1. Nongwa yafiki Yehova alifwanikisye nunkikulu uyu ikumpasikisya umwanake?

“NGIMBA unkikulu abaghile ukumwibwa umwanake umfyele?” Yehova alalusisye ilalusyo ili m’masiku gha nsololi Yesaya. Kyala ababulile ababombi bake atile, “Napa linga unkikulu ikumwibwa umwanake, loli une ndisakubibwamo umwe.” (Yes. 49:15) Utubalilo twingi atikwifwanikisya nunkikulu uyu ikumpasikisya umwanake. Loli umwene alifwanikisye nunkikulu pakabalilo kala. Yehova afwanikisye ubumanyani ubu bukuyapo pakati pa mama numwanake ukuti abanangisye ulughano ababombi bake. Abamama bingi babaghile ukukolelana na isi umulumbu Jasmin ayobile. Umwene atile, “Linga kumpasikisya umwana, kuya nawe pabumanyani ubwamaka fiyo.”

2. Ngimba Yehova ikwipilika bulebule linga yumo mwababombi bake alekile ukubungana?

² Yehova ikumanya linga yumo mwababombi bake alekile ukufumusya nukufika pangomano. Yonongwa yake sikumbaba fiyo linga ikuketa ababombi bake bingi bikukindilila ukuya bonywa mwambepo * ikyinja kilikyosa.

3. Ngimba Yehova ikulonda ifindu fiki?

³ Linga abakamu na balumbu abonywa mwambepo bandile kangi ukubungana tukubambilila kangi tukuhoboka fiyo! Yehova ikulonda ukuti baghomokele kumyake kangi momuno nanuswe tukulondela. (1 Pet. 2:25) Ngimba tubaghile ukubatula bulebule ukuti baghomokele kwa Yehova? Bo tukali ukwamula ilalusyo ili, tukulondiwa ukumanya inongwa iyi bamo bikuleka ukubungana nukufumusya.

4. Ngimba findu fiki fikubombiwa kubangi panongwa yakubomba imbombo ya kumbili?

⁴ Bamo bikuketa ukuti imbombo ya kumbili yo yakulondiwa fiyo pabumi bwabo. Unkamu Hung * uyu ikwikala ku Asia, atile, “Ngumalila akabalilo namaka ghangu ukubomba imbombo ya kumbili. Ngabombagha ifindu mwamahala. Ninong’onagha ukuti linga nsyaghile indalama nyingi, nayagha pakufwanisya ukumbombela kanunu Yehova. Yonongwa yake nabombagha amaawala mingi. Isi syambangisyagha ukuti ningaghiwagha pangomano akabalilo kingi kangi pabumalilo nalekile ukubungana. Setano ikubombela ikisu ukuti abasofanie abandu ukuti baleke ukumbombela Kyala.”

5. Ngimba indamyo syalimpalamasisye bulebule umulumbu yumo?

⁵ Abakamu na balumbu bamo bikwaghana nindamyo isi sikubawisya amaka. Anne uyu ikwikala ku Britain ali nabana 5. Umwene atile, “Yumo mwa banangu apapiwe ndemale. Bo akabalilo kakindilepo, umwanangu yumo undindwana alyepusiwe nkipanga kangi umwanangu undumyana asyutile umutu. Nawile amaka, isi syalimbangisye ukuti ndeke ukubuka kungomano na mubufumusi. Pabumalilo nali monywa mwambepo.” Tukumpelela ikisa Anne nimbumba yake nabangi aba bikwaghana nindamyo isyakufwana itolo.

6. Nongwa yafiki yumo abaghile ukuleka ukuya pampene nababombi ba Yehova linga atikukonga ubulongosi ubwa pa Bakolosi 3:13?

⁶ Belenga Bakolosi 3:13. Ababombi ba Yehova bamo bakalele panongwa ya isi abakamu na balumbu bababombile. Untumiwa Pauli asyaghenie ukuti utubalilo tumo tubaghile “ukonangilana” nunkamu pamo umulumbu. Lumo bamo babaghile ukutubombela ifindu munjila iyi yikaya yabwanaloli. Linga tukaya maso tubaghile ukukalala. Linga umundu akalele abaghile ukuleka ukuya pampene nababombi ba Yehova. Inong’onela isi alyaghene nasyo unkamu Pablo uyu ikwikala ku South America. Umwene balintungulupile ukuti abombile ifindu ifibibi, isi syapangisye ukuti angayagha nubudindo nkipanga. Ngimba abombile isyafiki? Pablo atile, “Nakalele fiyo kangi nalekile ukubungana nikipanga.”

