1. Ngimba Davidi ikumfwanikisya Yehova nifindu fiki bo muno pikuyobela pa Salimo 18:46?

 TUKWIKALA nkisu iki tubaghile ukwaghana nindamyo isi sibaghile ukuchenja ifindu pabumi bwitu. Tukundaghisya fiyo panongwa yakuti tubaghile ukunsubila Yehova ukuti ikuya pakututula. Inkhani iyi yakindagha, yatukumbwisye ukuti Yehova yo Kyala umumi kangi akabalilo kosa abaghile ukututula. Linga tuketile muno atutulile, tukuya nulusubilo losa ukuti ‘Yehova yo mumi.’ (Belenga Salimo 18:46 NWT.) Bo Davidi ayobile ifundo iyi, ayobile kangi ukuti Kyala ‘lyalabwe lyangu.’ Ngimba Davidi asanusyagha isyafiki apa amfwanikisyagha Yehova Kyala umumi, nilyalabwe?

2. Nongwa yafiki syakukasya ukuketa ukuti Davidi alinjobile Yehova ukuti “Lyalabwe lyangu”?

² Munkhani iyi, tukuya pakuyobesania inongwa iyi Yehova ikuyobiwa ukuya lyalabwe na isi tukumanyilako. Tukuya pakuketa kangi inongwa iyi tukulondiwa ukunsubila Kyala ukuya Lyalabwe litu. Pabumalilo tukuya pakuyobesania injila isya muno tubaghile ukukongela utuyilo twa Yehova pakuya lyalabwe.

NONGWA YAFIKI YEHOVA IKUYOBIWA UKUYA LYALABWE?

3. Ngimba utubalilo twingi Ibaibolo likubombela bulebule amasyu aghakuti “lyalabwe”? (Keta kyapakikope.)

³ Ibaibolo likumfwanikisya Yehova ni “lyalabwe” ukuti tupilikisye kanunu utuyilo twake. Utubalilo twingi, linga ababombi ba Yehova bikumpala, bikunjoba ukuya lyalabwe. Amalo aghakwanda agha Yehova ikuyobiwa ukuya “Lyalabwe” mu Baibolo, ghikwaghiwa pilemba lya Ukukumbusya Indaghilo 32:4. Ndwiputo, Hana atile, “akayako nayumo uyu yo mwikemo bo yu Kyala.” (1 Samu. 2:2 NWT) Habakuku alinjobile Yehova ukuti “Lyalabwe.” (Haba. 1:12 NWT) Uyu alembile Salimo 73, atile Kyala “yo maka gha mu ndumbula yangu.” (Sal. 73:26 NWT) Kangi yope  Yehova aliyobile mwene ukuya lyalabwe. (Yes. 44:8 NWT) Isagha tuyobesanie utuyilo tutatu utwa Yehova nukuketa muno tubaghile ukunsubila umwene ukuya ‘Lyalabwe litu.’—Kukumbu. 32:31 NWT.

4. Ngimba Yehova yo kububopelo bwitu bulebule? (Salimo 94:22)

⁴ Yehova ko kububopelo. Bo muno umundu abaghile ukwibilila ku lyalabwe inywamu linga ifula iyamaka yikutima, Yehova abaghile ukutufighilila linga twaghene nindamyo pabumi bwitu. (Belenga Salimo 94:22.) Ikutufighilila kufindu ifi fibaghile ukonanga ubumi bwitu ubwa mwambepo nubwa kumbili. Mwakongelelapo, umwene afingile ukuti: Isakusosyapo ifindu fyosa ifi fikutupangisya ukuti tutamiweghe naminong’ono.—Eze. 34:​25, 26.

5. Ngimba tubaghile ukubomba isyafiki ukuti Yehova ayeghe bubopelo bwitu?

⁵ Injila yimo iyi yibaghile ukututula ukuti Yehova atufighilileghe, ko kwiputa kumyake. Linga twiputile, tukulwagha “ulutengano lwa Kyala” ulu lukusifighilila indumbula naminong’ono ghitu. (Filip. 4:​6, 7) Inong’onela isi syalimbonekile unkamu Artem, uyu apinyiwe panongwa yalwitiko lwake. Bo ali mujele, utubalilo twingi bandalusyagha amalalusyo, bannyozagha nukuntetemesya. Artem atile: “Natamiwagha fiyo aminong’ono linga bikundalusya amalalusyo. . . . Utubalilo tosa niputagha kwa Yehova. Nalinsumile Kyala ukuti ambepo ulutengano lwa mundumbula namahala. Nalinga ukuti bannyozagha fiyo, loli pope nakindilile ukuya nsubiliwa. . . . Nubutuli bwa Yehova, nafwanagha nimile kwimato lya libwe.”

