1-2. Ukufwana na isi sili pa Imbombo Sya Batumiwa 8:27-31, 35-38, ngimba findu fiki ifi fyalimpangisye Umwitiopia umfule ukuti osiwe?

NGIMBA mukulonda ukosiwa nukuya yumo wa bafundiwa ba Kristu? Ulughano nukundaghisya fibatulile abandu bingi ukuti bosiwe. Inong’onela isya kifwanikisyo kya mundu yumo uyu ambombelagha mwalafyale unkikulu wa ku Etiopia.

² Umundu wa ku Etiopia uyu alyosiwe mwanakalinga bo amanyile amasyu gha Kyala. (Belenga Imbombo Sya Batumiwa 8:27-31, 35-38.) Ngimba findu fiki ifi fyalimpangisye? Umwene andaghisisye amasyu gha Kyala; abalengagha ibuku lya Yesaya bo atughele pigeleti lyake. Kangi bo Filipi ayobile nawe, umundu uyu alyandile ukundaghisya fiyo isi Yesu alimbombile. Loli nongwa yafiki umundu uyu abukile ku Yerusalemu? Panongwa yakuti umwene ali nulughano kwa Yehova. Ngimba tukumanya bulebule? Umwene abaghile ukuti amwiputagha Yehova ku Yerusalemu. Unnyambala uyu alekile itchalichi ili iputagha pabwandilo nukwanda ukwiputa nabandu aba bambombelagha Kyala. Ulughano lwake kwa Yehova lo lwalimpangisye ukuti achenje, mwakosiwa nukuya mfundiwa wa Kristu.​—Mat. 28:19.

3. Ngimba findu fiki ifi fibaghile ukuntolesya umundu ukosiwa? (Keta Ibokosi ilyakuti “ Ngimba Ubundu Bwinu Bwa Nkati Buli Bulebule?”)

³ Ulughano lwinu kwa Yehova lubaghile ukubapangisya ukuti mosiwe. Loli ubogha bubaghile ukubapangisya ukuti mutoliwe ukosiwa. Bulebule? Inong’onela ififwanikisyo fimo ifi. Mubaghile ukuyighana fiyo imbumba na bamanyani aba bakaya Baketi ba Yehova kangi mubaghile ukwanda ukupasya ukuti linga mosiwe, bikuya pakubabenga. (Mat. 10:37) Lumo  mwighanile ukubomba ifindu fimo ifi Kyala afibengile, kangi kubaghile ukuya kukafu kumyinu ukuti mufileke. (Sal. 97:10) Kangi lumo mukulile mumbumba iyi yikuhoboka nukukonga inyiho isi sitikukolelana nubwighane bwa Kyala. Lumo mubaghile ukuti mwahobokagha fiyo ukubomba nabo inyiho isi kunyuma. Isi sibaghile ukubapangisya ukuti kuye kukafu kumyinu ukuleka ukubomba nabo inyiho isi sitikunhobosya Yehova. (1 Kor. 10:20, 21) Mukulondiwa ukwilalusya ukuti, “Ngimba yonani uyu nunganile fiyo?”

4. Ngimba kindu kiliku ikyakulondiwa fiyo iki kibaghile ukubapangisya ukuti mosiwe?

⁴ Muli nififukwa fingi ifyakunangisya ulughano nukundaghisya. Mwakifwanikisyo, bo mukali ukwanda ukumanyila Ibaibolo na Baketi ba Yehova, lumo mwalighindikagha fiyo Ibaibolo. Kangi lumo mwalinganile fiyo Yesu. Panongwa yakuti mumanyile isyakufwana na Baketi ba Yehova, lumo mukuhoboka fiyo ukubungana nabo. Loli isi sitikuya pakubapangisya ukuti mwiyipe kwa Yehova nukosiwa. Ikindu kyakulondiwa fiyo iki kibaghile ukubapangisya ukuti mosiwe, lo lughano lwinu ulu mukunangisya kwa Yehova. Linga munganile Yehova ukukinda ikindu kilikyosa, mutikuya pakwitikisya ikindu kimo ukuti kibatolesye ukumbombela umwene. Ulughano lwinu kwa Yehova lukuya pakubapangisya ukuti mosiwe kangi lukuya pakubatula ukuti mukindilile ukuya nulwitiko kumyake linga mosiwe.

