1-2. Ngimba mo munjila yiliku iyi Unkristu ali bo inyumba indali? (1 Bakorinti 15:58)

 NKYINJA kya 1978, inyumba indali fiyo yayengiwe ku Tokyo, Japan. Abandu baswighagha bo bikuketa ukuti yitikuwa nalinga ukuti utusenyenda twabombiwagha fiyo mu tawuni iyi. Ngimba aba bayengile babombile isyafiki ukuti yingawagha bo utusenyenda tukubombiwa? Abakalyoto bapangile ipulani iyakuti bayiyenge kanunu ukuti yingawagha linga akasenyenda kikubombiwa. Abakristu bafwene itolo ninyumba indali iyi. Munjila yiliku?

² Unkristu ikulondiwa ukufiketa kanunu ifindu mwakuleka ukusukanika. Umwene ikulondiwa ukuya wamaka kangi angasukanikagha pankhani yakupilikila indaghilo nifundo sya Yehova. (Belenga 1 Bakorinti 15:58.) Ikulondiwa ukuya “mwengo ukusitika” indaghilo nukukolelana nasyo. Kangi ikulondiwa ukuya “mololo,” linga kwakulondiwa. (Yak. 3:17) Unkristu uyu ikufiketa kanunu ifindu atikuya pakumilila pamo ukulekelela linga ifindu fimo fikubombiwa. Munkhani iyi, tukuya pakuyobesania isi tubaghile ukubomba ukuti tungasukanika. Tukuya pakuyobesania kangi injila 5 isi Setano ikubombela ukuti atutolesye ukukindilila ukumpilikila Yehova namuno tubaghile ukubombela ukuti tukane injila syake.

3. Ngimba ndaghilo siliku isi Undongosi Unkulumba ikutupa isi sikwaghiwa pa Imbombo sya Batumiwa 15:28, 29?

³ Pakuya Ndongosi Unkulumba, Yehova ikubapa abandu bake  indaghilo isyakupilikiwa kanunu. (Yes. 33:22) Mwakifwanikisyo, akabughatila kakulongosya akakunyuma kayobile injila sitatu isi Abakristu bikulondiwa ukukonga ukuti bakindilile ukuya nulwitiko lwamaka: (1) mwakuleka ukwiputa kufifwani loli kwa Yehova mwene, (2) mwakulighindika ilopa, kangi (3) mwakupilikila ifundo isyabugholofu isya mu Baibolo. (Belenga Imbombo sya Batumiwa 15:28, 29.) Ngimba Abakristu amasiku agha babaghile ukukindilila bulebule ukumpilikila Yehova pafundo sitatu isi?

4. Ngimba tubaghile ukubomba bulebule ukuti twiputeghe kwa Yehova mwene? (Ubusetuli 4:11)

⁴ Tutikwiputa kufifwani loli kwa Yehova mwene. Umwene ababulile Abaisraeli ukuti biyipeghe ukwiputa kumyake mwene. (Kukumbu. 5:6-10) Kangi linga tukugheliwa na Mohesi, Yesu atile tumwiputeghe Yehova mwene. (Mat. 4:8-10) Yonongwa yake tutikwiputa kufifwani. Kangi tutikubiputa abandu—kali balongosi ba matchalichi, abalongosi ba ndyali, abamanjele pamo abakalyoto aba bikupanga ifyakusangalusya—tutikubaketa ukuya bakyala. Tukuya kukighaba kya Yehova kangi tukumwiputa yuyo mwene uyu “apelile fyosa.”​—Belenga Ubusetuli 4:11.

