1-2. (a) Ngimba Yehova ikuyobesania bulebule na bandu? (b) Ngimba tukuya pakuyobesania isyafiki mu nkhani iyi?

YEHOVA ighanile ukuyobesania nanuswe. Nkabalilo ka kunyuma, umwene abombesyelagha abasololi, abandumi, kangi numwanake Yesu Kristu, ukuti batutule ukumanya ubwighane bwake. (Amosi 3:7; Gal. 3:19; Uba. 1:1) Amasiku agha, umwene ikuyobesania nanuswe ukwendela m’masyu ghake, Ibaibolo. Umwene atupele Ibaibolo ukuti tumanyile aminong’ono ghake kangi nukupilikisya injila syake.

² Pakabalilo aka Yesu ali pa kisu kya pasi, Yehova ayobile amasyu ukufuma kumwanya mfyakubombiwa fitatu. Isagha twinong’onelepo isi Yehova ayobile, ifi tubaghile ukumanyila ukufuma m’masyu ghake kangi namuno tukusayiliwa ukufwana na isi ayobile.

3. Linga tukubelenga pilemba lya Marko 1:9-11, Ngimba Yehova ayobile isyafiki bo Yesu osiwe, kangi ngimba amasyu ghakulondiwa agha Yehova ayobile ghikunangisya isyafiki?

³ Ilemba lya Marko 1:9-11 likuyoba ikyakubombiwa ikyakwanda pakabalilo aka Yehova ayobagha ukufuma kumwanya. (Belenga.) Umwene atile: “Uwe we Mwanangu, unkundwe; Mmyako mo nikyelile.” Amasyu aghakunangisya ulughano aghakufuma kwa Tata wake agha, ghalimpalamasisye fiyo Yesu pandumbula kangi ghalinkasisye fiyo! Amasyu gha Yehova ghanangisye ifundo sitatu isyakulondiwa fiyo isyakufwana na Yesu. Iyakwanda Yesu yo mwanake. Iyabubili, Yehova anganile umwanake. Kangi iyabutatu yo yakuti, Yehova ikwikyela numwanake. Isagha tukete kanunu ifundo yiliyosa.

4. Ngimba bumanyani bununu buliku ubu bwalipo pakati pa Kyala na Yesu bo ikosiwa?

 ⁴ “Uwe we Mwanangu.” Ukufwana na masyu agha, Yehova anangisye ukuti umwanake unkundwe, Yesu ali pabumanyani ubununu fiyo numwene. Pakabalilo aka Yesu ali kumwanya ali yo mbepo umwana wa Kyala. Loli bo ikosiwa, umwene apakiwe na mbepo mwikemo. Pakabalilo aka, Kyala anangisye ukuti Yesu uyu yo mwanake umpakiwa, ali nulusubilo ulwakughomokela kumwanya ukuya Mwalafyale uyu asaliwe na Kyala kangi ukuya Mputi nkulumba. (Luka 1:31-33; Hib. 1:8, 9; 2:17) Yonongwa yake palosyo lwa Yesu Tata wake ali ni kifukwa ikinunu ikya kuyobela ukuti “Uwe uli mwanangu.”—Luka 3:22.

5. Ngimba tubaghile ukukonga bulebule ikifwanikisyo kya Yehova ikya kunangisya ulughano kangi na ifi tukubomba?

⁵ “Uwe yowe . . . nkundwe.” Ikifwanikisyo kya Yehova ikya kunangisya ulughano na isi ikubomba sikutukumbusya isya lusako ulu tulinalo ulwakubakasya abangi. (Yoh 5:20) Tukuhoboka fiyo linga umundu yumo uyu tukumpasikisya ikutunangisya ulughano kangi ikundaghisya pa findu ifinunu ifi tukumbombela. Mwakufwana itolo abakamu na balumbu bitu nkipanga naba mumbumba yitu bikulondiwa ukuti tubanangisyeghe ulughano kangi nukubakasya. Linga tukubandaghisya abangi, tukukasya ulwitiko lwabo nukubatula ukuti bambombeleghe Yehova mwalusubilo. Fiyofiyo abapapi bikulondiwa ukubakasya fiyo abanabo. Linga abapapi bikubandaghisya abanabo mwakufuma pasi pandumbula kangi nukubanangisya ulughano, bikubatula abanabo ukuti bakindilile ukukula mwambepo.