6. Nongwa yafiki tukulondiwa ukunsubila Yehova utubalilo tosa? (Yesaya 26:​3, 4)

⁶ Yehova nsubiliwa kangi atisakutuleka. Bo muno ilyalabwe litikusukanika, Yehova yope ikuya pakutufighilila akabalilo kosa. Tukunsubila Kyala “papo umwene yo Lyalabwe lyakuponelamo bwila itolo.” (Belenga Yesaya 26:​3, 4 NWT.) Utubalilo tosa, umwene ikufwanisya isi afingile, ikupilika inyiputo syitu kangi ikutupa ifi tukulondiwa. Tukunsubila kangi Yehova panongwa yakuti nsubiliwa ku bandu aba bikumbombela mbusubiliwa. (2 Samu. 22:26) Umwene atisakwibwa isi tukumbombela, kangi utubalilo tosa ikutusaya.—Hib. 6:10; 11:6.

7. Ngimba syafiki sibaghile ukubombiwa linga tukunsubila fiyo Yehova? (Keta kangi ikithuzi.)

⁷ Yehova ikuya Lyalabwe litu linga tukunsubila fiyo umwene. Tukusubila ukuti linga tukumpilikila ntubalilo utupalapala, tukuya pakusayiwa fiyo. (Yes. 48:​17, 18) Linga utubalilo tosa tukuketa muno Yehova ikututulila, ulusubilo lwitu mmyake lukukula fiyo. Isi sikuya pakututula ukuti twitendekesyeghe kungelo isi Yehova mwene yo abaghile ukututula. Utubalilo twingi linga twaghene ningelo isi nayumo umundu uyu abaghile ukututula, tukukumbuka muno buyilile ubusubiliwa bwa Yehova. Vladimir atile: “Pakabalilo aka nanyoziwagha mujele, po apa nasyaghenie ukuti ndipabumanyani ubwamaka na Kyala. Nasyaghenie ukuti ngunsubila fiyo Yehova panongwa yakuti nali nimwene. Kangi nasubilagha ukuti yo Kyala mwene uyu abaghile ukundula ukwifimbilisya.”

8. (a) Nongwa yafiki tubaghile ukuyoba ukuti Yehova atikuchenja? (b) Ngimba tukusayiwa bulebule panongwa yakuti Kyala yo Lyalabwe litu? (Salimo 62:​6, 7)

 ⁸ Yehova atikuchenja. Mwakufwana itolo nilyalabwe inywamu, Yehova atikuchenja pamo ukusukanika. Utuyilo twake na isi ikulonda ukubomba sitikuchenjamo. (Mala. 3:6) Bo Adamu na Eva bansambukile mungunda wa Edeni, Yehova akachenjile ubwighane bwake kubandu. Untumiwa Pauli alembile ukuti Yehova “akabaghila ukwikana.” (2 Tim. 2:13) Isi sikusanusya ukuti mulimosa muno sibaghile ukuyila, pamo isi bamo babaghile ukubomba, Yehova atikuya pakuchenja utuyilo twake, ubwighane bwake nifundo syake. Panongwa yakuti tukusubila ukuti Yehova akabaghila ukuchenja, tusimenye ukuti isakututula pakabalilo kangelo kangi isakufwanisya isi afingile nkyeni.—Belenga Salimo 62:​6, 7.

9. Ngimba tukumanyilako isyafiki kwa Tatyana?

⁹ Yehova abaghile ukuya Lyalabwe litu linga tukwinong’onela isya tuyilo nubwighane bwake kukisu nakubandu. Ukubomba isi, kubaghile ukututula ukuti tuye naminong’ono amanunu bo tukwifimbilisya kungelo. (Sal. 16:8) Syo isi syalimbonekile umulumbu Tatyana uyu ali mujele yapakaya panongwa yalwitiko lwake. Tatyana atile: “Nali nimwene itolo. Pakwanda kwali kwakutamya fiyo. Utubalilo twingi nayagha nikitima.” Loli bo andile ukwinong’onela isya Yehova nubwighane bwake kubandu, syalintulile ukuti akindilileghe ukwifimbilisya nukuya nsubiliwa. Umwene atile: “Ukumanya inongwa iyi natamiliwagha, kwalindulile ukukumbuka ukuti ulughano lwangu kwa Yehova lo lumbangisye ukuti naghane ningelo isi. Syalindulile ukuti ndeke ukwiyinong’onela nimwene.”

