Amalalusyo Aghakufuma ku Babelengi
Ngimba “unkikulu” uyu ikuyobiwa pa Yesaya 60:1, yonani kangi mo munjila yiliku iyi umwene “ikusumuka” kangi “ikubala bo isuba”?
Ilemba lya Yesaya 60:1 likuti: “Sumukagha, we nkikulu, ubaleghe bo li isuba, ubukulumba bwa Yehova Kyala bukukubalila uwe.” Ilemba ili likusanusya ukuti “unkikulu” uyu yo Ziyoni, pamo Yerusalemu, iyi yali yo tawuni ya Yudai pakabalilo kala. a (Yes. 60:14; 62:1, 2) Yerusalemu ikwimila ikisu kyosa kya Israeli. Isi Yesaya ayobile sikutwala amalalusyo mabili: Ilyakwanda, ngimba po pakabalilo kaliku kangi mo munjila yiliku apa Yerusalemu “asumwike” kangi nukubala mwambepo bo isuba? Ilyabubili, ngimba amasyu gha Yesaya ghikufwanisiwa naloli amasiku agha?
Ngimba po pakabalilo kaliku kangi mo munjila yiliku apa Yerusalemu “asumwike” kangi nukubala mwambepo bo isuba? Yerusalemu ni tempile lyake fyalyonangike pakabalilo aka Abayuda bali kubutumwa ku Babeloni kwa fyinja 70. Loli bo Abamedi na Baperesia bakatolile akaya ka Babeloni, Abaisraeli ukufuma nkaya kosa ka Babeloni bali babuke ukughomokela ku kaya kabo nukwakughomokesyapo ukwiputa kwabwanaloli. (Ezra 1:1-4) Ukwanda mu 537 B.C.E., abandu abasubiliwa bosa ifikolo 12 fya Israeli babombile isi. (Yes. 60:4) Balyandile ukubika amakemo kwa Yehova, ukusekela ifyaka, nukuyenga kangi itempile. (Ezra 3:1-4, 7-11; 6:16-22) Kangi ubukulumba bwa Yehova bwalyandile ukubala pa bandu bake mu Yerusalemu. Abene bali bo ulumuli ulwakufwanikisya ku fikolo ifi fikalimmenye Yehova.
Loli ubusololi bwa Yesaya bwafwanisiwe panandi itolo ku Yerusalemu. Abaisraeli bingi balekile ukumpilikila Kyala. (Nehe. 13:27; Mala. 1:6-8; 2:13, 14; Mat. 15:7-9) Ukufuma apo, balinkanile Mesiya, uyu yo Yesu Kristu. (Mat. 27:1, 2) Mu 70 C.E., Yerusalemu nitempile fyalyonangiwe kangi.
Yehova ayobile ngani ukuti isi sisakubombiwa. (Dan. 9:24-27) Loli bukali bwighane bwake ukuti ubusololi bosa ubu bukwaghiwa pa Yesaya 60 bufwanisiwe naloli mu Yerusalemu.
Ngimba amasyu gha Yesaya ghikufwanisiwa amasiku agha? Ena, loli isi sikubombiwa ku nkikulu uyungi uwakufwanikisya uyu yo—“Yerusalemu wakumwanya.” Untumiwa Pauli alembile isyakufwana numwene atile: “Uyu yo yuba witu twesa.” (Gal. 4:26) Yerusalemu wakumwanya kighaba kya gulu lya kumwanya lya Kyala ilya bandumi abasubiliwa. “Abanake” bikongelelapo Yesu naba 144,000 aba bo Bakristu abapakiwa, aba bali nulusubilo lwakumwanya bo Pauli. Abakristu abapakiwa bikupanga “ikikolo ikikemo” aba bo “bandu bake yuyo.”—1 Pet. 2:9; Gal. 6:16.