7. Ngimba findu fiki fibaghile ukubombiwa linga umundu ikutamiwa namabyebye?

⁷ Linga umundu yumo abombile ubutulanongwa ubunywamu kunyuma, umwene abaghile ukutamiwa namabyebye kwa kabalilo akatali kangi abaghile ukwinong’ona ukuti Yehova akabaghila ukunhobokela. Nalinga ukuti umwene alapile kangi anangisiwe ikisa, loli abaghile ukwipilika ukuti akabaghiliwe ukuya yumo wa babombi ba Kyala. Unkamu Francisco yope alipilike mwakufwana itolo. Umwene atile, “Nachenjile pabumi bwangu. Nalinga ukuti nakindililagha ukwaghiwa pangomano loli ngahobokagha kangi niketagha ukuti ngali wakulondiwa ukuya yumo wa babombi ba Yehova. Nasyobiwagha namabyebye ghangu mwakuketa ukuti Yehova akanhobokela. Bo akabalilo kakindilepo nalekile ukwaghiwa pangomano sya kipanga. Ngimba mukwipilika bulebule na bakamu na balumbu aba bikwaghana nindamyo isyakufwana itolo na isi? Ngimba mukubapelela ikisa? Ngimba Yehova ikwipilika bulebule nabandu aba?

8. Ngimba Yehova ikubakumbukila bosa aba bambombelagha? Lingania.

⁸ Yehova ikubakumbukila bosa aba bambombelagha kunyuma aba lino balekile ukubungana kangi atikwibwa isi babombagha pakumbombela umwene. (Hib. 6:10) Unsololi Yesaya ayobile ikifwanikisyo ikyakulondiwa fiyo iki kikunangisya muno Yehova  ikubapasikisyila ababombi bake. Yesaya atile, ‘Umwene yo isakughupakisyagha untimo wake wa ng’osi bo yu ntimi, isakutubunganiagha utung’osi nukutupaghata.’ (Yes. 40:11) Ngimba Yehova, uyu yo Ntimi Unkulumba ikwipilika bulebule linga yumo wa babombi bake alekile ukumbombela? Yesu anangisye muno Yehova ikwipilikila bo ikubalalusya abafundiwa bake ukuti: ‘Bule umwe mukuti fiki? Linga umundu yumo ali ning’osi mia yumo (100), lelo yimo yende nukusoba, kali atisakusilekagha isingi amalongo mahano na mana na ihano na ina (99) mfyamba, nukubuka kukuyilonda iyi yisobile? Lelo linga ayaghile, naloli nikubabula umwe nikuti, ikuyisekelela fiyo ukukinda inine sila amalongo mahano na mana na ihano na ina (99) isi sikasobile.’—Mat. 18:12, 13.

9. Ngimba untimi unnunu nkabalilo kakunyuma asifighililagha bulebule ing’osi syake? (Keta ikithuzi kya pakikope.)

⁹ Nongwa yafiki kwakulondiwa ukumfwanikisya Yehova nuntimi? Panongwa yakuti untimi unnunu nkabalilo kakunyuma asipasikisyagha fiyo ing’osi. Mwakifwanikisyo, Davidi aghoghile ingalamu nipatama ukuti asifighilile ing’osi syake. (1 Samu. 17:34, 35) Yonongwa yake untimi unnunu ikuketesya linga ing’osi yimoyene yisobile. (Yoh. 10:3, 14) Untimi uyu asilekagha ing’osi 99 kumalo aghakufighililiwa pamo ku ntimi uyungi nukwakuyilonda ing’osi iyi yisobile. Yesu abombile ikifwanikisyo iki ukuti atumanyisye ifundo iyakulondiwa fiyo iyakuti: “Bunobuno lelo bukaya bwighane bwa Wisemwe wakumwanya ukuti yumo mbanandi aba asobeghe.”—Mat. 18:14.

