1. Ngimba Pauli abasokile isyafiki Abakristu abapakiwa?

“TUNGIFWANIKISYAGHA,” nikisu kikiki.” (Rom. 12:2) Untumiwa Pauli abasokile Abakristu bakunyuma. Nongwa yafiki umwene abapele ubulongosi ubu abanyambala na bakikulu aba bali bakwiyipa fiyo kwa Kyala kangi aba bapakiwe na mbepo mwikemo?—Rom. 1:7.

2-3. Ngimba Setano ikughela bulebule ukuti atusofanie, loli ngimba tubaghile ukusosya bulebule ifindu ifibibi ifi fili muminong’ono ghitu?

² Pauli ali nikitima panongwa yakuti Abakristu bamo balyandile ukukolelana naminong’ono amabibi gha nkisu agha Setano ikukasya. (Ef. 4:17-19) Isi sibaghile ukubombiwa nakumyitu. Setano yo ndaghili wakisu iki kangi umwene abaghile ukubombela injila isyakukindanakindana ukuti atusofanie. Mwakifwanikisyo, injila simo isi umwene abaghile ukubombela ukuti atusofanie, ko kutupangisya ukuti twiketeghe ukuti tulibakulondiwa fiyo ukukinda abinitu kangi ukuti tufumuke. Abaghile kangi ukubombela ifindu bo ifi, muno tukulile, inyinho syitu nifimanyilo fyitu ukuti twinong’oneghe bo muno umwene ikulondela.

³ Twesa tubaghile ukufwanisya ukusosya “ifindu ifibibi” ifi fili muminong’ono ghitu? (2 Kor. 10:4) Keta muno Pauli alyamulile: umwene atile, “Tukusibulutula inyinong’ono nukwiyimika kosa uku kukulwa nubumanyi bwa kyala, kangi tukusibika mbukoliwa inyinong’ono syosa, ukuti silambeghe kwa Kristu.”(2 Kor. 10:5)  Momumo, nubutuli bwa Yehova twesa tubaghile ukusosya aminonong’ono amabibi. Mwakufwana itolo nunkota ughu ghubaghile ukusosya ubukali bwakindu, Amasyu gha Kyala ghope ghabaghile ukusosyapo ifindu ifibibi ifi Setano ikupangisya.

4. Ngimba twebingi ba uswe twachenjile isyafiki botumanyile ubwanaloli ubwa mu Baibolo?

⁴ Inong’onela isi twalondiwagha ukuchenja bo tumanyile ubwanaloli ubwa mu Baibolo nukusala ukumbombela Yehova. Twebingi ba uswe, twalekile ukubomba utuyilo utubibi ukuti tumbombele Yehova. (1 Kor. 6:9-11) Tukundaghisya fiyo panongwa yakuti Yehova atutulile ukuleka ukubomba ifindu ifibibi!

5. Ngimba findu fibili filiku ifi ilemba lya Baroma 12:2 likuyoba?

⁵ Loli, tunginongo’onagha ukuti tutikulondiwa ukukindilila ukuchenja utuyilo twitu. Nalinga ukuti tulikile ukubomba ubutulanonga ubunywamu ubu twabombagha bo tukali ukosiwa, tukulondiwa ukukindilila ukuya maso fiyo mwakuleka ukubomba ikindu kilikyosa iki kibaghile ukutupangisya ukubomba ifindu ifibibi ifi twabombagha kunyuma. Ngimba tubaghile ukubomba bulebule isi? Pauli ikwamula ukuti: ‘tungifwanikisyagha nikisu kikiki, loli twanduliweghe nubupya bwa nyinong’ono syitu.’ (Rom. 12:2) Yonongwa yake tukulondiwa ukubomba ifindu fibili. Ikyakwanda, tutikulondiwa “ukwifwanikisya nikisu,” pamo ukubumbiwa, nikisu iki. Ikyabubili, tukulondiwa “ukuchenja” mwakuleka ukuya naminong’ono amabibi.

