghile ukwipilika mwakufwana itolo nuntumiwa Pauli, uyu ayobile isyakufwana na Yesu ukuti: “Tuyongeleghe kwani? Uwe uli nagho amasyu gha bumi ubusitakumalika.” (Yoh. 6:68) Ngimba ngali tuli kughu linga tukakolelanagha ni gulu lya Yehova? Ukwendela mu gulu ili, Yesu ikutupa kilikyosa iki tukulondiwa ukuti tukindilileghe ukuya basubiliwa kwa Kyala. Kangi atumanyisye muno tubaghile ukufumukisya kanunu. Mwakongelelapo, ikututula ukuti “tumfwaleghe umundu umpya,” ukuti tunhobosyeghe Yehova.​—Ef. 4:24.

14. Ngimba twasayiwe bulebule panongwa yakuya ku kighaba kya gulu lya Yehova nkabalilo ka mbungo ya COVID-19?

¹⁴ Yesu ikutupa ubulongosi ubununu nkabalilo akapalapala aka. Tuli nubuketi ubwakuti tukukasiwa nubulongosi ubu pakabalilo ka mbungo ya COVID-19. Abandu bingi nkisu bakamanyagha isyakubomba loli Yesu aketesyagha ukuti twambililagha ubulongosi ubununu ukuti tukindileghe ukuya bakufighililiwa. Twakasiwagha ukufwala masiki linga tuli pa gulu lya bandu kangi twikalagha pabutali na bandu. Abakulumba bakipanga utubalilo tosa bakasiwagha ukuti babimbileghe abakamu  na balumbu ukuti bakindilileghe ukuya bakufighililiwa nukuya pabumanyani na Yehova. (Yes. 32:1, 2) Twambililagha kangi ubulongosi ubwakukasya ukwendela mu malipoti aghakufuma ku Kabughatila Kakulongosya.

15. Ngimba bulongosi buliku ubu twapeliwe ubwa muno tubaghile ukubombela ingomano nukufumusya pakabalilo ka mbungo ya COVID-19, kangi ifyakukongapo fyake fyali fyo filiku?

¹⁵ Nkabalilo ka mbungo ya COVID-19, twambililagha ubulongosi ubununu ubwa muno tubaghile ukubombela ingomano nukufumusya. Mwanakalinga, twalyandile ukubomba ingomano sya Chikristu, isya dela nisya kighaba ukwendela pa vidiyokonfelensi. Kangi twalyandile ukufumusya ukwendela pa foni nukulemba abakalata. Yehova atusayile fiyo panongwa yakwiyipa kwitu. Amaofesi mingi ghayobile ukuti inambala ya bafumusi yakindililagha ukubala. Ukuyoba ubwanaloli, bingi bayobagha inkhani isyakukasya.—Keta ibokosi ilyakuti “ Yehova Asayile Imbombo Yitu Iyakufumusya.”

16. Ngimba tubaghile ukuya nulusubilo luliku?

¹⁶ Bamo babaghile ukwinong’ona ukuti igulu likutupa indaghilo ingafu pa nkhani ya COVID-19. Loli linga akabalilo kakindilepo, tubaghile ukuketa ukuti indaghilo isi bikutupa syakutula fiyo. (Mat. 11:19) Kangi linga tukwinong’onela muno Yesu ikubalongosyela ababombi bake mwalughano, tukuya nulusubilo ulwakuti kilikyosa iki kisakubombiwa nkyeni, Yehova nu mwanake unganiwa bisakuya nanuswe.​—Belenga Bahiburi 13:5, 6.

17. Ngimba mukwipilika bulebule panongwa yakulongosiwa na Yesu?

¹⁷ Tuli basayiwa fiyo panongwa yakuti Yesu yo Ndongosi witu. Tuli mu gulu ili litikutapukana panongwa ya luko, ikisu pamo injobelo. Tukwambilila ubulongosi ukufuma Mmasyu gha Kyala kangi tukumanyila muno tubaghile ukufumusyila. Aliwesa ikumanyila muno abaghile ukumfwalila umundu umpya na muno tubaghile ukunangisania ulughano. Tuli nififukwa fingi ifyakundaghisya panongwa yakuti Yesu yo Ndongosi witu.