1. Ngimba findu fiki fikubatula ababombi ba Yehova ukukindilila ukumwiputa nalinga ukuti bikwaghana nindamyo?

 “UTUBALILO utupalapala” utu tulimo lino, to utu Ibaibolo lyayobile ngani. (2 Tim. 3:1) Ukongelelapo pandamyo isi aliwesa ikwaghana nasyo pakabalilo kalino, ababombi ba Yehova bikususiwa nukupinyiwa. Ngimba findu fiki fibaghile ukututula ukuti tukindilileghe ukumwiputa Yehova nalinga ukuti tukwaghana nindamyo? Ikindu ikyakulondiwa fiyo kyo kyakuti tumenye ukuti Yehova “yo yu Kyala umumi.”—Yere. 10:10; 2 Tim. 1:12.

2. Ngimba momunjila yiliku iyi Yehova yo Kyala umumi?

² Yehova ikuketa indamyo syosa isi tukwaghana nasyo kangi utubalilo tosa ikulonda ukututula. (2 Syambu. 16:9; Sal. 23:4) Linga tukukumbuka ukuti Kyala ikutupwelelela kangi ukuti utubalilo tosa ikuya pakututula, tukuya pakuya namaka aghakwifimbilisya ku ngelo yiliyosa. Tukumbukeghe muno syayilile ku Mwalafyale Davidi.

3. Ngimba Davidi asanusyagha isyafiki apa atighi “Yehova yo mumi”?

³ Davidi alimmenye kanunu Yehova kangi asubilagha mmyake. Pakabalilo aka atamiwagha na balughu bake, ukongelelapo Umwalafyale Sauli, Davidi asumagha ubutuli kwa Yehova. (Sal. 18:6) Bo Kyala amwile ulwiputo lwake, Davidi ayobile ukuti: “Yehova yo mumi.” (Sal. 18:46) Ngimba Davidi asanusyagha isyafiki? Ibuku limo lyayobile ukuti Davidi asubilagha ukuti Yehova “yo Kyala umumi uyu utubalilo tosa ikubatula ababombi bake.” Davidi asimenye ukuti Kyala wake mumi ukwendela mu isi syalimbonekile. Kangi isi syalimpangisye  ukuti akindilileghe ukumbombela nukumpala Yehova.—Sal. 18:​28, 29, 49.

4. Ngimba tukusayiwa bulebule linga tukunketa Yehova ukuya yo Kyala umumi?

⁴ Ukumanya ukuti Yehova yo Kyala umumi, kubaghile ukututula ukuti twiyipeghe pakumbombela. Tukuya pakuya namaka aghakwifimbilisya kungelo nukukindilila ukumbombela umwene. Kangi tukuya pakukindilila ukuya pabumanyani ubwamaka na Yehova.

KYALA UMUMI IKUYA PAKUTUKASYA

5. Ngimba tukukasiwa bulebule linga tukwaghana ningelo? (Bafilipi 4:13)

⁵ Tukuya pakwifimbilisya kungelo inywamu ninandi, linga tukukumbuka ukuti Yehova yo mumi kangi ukuti akabalilo kosa umwene ikuya pakututula. Kangi yikayapo indamyo iyi umwene akabaghila ukufwanisya ukumalana nayo. Yo mwenemakaghosa kangi abaghile ukutupa amaka ukuti twifimbilisyeghe. (Belenga Bafilipi 4:13.) Yonongwa yake tukuya nulusubilo linga tukwaghana nindamyo. Kangi linga tukuketa ukuti Yehova ikututula linga twaghene ningelo inandi tukuya nulusubilo losa ukuti ikuya pakututula linga twaghene ningelo inywamu.

6. Ngimba findu fiki fyabombiwe kwa Davidi bo wakilumyana ifi fyalimpangisye ukuti asubileghe fiyo mwa Yehova?

⁶ Amwinong’onele isi alyaghene nasyo Davidi isi syalimpangisye ukuti akindilile ukunsubila Yehova. Pakabalilo aka Davidi ali ntimi wakilumyana, ipatama ningalamu, fyakolile ing’osi sya tata wake. Utubalilo tosa tubili, Davidi anangisye ubukifu nukufikagha ifinyamana ukuti ayipoke ing’osi. Loli Davidi akalinong’winepo ukuti abombile isi pamwene. Asimenye ukuti Yehova yo uyu alimpele amaka. (1 Samu. 17:​34-37) Davidi akumbukagha isi syabombiwe. Bo ikwinong’onela isi, umwene asubilagha ukuti Kyala uyu yo mumi ikuya pakumpa amaka nkyeni.