6. Ngimba tukumanyilapo isyafiki pa isi Yesu ayobile pilemba lya Matai 12:43-45?

⁶ Amasyu aghakuti ukuchenja agha Pauli alingenie ghikongelelapo nyingi ukukinda itolo muno tukuketela ifindu pabumi bwitu. Ghikupalamasya ifyakubomba fyitu aliwesa pamwene. (Keta ibokosi ilyakuti “ Ngimba Tukuchenja?”) Tutikulondiwa ukuya naminong’ono amabibi mundumbula syitu, muno tukwiplikila kangi na muno tukuketela ifundu. Yonongwa yake aliwesa ikulondiwa ukwilalusya ukuti, ‘Ngimba  ukuchenja kwangu ukuti niye Mkristu kukipalamasya itolo muno ngubonekela kubangi pomo ngimba ngunangisya ukuti ndi nkristu naloli kufumila pasi pandumbula na muminong’ono?’. M’masyu ghake agha ghali pilemba lya Matai 12:43-45, Yesu anangisye isi tukulondiwa ukubomba. (Belenga.) Amasyu agha ghakulondiwa fiyo kumyitu: Kuyakaya kwakufwana ukusosya itolo aminong’ono amabibi loli kulondiwa ukubomba ifindu muno Yehova ikulondela.

7. Ngimba tubaghile ukuchenja bulebule ubundu bwitu ubwankati?

⁷ Ngimba tubaghile ukufwanisya ukuchenja ubundu bwitu ubwankati? Ena, amasyu gha Kyala ghikuti: “mwipeleghe bapya mumbepo sya mabyebye ghinu, kangi mumfwaleghe umundu umpya uyu apeleliwe ikifwani kya Kyala, mbugholofu na mbwikemo bwa naloli.” (Ef. 4:23, 24) Momumo, tubaghile ukufwanisya ukuchenja ubundu bwitu ubwankati, loli ukubomba isi kukaya kupepe. Tukulondiwa ukubomba nyingi ukukinda itolo ukuleka ukuya nifinyonywa pamo ukubomba ifindu ifibibi. Tukulondiwa ukuchenja mwakwipela ukuya ‘bapya mumbepo sya mabyebye ghitu.’ Isi sikongelapo ifinyonywa fyitu, nakayilo kitu kangi ninongwa iyi tukubomba ifindu fimo. Ukuti tufwanisye isi tukulondiwa ukwiyula fiyo.

8-9. Ngimba isi unkamu yumo alyaghene nasyo sikunangisya bulebule ukulondiwa kwakuchenja ubundu bwitu ubwankati?

⁸ Isagha twinong’onela isya nkamu yumo uyu pabwandilo ali nakayilo akabibi. Umwene anwagha fiyo ubwalwa kangi alighanile ukulwa nabandu, loli bo amanyile ubwanaloli alekile fyosa ifi kangi pabumalilo alyosiwe, isi syapangisye ukuti aye nketi nnunu kuno ikalagha. Loli isiku limo bo akabalilo kakindilepo panandi, umwene alyaghene ningelo. Umundu yumo uyu aghele ubwalwa alisile kukaya kumyake nukwanda ukulonda ukunkoma. Loli unkamu witu pabwandilo akanile ukuti alwe numundu yula. Pabumalilo umundu yula alyandile ukuyoba amasyu amabibi isya kufwana ningamu ya Yehova, isi syali mpangisye unkamu uyu ukuti akalale fiyo. Umwene asokile panja nukwanda ukunkoma ungala bwala yula. Nongwa yafiki unkamu uyu abombile isi? Nalinga ukuti ukumanyila Ibaibolo kwalintulile ukuti aleke ukuyta nikinyonywa kya kulwa ubwite nabandu, loli umwene akali ukuti achenje ukuya mpya mumbepo sya mabyebye ghake. M’masyu aghangi tubaghile ukuyoba ukuti, akali ukuchenja ubundu bwake ubwankati.

⁹ Loli unkamu uyu akindoilile ukughelaghela ukuchenja. (Mbu. 24:16) Nubutuli bwa bakulumba, umwene akindilile ukubomba kanunu. Lino nkulumba nkipanga. Isiku limo pakilo bo ali pa nyumba ya Bunyafyale alyaghene kangi ningelo iyakufwana itolo na iyi alyaghe nayo pabwandilo. Umundu yumo uyu aghele ubwalwa alondagha ukunkoma yumo wa bakulumba bitu. Ngimba unkamu witu uyu abombile isyafiki? Mwakwiyisya kangi na mbololo, umwene ayobesenie numundu yula mwakuntula ukuti atalale indumbula kangi lindongwisye injila iyakubuka kukaya kake. Nongwa yafiki unkamu witu uyu abombile bo ulu? Abombile bo isi panongwa yakuti umwene achenjile ukuya mpya mumbepo sya mabyebye ghake. Ukuyoba ubwanaloli unkamu witu uyu achenjile, ali mundu walutengano kangi wakwiyisya, isi syapangisye ukuti Yehova atufiweghe!