10. Ukufwana na Ezekieli 34:11-16, ngimba Yehova afingile ukuti ikuya pakubomba isyafiki ku ng’osi syake isi sisobile?

¹⁰ Yehova atughanile twesa, ukongelelapo “abanandi” aba basokileko ku ntimo wake. Ukwendela mu nsololi Ezekieli, Kyala afingile ukuti ayagha pakusilonda ing’osi syake nukusitula ukuti siye kangi pabumanyani nawe. Kangi ayobile isi ayagha pakubomba ukuti asipoke ing’osi syake. Isi ayagha pakubomba syayagha pakufwana itolo na isi untimi abombagha  linga ing’osi yake yiyongile. (Belenga Ezekieli 34:11-16.) Ikyakwanda, untimi alondiwagha ukuyilonda ing’osi, isi syalondiwagha ukuti aye nakabalilo nukwiyipa. Linga untimi ayaghile ing’osi, ayitwalagha ku nine. Mwakongelelapo, linga ing’osi yifulele pamo yikutamiwa, untimi ayitulagha mwakuyipinya, ukuyipimba nukuyipa ifyakulya. Abakulumba bakipanga, aba bikughutima “untimo wa Kyala” bikulondiwa ukubomba ifindu mwakufwana itolo ukuti bantule umundu aliwesa uyu asobile nkipanga. (1 Pet. 5:2, 3) Abene bikubalonda aba basobile ukuti baghomokele nkipanga nukubanangisya ulughano mwakubapa ubutuli bwa mwambepo. *

11. Ngimba untimi unnunu ikumanya isyafiki?

¹¹ Untimi unnunu ikumanya ukuti ing’osi syake sibaghile ukusoba. Kangi linga ing’osi yisokileko ku nine, untimi atikuyibombela mwankhaza. Inong’onela ikifwanikisyo iki Yehova anangisye ukuti abatule ababombi bamo aba akabalilo kamo balekile ukumbombela.

12. Ngimba Yehova alintulile bulebule Yona?

¹² Unsololi Yona akalimpilikile Yehova kangi akabukile ku Nineve. Nalinga ukuti mo syayilile, Yehova akalekile ukuntula Yona. Mwakufwana itolo nuntimi unnunu, Yehova alimpokile nukuntula ukuti aye namaka ukuti afwanisye ububombeli bwake. (Yona 2:7; 3:1, 2) Ukufuma apo, Kyala abombile uluyungu ulu lwamelile ukuti antule Yona ukumanya ukulondiwa kwa bumi bwa mundu aliwesa. (Yona 4:10, 11) Ngimba tukumanyilako isyafiki? Abakulumba batikulondiwa ukuwa amaka mwanakalinga ku bandu abonywa mwambepo. M’malo mwake, abene bikulondiwa ukughelaghela ukumanya isi sipangisye ing’osi ukuti yingabunganagha. Linga ing’osi iyi yighomokile kangi kwa Yehova, abakulumba bikulondiwa ukukindilila ukuyinangisya ulughano.

13. Ngimba tukumanyilako isyafiki na isi Yehova alimbombile uyu alembile Masalimo 73?

¹³ Uyu alembile Masalimo 73 awile amaka bo aketile ukuti abandu ababibi ifindu fikubendela kanunu. Umwene akayikile linga ukubomba ubwighane bwa Kyala kwakulondiwa.  (Sal. 73:12, 13, 16) Ngimba Yehova abombile bulebule? Umwene akalindongile unnyambala uyu. M’malo mwake, umwene alimwitikisye uwamasalimo ukuti alembe amasyu mu Baibolo. Pabumalilo, uwamasalimo asyaghenie ukuti ukuya pabumanyani ubununu na Yehova kindu kyakulondiwa fiyo ukukinda kilikyosa. (Sal. 73:23, 24, 26, 28) Ngimba tukumanyilako isyafiki? Abakulumba bakipanga batikulondiwa ukubalonga aba bikulonda ukumanya ubununu bwakumbombela Yehova. M’malo mwakubasusya, abakulumba bikulondiwa ukughelaghela ukubapilikisya inongwa iyi bikuyobela nukubombela ulu. Ukufuma apo, abakulumba babaghile ukubombela Ibaibolo ukuti babakasye.