6. Nongwa yafiki tukulondiwa ukuya nulusubilo mwa Yesu Kristu?

⁶ “Mmyako mo nikyelile.’’ Amasyu agha ghikunangisya ukuti Yehova ali nulusubilo ukuti Yesu ayagha pakufwanisya ubwighane bwake.  Yehova ali nulusubilo bo ulu kumwanake, yonongwa yake nanuswe tuli nulusubilo losa ukuti Yesu ikuya pakufwanisya syosa isi Yehova afingile .(2 Kor. 1:20) Linga tukwinong’onela ikifwanikisyo kya Yesu, tukunangisya ukuti tukulonda ukumanya nyingi ukufuma kumyake kangi nukukonga amakato ghake. Yehova ali nulusubilo ukuti ababombi bake bikuya pakukindilila ukumanyila ukufuma ku mwanake.—1 Pet. 2:21.

7. Ukufwana nilemba lya Matai 17:1-5, ngimba po pakyakubombiwa kiliku iki Yehova ayobile amasyu ukufuma kumwanya, kangi ayobile isyafiki?

⁷ Belenga Matai 17:1-5. Akabubili apa Yehova ayobile ukufuma kumwanya pali po pakabalilo aka Yesu “alyandwike.” Yesu alinkolile Peteli, Yakobo na Yonani ukuti baye pampene ukuti abuke nabo kukyamba ikitali. Bo bali kula, abene baketile ikisetuka ikyakuswighisya fiyo. Ikyeni kya Yesu kilinkwanduka kangi imyenda yake yilinkubukuka. Abandu babili aba bimilagha Mose na Eliya, balyandile ukuyoba na Yesu isya bufwe nukusyuka kwake. Nalinga ukuti abafundiwa batatu bala ‘utulo twabatolile,’ pamo ukuti baghonile. Abene bo balembwike balinkuswigha bo bakibwene ikisetuka. (Luka 9:29-32) Ukufuma apo, ilibingu lilinkubakupikila, kangi balinkupilika ilisyu lya Kyala ukufuma mwibingu! Ukufwana na isi syabombiwe pakabalilo aka Yesu osiwagha, Yehova anangisye ukuti ikwikyela numwanake kangi nulughano lwake kumyake mwakuyoba ukuti: ‘Uyu yo Mwanangu, unkundwe, uyu ngwikyela nawe.’ Loli pakabalilo kala Yehova alyongelile ukuti: ‘Mumpilikisyeghe yuyo.’

8. Ngimba ikisetuka kyanangisye isyafiki kwa Yesu na ku bafundiwa bake?

⁸ Ikisetuka kyanangisye ubukulumba na maka gha Yesu ukuya Mwalafyale wa Bunyafyale bwa Kyala. Kisita kukayika, Kristu akasiwe kangi alifimbilisye fiyo ku ndamyo ninifwa iyakubaba. Ikisetuka kyabatulile kangi abafundiwa ukuti bakusye ulwitiko kangi kyabakasisye ukuti basitole ingelo isi bayagha pakwaghana nasyo nukukindilila ukwiyipa pambombo iyi bayagha pakubomba nkyeni. Bo ifyinja 30 fikindilepo, Untumiwa Peteri ayobile isya kisetuka ikyakwanduka, mwakunangisya ukuti akindilile ukukumbukila isya kisetuka.—2 Pet. 1:16-18.

9. Ngimba bulongosi buliku ubwakulondiwa fiyo ubu Yesu abapele abafundiwa bake?

⁹ ‘Mumpilikisyeghe yuyo.’ Yehova anangisye kanunu ukuti tukulondiwa ukupilikila amasyu gha Mwanake nukughakonga. Ngimba Yesu ayobile isyafiki bo ali pa kisu kya pasi? Umwene atile filipo ifindu fingi ifyakulondiwa ifi tukulondiwa ukupilikila! Mwakifwanikisyo, umwene abamanyisye abamanyili bake muno babaghile ukufumukisya amasyu amanunu, kangi umwene ayobile mwakwandisania ukuti bakindilile ukuya maso. (Mat. 24:42; 28:19, 20) Kangi umwene ababulile ukuti bakindilile ukumbombela Yehova, kangi abakasisye ukuti bangalekagha. (Luka 13:24) Yesu abamanyisye abamanyili bake ukuti baghananeghe, bayeghe bamobene, kangi ukuti bapilikileghe ingomelesyo syake. (Yoh. 15:10, 12, 13) Ubulongosi ubu Yesu abapele abafundiwa bake bwali bwakulondiwa fiyo! Ubulongosi ubu bwakulondiwa fiyo amasiku agha ukufuma pakabalilo aka Yesu abapele abafundiwa bake.

10-11. Ngimba tubaghile ukunangisya bulebule ukuti tukupilikisya kwa Yesu?