10. Ngimba ukuchenja ubundu bwitu ubwankati kububaghile ukubombiwa kwene?

¹⁰ Ukuchenja uku kukabaghila ukubombiwa kwene loli tukulondiwa ukwiyipa. Tukulondiwa “ukwiyula fiyo” ukubomba isi pabumi bwitu bosa. (2 Pet. 1:5) Ukuchenja uku kutikuya pakubombiwa panongwa yakuti “tumbombile Yehova” kwa fyinja fingi. Loli tukulondiwa ukughelaghela ukwiyipa nindumbula yito yosa ukuti tuchenje ubundu bwitu ubwankati. Pali ifindu fingi ifi fibaghile ukututula ukuti tuchenje. Isagha tuyobesanie fimo mwa findu ifi.

11. Ngimba ulwiputo lubaghile ukututula bulebule ukuti tuchenje imbepo sya mabyebye ghitu?

¹¹ Ulwiputo yo njila iyakwanda iyakulondiwa fiyo. Tukulondiwa ukwiputa bomuno abombile uwamasalimo, umwene atile: “We Kyala uyipeleghe indumbula yangu ukuya nyelu, kangi ubikeghe nkati mmyangu imbepo imbya iya nyinong’ono ingolofu.” (Sal. 51:10) Ukuti tuchenje mwakuya nimbepo sya mabyebye ghitu tukulondiwa ukunsuma Yehova ukwendela ndwiputo ukuti atutule. Ngimba tubaghile ukusubila bulebule ukuti Yehova ikuya pakututula ukuti tuchenje? Tubaghile ukukasiwa fiyo nulufingo ulu Yehova afingile na Baisraeli nkabalilo ka Ezekieli: Umwene atile, “Nisa kubapagha indumbula imbya. . . nukubika mmyinu ubumi ubupya, [isi syali syakulondiwa fiyo ukuti bakongeghe Ubulongosi bwa Kyala].” (Eze. 11:19;) Yehova alondagha ukubatula Abaisraeli ukuti ba chenje kangi ikulonda ukututula nanuswe.

12-13. (a) Ukufwana na Masalimo 119:59, ngimba tukulondiwa ukwinong’onela isyafiki? (b) Ngimba malalusyo ghaliku agha aliwesa pamwene ikulondiwa ukwilalusya?

¹² Ukwinong’onelapo yo njila yabubili. Linga tukubelanga kanunu amasyu gha Kyala akabalilo kosa, tukulondiwa ukuya nakabalilo kakwinong’onela ukufuma pasi pandumbula nukukonga isi tubelengile, tukulondiwa ukuchenja aminong’ono amabibi kangi namuno tukwipilikila. (Belenga Salimo 119:59; Hib. 4:12; Yak. 1:25) Tukulondiwa ukumanya muno abandu bikuketela ifindu fyankisu iki kangi naminong’ono agha ikisu iki kikukasya. Tukulondiwa ukwitikisya ukuti tukaya bandu bagholofu nukughelaghela ukuleka ukubomba ifindu ifibibi.

¹³ Mwakifwanikisyo, aliwesa pamwene abaghile ukwilalusya ukuti: ‘Ngimba ndinubusyobi nakabini mundumbula yangu?’ (1 Pet. 2:1) ‘Ngimba ngwibona panongwa ya muno ifindu fiyilile pabumi bwangu, ifimanyilo fyangu, pamo panongwa ya bwingi bwa ndalama isi ndinasyo?’ (Mbu. 16:5) ‘Ngimba ngubaketa abandu bosa ukuya bapasi aba bakaya nifindu ifi ndi nafyo pamo aba ngindene nabo muno ngulile?’ (Yak. 2:2-4) ‘Ngimba mfighanile ifindu fya Setano ifya nkisu iki ?’ (1 Yoh 2:15-17) ‘Ngimba nguhoboka nifindu fyabulowe pamo inyangalo isi sikukasya ifyabwite?’ (Sal. 97:10; 101:3; Amosi 5:15) Amaansala gha malalusyo agha ghabaghile ukututula ukuti tukete apa tukulondiwa ukuchenja. Linga tukufwanisya ukuchenja mwakukana “ifindu ifibibi” ifi fibaghile ukononga ubumi bwitu tukuya paku nhobosya fiyo Tata witu wa kumwanya.—Sal. 19:14.