10. Ngimba Yehova abaghile bulebule ukuya Lyalabwe litu lino?

¹⁰ Nkyeni, twisakwaghana ningelo isi twisakulondiwa ukunsubila fiyo Yehova ukukinda kunyuma kosa. Aka ko kabalilo kakukasya ulusubilo lwitu ukuti isakutupa fyosa ifi tukulondiwa ukuti twifimbilisyeghe mbusubiliwa kungelo. Ngimba tubaghile ukubomba bulebule isi? Tubelengeghe inkhani sya mu Baibolo na isi sikubabonekela Abaketi amasiku agha. Tuketeghe muno Kyala abatulile ababombi bake abakunyuma. Twinong’oneleghe fiyo inkhani isi. Ukubomba isi kukuya pakututula ukuti tunketeghe Yehova ukuya Lyalabwe litu.

TUKONGEGHE UTUYILO TWA YEHOVA

11. Nongwa yafiki tukulondiwa ukukonga utuyilo twa Yehova? (Keta kangi ibokosi ilyakuti “ Ubwighane bwa Bakamu Abakilumyana.”)

¹¹ Tuyobesenie utuyilo twa Yehova utu tukunangisya ukuti afwene nilyalabwe. Lino isagha tuyobesanie muno tubaghile ukukongela utuyilo twake. Linga tukwiyipa fiyo ukukonga utuyilo twa Yehova, tukuya pakubakasya abakamu na balumbu bitu. Mwakifwanikisyo, Yesu alimpele Simoni ingamu iyakuti Kefa (iyi yikusanusya ukuti “Peteri”), iyi yikwimila “Ilyalabwe.” (Yoh. 1:42) Yesu asanusyagha ukuti Peteri isakubasubisyagha abinake nkipanga nukukasya ulwitiko lwabo. Abakulumba bakipanga bikuyobiwa ukuya “buyo bwakwibililamo.”  Isi sikusanusya ukuti bikukifighilila ikipanga. (Yes. 32:2) Loli ikipanga kikusayiwa fiyo linga abakamu na balumbu bosa bikukonga utuyilo twa Yehova.—Ef. 5:1.

12. Ngimba tubaghile ukubatula bulebule abinitu nkabalilo kandamyo?

¹² Tubatuleghe abakamu ukuti bafighililiweghe. Linga inyumba sya bakamu bitu syonangike pamo bikulondiwa ukutuleka utwaya twabo panongwa yabwite pamo ingozi syakipeliwa, tukulondiwa ukubambilila ntwaya twitu. Bo ifindu fikukindilila ukonangika nkisu “mmasiku gha kubumalikisyo,” tukusubila ukuti tuli nulusako ulwakubapa abakamu na balumbu bitu ifi bikulondiwa. (2 Tim. 3:1) Tukulondiwa kangi ukubasubisya nukubaghana abakamu na balumbu bitu. Injila yimo iyi tubaghile ukubombela isi ko kubambilila kanunu nukubasubisya pa Nyumba ya Bunyafyale. Isi sikuya pakutula ukuti linga bisile pangomano, basubisiweghe nukukasiwa. Abandu amasiku agha bakali fiyo kangi babaghile ukubapangisya abakamu na balumbu ukuti batamiweghe naminong’ono nukwipilika ukuti bakaghaniwa. Yonongwa yake linga abakamu na balumbu bikwisa kungomano, tukulondiwa ukubomba isi tubaghile ukufwanisya ukuti tubakasye nukubasubisya.

13. Ngimba abakulumba babaghile ukubasubisya bulebule abangi nkabalilo kandamyo? (Keta kangi ikithuzi.)

¹³ Abakulumba bikubatula abakamu na balumbu nkipanga aba bikwaghana ningelo. Linga ingozi syakipeliwa sibombiwe pamo linga abafumusi bamo bikulondiwa ubutuli bwa kukipatala, abakulumba bakipanga bikweghapo ikighaba ukubatula. Bikutupa kangi ubulongosi nukutukasya na Malemba. Abakamu na balumbu bikuya babuke ukusuma ubutuli ku nkulumba uyu bikunketa ukuti mololo, wakisa kangi wakupilikisya. Utuyilo bo utu, tukutula ukuti umundu ipilikeghe ukuti aghaniwe kangi kukuya kupepe ukuti akongeghe ubulongosi bwa Mmalemba ubu unkulumba ampele.—1 Tes. 2:​7, 8, 11.