5. Ngimba malalusyo ghaliku agha tukuya pakuyobesania?

⁵ Yesu atile, unganeghe Yehova nindumbula yako yosa, numoyo wako ghosa namaka ghako ghosa. (Mar. 12:30) Ngimba mubaghile ukungana bulebule Yehova ukufumila pasi pandumbula? Linga tukwinong’onela isya muno Yehova atughanile, sikuya pakututula ukuti nanuswe tunganeghe fiyo. (1 Yoh. 4:19) Ngimba findu fiki fikuya pakubombiwa linga mukukusya ulughano? *

6. Ukufwana na Baroma 1:20, ngimba njila yiliku iyi tubaghile ukumanyila nyingi isya Yehova?

⁶ Mumanyileghe ukwendela nkipeliwa kyake. (Belenga Baroma 1:20; Ubuset. 4:11) Inong’onela isya finyamana kangi nifyakumela ifi Yehova apelile namuno fikunangisyila ukuti wamahala fiyo. Inong’onela muno Yehova apelile umbili witu munjila yakuswighisya. (Sal. 139:14) Kangi inong’onela isya maka gha isuba nubwingi bwa ndondwa * isi apelile. (Yes. 40:26) Linga mukwinong’onela isya kipeliwa kya Yehova, mukuya pakukindilila ukungindika fiyo. Loli, ukumanya ukuti Yehova wamahala kangi wa maka ko kwene kubaghile ukubatula ukuti muye nawe pabumanyani. Ukuti muye nulughano lwamaka kwa Yehova, mukulondiwa ukumanya nyingi isyakufwana numwene.

7. Ngimba mukulondiwa ukusubila isyafiki ukuti munganeghe fiyo Yehova?

⁷ Mukulondiwa ukumanya ukuti Yehova abaghanile fiyo. Ngimba mukuketa ukuti kukafu ukusubila ukuti Umpeli witu abamenye kangi ikubapasikisya? Linga mo siyilile, mukumbukeghe ukuti Yehova “akaya pabutali pali yumoyumo mmyitu.” (Imbo. 17:26-28) Umwene “ikwenesya mundumbula syitu syosa,” kangi ikufinga bo muno Davidi alimbulile Solomoni ukuti, “linga kundonda umwene po wisa kumwagha.” (1 Syambu. 28:9) Bwanaloli, ukuti ikifukwa iki lino mukumanyila Ibaibolo kyo kyakuti Yehova ikuti, “mbaghanile  umwe nulughano lwangu.” (Yere. 31:3) Linga mukukindilila ukumanya nyingi isi Yehova ababombile, mukuya pakuya nulughano lwamaka kumyake.

8. Ngimba mubaghile ukundaghisya bulebule ulughano lwa Yehova?

⁸ Injila yimo iyi mubaghile ukunangisya ulughano kwa Yehova ko kuyobesania nawe ndwiputo. Ulughano lwinu kwa Kyala lukuya pakukula linga mukumbula isya mundumbula yinu nukunndaghisya pa isi ikubabombela. Kangi ubumanyani bwinu na Yehova bukuya pakuya bwamaka bo mukuketa muno ikwamulila inyiputo syinu. (Sal. 116:1) Mukuya pakusubila ukuti umwene ikubapilikisya. Loli ukuti muye pabumanyani na Yehova mukulondiwa ukumanya isi ikulonda. Kangi mukulondiwa ukumanya isi umwene ikulonda kumyinu. Injila yene iyi mubaghile ukumanya isi umwene ikwikyela nasyo ko kumanyila amasyu ghake.

9. Ngimba mubaghile ukunangisya bulebule ukuti mukundaghisya amasyu gha Kyala?

⁹ Mundaghisyeghe amasyu gha Kyala. Ibaibolo lyene lyo lili nubwanaloli ubwakuyoba isya Yehova nubwighane bwake. Mukunangisya ukuti mukundaghisya amasyu gha Kyala mwakubelenga ilisiku lililyosa, mwakwitendekesya ukumanyila kwa pamwibene nukukonga isi mukumanyila. (Sal. 119:97, 99; Yoh. 17:17) Ngimba muli nimbatiko iyakubelenga Ibaibolo? Ngimba mukubelenga Ibaibolo isiku lililyosa?

