Isi Sibaghile Ukubatula Ukuti Mwisibile ku Kipanga Ikipya
Ngimba mwasamileko ku kipanga ikipya? Linga momumo syayilile, mubaghile ukukolelana na Jean-Charles uyu atile: “Kukafu fiyo ukwisibila ku kipanga ikipya nukuntula aliwesa mumbumba ukuti akindilile ukuya pabumanyani ubwamaka na Yehova.” Kangi linga musamile ku malo aghangi, mukulondiwa ukwakulonda imbombo iyingi, amalo aghakwikala, lumo isukulu ya bana, ukwisibila amalo amatalalano pamo amapyano, inyiho nikighaba ikipya ikyakufumusyako.
Nicolas na Céline balyaghene nindamyo iyakukindanapo. Abene balitike bo ofesi ya ku France yibasumile ukuti bakabombeghe ububombeli ku kipanga ikipya. Abene batile: “Pakwanda, twahobwike fiyo loli bo akabalilo kakindilepo twalyandile ukubakumbuka abamanyani bitu. Twakali ukubagha abakamu na balumbu ukuti baye bamanyani bitu ku kipanga ikipya.” a Panongwa ya ndamyo bo isi, ngimba mubaghile ukubomba isyafiki ukuti muhobokeghe linga musamile ku kipanga ikipya? Ngimba abangi babaghile ukubomba isyafiki ukuti babatule? Kangi ngimba lusayo luliku ulu mubaghile ukulwagha linga musamile ku kipanga ikipya?
IFUNDO 4 ISI SIBAGHILE UKUBATULA UKUMALANA NINDAMYO
Munsubileghe fiyo Yehova
1. Munsubileghe fiyo Yehova. (Sal. 37:5) Kazumi, uwa ku Japan, asokileko ku kipanga iki alikeleko kwa fyinja 20 bo undume wake ambilile kalata uwakufuma kumbombo ukuti basame. Ngimba umwene ‘alintaghile bulebule syosa Yehova’? Umwene atile: “Nalimbulile Yehova syosa isi syali mundumbula yangu namuno nipilikilagha. Linga akabalilo kosa mbombile isi, umwene ambagha amaka agha nalondiwagha.”
Ngimba mubaghile ukubomba bulebule ukuti munsubileghe fiyo Yehova? Bo muno ifyakumela fikulondela amisi nimboto ukuti fikule kanunu, nanuswe tukulondiwa ukunsubila Yehova ukuti tuye nulwitiko lwamaka. Nicolas, uyu tunjobile pakwanda, inong’onelagha ikifwanikisyo kya Abrahamu, Yesu na Pauli, aba biyipagha fiyo ukubomba ubwighane bwa Kyala, kangi isi syalinkasisye Nicolas ukuti yope ansubileghe Yehova ukuti ikuya pakuntula. Linga mukumanyila Ibaibolo akabalilo kosa, sikuya pakubatula ukwifimbilisya linga ifindu fichenjile pabumi bwinu kangi mukuya pakumanyila muno mubaghile ukubakasyila abangi nkipanga ikipya.
Mungafwanikisyagha
2. Mungafwanikisyagha. (Ndumbi. 7:10) Jules alondiwagha ukwisibila inyiho isyakutamya fiyo bo asamile ukufuma ku Benin nukubuka ku United States. Umwene atile, “Naketagha ukuti ngulondiwa ukumbula umundu aliwesa unhesya uyu naghene nawe isyakufwana nubumi bwangu.” Panongwa yakuti isi syakindene na isi alisibile, umwene alyandile ukwipaghula ku bakamu na balumbu. Loli bo andile ukubamanya kanunu abakamu na balumbu, achenjile muno abombelagha ifindu. Umwene atile: “Lino nsyaghenie ukuti kulikosa kuno tubaghile ukwaghiwa pakisu kyapasi, twe bandu tufwene itolo. Tukindene itolo isi tukuyoba nukubomba. Tukulondiwa itolo ukwitikisya muno abandu bayilile namuno bikubombela ifindu.” Yonongwa yake tutikulondiwa ukufwanikisya ikipanga iki twabunganagha kunyuma nikipanga ikipya kuno tusamile. Umulumbu yumo umpayiniya uyu ingamu yake yo Anne-Lise atile: “Nasamile panongwa yakuti nalondagha ukwakumanyila ifindu ifipya komma panongwa yakuti ngafyaghe ifi nafilekile kukipanga iki nabunganagha pakwanda.”
