1. Ngimba Yehova ikwipilika bulebule linga yumo wa babombi bake aghomokile kumyake?

UKUFWANA namuno twamanyilile mu nkhani iyi yakindagha, Yehova ikwifwanikisya nuntimi unnunu uyu ikuyipasikisya ing’osi yiliyosa mwakisa. Kangi umwene ikundonda aliwesa uyu asobile. Yehova ababulile Abaisraeli aba balekile ukumbombela, atile: “Ghomokela kumyangu po lelo nanine nikughomokelagha kumyinu.” Tusimenye ukuti umwene ikwipilika munjila iyakufwana itolo panongwa yakuti atile: “Ndikwandukamo.” (Mal. 3:6, 7) Yesu atile Yehova nabandumi bikuya balusekelo fiyo linga yumo wa babombi bake uyu asobile aghomokile kumyake.—Luka 15:10, 32.

2. Ngimba tukuya pakuyobesania isyafiki mu nkhani iyi?

² Isagha tuyobesanie ififwanikisyo fitatu ifi Yesu ayobile ifi fikutumanyisya muno tubaghile ukubatulila aba basokileko kwa Yehova. Tukuya pakuyobesania utuyilo tutatu utu tukulondiwa ukuti tusitule ing’osi isi sisobile ukuti sighomokele kumyake. Kangi tukuya pakuyobesania inongwa iyi kwakulondiwa fiyo ukubatula abonywa mwambepo.

3-4. Nongwa yafiki unkikulu uyu ikuyobiwa pa Luka 15:8-10, alondile kanunu ulutalama ulu lwasobile?

³ Tukulondiwa ukwiyula ukuti tubaghe aba bikulonda ukughomokela kwa Yehova. Ikifwanikisyo iki kili mu buku lya Luka, Yesu ayobile isya nkikulu uyu ayongisye ulutalama. Ikifwanikisyo iki kikulingania muno unkikulu aliyulile ukuti alwaghe ulutalama.—Belenga Luka 15:8-10.

⁴ Yesu alingenie muno unkikulu uyu alipilikile bo alwaghile ulutalama lwake ulu lwasobile. Utubalilo twingi abakikulu ba Chiyuda bampagha umwana unkikulu indalama kalongo pa bukwati bwake. Ulutalama ulu lwali lwakulondiwa fiyo ku nkikulu uyu panongwa yakuti mama wake yo uyu alimpele. Umwene asimenye ukuti ulutalama lwake lwawile pasi nnyumba. Yonongwa  yake alyasisye inyale ukuti alonde loli akalwaghile. Inyale yake yikakagha fiyo ukuti alwaghe ulutalama lwa siliva. Pabumalilo umwene apyaghile kanunu nnyumba yake yosa. Umwene alwaghile ulutalama lwake ndufumbi bo asisye inyale yake. Umwene ali walusekelo panongwa yakuti alwaghile ulutalama. Ukufuma apo, abakolile abamanyani nabapalamani bake ukuti ababule inkhani iyakuhobosya iyi.

5. Nongwa yafiki tukulondiwa ukwiyipa ukuti tubatule abonywa mwambepo?

⁵ Tukumanyilako ku kifwanikisyo kya Yesu, ukuti tukulondiwa ukwiyipa ukuti tukyaghe ikindu iki kisobile. Mwakufwana itolo, tukulondiwa ukwiyipa fiyo ukuti tubatule abonywa mwambepo ukughomokela kwa Yehova. Abene babaghile ukuleka ukubungana kwa fyinja fingi. Lumo basamile ku kighaba ikingi kuno abakamu na balumbu bakabamanya. Loli tuli nulusubilo losa ukuti abonywa mwambepo aba bikulonda ukughomokela kwa Yehova. Abene bikulonda ukumbombela Yehova pampene na bakamu na balumbu loli bikulondiwa ubutuli bwitu.