14. Nongwa yafiki Eliya alondiwagha ubutuli, kangi Yehova alintulile bulebule?

¹⁴ Unsololi Eliya ambopagha umwalafyale unkikulu Yezebeli. (1 Banyaf. 19:1-3) Eliya inong’onagha ukuti akalipo unsololi uyungi uyu ambombelagha Yehova kangi aketagha ukuti isi ambombelagha Yehova syali sya itolo. Eliya atamiwe fiyo naminong’ono kangi alondagha ukufwa. (1 Banyaf. 19:4, 10) M’malo mwakundonga Eliya, Yehova alinsimikisyile ukuti akali mwene, umwene alondiwagha ukusubila amaka gha Kyala kangi ali nimbombo nyingi isyakuti abombe. Mwakisa, Yehova apilikisye indamyo isi Eliya alyaghene nasyo nukumpa ububombeli ubupya. (1 Banyaf. 19:11-16, 18) Ngimba tukumanyilako isyafiki? Twesa fiyofiyo abakulumba bikulondiwa ukubatula mwakisa ababombi ba Yehova. Kali umundu ikuyoba ukuti akalele pamo ikuti Yehova atikuya pakunhobokela, loli abakulumba bikulondiwa ukumpilikisya linga ikuyoba muno ikwipilikila.  Ukufuma apo bikuya pakughela ukuyitula ing’osi iyi yisobile ukumanya ukuti Yehova anganile.

15. Ukufwana na Yohani 6:39, ngimba Yesu ikusiketa bulebule ing’osi sya Tata wake?

¹⁵ Ngimba Yehova ikulonda ukuti twipilikeghe bulebule ning’osi syake isi sisobile? Tubaghile ukumanyilako ku kifwanikisyo kya Yesu. Umwene asimenye ukuti syosa ing’osi sya Yehova syakulondiwa fiyo kumyake, yonongwa yake Yesu abombile kilikyosa iki abaghile ukufwanisya ukuti asitule ‘ing’osi isobi isya nnyumba ya Israeli’ ukughomokela kwa Yehova. (Mat. 15:24; Luka 19:9, 10) Yesu yo ntimi unnunu, yonongwa yake abombile syosa isi abaghile ukufwanisya mwakuketesya ukuti ing’osi sya Yehova singasobagha.—Belenga Yohani 6:39.

16-17. Ngimba abakulumba bikulondiwa ukwipilika bulebule na aba balekile ukubungana? (Keta ibokosi lyakuti “ Muno Ing’osi Iyi Yisobile Yibaghile Ukwipilikila.”)

¹⁶ Untumiwa Pauli abakasisye Abakristu ba ku Efesi ukuti bakongeghe ikifwanikisyo kya Yesu. Umwene atile, “Fikuti bo mwiyuleghe bunobuno ukubatula abonywa bo mukukumbuka amasyu gha Mwalafyale Yesu apa atighi: ‘Nukupa nukwambilila, kusayiwa ku kupa.’” (Imbo. 20:17, 35) Ilemba ili likunangisya ukuti abakulumba bakipanga bali nubudindo bwakubapasikisya ababombi ba Kyala. Salvador uwa ku Spain ayobile atile, “Linga ngwinong’onela muno Yehova ikusipasikisyila ing’osi syake, ngukasiwa fiyo ukubomba syosa isi mbaghile ukufwanisya ukuti nsitule. Pakuya ntimi nguhoboka fiyo ukumanya ukuti Yehova ikulonda ukuti nsifighilileghe ing’osi syake.

¹⁷ Abandu bosa aba bayobiwe mu nkhani iyi aba balekile ukubungana batuliwe ukuti baghomokele kwa Yehova. Lino abandu bingi aba balekile ukumbombela Yehova bikulonda ukubomba mwakufwana itolo. Inkhani iyakukongapo yikuya pakulingania ifindu fingi ifi tubaghile ukubomba ukuti tubatule ukughomokela kwa Yehova.