Abakulumba bakipanga bope batikulondiwa ukufwanikisya muno ifindu fyayilile ku kipanga kyabo ikyakunyuma. Ukubomba ifindu munjila isyakukindanakindana kukaya kubibi. Kwakulondiwa fiyo ukumanyila muno ifindu fiyilile ku kipanga ikipya bo mukali ukubika amasakisyo ghinu. (Ndumbi. 3:1, 7b) Mukulondiwa ukuya kifwanikisyo kinunu ku bakamu na balumbu nkipanga ukukinda ukubafimbilisya ukuti bendeleghe aminong’ono ghinu.—2 Kor. 1:24.
Mweghengepo ikighaba
3. Mweghengepo ikighaba. (Filip. 1:27) Nalinga ukuti ukusama kukwegha akabalilo akatali, loli kwakulondiwa fiyo ukuti mubukeghe mwanakalinga kukipanga ikipya linga musamile. Abakamu na balumbu babaghile ukulonda ukuti babaketeghe utubalilo tosa ukuti muyeghe nabo pabumanyani kangi ukuti bafwanisyeghe ukubatula. Lucinda uyu asamile nabanake abalindwana babili ukubuka ku tawuni inywamu ku South Africa, atile: “Abamanyani bangu balingasisye ukuti ngaye pabumanyani na bakamu na balumbu ku kipanga ikipya, ngabukeghe nabo mubufumusi kangi ngamulengepo pangomano. Kangi twababulile abakamu ukuti babaghile ukubungana ku nyumba yitu linga tukwitendekesya ukwingila mubufumusi.”
Linga ‘mukwiyula ukubombela pampene’ na bakamu na balumbu pambombo sya Bunyafyale ku kipanga ikipya, sibaghile ukubatula ukukasya ulwitiko lwinu nulwa bangi. Anne-Lise uyu tunjobile pakwanda, akasiwe fiyo na bakulumba bakipanga bo bambulile ukuti afumusyeghe numundu aliwesa nkipanga. Ngimba ifyakukongapo fyake fyali fyo filiku? Umwene atile, “Mwanakalinga nasyaghenie ukuti iyi yo njila inunu iyakwipilika ukuti ndikulubafu lwa kipanga. Kangi linga kwiyipa ukubomba imbombo bo ukupwelelela nukutendekesya pa Nyumba ya Bunyafyale, abakamu na balumbu bikuya pakuketa ukuti wandile ukwisibila ku kipanga ikipya. Linga mukwiyipa ukweghapo ikighaba pambombo sya pakipanga, mwanakalinga abakamu na balumbu bikuya pakuya babuke nanumwe kangi mukwanda ukwipilika ukuti muli mumbumba yimoyene.
Mubagheghe abamanyani abapya
4. Mubagheghe abamanyani abapya. (2 Kor. 6:11-13) Ukuya mwabuke numundu aliwesa, yo njila inunu iyakubaghila abamanyani. Yonongwa yake mukulondiwa ukufika mwanakalinga pangomano nukusyalikila linga ingomano simalike ukuti muye nakabalilo akakwangala nabandu ukuti mubamanye kanunu. Mughelegheleghe ukumanya ingamu syabo. Linga mukukumbukila ingamu syabo nukuya babumanyani, sikuya pakubapangisya abangi ukuti muye nabo pabumanyani ubununu.
Mmalo mwakwiyaya isya muno bikuya bakubambililila, mwitikisyeghe ukuti abakamu na balumbu babamanye kanunu. Mubaghile ukumanyilako kwa Lucinda uyu atile, “Lino tuli pabumanyani na bakamu na balumbu panongwa yakuti twabakolelagha kunyumba yitu.”