6. Ngimba twesa nkipanga tubaghile ukubomba bulebule ukuti tubatule abonywa mwambepo?

⁶ Ngimba yonani uyu abaghile ukutulapo ukubagha abonywa mwambepo? Twesa, abakulumba bakipanga, abapayiniya, abamumbumba nabafumusi tubaghile ukubatula abonywa mwambepo. Ngimba muli nummanyani pamo unkamu uyu monywa mwambepo? Ngimba mwaghenemo nu monywa mwambepo bo mukufumusya kunyumba ni nyumba pamo kuno kukwaghiwa abandu bingi? Linga umundu abapele inambala ya foni, mubaghile ukubapa abakulumba bakipanga kyinu.

7. Ngimba tukumanyilako isyafiki kwa Thomas?

⁷ Abakulumba bakipanga bo bali nubudindo ubunywamu ubwakubatula abonywa mwambepo ukuti baghomokele kwa Yehova. Ngimba babaghile ukubomba bulebule isi? Inong’onela isi ayobile unkulumba wakipanga Thomas * uyu ikwikala ku Spain. Umwene abatulile abakamu na balumbu abakukinda 40 ukuti baghomokele nkipanga. Thomas atile, “Ikyakwanda nabalalusyagha abakamu na balumbu bingi linga babaghile ukumanyako kuno aliwesa ikwikala. Lumo nabalalusyagha abafumusi linga bikunkumbuka aliwesa uyu atikwisa ku ngomano. Abakamu na balumbu bikuhoboka ukutulapo mwakweghapo ikighaba. Pabumalilo, linga naghene nabonywa mwambepo, ngubalalusya isya banabo kangi na bakamu babo. Abonywa mwambepo bamo babukagha nabanabo ku ngomano kangi abana aba bali bafumusi akabalilo kamo. Bope tubaghile ukubatula ukuti baghomokele kwa Yehova.

8. Ukufwana na Luka 15:17-24, ngimba tata abombile isyafiki numwanake uyu alapile?

⁸ Ngimba tukulondiwa ukuya nutuyilo tuliku ukuti tubatule aba bikulonda ukughomokela kwa Yehova? Inong’onela isi tukumanyilako ku kifwanikisyo kya Yesu ikya mwana undumyana uyu asokilepo pakaya. (Belenga Luka 15:17-24.) Yesu alingenie ukuti umwana undumyana uyu asyaghenie ukuti akabombile kanunu kangi alinong’wine isyakughomokela kukaya. Tata wake alinkubopa alinkwakuntambila mmakosi nukumponia umwanake, mwakunnangisya ulughano. Amabyebye ghalintamyisye fiyo kangi alipilike ukuti akali wakulondiwa ukuya mwanake. Tata alimpelile ikisa umwanake undumyana uyu mwakumbula muno ipilikilagha. Ukufuma apo tata abombilepo simo ukunangisya ukuti amwambilile komma ukuya yumo mwababombi bake loli ukuya mwanake. Ukuti anangisye ukuti alinganile  kangi amwambilile umwanake, tata atendekisye ifyakulya nukumpa imyenda umwanake uyu alapile.

9. Ngimba tukulondiwa ukuya nutuyilo tuliku ukuti tubatule abonywa mwambepo ukughomokela kwa Yehova? (Keta ibokosi ilyakuti “ Muno Tubaghile Ukubatulila Aba Bikulonda Ukughomokela Kwa Yehova.”)

⁹ Yehova afwene itolo na tata uwa nkifwanikisyo iki. Umwene abaghanile abakamu na balumbu bosa abonywa mwambepo aba bikulonda ukughomokela kumyake. Mwakunkonga Yehova, tubaghile ukubatula ukuti baghomokele kumyake. Ukuti tubombe isi tukulondiwa ukuya bololo, bakisa kangi balughano. Nongwa yafiki tukulondiwa ukunangisya utuyilo utu kangi tubaghile ukubomba bulebule isi?