14. Nongwa yafiki kwakulondiwa fiyo ukusala abamanayani abanunu?

¹⁴ Ukusala abamanyani abanunu yo njila yabutatu. Utabalilo twingi, tukusyobiwa nabamanyani bitu aba tukwangala nabo. (Mbup. 13:20) Kumbombo, pamo kusukulu tukusyungutiliwa nabandu aba bakabaghila ukututula ukuti twinong’oneghe bo muno Kyala ikwinong’onela. Loli, tubaghile ukubagha abandu nukuya nabo pabumanyani ubununu pangomano syitu isya chikristu. Kuno twesa tubaghile ukukasiwa fiyo, kangi ukunangisania, “ulughano nukubomba imbombo inunu.”—Hib. 10:24, 25, amasyu gha pasi.

15-16. Ngimba Setano ikughela bulebule ukuti achenje aminong’ono ghitu?

¹⁵ Tukumbukeghe ukuti Setano ikuya pakukindilila ukuti achenje aminong’ono ghitu. Umwene ikubombela injila isyakukindanakindana ukuti onange inyinong’ono syitu ukuti tungasubilagha ifundo sya m’masyu gha Kyala.

¹⁶ Setano ikukindilila ukulalasya ilalusyo ilya kufwana itolo bo ili ali ndalusisye Eva mungunda wa Edeni ukuti: “Ngimba Kyala atile mungalyagha iseke sya mipiki yosa iya mungunda? (Bwa. 3:1) Nkisu iki Setano ikulaghila, utubalilo twingi tukupilika amalalusyo agha ghabaghile ukutupangisya ukuti twande ukukayikila ubwanaloli ubu tumanyile bo aghakuti: ‘Ngimba Kyala  atikwitikisya naloli ubweghi bwa banyambala pamo abakikulu bene? Ngimba Kyala atikulonda naloli ukuti tusekeleghe ikilisimasi nisiku ilyakupapiwa? Ngimba Kyala ikulonda naloli ukuti tukaneghe ukubikiwa ilopa? Ngimba Kyala uwalughano atikulonda naloli ukuti tuyeghe pamopene numundu uyu epusiwe nkimpanga?’

17. Ngimba tukulondiwa ukubomba isyafiki linga tutikwamuliwa amalalusyo ghitu aghakufwana na isi tukusubila, kangi ilemba lya Bakolosi 2:6, 7 likunangisya ifindu fiki ifi fibaghile ukukongapo?

¹⁷ Tukulondiwa ukwitikisya nindumbula yitu yosa isi tukusubila. Linga tutikwamuliwa amalalusyo ghitu aghakufwana na isi tukusubila, tubaghile ukwanda ukukayika linga isitukusubila syanaloli. Ukukayikila uku kubaghile ukupalamasya aminong’ono ghitu nukonanga ulwitiko ulu tulinalo. Ngimba tukulondiwa ukubomba isyafiki? Amasyu gha Kyala ghikututula ukuti twanduliweghe itolo nubupya bwa nyinong’ono syitu; ukuti tusimanyeghe isi ighanile Kyala,“inunu, ingyeliwa, nimbelelesye.” (Rom. 12:2) Linga tukumanyila amasyu gha Kyala akabalilo kosa, tukusubila ubwanaloli ubu tumanyila mu Baibolo. Tukusubila ukuti ifundo sya Yehova syabwanaloli. Ukufwana itolo numpiki ughu imisyu yake yili pasi fiyo, ghukumela kanunu, nanuswe tukuya “pakwitoteka ndwitiko.”—Belenga Bakolosi 2:6, 7.

18. Ngimba findu fiki ifi fibaghile ukututula ukuti twifighilileghe kufindu ifibibi ifi fili nkisu kya Setano iki?

¹⁸ Umundu aliwesa abaghile ukukasya ulwitiko lwake pamwene. Yonongwa yake tukulondiwa ukukindilila ukughamanyisya amabyebye ghitu. Twiputeghe akabalilo kosa; tunsumeghe Yehova ukuti atupepo mbepo wake mwikemo ukuti atutule. Twinong’oneleghe ukufuma pasi pandumbula nukukonga isi tukumanyila; tukindilileghe ukughamanyisya aminong’ono ghitu. Tusaleghe kanunu abamanyani bakwangala nabo; akabalilo kosa tuyeghe nabandu aba babaghile ukututula ukuchenja aminong’ono ghitu. Linga tukubomba isi, tukuya pakwifighilila mwakuleka ukubomba ifindu ifibibi ifi fili nkisu kya Setano iki kangi tukuya pa kukindilila “ukwiyimika kosa uku kukulwa nubumanyi bwa Kyala.”—2 Kor. 10:5.