Yesu abamanyisyagha abandu ukuti bayeghe palutengano. Loli akabalilo kamo, ababulile abafundiwa bake ukuti: ‘Munginong’onagha ukuti nisile nkubika ulutengano nkisu; umma, ngisa nkubika ulutengano, loli ulubo. Namanga nisile nkubasomania umwana undumyana nuwise, yope undindwana nunna, unkamwana nunna wa ndume.’ (Mat. 10:34, 35) Ngimba Yesu asanusyagha isyafiki?

Yesu akalondagha ukuti aba mumbumba bangakolelanagha loli asimenye ukuti isi amanyisyagha syayagha pakupangisya ukuti imbumba simo singakolelanagha. Yonongwa yake aba balondagha ukwipela ukuya bafundiwa ba Kristu nukosiwa balondiwagha ukumanya ukuti utubalilo tumo aba mumbumba yabo batikuya pakuhoboka na isi basalile ukubomba. Utubalilo tumo umwinabo wa mbweghi pamo aba mumbumba yabo babaghile ukwanda ukubasusya. Kangi isi sibaghile ukubapangisya ukuti kuye kukafu kumyabo ukukindilila ukukonga isi Yesu amanyisyagha.

Ibaibolo likubakasya Abakristu ukuti ‘bayeghe balutengano nabandu bosa.’ (Rom. 12:18) Loli isi Yesu amanyisyagha sibaghile ukuya bo “ulubo” ku mbumba simo. Isi sibaghile ukubombiwa linga yumo mumbumba ikukonga isi Yesu amanyisyagha loli bamo bikususya. Linga sili bo ulu, aba mumbumba bo aba bikwipela ukuya “balughu” ba uyu ikumanyila ubwanaloli.—Mat. 10:36.

Abafundiwa ba Kristu aba bikwikala na bakamu babo aba bakaya Baketi, utubalilo tumo bikugheliwa ukuti banangisye ulughano lwabo kwa Yehova na Yesu. Mwakifwanikisyo, abene babaghile ukubafimbilisya ukuti basekeleghe amaholide. Ukufuma apo, bikulondiwa ukusala uyu bikuya pakunhobosya. Yesu atile: “Uyu linga anganile uwise pamo unna ukukinda une, yo akambaghila.” (Mat. 10:37) Ukuyoba ubwanaloli, Yesu akasanusyagha ukuti aba bikulonda ukuya bafundiwa bake bababengeghe abapapi babo. Loli abamanyisyagha muno babaghile ukusalila ifindu ifyakulondiwa fiyo pa bumi bwabo. Linga aba mumbumba bikususya ukwiputa kwitu, tukukindilila ukubanangisya ulughano panongwa yakuti tukumanya ukuti ulughano lwitu kwa Kyala lo lwakulondiwa fiyo.

Kisita kukayika, linga tukususiwa naba mumbumba sikutubaba fiyo. Loli abafundiwa ba Yesu bikulondiwa ukukumbuka amasyu aghakuti: ‘Yope na uyu linga atikupimba ikipiki kyangu ikyakutamiliwapo nukungonga munyuma, yo akambaghila.’ (Mat. 10:38) Abakristu bikuketa ukuti ukususiwa naba mumbumba yo yimo mwa ndamyo iyi abafundiwa ba Kristu bikulondiwa ukwifimbilisya. Kangi abene bikusubila ukuti panongwa ya kayilo kabo akanunu, aba mumbumba yabo babaghile ukuchenja nukwanda ukumanyila ubwanaloli.​—1 Pet. 3:1, 2.