10. Nongwa yafiki tukulondiwa ukuya bololo linga tukulonda ukuntula yumo ukuti ande kangi ukumbombela Yehova?

¹⁰ Tukulondiwa ukuya bololo panongwa yakuti pikwegha akabalilo ukuti umundu aghomokele kwa Yehova. Abonywa mwambepo bikuyoba ukuti babaghile ukwanda kangi ukumbombela Yehova linga abakamu na balumbu bikubendela utubalilo twingi. Umulumbu Nancy uwa ku Asia, alembile ukuti: “Ummanyani wangu nkipanga alindulile. Alinganile fiyo. Umwene angumbusyagha ifindu ifinunu ifi twabombagha kunyuma. Ambilikisyagha mbololo linga ngulingania muno nipilikilagha kangi ambagha ubulongosi mwanakalinga. Umwene anangisye ukuti ali mmanyani nnunu kangi andulagha akabalilo kosa.”

11. Nongwa yafiki tukulondiwa ukuya bakisa ukuti tubatule aba bakalele?

¹¹ Ikisa kili bo unkota wamaka; kibaghile ukututula ukuti twipilikeghe kanunu. Abakamu na balumbu bamo nkipanga bikukindilila ukukalala panongwa yakuti umundu yumo abakalalisye  kunyuma. Panongwa ya isi abene batikulonda ukughomokela kwa Yehova. Bamo babaghile ukwinong’ona ukuti bakababombile kanunu. Abene babaghile ukulondiwa umundu uyu abaghile ukubapilikisya kanunu muno bikwipilikila. (Yak. 1:19) Maria uyu ali monywa mwambepo, atile, “Nalondiwagha umundu uyu abaghile ukumbilikisya, ukunsubisya nukumba ubulongosi.”

12. Yoba ikifwanikisyo ikya muno ulughano lwa Yehova lubaghile ukubatulila abonywa mwambepo ukughomokela kumyake.

¹² Ibaibolo likulingania ukuti ulughano lwa Yehova ku bandu bake lufwene itolo nulughoye. Ngimba mo munjila yiliku iyi ulughano lwa Kyala lufwene itolo nulughoye? Inong’onela ikifwanikisyo iki: Bule linga mukwibila mwasumbi kangi umundu yumo abasopile ikindu kimo ukuti mufwale ukuti mungibilagha. Mubaghile ukunndaghisya fiyo umundu uyu panongwa ya butuli ubu abapele. Loli ikindu iki abapele kikaya kyakufwana ukuti kibatule ukuya nu bumi. Amisi ghatalele kangi mukabaghila ukupona pene apa linga mulyaghile iboti. Mukulondiwa umundu yumo ukuti abasopele ulughoye nukubakwabila mwiboti. Yehova ababulile Abaisraeli ukuti bosa aba basobile: ‘Ndinkubaseghelesya kumyangu nikisa kangi nulughano.’ (Hos. 11:4) Amasiku agha Kyala ikwipilika mwakufwana itolo linga abandu balekile ukumbombela kangi bikwaghana nindamyo. Umwene ikulonda ukuti bamanye ukuti abaghanile nukuti baseghelele kumyake. Kangi Yehova abaghile ukutubombesyela imbombo ukuti anangisye ulughano lwake kumyabo.

13. Yoba ikifwanikisyo ikya muno abakamu nabalumbu bamo babaghile ukututulila ukughomokela kwa Yehova.

¹³ Kwakulondiwa fiyo ukubakasya abonywa  mwambepo ukuti Yehova abaghanile kangi ukuti nanuswe tubaghanile fiyo. Pablo uyu ayobiwe mu nkhani iyi yakindagha, ali monywa mwambepo kwa fyinja 30. Umwene atile: “Isiku limo nulubunju bo ngusokapo pakaya, nalyaghene numulumbu yumo kangi twayobesenie mwalughano. Nalyandile ukulila bo mwana. Nalimbulile ukuti sikuboneka ukuti Yehova yo akutumile ukuti usayobesanie nanine. Ukufuma pakabalilo kala, nalinong’wine isyakughomokela kwa Yehova.

