1. Ngimba ilemba lya Salimo 15:​1-5 libaghile ukututula bulebule?

 MUNKHANI iyi yakindagha, twamanyile ukuti bosa aba biyipile kwa Yehova nukosiwa kangi bikukindilila ukuya pabumanyani ubwamaka numwene, babaghile ukuya bahesya mu “hema” lyake. Loli ngimba tukulondiwa ukubomba isyafiki ukuti tukindilile ukuya bahesya mu hema lyake? Ichaputala 15 kya Salimo, kikuyoba nyingi pankhani iyi. (Belenga Salimo 15:​1-5.) Ibuku ili lili nifundo isi sibaghile ukututula ukuti tuye pabumanyani na Kyala.

2. Ngimba findu fiki ifi fibaghile ukuti fyalimpangisye uwamasalimo Davidi ukuyoba isya hema lya Yehova?

² Ichaputala 15 kya Salimo kikwanda namalalusyo bo aghakuti: “We Yehova, ywani uyu ikwitughalagha mu hema lyako? Ywani uyu ikuyangapo pa kyamba kyako ikikemo?” (Sal. 15:1) Bo ikuyoba isya “ihema” lya Yehova, uwamasalimo Davidi abaghile ukuti inong’onelagha isya ihema ili lyali ku Gibeoni pakabalilo kala. Davidi ayobile kangi isya “kyamba ikikemo” ikya Kyala, lumo umwene abaghile ukuti ayobagha isya Zioni wa ku Yerusalemu. Ghali makilomita mingi ukwakufika kwitongo ku Gideoni kuno Davidi ayengile ihema ukuti asungengemo ibokosi lya lwitikano ukufika apa itempile lyayengiwe.—2 Samu. 6:17.

3. Nongwa yafiki tukulondiwa ukupilikisya fiyo isi sili mu chaputala 15 kya Salimo? (Keta kangi ikithuzi.)

³ Bwanaloli ukuti Abaisraeli bingi bakitikisiwagha ukubombela pihema, banandi itolo bo aba bitikisiwagha ukwingila nkati mwihema muno ibokosi lya lwitikano lyasungiwagha. Loli ababombi bosa ba Yehova abasubiliwa bayagha bahesya mu hema lyake ilyakufwanikisya mwakukindilila ukuya nawe pabumanyani. Syo isi twesa tukulonda. Chaputala 15 kya Salimo, kyayobile utuyilo tumo utu tukulondiwa ukukusya nukunangisya  ukuti tukindilileghe ukuya bamanyani ba Yehova.

UYU SIKAYAMO IMBIBI NDWENDO LWAKE, YO IKUBOMBA INGOLOFU

4. Ngimba tukumanya bulebule ukuti ulosyo lukaya lo lwene ulu Yehova ikulonda kumyitu? (Yesaya 48:1)

⁴ Pa Salimo 15:​2, pikulingania ukuti ummanyani wa Kyala yo “mwene yuyo sikayamo imbibi ndwendo lwake, uyu ikubomba ingolofu.” Amasyu aghakuti “ndwendo” naghakuti “ikubomba” ghikusanusya ukukindilila ukubombapo simo. Loli ngimba sikabaghila ukuyamo ‘imbibi ndwendo lwitu’? Hayi. Akayapo umundu uyu ngolofu, Yehova abaghile ukutuketa ukuti “sikayamo imbibi ndwendo lwitu” linga tukughelaghela ukumpilikila. Linga twiyipile kwa Kyala nukosiwa, bukuya bwandilo itolo. Mwakifwanikisyo, nkabalilo kakunyuma, linga umundu ali nkikolo kya Baisraeli, sikanangisyagha ukuti nhesya mu hema lya Yehova. Bamo bakakolelagha pangamu yake ‘mbwanaloli nambugholofu.’ (Belenga Yesaya 48:1.) Ukuti banangisye ukuti bikulonda naloli ukuya bahesya mu hema lya Yehova, Abaisraeli balondiwagha ukumanyila isi Yehova ikulonda nukusikonga. Mwakufwana itolo, nanuswe ukuti tuye pabumanyani ubwamaka na Yehova, tukulondiwa ukubomba nyingi ukukinda itolo ukosiwa nukukoleliwa ukuya yumo wa Baketi ba Yehova. Tukulondiwa ukukindilila “ukubomba ingolofu.” Ngimba tubaghile ukubomba bulebule isi?