5. Nongwa yafiki tukupilikila ululaghilo lwa Yehova pankhani yakubughindika ubumi nilopa?

⁵ Tukukonga ululaghilo lwa Yehova ulwakubughindika ubumi nilopa. Nongwa yafiki? Panongwa yakuti Yehova ikuti ilopa likwimila ubumi ubu kyabupe kyapamwanya fiyo iki atupele. (Levi. 17:14) Pakwanda, bo Yehova abitikisye abandu ukuti balyeghe inyama, ababulile ukuti bangalyagha ilopa. (Bwa. 9:4) Umwene ayobile mwakwandisania ululaghilo ulu bo abapele Abaisraeli indaghilo ukwendela mwa Mose. (Levi. 17:10) Kangi ababulile abankabughatila kakulongosya akakunyuma ukuti babape Abakristu bosa indaghilo isyakuti “bepukengeko . . . kwilopa.” (Imbo. 15:28, 29) Tukupilikila ululaghilo ulu linga tukusala kanunu ubutuli bwa kukipatala pankhani yankota. b

6. Ngimba tukubomba isyafiki ukuti tunangisye ukuti tukupilikila ifundo isyabugholofu isya Yehova?

⁶ Tukupilikila ifundo isyabugholofu isya Yehova. (Hib. 13:4) Mwakubombela amasyu aghakufwanikisya, untumiwa Pauli ikutupa ubulongosi ubwakuti “tufighogheghe” ifinyonywa fyitu ifya mbili. Isi sikusanusya ukubomba kilikyosa iki tubaghile ukufwanisya ukuti tungayagha nifinyonywa ifibibi. Tukwepuka ukuketa pamo ukubomba kilikyosa iki kibaghile ukutupangisya ukubomba ifindu fyabulowe. (Kolos. 3:5; Jobu 31:1) Linga tukugheliwa ukuti tubombe ikindu kimo ikibibi, mwanakalinga tukaneghe aminong’ono nifyakubomba ifi fibaghile ukonanga ubumanyani bwitu na Kyala.

7. Ngimba tukulondiwa ukughelaghela ukubomba isyafiki, kangi nongwa yafiki?

⁷ Yehova ikughulila ukuti tuyeghe “bakupilikila nindumbula yosa.” (Rom. 6:17) Utubalilo tosa ubulongosi bwake bukututula kangi tukabaghile ukuchenja indaghilo syake. (Yes. 48:17, 18; 1 Kor. 6:9, 10) Tukughelaghela ukunhobosya Yehova nukunangisya akayilo akakufwana itolo na aka uwamasalimo anangisyagha uyu atile: “Nikuyilabikisya indumbula yangu kukusibomba indaghilo syako, bwila na bwila ukwakufika na ku bumalikilo.” (Sal. 119:112) Loli Setano ikuya pakughelaghela ukutuwisya amaka. Ngimba njila siliku isi ikubombela?

8. Ngimba Setano ikubomba bulebule ukuti atuwisye amaka?

⁸ Ukufwimiwa. Umohesi ikubombela ifindu ifyankhaza ifi abandu bikutubombela ukuti  tuwe amaka. Ubwighane bwake bo bwakuti “atumile” nukonanga ubumanyani bwitu na Yehova. (1 Pet. 5:8) Abalughu ba Kyala babatilisyagha Abakristu bakunyuma kangi babakomagha nukubaghogha panongwa yalwitiko lwabo. (Imbo. 5:27, 28, 40; 7:54-60) Setano ikukindilila ukutufwima amasiku agha. Ubuketi bwa isi syo isi sikubombiwa ku bakamu na balumbu bitu ku Russia na mfisu ifingi kuno abakususya bikubabombela ifyankhaza Abaketi ba Yehova pamo ukubasambukila abakamu na balumbu bitu munjila isingi.

9. Lingania inongwa iyi tukulondiwa ukuya maso linga tukufimbilisiwa.

⁹ Ukufimbilisiwa. Ukongelela pakufwimiwa, Setano ikubombela kangi “ubukomu” ubungi. (Ef. 6:11) Inong’onela isi syalimbonekile unkamu Bob, uyu alambalikiwe nkipatala ukuti bampange opaleshoni inywamu. Ababulile abadokotala ukuti mulimosa muno sibaghile ukuyila atikuya pakwitika ukubikiwa ilopa. Abadokotala balitikisye isi asalile. Loli pakilo bo bakali ukumpanga opaleshoni, dokotala uyungi alisile pakunketa Bob bo abakamu bake babukile kukaya. Alimbulile Bob ukuti abadokotala batikuya pakubombela ilopa loli bikuya pakulisunga itolo papo lumo libaghile ukulondiwa. Dokotala uyu inong’onagha ukuti lumo Bob ikuya pakuchenja aminong’ono ghake panongwa yakuti aba mumbumba yake bakalipo. Loli Bob akachenjile. Umwene akindilile ukukana ukubikiwa ilopa mulimosa muno syabaghile ukuyila.