10. Ngimba kindu kiliku iki kikunangisya ukuti Ibaibolo buku lya padela fiyo?

¹⁰ Ibaibolo likuyoba isi Yesu abombagha isi abandu basiketagha. Ili lyo buku lyene ili likulingania kanunu isi Yesu ababombile. Linga mukumanyila isi Yesu ayobagha nukubomba mukuya pakuya pabumanyani nawe.

11. Ngimba findu fiki fibaghile ukubatula ukuti munganeghe Yehova?

¹¹ Munganeghe Yesu kangi ulughano lwinu kwa Yehova lukuya pakukula. Nongwa yafiki? Panongwa yakuti Yesu akongagha utuyilo utununu utwa Tata wake. (Yoh. 14:9) Yonongwa yake linga mukumanyila nyingi isya Yesu, mukuya pakummanya nukunndaghisya  Yehova. Inong’onela ikisa iki Yesu anangisyagha ku bandu aba babonekagha ukuya bapasi, abalondo, ababine na bonywa. Inong’onela kangi isya bulongosi ubwakulondiwa fiyo ubu ikubapa namuno mukuchenjela pabumi bwinu linga mukumpilikila.​—Mat. 5:1-11; 7:24-27.

12. Linga mukumanyila isya Yesu, ngimba mukuya pakubomba isyafiki?

¹² Ulughano lwinu kwa Yesu lukuya pakuya lwamaka linga mukwinong’onela isya ikemo ili abikile ukuti ubutulanongwa bwinu buhobokeliwe. (Mat. 20:28) Linga musimenye ukuti Yesu abafwilile, sibaghile ukubapangisya ukulapa nukusuma ukuti Yehova abahobokele. (Imbo. 3:19, 20; 1 Yoh 1:9) Linga mukukindilila ukungana Yesu na Yehova, mukuya pakukolelana nabandu bingi aba bope bikunangisya ulughano bo ulu.

13. Ngimba Yehova abapele findu fiki?

¹³ Mubaghaneghe bosa aba banganile Yehova. Imbumba yinu iyi yikaya ya Baketi na bamanyani binu bakabaghila ukumanya inongwa iyi mukulonda ukwiyipa kwa Yehova. Abene babaghile ukubasusya. Yehova ikuya pakubatula mwakubapa imbumba ya mwambepo. Linga mukuya pabupipi nimbumba iyi, mukuya pakulwagha ulughano nubutuli ubu mukulondiwa. (Mar. 10:29, 30; Hib. 10:24, 25) Linga akabalilo kakindilepo, aba mumbumba yinu bope babaghile ukwanda ukumbombela Yehova nukukonga ifundo syake.​—1 Pet. 2:12.

14. Ukufwana na 1 Yohani 5:3, ngimba musyaghile isyafiki isyakufwana nubulongosi bwa Yehova?

¹⁴ Mundaghisyeghe nukukonga ifundo sya Yehova. Bo mukali ukummanya Yehova, mwasalagha mwibene ukubomba ifindu ifinunu na ifi fikaya finunu, loli lino mukuketa ukuti ifundo sya Yehova syakulondiwa fiyo. (Sal. 1:1-3; Belenga 1 Yohani 5:3.) Inong’onela isya bulongosi ubwa mu Baibolo ubwakuyoba isya banyambala, abakikulu na bana. (Ef. 5:22–6:4) Linga mukukonga ubulongosi ubu, ngimba mukuketa ukuti abandu ba mumbumba yinu balusekelo? Linga mukupilikila ubulongosi bwa Yehova ubwakufwana namuno mubaghile ukusalila abamanyani abanunu, ngimba mukuchenja utuyilo twinu? Ngimba uli mundu walusekelo? (Mbu. 13:20; 1 Kor. 15:33) Ansala wa malalusyo agha yo wakuti ena.