7. Ngimba ukuya naminong’ono amanunu kwalintulile bulebule Davidi ukulimbana na Goliyati?

⁷ Bo akabalilo kakindilepo, Davidi bo wakilumyana, abukile ku musasa wa balwabwite ba ku Israeli. Abalwabwite ba ku Israeli, bali nulutende panongwa yakuti Umfilisiti yumo uyu ali yo Goliyati ayobile ukuti, “nikubaywelula abalwabwite bosa mbanya Israeli.” (1 Samu. 17:10, 11) Abalwabwite bali nulutende panongwa yakutila muno Goliyati abonekelagha kangi na isi ayobagha. (1 Samu. 17:​24, 25) Loli mukaya momuno Davidi aketelagha. Umwene aketagha ukuti Goliyati akabatukagha Abaisraeli loli antukagha “Kyala umumi.” (1 Samu. 17:26) Davidi inong’onelagha isya Yehova. Kangi asubilagha ukuti Kyala uyu alintulile pakabalilo kabutimi, yo uyu ayagha pakuntula napakabalilo kala. Panongwa yabutuli bwa Kyala, Davidi alwile na Goliyati kangi alintolile.—1 Samu. 17:​45-51.

8. Ngimba findu fiki fibaghile ukututula ukuti tunsubileghe Yehova linga twaghene ningelo? (Keta kangi ikithuzi.)

⁸ Nanuswe tubaghile ukumalana ningelo linga tukukumbuka ukuti Kyala uyu yo mumi ikuya pakututula. (Sal. 118:6) Tubaghile ukusubila ukuti ikuya pakututula linga tukwinong’onela isi abombile kunyuma. Tubelengeghe inkhani sya mu Baibolo isi sikutukumbusya muno Yehova abapokile ababombi bake. (Yes. 37:​17, 33-37) Tubelengeghe nukuketelela amalipoti pa webusayiti yitu ya jw.org agha ghikulingania muno Yehova ikubatulila abakamu na balumbu amasiku agha. Lumo tubaghile ukuketa ukuti Yehova akatubombelapo ikindu ikyakuswighisya bo ukutupoka kungalamu pamo ipatama. Nongwa yafiki? Panongwa yakuti Yehova atubombile ifindu fingi pabumi bwitu. Umwene atutulile ukuti  tuye nawe pabumanyani. (Yoh. 6:44) Lino tukulondiwa ukunndaghisya panongwa yakuti ikututula ukuti tukindilile ukuya nawe pabumanyani. Tukindilileghe ukunsuma ukuti atutuleghe ukukumbuka akabalilo aka alyamwile inyiputo syitu, atupele isi twalondiwagha pakabalilo kake kangi, atutulile pakabalilo kandamyo. Ukukumbuka ifyakubombiwa bo ifi, kukuya pakutukasya ukuti tusubileghe fiyo ukuti Yehova ikuya pakukindilila ukututula.

9. Ngimba tukulondiwa ukukumbuka isyafiki linga tukwaghana ningelo? (Isya Mbupingamu 27:11)

⁹ Linga tukunketa Yehova ukuya mumi, sikuya pakututula ukuti tulimbaneghe ningelo. Bulebule? Tukuya pakwanda ukuketa ukuti ingelo nkhani nywamu pakati pa Yehova na Setano. Umohesi ikuyoba ukuti linga tukwaghana nindamyo tukuya pakundeka Yehova. (Jobu 1:10, 11; belenga Isya Mbupingamu 27:11.) Linga tukukindilila ukuya basubiliwa kwa Kyala nalinga ukuti tukwaghana nindamyo, tukunangisya ukuti tunganile Yehova kangi ukuti Umohesi ntungulu. Ngimba mukususiwa na baboma, muli balondo, mukususiwa mubufumusi pamo indamyo isingi? Linga momuno siyilile, mukumbukeghe ukuti indamyo isi sikubapa ulusako ulwakuti muyihobosyeghe indumbula ya Yehova. Mukumbukeghe ukuti umwene atikuya pakwitikisya ukuti mugheliweghe ukukinda pamaka ghinu. (1 Kor. 10:13) Ikuya pakubapa amaka ukuti mwifimbilisyeghe.