10. Nongwa yafiki aminong’ono gha bandu mabibi? (1 Bakorinti 3:19, 20)

¹⁰ Aminong’ono gha bandu. Linga twandile ukwendela aminong’ono gha bandu aba batikukonga indaghilo sya Yehova nifundo syake, nanuswe tubaghile ukuleka ukusikonga. (Belenga 1 Bakorinti 3:19, 20.) Utubalilo twingi “amahala gha nkisu kikiki” ghikubapangisya abandu ukuti bangampilikilagha Kyala. Abakristu ba ku Pergamo na ku Tiatira basofanisiwe na bandu bankabalilo kabo aba biputagha kufifwani nukubomba ifyabulowe. Yesu afipele ubulongosi ubwamaka ifipanga ifi panongwa yakukonga utuyilo twabulowe. (Ubuset. 2:14, 20) Abandu ba mmasiku agha babaghile ukutusofania ukuti tuyeghe naminong’ono amabibi. Aba mumbumba yitu na bamanyani babaghile ukutufimbilisya ukuti tungakongagha indaghilo sya Yehova. Mwakifwanikisyo, babaghile ukutubula ukuti ukubomba ubulowe kununu itolo nukuti ifundo sya mu Baibolo sya iyolo fiyo.

11. Ngimba tutikulondiwa ukubomba isyafiki ukuti tukindilile ukuya nulwitiko lwamaka?

¹¹ Utubalilo tumo, tubaghile ukuketa ukuti ubulongosi ubu Yehova atupele bukaya bwakutula. Lumo tubaghile nukwanda ukubomba ifindu ukukinda “pali isi sisimbiwe.” (1 Kor. 4:6) Syo isi abalongosi bamatchalichi nkabalilo ka Yesu babombagha. Panongwa yakuti balyongelile indaghilo syabo, kwali kukafu ukuti abandu basikongeghe. (Mat. 23:4) Yehova ikutupa ubulongosi ubununu ukwendela Mmasyu ghake ni gulu lyake. Tutikongelelapo ubulongosi ubungi ukukinda pabulongosi bwa Kyala. (Mbu. 3:5-7) Polelo tutikubomba ifindu ukukinda pali isi silembiwe mu Baibolo pamo ukubapa indaghilo Abakristu abinitu pafindu ifi Ibaibolo litikuyoba.

12. Ngimba Setano ikubombela bulebule “ubusyobi bwa itolo”?

¹² Ubutungulu. Setano ikubombela “ubusyobi bwa itolo” ni “mbepo isi sikulaghila nkisu” ukuti abasofanie nukubatapulania abandu. (Kolos. 2:8) Nkabalilo ka Bakristu bakunyuma, Setano abombelagha amahala, ifimanyisyo fya Bayuda ifi fikafumagha mu Baibolo nikimanyisyo ikyakuti Abakristu bikulondiwa ukukonga Indaghilo isi Kyala abapele Abaisraeli  ukwendela mwa Mose. Aminong’ono agha ghali ghabutungulu panongwa yakuti ghabapangisyagha abandu ukuti baleke ukumpilikila Yehova umwene mahala ghosa. Amasiku agha Setano ikufumusya inkhani namalipoti ghabutungulu agha ghikufuma kubalongosi bandyali ukwendela pa TV, palediyo ni fingi. Twapilikagha utupango twingi utwabutungulu nkabalilo ka mbungo ya COVID-19. c Abaketi ba Yehova aba bakongile ubulongosi bwakufuma ku gulu, bakatamiwe naminong’ono pakufwanikisya nabandu aba bakongagha amasyu aghabutungulu.​—Mat. 24:45.