5. Ngimba ukumpilikila Yehova mfindu fyosa kukongelelapo isyafiki?

⁵ Kwa Yehova, ukuleka ukuya “nimbibi ndwendo lwitu” kangi “nukubomba ingolofu” kukusanusya nyingi ukukinda ukubuka itolo ku Nyumba ya Bunyafyale akabalilo kosa. (1 Samu. 15:22) Tukulondiwa ukughelaghela ukumpilikila Kyala pabumi bwitu, nalinga tuye kwa twibene. (Mbu. 3:6; Ndumbi. 12:​13, 14) Kwakulondiwa fiyo ukumpilikila Yehova nalinga po pafindu ifinandi. Linga tukubomba isi, tukuya pakunangisya ukuti tunganile  naloli, kangi sikuya pakupangisya ukuti yope atughaneghe fiyo.—Yoh. 14:23; 1 Yoh. 5:3.

6. Ukufwana na Bahiburi 6:​10-12, ngimba kindu kiliku ikyakulondiwa fiyo ukukinda ifindu ifinunu ifi twabombile kunyuma?

⁶ Yehova ikundaghisya fiyo isi twalimbombile kunyuma. Nalinga ukuti twabombile ifindu ifinunu kunyuma, sitikusanusya ukuti tukuya pakukindilila ukuya nhesya mu hema lya Yehova. Isi sikukolelana nilemba lya Bahiburi 6:​10-12. (Belenga.) Yehova atikwibwa ifindu ifinunu ifi twabombile kunyuma. Loli umwene ikulonda ukuti tukindilileghe ukumbombela nindumbula yosa “ukwakufika kubumalikilo.” Umwene isakutusaya fiyo mwakukindilila ukuya nawe pabumanyani kwa bwila na bwila “linga tutikuyeta.”—Gal. 6:9.

MUYOBEGHE ISYA NALOLI ISI SIKUFUMA MUNDUMBULA YINU

7. Ngimba ukuyoba isya naloli isi sikufuma mundumbula yitu kukongelelapo isyafiki?

⁷ Uyu ikulonda ukuya nhesya mu hema lya Yehova, ikulondiwa ukuti “ayobeghe isyanaloli isi sikufuma mundumbula yake.” (Sal. 15:2) Isi sikongelelapo nyingi ukukinda ukuyoba itolo ubutungulu. Yehova ikulonda ukuti tuyobeghe ubwanaloli akabalilo kosa. (Hib. 13:18) Isi syakulondiwa fiyo, “namanga umundu unniongafu yo kinyanyasi kwa Yehova loli abagholofu bo Kyala ikwikyela nabo.”—Mbu. 3:32.

8. Ngimba tukulondiwa ukwepuka kukayilo kaliku?

⁸ Bosa aba ‘bikuyoba isya naloli isi sikufuma mundumbula,’ batikusyobekesya ukuti bikumpilikila Kyala linga bali pagulu lya bandu nukubomba ifindu ifibibi linga bali kwabene. (Yes. 29:13) Abene bikwepuka ukubomba ifindu mbusyobi. Umundu unsyobi abaghile ukwanda ukukayikila ifundo simo isya Yehova. (Yak. 1:​5-8) Abaghile ukwanda ukuleka ukumpilikila Yehova pankhani isi ikuketa ukuti sikaya syakulondiwa fiyo. Ukufuma apo, linga aketile ukuti kikayapo ikibibi iki kikubombiwa panongwa yakuleka ukupilikila, abaghile ukwanda ukusula indaghilo sya Kyala kangi ukwiputa kwake kubaghile ukuya kwa busyobi. (Ndumbi. 8:11) Yonongwa yake tukulondiwa ukuyoba ubwanaloli akabalilo kosa.

9. Ngimba tukumanyilako isyafiki bo Yesu aghene akakwanda na Natanaeli? (Keta kangi ikithuzi.)

 ⁹ Tubaghile ukumanyilako simo kwa Yesu pakabalilo aka alyaghene akakwanda na Natanaeli. Bo Filipu abukile nummanyani wake Natanaeli ukuti akaghane na Yesu, ikindu kimo ikyakuhobosya kyabombiwe. Nalinga ukuti kali kakwanda ukwaghana na Natanaeli, loli Yesu atile: “Keta unnya Israeli naloli, uyu akaya nulusyobo nalumo mmyake.” (Yoh. 1:47) Yesu asimenye ukuti abafundiwa bake bamo bayobagha ubwanaloli. Loli umwene aketile ukuti Natanaeli yo ayobagha fiyo ubwanaloli. Mwakufwana itolo nanuswe, Natanaeli yope ali mundu nsitabugholofu. Loli bukalimo ubusyobi mmyake pamo ukuti ukuyoba isyabutungulu. Yesu alindaghisye fiyo Natanaeli. Bwanaloli ukuti nanuswe mo tukulonda ukuti Yesu atuketeleghe.