¹⁰ Yesu atile: ‘Wesa uyu ali pabwanaloli yo ikupilikila ilisyu lyangu.’ (Yoh. 18:37) Tukunangisya ukuti tukupilikila ilisyu lyake linga ‘tukukindilila ukufisanilana ilyoyo kangi nukuhobokelana nindumbula yosa.’ (Kol. 3:13; Luka 17:3, 4) Tukunangisya kangi ukuti tukupilikila ilisyu lyake mwakwiyipa pakufumusya amasyu amanunu “nkabalilo akanunu na kandamyo.”—2 Tim. 4:2.

¹¹ Yesu atile: ‘Ing’osi syangu sikulipilika ilisyu lyangu.” (Yoh. 10:27) Abamanyili ba Kristu batikunangisya ukuti bikupilikila itolo amasyu ghake  loli bikughakonga. Abene “batikwiyaya nifyabumi.’ (Luka 21:34) M’malo mwake, abene bikupilikila indaghilo sya Yesu ukuya syakulondiwa fiyo pabumi bwabo, nalinga po pakabalilo aka baghene nindamyo. Abakamu bitu bingi bikwifimbilisya nindamyo isi bikwaghana nasyo, bo ukususiwa, ubulondo kangi ningozi sya kipeliwa. Pasyosa isi, abene bikukindilila ukuya nulwitiko kwa Yehova kisita kwinong’onela indamyo isi bikwaghana nasyo. Yesu ikubapa abene ulusubilo ulwakuti: ‘Uyu linga alinasyo indaghilo syangu, kangi ikusikonga, yo uyu anganile une; lelo uyu anganile une yope Tata isakunganagha, nanine nisakunganagha kangi nisakwibonesyagha kumyake.’—Yoh 14:21.

12. Ngimba njila yiliku iyingi iyi tubaghile ukunangisyila ukuti tukupilikisya kwa Yesu?

¹² Injila iyingi iyi tubaghile ukunangisyila ukuti tukupilikisya kwa Yesu ko: kukolelana na aba basaliwe ukuti batulongosyeghe. (Hib. 13:7, 17) Igulu lya Yehova lichenjile ifindu fyingi fiyo mfyinja ifi fikindilepo, ukongelapo amabaku agha tukubombesyela imbombo kangi ninjila isi tukubombesyela mubufumusi, imbatiko ya ngomano isya nkati mwasabata, kangi namuno tukuyengela Inyumba syitu isya Bunyafyale. Tukundaghisya fiyo ulughano nubulongosi ubu tukwambilila! Tuli nulusubilo losa ukuti Yehova ikuya pakutusaya panongwa yakwiyipa kwitu mwakukonga ubulongosi ubu tukwambilila ukwendela mu gulu lyake.

13. Ngimba tukusayiwa bulebule linga tukupilikisya kwa Yesu?

¹³ Tukusayiwa fiyo linga tukupilikisya pafindu fyosa ifi Yesu ikutumanyisya. Yesu abasimikisyile abafundiwa bake ukuti isi amanyisyagha syayagha pakubapa ubutusyo. Umwene atile ‘Mwisakubwaghagha ubutusyo bwa myoyo yinu’. ‘Namanga ikogholigholi kyangu kihobofu ghope nuntwalo wangu mpepe.’ (Mat. 11:28-30) Amasyu gha Kyala agha, ghikongelelapo amabuku 4 agha masyu amanunu agha ghikuyoba isya bumi bwa Yesu nubufumusi bwake, ghikutupa ubutusyo, ghikutukasya fiyo mwambepo kangi ghikutupa amahala. (Sal. 19:7; 23:3) Yesu atile: ‘Loli basayiwa ukukinda aba bikulipilika ilisyu lya Kyala nukulisunga!’—Luka 11:28.

14-15. (a) Ngimba kyakubombiwa kiliku ikyabutatu, iki kiyobiwe pilemba lya Yohani 12:27, 28, iki Yehova ayobile ukufuma kumwanya? (b) Nongwa yafiki amasyu gha Yehova ghalinsubisye nukunkasya fiyo Yesu?

¹⁴ Belenga Yohani 12:27, 28. Amasyu amanunu agha mwibuku lya Yohani ghikuyoba isya kyakubombiwa ikyabutatu iki Yehova ayobile ukufuma kumwanya. Bo ghasyele amasiku manandi ukuti afwe, Yesu ali ku Yerusalemu pakusekela  ikyaka kya Pasa. Umwene atile, ‘Umoyo wangu ghulalamwike,’ Kangi aliputile ukuti: ‘We Tata, uyipeghe ubukulumba ingamu yako.’ Popapo alinkupilika ilisyu lya Tata wake ukufuma kumwanya likuti: ‘Njipele ubukulumba, kangi nikwandisyagha ukuyipa ubukulumba.’