13. Nongwa yafiki tukulondiwa ukuya maso ukuti tuleke ukusofanisiwa?

¹³ Ukusofanisiwa. Mukulondiwa ukuti “musisaleghe inunu.” (Filip. 1:9, 10) Linga tusofanisiwe, tubaghile ukonanga itolo akabalilo akatali namaka ghitu. Ifindu ifi twisibile ukubomba pabumi bwitu, bo ukulya, ukunwa, ifyakusangalusya nimbombo, fibaghile ukutusofania linga tukufiketa ukuya fyakulondiwa fiyo pabumi bwitu. (Luka 21:34, 35) Mwakongelelapo, isiku lililyosa tukupilika nukubelenga inkhani isi abakususya nabandyali bikususania. Tukulondiwa ukuya maso ukuti tungasofanisiwagha ninkhani bo isi. Linga tukaya maso, tubaghile ukwanda ukwingililapo mminong’ono ghitu. Setano ikubombela injila syosa isi siyobiwe pamwanya ukuti atuwisye amaka nukwanda ukubomba ifindu ifibibi. Isagha tuyobesanie muno tubaghile ukwepukila ku njila isi nukukindilila ukuya basubiliwa.

14. Ngimba kindu kimo kiliku iki kibaghile ukututula ukukindilila ukuya kulubafu lwa Yehova?

¹⁴ Twinong’oneleghe ikifukwa iki twaliyipile kwa Yehova nukosiwa. Mwabombile isi panongwa yakuti mwalondagha ukuya kulubafu lwa Yehova. Kumbuka isi syabasimikisyile ukuti mubwaghile ubwanaloli. Mwalimmenye kanunu Yehova kangi mwalyandile ukungindika nukungana pakuya Tata winu wakumwanya. Mwanangisye ulwitiko lwamaka kangi mwalapile. Mwabikilepo indumbula ukuleka utuyilo  utubibi nukwanda ukubomba ifindu mwakukolelana nubwighane bwa Kyala. Mwalyandile ukwipilika kanunu bo musyaghenie ukuti Kyala abahobokile. (Sal. 32:1, 2) Mwalyandile ukufika pangomano sya Bukristu nukubabulako abangi ifindu ifinunu ifi mwamanyile. Panongwa yakuti lino mosiwe, mukwenda mu nsebo uwakubuka ku bumi, kangi mukughelaghela ukuti mungaghulekagha.​—Mat. 7:13, 14.

15. Nongwa yafiki ukumanyila Amasyu gha Kyala nukwinong’onelapo kwakutula fiyo?

¹⁵ Tumanyileghe Amasyu gha Kyala nukwinong’onelapo. Mwakufwana itolo numpiki ughu ghubaghile ukuya wamaka linga imisisi yake yifikile pasi, nanuswe tubaghile ukukindilila ukuya bamaka linga tuli nulwitiko lwamaka mwa Yehova. Linga umpiki ghukukula, imisisi yake yikubuka pasi kangi yikubala fiyo. Linga tukubelenga Amasyu gha Kyala nukwinong’onelapo, tukukasya ulwitiko lwitu kangi tukuya nulusubilo ukuti injila sya Kyala nunu fiyo. (Kolos. 2:6, 7) Twinong’oneleghe muno ubulongosi nifundo sya Yehova syabatulilagha ababombi bake abakunyuma. Mwakifwanikisyo, ukwendela nkisetuka Ezekieli aketesyagha kanunu bo uwandumi ikupima itempile. Ikisetuka iki kyalinkasisye Ezekieli kangi kikutumanyisya ifundo isyakulondiwa fiyo isya muno tubaghile ukubombela ukuti tupilikileghe ifundo sya Yehova pakwiputa kwa bwanaloli. d (Eze. 40:1-4; 43:10-12) Nanuswe tukusayiwa fiyo linga tukuya nakabalilo akakumanyila nukwinong’onela ifundo isyakulondiwa isi sikwaghiwa Mmasyu gha Kyala.