10. Nongwa yafiki tukulondiwa ukuya maso na isi tukuyoba? (Yakobu 1:26)

¹⁰ Ifundo nyingi isi sili mu chaputala 15 kya Salimo, sikulingania muno tubaghile ukubombela ifindu na bangi. Pa Salimo 15:​3, pikuyoba ukuti unhesya mu hema lya Yehova “atikuheha nululimi lwake, kangi atikumbombela imbibi ummanyani wake, nalinga kokuntuka umpalamani wake.” Linga tukubaheha abangi, sibaghile ukubafulasya kangi tukabaghila ukuya bahesya mu hema lya Yehova.—Belenga Yakobu 1:26.

11. Ngimba uluheho findu fiki, kangi syafiki sibaghile ukubombiwa ku mundu uyu ikubaheha abangi linga atikulapa?

¹¹ Uwamasalimo ayobile isyakufwana nuluheho. Ngimba uluheho findu fiki? Nkhani syabutungulu si sibaghile ukonanga utuyilo twa mundu yumo. Linga umundu ikubaheha abangi kangi atikulapa, abaghile ukwepusiwa nkipanga.—Yere. 17:10.

12-13. Ngimba po pafyakubombiwa filiku ifi tubaghile ukwiyipa inongwa panongwa yakunyasya utuyilo twa binitu? (Keta kangi ikithuzi.)

¹² Pa Salimo 15:3 pikutukumbusya kangi ukuti abahesya mu hema lya Yehova batikubabombela ifindu ifibibi abinabo kangi  batikubanyoza abamanyani babo. Ngimba isi sibaghile ukongelelapo isyafiki?

¹³ Linga tukuyoba inkhani isyabutungulu, tubaghile ukunyasya utuyilo twa mundu yumo. Mwakifwanikisyo: (1) umulumbu abaghile ukuleka ubupayiniya bwa kabalilo kosa, (2) aba bali pabweghi babaghile ukubimisya ububombeli bwa pa Beteli, pamo (3) unkamu akabaghila ukuya kangi nkulumba pamo ntuli wakipanga. Kubaghile ukuya kubibi fiyo ukwanda ukubabula abangi ukuti abakamu na balumbu aba, babaghile ukuti babombile ikindu kimo ikibibi yonongwa yake ifindu fichenjile kumyabo. Pabaghile ukuya ififukwa fingi ifi fipangisye ukuti ifindu fichenje ifi uswe tukafimanya. Mwakongelelapo, unhesya mu hema lya Yehova “atikumbombela imbibi ummanyani wake, nalinga kokuntuka umpalamani wake.”

MUBAGHINDIKEGHE ABA BIKUNTILA YEHOVA

14. Lingania muno abahesya ba mu hema lya Yehova bikwepukila kwa ‘aliwesa umbibi.’

¹⁴ Pa Salimo 15:4 NWT, pikuyoba ukuti ummanyani wa Yehova ‘ikunkana aliwesa umbibi.’ Ngimba tubaghile ukubomba bulebule isi? Pakuya bandu basitabugholofu, tukaya nubudindo ubwakuyoba ukuti umundu yumo mbibi. Nongwa yafiki? Tubaghile ukwanda ukubaghana abandu bamo nukubabenga abangi panongwa ya bundu bwabo. Tukulondiwa ukubakana bene aba Yehova ikuketa ukuti bandu “babibi.” (1 Kor. 5:11) Bamo mwabandu aba bo aba bikubomba ifindu ifibibi, batikughindika isi tukusubila na aba bikulonda ukonanga ubumanyani bwitu na Yehova.—Mbu. 13:20.

15. Ngimba njila yimo yiliku iyi tukunangisya ukuti tukubaghindika “aba bikuntila Yehova”?

¹⁵ Mwakukindana na isi, pa Salimo 15:​4, pikuyoba ukuti tubaghindikeghe “aba bikuntila Yehova.” Yonongwa yake tukughelaghela ukubanangisya ikisa nukubaghindika abamanyani ba Yehova. (Rom. 12:10) Bulebule? Injila yimo iyi yili pa Salimo 15:​4, yo yakuti unhesya mu hema lya Yehova “ikwima itolo muli isi afingile napa linga sikuntwalila ubupalapala.” Linga tutikufwanisya isi twafingile, tukubakalalisya abangi. (Mat. 5:37) Mwakifwanikisyo, Yehova ikulonda ukuti unnyambala nunkikulu bafwanisyeghe isi bafingile bo bikweghana. Ikuhoboka kangi linga abapapi bikufwanisya isi bafingile ku banabo. Panongwa yakuti tunganile Kyala nabangi, tukuya pakughelaghela ukufwanisya isi twafingile.