15. Ngimba mubaghile ukubomba isyafiki ukuti mukongeghe ifundo sya mu Baibolo?

¹⁵ Utubalilo tumo, mubaghile ukuketa ukuti kukafu fiyo ukumanya muno mubaghile ukukongela ifundo sya mu Baibolo isi mukumanyila. Yonongwa yake Yehova ikubombela igulu lyake ukubapa amabuku aghakulingania isya mu Baibolo agha ghabaghile ukubatula ukupaghula ifindu ifinunu nifibibi. (Hib. 5:13, 14) Linga mukubelenga nukumanyila ifindu ifi, mukuya pakuketa ukuti fyakulondiwa fiyo kangi mukuya pakukindilila ukuya mugulu lya Yehova.

16. Ngimba Yehova abakwabile bulebule abandu bake?

¹⁶ Munangisyeghe ulughano nukulitula igulu lya Yehova. Yehova abakwabile abandu bake nkipanga. Kangi Umwanake Yesu yo mutu wa bosa. (Ef. 1:22; 5:23) Yesu asaliwe ukuti yo alongosyeghe akagulu ka banyambala abapakiwa pambombo iyi ikulonda ukuti yibombiweghe amasiku agha. Yesu atile akagulu aka ka ‘mbombi unsubiliwa nuwa mahala,” kangi ubudindo bwabo ko kubatula ukuti muye pabumanyani na Kyala nukubafighilila mwambepo. (Mat. 24:45-47) Injila yimo iyi umbombi unsubiliwa ikubombela ukuti abafighilile ko kusala abakulumba ba kipanga ukuti babalongosyeghe. (Yes. 32:1, 2; Hib. 13:17; 1 Pet. 5:2, 3) Abakulumba ba kipanga bikubomba syosa isi babaghile ukufwanisya ukuti babasubisye  nukubatula ukuseghelela kwa Yehova. Loli ikindu kyakulondiwa fiyo iki babaghile ukubomba ko kubatula ukuti mubamanyisyeghe abangi isyakufwana na Yehova.​—Ef. 4:11-13.

17. Ukufwana na Baroma 10:10, 13, 14, nongwa yafiki tukubafumukisya abangi isya Yehova?

¹⁷ Mubatuleghe abangi ukungana Yehova. Yesu ababulile abamanyili bake ukuti babamanyisyeghe abangi isya Yehova. (Mat. 28:19, 20) Tukulondiwa ukupilikila ululaghilo ulu panongwa yakuti tusimenye ukuti syo isi tukulondiwa ukubomba. Loli linga ulughano lwinu kwa Yehova lukukula, mukuya pakwipilika mwakufwana itolo namuno untumiwa Peteri na Yohani balipilikile, aba batile: ‘Tukabaghila ukuleka ukusiyoba isi tusibwene nisi tusipilike.’ (Imbo. 4:20) Tukuya pakuya balusekelo fiyo linga tukuntula yumo ukummanya Yehova. Inong’onela muno Filipi alipilikile apa alintulile umundu wa ku Etiopia ukumanya ubwanaloli ubwa mu malemba nukosiwa! Linga mukunkonga Filipi nukupilikila ululaghilo lwa Yesu ulwakufumusya mukuya pakunangisya ukuti mukulonda ukuya yumo wa Baketi ba Yehova. (Belenga Baroma 10:10, 13, 14.) Ukufuma apo, mukuya pakwilalusya ilalusyo ilyakufwana itolo namuno umundu wa ku Etiopia ayobile ukuti: “Fiki fikunganisya ukosiwa?”​—Imbo. 8:36.

18. Ngimba tukuya pakuyobesania isyafiki mu nkhani iyakukongapo?

¹⁸ Mukuya pakusala ikindu ikyakulondiwa fiyo pabumi bwinu linga musalile ukosiwa. Panongwa yakuti isi musalile syakulondiwa fiyo, mukulondiwa ukwinong’onelapo fiyo isi sikusanusya. Ngimba mukulondiwa ukumanya isyafiki isyakufwana nukosiwa? Ngimba mukulondiwa ukubomba isyafiki bo mukali kangi linga mosiwe? Amalalusyo agha ghikuya pakwamuliwa mu nkhani iyakukongapo.