Yehova Ikuketa Amasyu Ghinu Aghakuti “Ameni” Ukuya Ghakulondiwa Fiyo
YEHOVA ikuketa ukwiputa kwitu ukuya kwakulondiwa fiyo. Umwene “ikubikako amahala nukupilikisya” ku babombi bake, kangi ikuketa syosa isi tukubomba pakumwiputa ukuti syakulondiwa fiyo nalinga tutikubomba nyingi. (Mal. 3:16) Mwakifwanikisyo, inong’onela isya lisyu ili tukuyoba utubalilo twingi. Ilisyu lyake lyo lyakuti “ameni.” Ngimba Yehova ikuketa ukuti amasyu agha ghakulondiwa fiyo? Ena! Ukuti tumanye inongwa yake, isagha tukete isi amasyu agha ghikusanusya namuno Ibaibolo likuyobela.
“ABANDU BOSA BAMULEGHE UKUTI, ‘AMENI!’”
Amasyu gha mu Chizungu aghakuti “ameni” ghikusanusya ukuti “mo siyileghe,” pamo “momumo.” Ilisyu ili lifumile ku lisyu lya Chihiburi ili likusanusya “ukuya nsubiliwa.” Utubalilo tumo baghabombesyelagha linga bikulonga inongwa. Linga umundu afingile simo, umwene ayobagha ukuti “ameni” ukusimikisyila ukuti isi ayobile sya bwanaloli kangi ikuya pakufwanisya nukwitikisya ifyakukongapo fyake. (Kub. 5:22) Linga ayobile ukuti ameni pakilundilo, umwene alondiwagha ukufwanisya isi afingile.—Neh. 5:13.
Ikifwanikisyo ikinunu ikya masyu aghakuti “ameni” kikwaghiwa pilemba lya Ukukumbusya Indaghilo chaputala 27. Bo Abaisraeli bingile Nkisu kya Lufingo, babungene pa kikogha kya kyamba kya Ebala ni kya Gerizimu ukuti bakapilike indaghilo sya Kyala. Abene babukile ukuti bakapilikisye kangi nukwitikisya indaghilo. Abene babombagha isi mwakwamula ukuti “Ameni!” linga babelengile indaghilo. (Kuk. 27:15-26) Inong’onela isya masyu muno ghapilikiliwe agha banyambala, abakikulu kangi na bana bo bikwamulila pampene! (Yos. 8:30-35) Ukuyoba ubwanaloli abene bakalibibwemo amasyu agha balyamulile pampene pisiku lila. Kangi Abaisraeli bosa basungile amasyu aghakuti: ‘Abene Abanyaisraeli bo balinkumbombela Yehova m’masiku ghosa bo Yoswa aliko ku bumi, kangi na m’masiku ghosa gha bumi bwa bakulumba bosa aba baghonile ukunkinda Yoswa kangi aba basibwene imbombo syosa isi Yehova ababombile Abanyaisraeli.’—Yos. 24:31.
Yesu yope abombesyelagha amasyu aghakuti “ameni” ukuti asimikisyile ukuti isi ayobagha syali sya bwanaloli loli abombile munjila inunu. M’malo mwakubombesyela ukuti amule mwakulingania, umwene abombesyelagha amasyu aghakuti “ameni” (agha mu Chizungu baghasanwisye ukuti “momumo”) ukuti abalinganie ubwanaloli. Utubalilo tumo ayobagha mwakwandisania amasyu aghakuti “ameni ameni.” (Mat. 5:18; Yoh. 1:51) Umwene abasimikisyilagha abandu aba abamanyisyagha ukuti amasyu ghake ghali ghabwanaloli. Yesu ayobagha mwakusimikisya panongwa yakuti ali nubudindo ubwakufwanisya syosa isi Kyala afingile.—2 Kor. 1:20; Ubu. 3:14.
“ABANDU BOSA BALINKUYOBA BALINKUTI, ‘AMENI!’ KANGI BALINKUMPALA YEHOVA”
Abaisraeli bope babombesyelagha amasyu aghakuti “ameni” linga bikumpala nukwiputa kwa Yehova. (Neh. 8:6; Sal. 41:13) Mwakuyoba ukuti ameni pabumalilo palwiputo, aba bapilikisyagha banangisyagha ukuti bikukolelana na isi sili mulwiputo. Bosa aba baghiwangapo ukuti biputile pampene, bahobokagha fiyo ukumpala Yehova. Isi syo isi syabombiwe pakabalilo aka Umwalafyale Davide atwele ibokosi ilya Yehova ilya lwitikano ku Yerusalemu. Pakabalilo ka ikyaka ikyakukongapo, umwene aliputile ukufumila pasi pandumbula mwakwimba inyimbo iyi yikwaghiwa pilemba lya 1 Syambukulu 16:8-36. Bosa aba balipo bakasiwe fiyo na masyu ghake “abandu bosa balinkuyoba balinkuti, ‘Ameni!’ kangi balinkumpala Yehova.” Momumo, ukwamula kwabo kwapangisye ukuti baye nulusekelo.