“AMWAMBILILANEGHE MWE BABO BATUPU”
Bamo bikuketa ukuti kwakutamya fiyo ukwingila mu Nyumba ya Bunyafyale muno balimo abandu bingi bakihesya. Ngimba mubaghile ukubomba bulebule ukuti mubatule aba bisile ku kipanga kyinu? Untumiwa Pauli atukasisye ukuti, “Amwambililaneghe mwe babo batupu, bo apa yope Kristu atwambilile uswe.” (Rom. 15:7) Mwakunkonga Yesu, abakulumba babaghile ukubatula abapya ukwipilika ukuti bambililiwe. (Keta ibokosi ilyakuti “ Ngimba Findu Fiki Fibaghile Ukubatula Linga Mukusama?”) Loli twesa nkipanga, ukongelelapo abana, babaghile ukubatula aba bisile ku kipanga kyabo ukwipilika ukuti bambililiwe.
Ukubambilila abangi kukongelelapo ukubakolela ku nyumba syitu nukubapa ubutuli. Mwakifwanikisyo, umulumbu yumo, abukile numulumbu yumo unhesya ukuti akannangisye itawuni nukundingania muno abandu bikwendela pamagalimoto. Isi syalinswighisye fiyo umulumbu unhesya yula kangi syalintulile ukuya mwabuke nukwisibila ku malo amapya agha ikalagha.
ULUSAKO ULWAKUKULA MWAMBEPO
Linga amapalalila ghikukula, utubalilo twingi, ghikughuleka umbili wake bo ghakali ukwanda ukupululuka. Mwakufwana itolo, linga musamile ku kipanga ikipya, mukulondiwa ukwepuka ku kindu kilikyosa iki kibaghile ukubatolesya ukumbombela Yehova. Nicolas na Céline batile, “Ukusama bo bwandilo ubununu. Ukwisibila nabandu kangi amalo aghakukindanakindana kukututula ukukusya utuyilo utupya.” Jean-Charles, uyu tunjobile pakwanda ayobile muno imbumba yake yalwaghile ulusayo panongwa yakusama. Umwene atile: “Ukusama kwapangisye abanitu ukuti bakule mwambepo nukuseghelela kwa Yehova. Kwa myesi minandi itolo, umwanitu undindwana alyandile ukweghapo ikighaba pangomano sya nkati mwasabata kangi umwanitu unnyambala ali mfumusi uyu akosiwa.”
Loli bule linga mukutoliwa ukusama panongwa ya muno ifindu fiyilile pabumi bwinu ukuti mukatuleko kuno kukulondiwa ubutuli bwa bafumusi bingi? Mufwaneghe muli ku kipanga ikingi ikipya nukughelaghela ukukonga amasakisyo ghamo agha ghayobiwe munkhani iyi. Munsubileghe fiyo Yehova, mweghengepo ikighaba nkipanga mwakwingila nabangi mubufumusi nukuya pabumanyani nabangi. Lumo mubaghile ukubatula abapya nkipanga munjila yimo pamo aba bikulondiwa ubutuli bumo. Panongwa yakuti Abakristu banaloli bikumanyiwa nulughano, ukubatula abangi kubaghile ukubapangisya ukuti muye pabumanyani ubwamaka na Yehova. (Yoh. 13:35) Mubaghile ukuya nulusubilo losa ukuti ‘Kyala ikuya pakwikyela namakemo bo ghaghagha.’—Hib. 13:16.
Kisita kwinong’onela indamyo isi babaghile ukwaghana nasyo, Abakristu bingi bikuya balusekelo kangi bikwiyipa linga basamile ku kipanga ikipya, nanumwe mubaghile ukufwanisya. Anne-Lise atile, “Ukusamila ku kipanga ikipya kwalindulile ukuti mbombeghe nyingi pakumbombela Yehova. Lino Kazumi aketile ukuti linga usamile ku kipanga ikipya “ubaghile ukuketa muno Yehova ikukutulila munjila isi ukaghulilagha.” Ngimba Jules ikwipilika bulebule? Umwene atile: “Abamanyani aba mbaghile bandulile ukuti nipilikeghe ukufwana ndi ku kaya. Lino ngukolelana fiyo na bakamu na balumbu nkipanga kangi kubaghile ukuya kukafu ukusokako.”
a Ukuti mubwaghe ubulongosi ubwakubatula, keta inkhani iya mutu uwakuti “Kulimbana ndi Malingaliro a Kulakalaka Kumudzi Kwanu mu Utumiki wa Mulungu,” mu Ingasya ya Ndindilili ya Chichewa iya Meyi 15, 1994.
