Tukulondiwa ukuya nulwitiko ukuti tunhobosyeghe Yehova. Loli Ibaibolo likuti “namanga abandu bosa batikughitika amasyu.” (2 Tes. 3:2) Untumiwa Pauli abayobile abandu aba bannyozagha ukuya “baniongafu nababibi.” Loli isi ayobile pankhani ya lwitiko, sikubapalamasya abandu bosa. Bamo batikulonda ukusubila ukuti Kyala uyu apelile ifindu fyosa aliko. (Rom. 1:20) Bamo babaghile ukuyoba ukuti bikusubila mmundu yumo uwamaka fiyo. Loli ulu lukaya lwitiko lwanaloli ulu tukulondiwa ukuya nalo ukuti tunhobosyeghe Yehova.

Tukulondiwa ukusubila ukuti Yehova aliko kangi ikuya pakubasaya aba bali nulwitiko lwamaka. (Hib. 11:6) Ulwitiko lo lumo mwa seke sya mbepo mwikemo. Twiputeghe kwa Yehova ukuti atupepo mbepo mwikemo. (Luka 11:​9, 10, 13) Tubaghile ukwambilila mbepo mwikemo linga tukubelenga Ibaibolo akabalilo kosa. Kangi tukulondiwa ukwinong’onelapo nukughelaghela ukukonga ifundo isi tumanyile. Ukubomba isi, kubaghile ukututula ukuti mbepo mwikemo ghututuleghe pabumi bwitu, nukututula ukuya nulwitiko lwamaka.