KYALA UMUMI IKUYA PAKUTUSAYA

10. Ngimba Kyala umumi ikuya pakubabombela isyafiki aba bikumwiputa?

¹⁰ Yehova ikubasaya aba bikumwiputa. (Hib. 11:6) Ikuya pakutupa ulutengano nukwikutisiwa kangi ikuya pakutupa ubumi bwa bwila na bwila nkyeni. Tukulondiwa ukusubila ukuti Yehova ikuya pakutusaya kangi ali namaka aghakubombela isi. Isi sikutupangisya ukuti tukindilileghe ukumwiputa, bo muno ababombi bake abakunyuma babombelagha. Syo isi Timoti abombagha.—Hib. 6:​10-12.

11. Nongwa yafiki Timoti iyipagha ukubomba imbombo nkipanga? (1 Timoti 4:10)

 ¹¹ Belenga 1 Timoti 4:10. Timoti asubilagha mwa Kyala umumi. Yonongwa yake, umwene aghelaghelagha ukumbombela Yehova na bandu. Untumiwa Pauli alinkasisye ukuti aye mmanyisi nnunu mubufumusi na nkipanga. Timoti ali kifwanikisyo kinunu ku Bakristu abinake, abakusi na bakeke. Kangi apeliwe ububombeli ubwakutamya, bo ukubapa ubulongosi mwalughano abandu nkipanga. (1 Tim. 4:​11-16; 2 Tim. 4:​1-5) Nalinga ukuti abangi bakandaghisyanga ububombeli bwake loli umwene amenye ukuti Yehova ikuya pakunsaya.—Rom. 2:​6, 7.

12. Nongwa yafiki abakulumba bikwiyipa fiyo nkipanga? (Keta kangi ikithuzi.)

¹² Amasiku agha, abakulumba bope bamenye ukuti Yehova ikuketa kangi ikundaghisya imbombo inunu isi bikubomba. Ukongelelapo pambombo ya butimi, ukumanyisya kangi nukufumusya, abakulumba bingi bikutulapo pambombo yakuyenga kangi linga ingozi syakipeliwa sibombiwe. Abangi bikwendela ababine bamo bali mu Komiti Yakipatala. Abakulumba aba bikutulapo pambombo isi, bikukiketa ikipanga ukuya kya Yehova komma kya bandu. Yonongwa yake bikwiyipa fiyo nkipanga kangi bikunsubila fiyo Yehova ukuti ikuya pakubasaya pambombo iyi bikubomba.—Kolos. 3:​23, 24.

13. Ngimba Yehova ikwipilika bulebule linga tukwiyipa pakumbombela?

¹³ Akaya aliwesa uyu abaghile ukuya nkulumba wakipanga. Loli twesa tubaghile ukumpa ikindu kimo Yehova. Kyala witu ikundaghisya fiyo linga tukwiyipa ukuti tumbombeleghe. Umwene ikuketa isi tukubomba ukuti tutulepo pambombo ya pakisu kyosa nalinga ukuti tukabaghila ukubomba nyingi. Ikuhoboka fiyo linga tukwimika ikiboko ukuti twamulepo pangomano nalinga ukuti tuli nisoni, kangi ikuhoboka linga tukubahobokela abangi. Nalinga ukuti mukwipilika ukuti  mutikumbombela nyingi Yehova loli mukulondiwa ukusubila ukuti ikundaghisya isi mubaghile ukufwanisya ukubomba. Umwene abaghanile kangi ikuya pakubasaya.—Luka 21: 1-4.