16. Ngimba indumbula iyi yitotike yalimfighilile bulebule Bob? (Salimo 112:7)

¹⁶ Indumbula yitu yitotekeghe. Umwalafyale Davidi atile ikuya pakukindilila ukungana Yehova bo ikwimba ukuti: “Indumbula yangu yo yitotike, we Kyala.” (Sal. 57:7) Nanuswe indumbula yitu yibaghile ukwitoteka linga tukunsubila fiyo Yehova. (Belenga Salimo 112:7.) Inong’onela muno isi syalintulile Bob, uyu tunjobile pakwanda. Bo bambulile itolo ukuti bikuya pakulisunga ilopa ukuti basambike linga likulondiwa, umwene atile ikuya pakusokamo nkipatala mwanakalinga linga bikumfimbilisya.  Panyuma pake, Bob atile, “Nali nulusubilo losa ukuti nayagha pakusoka naloli kangi ngapasyagha isi syayagha pakubombiwa.”

17. Ngimba tukumanyilako isyafiki ku isi Bob alyaghene nasyo? (Keta kangi ikithuzi.)

¹⁷ Bob alitotike panongwa yakuti asalile ngani ukuti angisakusukanikagha linga ingile nkipatala. Ikyakwanda, alondagha ukunhobosya Yehova. Ikyabubili, abelengile isi Ibaibolo na mabuku agha ghikulingania Ibaibolo ghikuyoba isyakukemesiwa kwa bumi ni lopa. Ikyabutatu, asubilagha ukuti Yehova ikuya pakunsaya panongwa yakukonga indaghilo syake. Nanuswe indumbula yitu yibaghile ukwitoteka pandamyo yiliyosa iyi tubaghile ukwaghana nayo.

18. Ngimba ikifwanikisyo kya Baraki kikutumanyisya isyafiki pankhani yakunsubila Yehova? (Keta ikithuzi kyapakikope.)

¹⁸ Tunsubileghe Yehova. Inong’onela muno Baraki afwanisyile ububombeli bwake panongwa yakusubila ubulongosi bwa Yehova. Pakabalilo kala, Abaisraeli bakalitendekisye ukulwa ubwite. Abene bakalinafyo ifilwilo. Loli Yehova alimbulile Baraki ukuti abuke akalwe numwalafyale wa Bakanani Sisera nabalwabwite bake aba bali nifilwilo fingi. (Balo. 5:8) Unsololi unkikulu Debora alimbulile Baraki ukuti ikilile ifyamba abuke pasi pantebela ukuti akalwe na Sisera nabalwabwite bake 900 aba bali pamageleti. Nalinga ukuti kwali kukafu ku Baisraeli ukulwa nabalwabwite aba loli Baraki apilikile. Bo abasilikali bikusuluka ukubuka ku kyamba kya Tabori, Yehova awisisye ifula yamaka fiyo. Amageleti gha Sisera ghalinkwanda ukwikola mmatope kangi Yehova alintulile Baraki ukuti abatole pabwite. (Balo. 4:1-7, 10, 13-16) Mwakufwana itolo, Yehova ikuya pakututula ukuti tutole linga tukunsubila umwene nubulongosi ubu ikutupa ukwendela mu gulu lyake.​—Kukumbu. 31:6.

19. Nongwa yafiki tukulondiwa ukukindilila ukwitoteka?

¹⁹ Tukulondiwa ukukindilila ukulwa ukuti twitoteke panongwa yakuti tukwikala nkisu ikibibi iki. (1 Tim. 6:11, 12; 2 Pet. 3:17) Isagha tukindilileghe ukwitoteka nukuleka ukuwa amaka panongwa yakufwimiwa, ukufimbilisiwa, aminong’ono amabibi agha bandu, ubutungulu nukusofanisiwa. (Ef. 4:14) Mmalo mwake, isagha tukindilileghe ukungana Yehova nukupilikila indaghilo syake. Kangi tukulondiwa ukubomba ifindu mwamahala. Munkhani iyakukongapo, twisakuyobesania muno Yehova na Yesu bikunangisyila ikifwanikisyo ikinunu pankhani yakubomba ifindu mwamahala.