Abakristu bankabalilo ka kunyuma bope babombesyelagha amasyu aghakuti “ameni” linga bikumpala Yehova. Aba balembagha Ibaibolo bope balembile amasyu agha mubakalata babo. (Rom. 1:25; 16:27; 1 Pet. 4:11) Ibuku lya Ubusetuli likuyoba isya fipeliwa ifyamwambepo ifya kumwanya ukuti fikumpala Yehova mwakuyoba ukuti: ‘Ameni! Tumpaleghe Yehova!’ (Ubu. 19:1, 4) Abakristu abakunyuma utubalilo twingi bayobagha ukuti “ameni” pabumalilo pa nyiputo isi syabombiwagha pangomano. (1 Kor. 14:16) Loli amasyu agha ghakali masyu aghakuti bamuleghe kisita kwinong’onelapo.
NONGWA YAFIKI AMASYU GHITU AGHAKUTI “AMENI” GHAKULONDIWA FIYO
Ukufwana namuno tumanyilile ukuti ababombi ba Yehova babombesyelagha amasyu aghakuti, “ameni” tubaghile ukuketa inongwa iyi amasyu agha ghakulondiwa fiyo ukughayoba pabumalilo palwiputo. Linga tukuyoba amasyu agha pabumalilo palwiputo lwitu, tukunangisya ukuti tukukolelana na isi tuyobile. Kangi tukukasiwa fiyo ukwamula ukuti “ameni,” linga tukwiputa mundumbula, pakilundilo, tukunangisya ukuti tukukolelana na isi tuyobile. Inong’onela kangi muno amasyu ghitu aghakuti “ameni” ghabaghile ukuyila ghakulondiwa.
Tukupilikisya linga yumo ikwiputa. Tukumpala Yehova linga tukwiputa komma pene pa isi tukuyoba loli namuno tukubombela ifindu pa bumi bwitu. Panongwa yakuti tukulonda ukuti tuye bandu banunu linga tukuyoba amasyu aghakuti “ameni” isi sikututula ukuti tuye naminong’ono amanunu kangi nukukindilila ukupilikisya.
Tukuya pampene na bakristu abinitu. Ulwiputo lwa pakilundilo lukututula ukuti tubikeghe amahala pa isi ikipanga kyosa kikupilikisya. (Imb. 1:14; 12:5) Linga tukwamula pampene na bakamu na balumbu bitu, tukukusya ubumobwene bwitu. Kali tukuyoba mwakukwesya pamo mundumbula yitu, amasyu ghitu aghakuti “ameni” ghikumpangisya Yehova ukuti abombepo simo mwakukolelana na isi tukusuma.
Amasyu ghitu aghakuti “ameni” ghikutupangisya ukuti tumpaleghe Yehova
Tukumpala Yehova. Yehova ikumanya syosa isi tukubomba linga tukumwiputa. (Luka 21:2, 3) Umwene ikumanya syosa isi tukulonda kangi na isi sili mundumbula yitu. Nalinga po pakabalilo aka tukupilikisya ingomano pa foni, tubaghile ukuya nulusubilo losa kuti amasyu ghitu aghakwiyisya aghakuti “ameni” Yehova ikughapilika. Linga tukuyoba amasyu aghakuti ameni, tukuya pampene na bandu bosa aba bali pangomano mwakumpala Yehova.
Amasyu ghitu aghakuti “ameni” ghabaghile ukuboneka ukuti ghakaya ghakulondiwa fiyo loli ghakulondiwa fiyo. Ibaibolo limo ilya encyclopedia likuyoba ukuti “ukwendela mu masyu agha,” ababombi ba Kyala babaghile ukunangisya ukuti “bikwitikisya isi siyobiwe kangi nukuya nulusubilo lwa maka mundumbula syabo.” Amasyu ghitu ghosa aghakuti “ameni” ghanhobosyeghe Yehova.—Sal. 19:14.