TUYEGHE PABUMANYANI NA KYALA UMUMI

14. Ngimba ukuya pabumanyani na Yehova, kubaghile ukututula bulebule ukuya basubiliwa kumyake? (Keta kangi ikithuzi.)

¹⁴ Linga tuli pabumanyani ubununu na Yehova, kukuya pakuya kupepe ukuya basubiliwa kumyake. Syo isi syabombiwe kwa Yosefu. Umwene akanile ukubomba ubulowe, panongwa yakuti ali pabumanyani ubununu na Yehova kangi akalondagha ukuti ankalalisye. (Bwa. 39:9) Ukuti tuye pabumanyani ubununu na Yehova, tukulondiwa ukuya nakabalilo akakwiputa kumyake nukubelenga Amasyu ghake. Ubumanyani bwitu numwene bukuya pakukula. Linga tuli pabumanyani ubununu na Yehova bo Yosefu, tutikuya pakunkalalisya.—Yak. 4:8.

15. Ngimba tubaghile ukumanyilako isyafiki ku isi balyaghene nasyo Abaisraeli ndungalangala? (Bahiburi 3:12)

¹⁵ Aba bikwibwa ukuti Yehova yo Kyala umumi, babaghile ukusokako kumyake mwanakalinga. Amwinong’onele isi syababonekile Abaisraeli pakabalilo aka bali ndungalangala. Abene basimenye ukuti Yehova aliko, loli balyandile ukukayikila linga abaghile ukubapa ifi balondiwagha. Abene bayobile ukuti: ‘Ngimba Yehova ali palikimo nanuswe pamo mma?’ (Kuso. 17:​2, 7) Yonongwa yake, balinsambukile Kyala. Ukuyoba ubwanaloli, tutikulonda ukukonga isi babombile. Iki kifwanikisyo kibibi kumyitu.—Belenga Bahiburi 3:12.

16. Ngimba findu fiki fibaghile ukughela ulwitiko lwitu?

¹⁶ Amasiku agha, kukafu fiyo ukuya pabumanyani na Yehova. Bingi bikukana ukuti Kyala aliko. Utubalilo twingi, aba bikukana ukukonga ifundo sya Kyala bo aba ifindu fikubendela kanunu. Linga tukuketa isi sikubombiwa, ulwitiko lwitu lubaghile ukugheliwa. Nalinga ukuti tukusubila ukuti Kyala  aliko loli tubaghile ukwanda ukukayika ukuti ikuya pakututula. Uyu alembile Salimo 73 yope alipilike bo ulu. Aketagha ukuti abandu bankabalilo kake, bakakongagha indaghilo sya Kyala loli bahobokagha pabumi bwabo. Ifyakukongapo fyake fyali fyakuti, alyandile ukukayikila linga ukumbombela Yehova kwakulondiwa.—Sal. 73:​11-13.

17. Ngimba findu fiki fikuya pakututula ukuya pabumanyani na Yehova?

¹⁷ Ngimba findu fiki fyalintulile uwamasalimo uyu ukuchenja aminong’ono ghake? Umwene inong’onelagha isi sibaghile ukubombiwa kubandu aba batikunsubila Yehova. (Sal. 73:​18, 19, 27) Inong’onelagha kangi ubununu ubwakumbombela Kyala. (Sal. 73:24) Nanuswe twinong’oneleghe ulusayo ulu Yehova atupele. Kangi twinong’oneleghe muno ubumi bwitu bwayagha pakuyila linga tukambombelagha Yehova. Ukubomba isi, kubaghile ukututula ukuya basubiliwa nukuyoba bo muno ayobile uwamasalimo ukuti: “Loli une, isyene inunu ukukinda syo syakuya mbupipi mwa Kyala.”—Sal. 73:28.

18. Nongwa yafiki tutikulondiwa ukutila ifi fikwisa nkyeni?

¹⁸ Tubaghile ukwaghana nindamyo nyingi nkabalilo kakubumalikisyo aka panongwa yakuti tusalile ukuti “tumbombeleghe Kyala umumi uwa naloli.” (1 Tes. 1:9) Kyala witu atughanile kangi ikuya pakututula akabalilo kosa. Umwene abatulagha ababombi bake abakunyuma, kangi ikuya pakuya nanuswe amasiku agha. Mwalululu, ubutolwe ubukulumba bukuya pakwanda. Loli tutikuya pakuya twibene, Yehova ikuya pakuya nanuswe. (Yes. 41:10) Tukulondiwa “ukuyoba nubukifu ukuti: ‘Yehova yo ntuli wangu; ndisakutilagha nafimo.’”​—Hib. 13:​5, 6.