TWESA tukusubila ukuti Yehova yo ikutulongosya nukukutula ukwendela M’masyu ghake “m’masiku ghabumalikisyo” agha. (2 Tim. 3:1) Loli twesa tukulondiwa ukumpilikila Yehova. Tubaghile ukufwanikisya isi sikubombiwa kumyitu m’masiku agha na isi syabombiwagha ku Baisraeli bo bali mmatengele. Abene babombangapo simo linga bapilike ingangabwite yikulila.

Yehova alimbulile Mose ukuti atendekesye ingangabwite sya siliva ibili ukuti “siyeghe mbondiwa ni mbondelo.” (Kuba. 10:2) Abaputi bakubagha ingangabwite munjila isyakukindanakindana ukunangisya ukuti abandu balondiwa. (Kuba. 10:3-8) Amasiku agha ababombi ba Kyala bikwambilila ubulongosi mwakukindanakindana. Inong’onela injila sitatu isi sikutukumbusya isya ngangabwite isya kunyuma bo sikulila. Ababombi ba Kyala, amasiku agha bikukoleliwa ku ngomano inywamu, abakulumba bakipanga bikubakolela ukuti bakamanyile ubulongosi ubu bukufika ku fipanga fyosa linga ifindu fichenjile.

Linga Yehova ikulonda “ikilundilo kya bandu” ukuti kibungane pakifigho kya hema yakwaghanilamo, abaputi bakubagha ingangabwite. (Kuba. 10:3) Abandu bamfikolo fyosa, aba bikalagha pihema mfighaba 4 bapilikagha ukulila uku. Aba bali pabupipi nihema bisagha mwanakalinga. Abangi bikalagha kubutali kangi balondiwagha akabalilo akatali nukubikapo indumbula ukuti bise ku malo agha. Kali bali pabupipi pamo kubutali, Yehova alondagha bosa ukuti bakabungane nukupilikisya indaghilo syake.

Amasiku agha, tutikubungana muhema, loli tukukoleliwa ku ngomano isya babombi ba Kyala. Isi sikongelelapo ingomano sya kighaba nifyakubombiwa fimo ifyapadela kuno tukwambilila ifundo nubulongosi ubwakulondiwa fiyo. Pa kisu kyosa, ababombi ba Yehova bikuhoboka fiyo nimbatiko iyi. Yonongwa yake bosa aba bikwitikisya ukukoleliwa uku bikuhoboka panongwa yakuti bikuya mu gulu lya lusekelo. Bamo bikufuma ku malo aghakubutali ukukinda abangi. Nalinga mo siyilile bosa aba bikwitikisya ukukoleliwa uku bikuhoboka fiyo.

Ngimba amagulu agha ghali kubutali ningomano inywamu bope bikusayiwa? Panongwa yakukula kwa tekinoloje, abandu bingi bikutuliwa ningomano. Mwakifwanikisyo, bo unkamu uyu afumile ku ofesi yitu inywamu isile ku Beteli ya ku Benin, ofesi ya ku Benin yalyandile ipulogilamu ku Arlit, Niger nkaya ka Sahara Desert. Abakamu na  balumbu 21, nabangi aba balondagha ukumanya nyingi babungene pampene. Nalinga ukuti bikalagha kubutali, loli babungene abandu abakufwana 44,131. Unkamu yumo alembile ukuti: “Ngundaghisya fiyo ukufumila pasi pandumbula panongwa ya pulogilamu iyi. Syanangisye muno mwatughanile ukufumila pasi pandumbula.”

Linga abaputi bakubile ingangabwite kamokene itolo, “po lelo abakulumba aba bo balongosi mfikolo fyabo” balondiwagha ukwisa ku malo agha lukomano. (Kuba. 10:4) Abene bambililagha ubulongosi ukufuma kwa Mose. Isi syabatulagha fiyo ukuti aliwesa abombeleghe kanunu ubudindo bwake mfikolo fyabo. Linga uli yumo wa bakulumba, ngimba ukayagha pakubomba syosa isi wabaghile ukufwanisya ukuti ukaghiwepo nukuti usayiwe?