14. Ukufwana na Luka 15:4, 5, ngimba untimi abombile isyafiki bo ayaghile ing’osi iyi yasobile?

¹⁴ Abonywa bikulondiwa ubutuli ubwakufuma kumyitu. Mwakufwana itolo numwana uyu asobile nkifwanikisyo kya Yesu, abene babaghile ukutamiwa fiyo naminong’ono. Lumo babaghile ukuya bonywa mwambepo panongwa ya isi bikwaghana nasyo nkisu kya Setano iki. Tukulondiwa ukubatula ukuti baye kangi nulwitiko mwa Yehova. Nkifwanikisyo kya ng’osi iyi yasobile, Yesu alingenie muno untimi abikile ing’osi yake pakibegha nukuyighomokesya ku ntimo. Untimi alondiwagha akabalilo namaka ukuti ayaghe ing’osi iyi yasobile. Loli umwene asyaghenie ukuti ikulondiwa ukuyibaghala pafibegha nukuyitwala ku nine panongwa yakuti yikali namaka ukuti yighomokele yene.—Belenga Luka 15:4, 5.

15. Ngimba tubaghile ukubatula bulebule abonywa mwambepo aba bikulonda ukughomokela kwa Yehova? (Keta ibokosi ilyakuti “ Ibulosha Ilyakulondiwa Fiyo.”)

¹⁵ Tukulondiwa ukwiyipa fiyo ukubatula abonywa mwambepo ukuti bamalane nindamyo isi sikubapangisya ukuti bangaghomokelagha kwa Yehova. Loli nubutuli bwa mbepo wa Kyala, Amasyu ghake namabuku agha tukwambilila, tubaghile ukubatula ukuti bakule kangi mwambepo. (Rom. 15:1) Ngimba tubaghile ukubomba bulebule isi? Unkulumba yumo  atile: “Abonywa mwambepo bikulonda ukumanyila Ibaibolo linga basalile ukughomokela kwa Yehova.” * Yonongwa yake linga babasumile ukuti mumanyileghe numundu uyu monywa mwambepo, ngimba mubaghile ukuntula? Kangi atile: “Umfumusi uyu ikumanyila numundu Ibaibolo ikulondiwa ukuya mmanyani nnunu kangi nsubiliwa.

16. Ngimba tukumanya bulebule ukuti abandumi bikututula?

¹⁶ Mfyakubombiwa fingi sikunangisya ukuti abandumi bikubombela pampene nanuswe ukubatula abonywa mwambepo aba bikulonda ukughomokela kwa Yehova. (Ubuset. 14:6) Mwakifwanikisyo, Silvio uwa ku Ecuador aliputile ukufumila pasi pandumbula ukuti aghomokele nkipanga. Bo umwene ikwiputa apilike ukugogoda. Abakulumba babili balisile pakaya kake. Pabulendo ubu, abene bahobwike panongwa yakuti balintulile.

17. Ngimba tukuya pakwipilika bulebule linga tukubatula abonywa mwambepo?

¹⁷ Tukuya pakuya nulusekelo fiyo linga tukubatula abonywa mwambepo ukughomokela kwa Yehova. Inong’onela isya Salvador uyu mpayiniya kangi ikwiyipa fiyo ukubatula abonywa mwambepo, umwene atile, “Utubalilo tumo, nguhoboka fiyo linga ngwinong’onela isya bosa aba bonywa mwambepo aba baghomokile kwa Yehova. Sikunhobosya fiyo linga ngwinong’ona muno Yehova ikusipokela ing’osi syake ku kisu kya Setano kangi ndinulusako ulwakweghapo ikighaba pambombo yake.”—Imbo. 20:35.

18. Linga muli bonywa mwambepo, ngimba mukulondiwa ukumanya isyafiki?

¹⁸ Linga muli bonywa mwambepo, mukulondiwa ukumanya ukuti Yehova abaghanile fiyo. Umwene ikulonda ukuti mughomokele kumyake. Mukulondiwa ukwiyipa fiyo ukuti mughomokele kumyake. Loli mwakufwana itolo na tata uwa nkifwanikisyo kya Yesu, Yehova ikubaghulila ukuti mughomokele kumyake kangi ikuya pakuhoboka fiyo ukubambilila.