¹⁵ Yesu atamiwagha panongwa yabudindo ubunywamu ubu ali nabo ubwakuti akindilile ukuya nulwitiko kwa Yehova. Yesu asimenye ukuti ayagha pakutamiwa nukughoghiwa mwankhaza. (Mat. 26:38) Ukukinda pa fyosa Yesu alondagha ukuyipa ubukulumba ingamu ya Tata wake. Yesu balintungulupile ukuti amunyozagha Kyala kangi umwene apasyagha ukuti inifwa yake yayagha pakupangisya ukuti Kyala anyoziwe. Loli amasyu gha Yehova ghalimpele Yesu ulusubilo! Umwene ali nulusubilo losa ukuti ingamu ya Yehova yayagha pakupeliwa ubukulumba. Amasyu gha Tata wake ghalinsubisye fiyo Yesu kangi ghalinkasisye ukuti afwanisye ubwighane bwa Yehova. Nalinga ukuti Yesu yo ali mundu mwene uyu imilagha kangi uyu apilikisyagha isi Tata wake ayobagha pakabalilo kala, Yehova anangisye ukuti amasyu ghake ghafwanisiwe ku bandu bosa.—Yoh. 12:29, 30.

16. Nongwa yafiki utubalilo tumo tubaghile ukupasya ukuti tukuya pakupangisya ukuti ingamu ya Kyala yinyoziwe?

¹⁶ Ukufwana na Yesu, nanuswe tubaghile ukupasya ukuti lumo tukuya pakunyoza ingamu ya Yehova. Lumo mwakufwana itolo na Yesu, nanuswe abandu bamo babaghile ukutubombela ifindu munjila iyi yikaya yabwanaloli. Pamo tubaghile ukusofaniwa ninkhani syabutungulu  isi aba bikutususya bikuyoba isyakufwana nanuswe. Tubaghile ukwinong’ona ukuti inkhani isi sikupangisya ukuti ingamu ya Yehova ni gulu lyake fikunyoziwa. Linga isi sibombiwe, amasyu gha Yehova ghabaghile ukutusubisya fiyo. Kangi tutikulondiwa ukutamiwa naminong’ono. Tubaghile ukuya nulusubilo losa ukuti ‘ulutengano lwa Kyala ulu lughakindile ghosa amahala lo lukusyubatilagha indumbula syitu ninyinong’ono syitu mwa Kristu Yesu.’ (Fil. 4:6, 7) Yehova akabaghila ukutoliwa ukuyipa ubukulumba ingamu yake. Ukwendela mu Bunyafyale bwake, umwene isakutendekesya ifindu fyosa ifi Setano onangile kangi ikisu iki kikwisa kuya nababombi bake abasubiliwa .—Sal. 94:22, 23; Yes. 65:17.

17. Ukufwana nilemba lya Yesaya 30:21, ngimba Yehova ikuyoba bulebule nanuswe amasiku agha?

¹⁷ Yehova akali ikuyoba nanuswe amasiku agha. (Belenga Yesaya 30:21.) Bwanaloli ukuti, tutikupilika ukuti Kyala ikuyoba nanuswe ukufuma kumwanya. Loli umwene, atupele amasyu ghake, agha ghalembiwe mu Baibolo, muno ikutupa ubulongosi bwake. Mwakongelelapo, mbepo mwikemo wa Yehova ghukuntula ‘untumwa unsubiliwa nu wamahala’ ukuti abapeghe ababombi bake ifyakulya ifyamwambepo. (Luka 12:42) Tukwambilila ifyakulya fingi ifyamwambepo, bo ifi fikwaghiwa pa intaneti, amavidiyo, ifyakupilikisya na mabuku ghitu!

18. Ngimba amasyu gha Yehova ghikuyenga bulebule ulwitiko lwitu nukutukasya?

¹⁸ Isagha tukindilile ukukumbukila amasyu agha Yehova ayobile bo Umwanake ali pa kisu kyapasi! Amasyu gha Kyala, agha ghayobiwe mu Baibolo, ghikutupa ulusubilo ulwakuti Yehova ali namaka ghosa kangi umwene isakutendekesya ifindu fyosa ifi Setano onangile ni kisu kyake ikibibi. Kangi isagha tukindilile ukunangisya ukuti tukupilikisya amasyu gha Yehova nindumbula yosa. Linga tukukindilila ukupilikisya amasyu gha Yehova, tukuya pakwifimbilisya ku ndamyo isi tukwaghana nasyo lino na syosa isi tukuya pakwaghana nasyo nkyeni. Ibaibolo likutukumbusya ukuti: ‘Tuyeghe nubufisalyoyo, ukuti bo tubombile ubwighane bwa Kyala, twisetwambilileghe isi afingile.’—Hib. 10:36.