Amasiku agha, abakulumba bakipanga bakaya “banyafyale”; pamo ukuya bo ba bwana ku ntimo wa Kyala. (1 Pet. 5:1-3) Loli abene bikubomba syosa isi babaghile ukufwanisya pakutima untimo. Yonongwa yake bikupilikila linga bakoleliwe ukuti bakamanyile, bo ukubuka ku Sukulu ya Bunyafyale. Isukulu iyi, abakulumba bikumanyila injila inunu isya muno babaghile ukubombela ni nkhani sya nkipanga. Panongwa yafimanyilo ifi, abakamu na balumbu bikuya pabumanyani ubununu fiyo na Yehova. Nalinga ukuti mukamanyilapo ifimanyilo ifi, mubaghile ukusayiwa fiyo na aba bamanyile isukulu isi.

Utubalilo tumo, abaputi bapangisyagha ukuti ingangabwite yipilikiwe munjila iyapadela. Isi syabatulagha ukumanya ukuti Yehova ikulonda ukuti abandu bosa basoke. (Kuba. 10:5, 6) Linga abandu aba bikusamisya ikampu bakolelanagha fiyo kangi balondiwagha ukwiyipa fiyo. Utubalilo tumo Abaisraeli bamo bakabilagha ukusokapo pa malo agha. Nongwa yafiki?

Bamo binong’onagha ukuti babuliwagha mwanakalinga ukuti basokepo ukubuka ku malo aghangi kisita kwitendekesya. “Ntubalilo tumo ilibingu lilinkuyako itolo ukufuma namayolo ukufika nulubunju. Utubalilo tumo bendagha amasiku mabili, lumo umwesi ghumo, pamo ukukinda” po balinkusumuka. (Kuba. 9:21, 22) Kangi ngimba tubalilo tuliku utu basumukagha pa malo? Ibuku lya Ukubaliwa pa chaputala 33 pikuyoba kangi amalo 40 kuno Abaisraeli balikelepo.

Utubalilo tumo Abaisraeli bitughalagha pamalo ghakipepo. Amalo aghafipepo ghaghiwagha fiyo “ndungalangala ulukulumba ulupela lutende.” (Kukumbu. 1:19) Kangi babaghile ukuti bapasyagha linga bikwinong’onela isya malo agha bayagha pakubuka.

Linga ifikolo fisamile, abandu bamo baketagha ukuti kukafu ukusama kangi. Bosa bapilikagha ukulila kwa ngangabwite loli bakasamagha bosa pakabalilo aka. Ukulila kwa ngangabwite kwanangisyagha ukuti ifikolo ifi fikele ku busokelo isuba ifya Yuda, Isakala na zebuloni bikulondiwa ukusumuka. (Kuba. 2:3-7; 10:5, 6) Linga basumwike, abaputi bakubagha ingangabwite akabubili ukunangisya ukuti ifikolo fitatu ifya kwitongo fibungane. Abaputi bakindililagha ukubomba isi mpaka ikilundilo kyosa kisumuke.

Lumo mukuswigha nifindu ifi fikuchenja mugulu lya Yehova. Kangi mubaghile ukutamiwa linga ifindu fichenjile. Pamo mubaghile ukwipilika kanunu nukuchenja uku. Mulimosa muno fibaghile ukuyila, mukulondiwa ukuya bololo nukughelaghela ukwisibila. Ukukinda fyosa, mukuya pakuketa ukuti ukuchenja uku kununu kangi Yehova ikuhoboka nanumwe.

Nkabalilo ka Mose, Yehova abalongosyagha abanyambala, abakikulu nabana bingi ndungalangala. Kisita butuli nukulongosiwa na Yehova, abene bakayagha pakuya nu bumi. Amasiku agha, Yehova yo uyu ikutulongosya m’masiku aghabumalikisyo agha. Umwene ikututula ukuti tuye nawe pabumanyani nukuya nulwitiko lwamaka. Yonongwa yake twesa tukulonda ukuya bakupilikila mwakufwana itolo na Baisraeli abasubiliwa aba bapilikagha ukulila kwa ngangabwite nalinga bikalagha kubutali.