14. Ngimba tubaghile ukunangisya bulebule ukuti tuli basubiliwa?

 ¹⁴ Tuyeghe basubiliwa. Tukulonda ukuti abangi basubileghe ukuti tubaghile ukubatula linga bikulondiwa ubutuli, fiyofiyo ntubalilo utupalapala utu. (Mbu. 17:17) Ngimba mubaghile ukubomba isyafiki ukuti abininu babasubileghe? Isiku lililyosa, tukulondiwa ukukonga utuyilo twa Kyala. Mwakifwanikisyo, tukulondiwa ukufwanisya isi tufingile mwakwiyipa fiyo ukubomba ifindu pakabalilo kake. (Mat. 5:37) Linga tusyaghenie ukuti yumo ikulondiwa ubutuli, tuntuleghe muno ikulondela. Mwakongelelapo, tukulondiwa ukuketesya ukuti tukubomba imbombo iyi tupeliwe nkipanga ukufwana nubulongosi ubu tukwambilila.

15. Ngimba ikipanga kikusayiwa bulebule linga abakulumba bikubomba ifindu mbusubiliwa?

¹⁵ Ngimba ikipanga kikusayiwa bulebule linga abakamu na balumbu bikubasubila abakulumba? Linga abafumusi basyaghenie ukuti babaghile ukuyobesania mbwabuke nabakulumba bakipanga pandamyo iyi bali nayo, batikutila ukuyobesania nabo. Abafumusi bikwipilika kangi ukuti baghaniwe linga basyaghenie ukuti abakulumba bikwiyipa ukubatula. Linga abakulumba  bikubombela ubulongosi bwa mu Baibolo namabuku gha ntumwa unsubiliwa mmalo mwakubombela aminong’ono ghabo, abakamu na balumbu bikubasubilagha fiyo. Abakulumba aba bikusunga inkhani syabo isya kisisi nukufwanisya isi bafingile, abakamu na balumbu bikubasubila fiyo.

16. Ngimba uswe nabangi tukusayiwa bulebule linga tukubomba isi Yehova ikuti nunu?

¹⁶ Utubalilo tosa tubombeghe isi Yehova ikuti nunu. Linga utubalilo tosa tukumpilikila Yehova nukusala ifindu ukufwana nifundo sya mu Baibolo, tukuya pakuya kifwanikisyo kinunu kubangi. Linga tukumanyila Amasyu gha Kyala nukukasya ulwitiko lwitu, tukuya pakuya basubiliwa kumyake nakufundo syake. Ukubomba isi kukuya pakututula ukuti tufimanyeghe ifimanyisyo fyabutungulu nifundo isi sitikukolelana naminong’ono gha Yehova kangi tutikuya pakusyobiwa. (Ef. 4:14; Yak. 1:​6-8) Tukukindilila ukuya nulwitiko lwamaka mwa Yehova na ndufingo lwake nalinga tubaghile ukupilika amasyu amabibi. (Sal. 112:​7, 8) Sikuya pakututula kangi ukuti tubatuleghe aba bikwaghana ningelo.—1 Tes. 3:​2, 3.

17. Ngimba findu fiki fikubatula abakulumba bakipanga ukuti bayeghe bakukasya?

¹⁷ Abakulumba bikulondiwa ukuya bakwikola ntuyilo twabo, binong’oneghe kanunu, babombeghe ifindu ndubatiko kangi bayeghe bakupilikisya. Abanyambala aba bikubatula abinabo ukuti bayeghe bakifu nukuya nulwitiko lwamaka mwa Yehova na “mwisyu ilisubiliwa.” (Titi 1:9; 1 Tim. 3:​1-3) Panongwa yakuti bikunangisya ikifwanikisyo ikinunu kangi bikubomba ubutimi, abakulumba bikubatula abafumusi ukuti utubalilo tosa bafikeghe pangomano, bafumusyeghe nukumanyila pabene. Linga abakamu na balumbu baghene nindamyo, abakulumba bikubakumbusya ukuti bansubileghe fiyo Yehova na isi afingile.

18. Nongwa yafiki tukulondiwa ukumpala Yehova nukuya nawe pabumanyani? (Keta ibokosi ilyakuti “ Injila iyi Yibaghile Ukututula Ukuya Pabumanyani na Yehova.”)

¹⁸ Panyuma pakuyobesania utuyilo utununu utwa Yehova, tubaghile ukuyoba bo muno ayobile Umwalafyale Davidi ukuti: “Atufiweghe Yehova, uyu ali bo Lyalabwe lyangu.” (Sal. 144:1) Tukuya pakukindilila ukunsubila Yehova. Utubalilo tosa, nalinga tukangele, tusubileghe ukuti Kyala abaghile ukututula ukuti tukindilileghe ukuya nawe pabumanyani. Yonongwa yake tubaghile ukuyoba ukuti: “Umwene yo Lyalabwe lyangu.”—Sal. 92:​14, 15.