16. Ngimba njila yimo yiliku iyingi iyi tukunangisya ukuti tukubaghindika abamanyani ba Yehova?

¹⁶ Injila iyingi iyakubaghindika abamanyani ba Kyala, kokuya nindumbula yakwambilila abahesya nukunangisya ikisa. (Rom. 12:13) Linga tukuya nakabalilo akakwangala na bakamu na balumbu bitu, sikututula ukuya pabumanyani ubwamaka nabene kangi na Yehova. Kangi linga tuli nindumbula iyakwambilila abahesya, kokuti tukunkonga Yehova.

MUNGASIGHANAGHA FIYO INDALAMA

17. Nongwa yafiki inkhani ya ndalama yikuyobiwa mu chaputala 15 kya Salimo?

¹⁷ Tukubelenga ukuti uyu nhesya mu hema lya Yehova “atikwambilila ibana (indalama yapamwanya) nalinga ko kwambilila ifya kuhongela ku mundu unsita nongwa.” (Sal. 15:5) Nongwa yafiki pa salimo ili pikuyoba isya ndalama? Panongwa yakuti linga tusighanile fiyo indalama, tubaghile ukubakalalisya abangi nukonanga ubumanyani bwitu na Yehova. (1 Tim. 6:10) Nkabalilo kakunyuma, bamo balwaghilangapo ulusako ku bandu aba bali balondo mwakubahombesya indalama nyingi ukukinda pa isi bakopagha. Kangi abalongi  bamo bambililagha ifihombiwa nukubalongela mbubibi abasitanongwa. Ukubomba bo isi, kukunkalalisya fiyo Yehova.—Eze. 22:12.

18. Ngimba malalusyo ghaliku agha ghabaghile ukututula ukwifufuza pankhani ya muno tukusiketela indalama? (Bahiburi 13:5)

¹⁸ Kwakulondiwa fiyo ukwifufuza pankhani ya muno tukusiketela indalama. Amwilalusye ukuti: ‘Ngimba utubalilo twingi ngwinong’onela fiyo isya ndalama na ifi mbaghile ukula? Linga ngopile indalama, ngukabila ukughomola, nukwanda ukwinong’ona ukuti uyu alingopisye atikusilonda? Ngimba ukuya nindalama kukumbangisya ukwiketa ukuya wakulondiwa fiyo nukutoliwa ukubanangisya ikisa abangi? Ngimba ngubaketa abakamu na balumbu ukuti bafighanile fiyo ifindu ifyakumbili panongwa yakuti bali nindalama? Ngimba nguya pabumanyani na bandu aba bali nindalama nukuleka ukwangala nabalondo?’ Tuli nulusako ulunywamu fiyo panongwa yakuya bahesya mu hema lya Yehova. Tubaghile ukufighilila ulusako ulu mwakuleka ukusighana fiyo indalama. Linga tukubomba isi, Yehova atikuya pakutuleka.—Belenga Bahiburi 13:5.

YEHOVA ABAGHANILE ABAMANYANI BAKE

19. Nongwa yafiki Yehova ikulonda ukuti tubombeghe syosa isi sikuyobiwa mu chaputala 15 kya Salimo?

¹⁹ Ichaputala 15 kya Salimo, kikumalisya nulufingo ulu lukuti: “Umundu uyu linga ikusikonga sisisi yo atisakwikilisiwamo siku.” (Sal. 15:5) Apa uwamasalimo ikulingania inongwa iyi Yehova ikulonda ukuti tubombeghe syosa isi sikuyobiwa mu salimo ili. Umwene ikulonda ukuti tuyeghe balusekelo. Yonongwa yake ikutupa ubulongosi ubu bukututula nukutufighilila.—Yes. 48:17.

20. Ngimba abahesya aba bali mu hema lya Yehova bikughulila isyafiki nkyeni?

²⁰ Aba bitikisiwe na Yehova ukuya bahesya mu hema lyake, bikughulila ifindu ifinunu nkyeni. Abapakiwa abasubiliwa bisakwingila ‘mbuyo ubwingi’ ubu Yesu abatendekesyile kumwanya. (Yoh. 14:2) Bosa aba bali nulusubilo ulwakwisa kwikala pakisu, bikughulila ukufwanisiwa kwa lufingo ulu luli pa Ubusetuli 21:3. Bwanaloli ukuti twesa, tukuketa ukuti lusako lunywamu fiyo ukuya bamanyani ba Yehova nukuya bahesya mu hema lyake kwa bwila na bwila.