Ngimba mo munjila yiliku iyi Yerusalemu wakumwanya “ikusumuka” kangi “nukubala”? Abombile isi ukwendela mbanake abapakiwa aba bali pakisu. Keta muno isi abombile sikukolelana nubusololi ubu bukuyobiwa mwa Yesaya chaputala 60.
Abakristu abapakiwa balondiwagha “ukusumuka” panongwa yakuti bali mungisi yamwambepo pakabalilo aka abatumiwa bafwile. (Mat. 13:37-43) Ukufuma apo, bali pasi pa Babeloni Unkulumba, uku ko kwiputa kwa butungulu. Abapakiwa bikukindilila ukuya batumwa mpaka “pabumalikilo ikisu,” akabalilo aka kalyandile mu 1914. (Mat. 13:39, 40) Ukufuma apo, mu 1919, balyabuliwe kangi balyandile ukufumusya amasyu amanunu gha Bunyafyale. b Kwa fyinja fingi, abandu bafikolo fyosa balisile kulumuli, ukongelelapo Israeli wa Kyala aba bo “Banyafyale” aba bikuyobiwa pa Yesaya 60:3.—Ubuset. 5:9, 10.
Nkyeni, Abakristu abapakiwa bikuya pakufumusya ulumuli lwakufuma kwa Yehova munjila yapamwanya fiyo. Bulebule? Linga bafwile pakisu bikuya mwa “Yerusalemu umpya,” pamo ukuti bikuya bakasi ba Kristu aba 144,000 na banyafyale kangi baputi.—Ubuset. 14:1; 21:1, 2, 24; 22:3-5.
Yerusalemu umpya ikuya pakufwanisya ubusololi ubu buli pa Yesaya 60:1. (Fwanikisya Yesaya 60:1, 3, 5, 11, 19, 20 na Ubusetuli 21:2, 9-11, 22-26.) Bo muno ayilile Yerusalemu wakunyuma, Yerusalemu Umpya yope na Kristu, bwisakuya bunyafyale ubupya. Ngimba Yerusalemu Umpya “abaghile ukwisa bulebule ukufuma kumwanya”? Mwakubombapo simo pakisu kyapasi. Ifikolo fyosa fya bandu aba bikuntila Kyala “fisakwendelagha ndumuli lwake.” Bisakwabuliwagha kangi ku butulanongwa ninifwa. (Ubuset. 21:3, 4, 24) Ifyakukongapo fyake, ifindu ‘fisakwanduliwagha fyosa,’ bo muno Yesaya nabasololi abangi bayobile ngani. (Imbo. 3:21) Ukwanduliwa uku kwalyandile pakabalilo aka Kristu abikiwe ukuya Mwalafyale kangi ikuya pakukindilila mpaka pabumalilo bwa fyinja 1,000.
a Pa Yesaya 60:1, Ibaibolo lya Mang’anamuliro gha Charu Chiphya, likubombesyela ilisyu ilyakuti “unkikulu” mmalo mwa “Ziyoni,” pamo “Yerusalemu,” panongwa yakuti amasyu gha Nkihiburi aghakuti “sumukagha” naghakuti “ulumuli” ghali mugulu lyabakikulu, bo muno likuyobiwa ilisyu ilyakuti “uwe.”
b Ukughomokesyapo ukwiputa kwabwanaloli uku kwabombiwe mu 1919, kukuyobiwa kangi pa Ezekieli 37:1-14 na pa Ubusetuli 11:7-12. Ezekieli ayobile ngani isyakubaghomolelapo mwambepo Abakristu bosa abapakiwa panyuma pakuya batumwa kwakabalilo akatali. Ubusololi ubwa mubuku lya Ubusetuli bukuyoba isyakupapiwa kangi kwa kagulu akanandi akabakamu aba balongosyagha kwakabalilo akapimba panongwa yakuti babikiwe mujele. Mu 1919, basaliwe ukuya “ntumwa unsubiliwa nuwamahala.”—Mat. 24:45; Keta ibuku ilyakuti Yehova Wawezgerapo Kusopa Kutuŵa!, peji 118.
