Jack na Marie-Line babombelagha pampene ububombeli bwa kabalilo kosa ukwanda mu 1988. Abene balyaghene nindamyo nyingi kangi babombile ububombeli bwakukindanakindana ku Guadeloupe na ku French Guiana. Ofesi ya ku France yo yikuketesya amalo ghosa mabili agha. Isagha tundalusye Jack na Marie-Line amalalusyo manandi itolo.

Nongwa yafiki mwalyandile ububombeli bwa kabalilo kosa?

Marie-Line: Bo ndi nkeke nakulile ku Guadeloupe, utubalilo twingi nafumusyagha pampene na mama wangu, uyu ali Nketi wakwiyipa fiyo. MbaghaniIe abandu, yonongwa yake bo m’malile isukulu mu 1985, nalyandile ubupayiniya.

Jack: Bo ndi nkeke, nikalagha pabupipi nabandu aba bali mububombeli bwa kabalilo kosa aba balighanile ukufumusya. Nabombagha ubupayiniya bwa kabalilo linga ndi pa holide. Kubumalilo bwa sabata utubalilo tumo twendagha mu galimoto na bapayiniya ukuti tukafumusye ku kighaba kyabo. Twafumwisye ilisiku lyosa kangi twabukile ku malo aghakwangala (beach). Akabalilo aka kali kakuhobosya fiyo!

Bo akabalilo kakindilepo panandi bo tweghene na Marie-Line mu 1988, nayobile ukuti, ‛Tuli babuke, nongwa yafiki tukutoliwa ukubomba nyingi mubufumusi?’ Nalyandile ukubomba ubupayiniya na Marie-Line. Ikyinja kyakindilepo, bo tufumile ku sukulu ya bapayiniya, batutumile ukuti tukande ubupayiniya bwapadela. Twahobokagha fiyo nububombeli ubwakukindanakindana ku Guadeloupe bo bakatubula ukuti tubuke ku French Guiana.

Mwambilile ububombeli bwakukindanakindana kwa fyinja fingi. Ngimba findu fiki fibatulile ukuti mumalane nindamyo isi mwaghanagha nasyo?

Marie-Line: Abakamu ba ku Ofesi ya ku French Guiana basimenye ukuti tulighanile ilemba lya Yesaya 6:8. Yonongwa yake linga batwimbile ifoni, abene utubalilo twingi batulalusyagha ukuti, “Ngimba mukukumbukila ivesi ili mulighanile?” Twasyaghenie ukuti abene basanusyagha ukuti tukuya pakwambilila ububombeli ubupya. Kangi uswe twatighi, “Ututume uswe! Tubukeghe!!”

Tutikukindanisya ububombeli ubupya nububombeli ubu twabombagha kunyuma panongwa yakuti  tutikuya pakuhoboka nububombeli ubupya. Kangi tukughelaghela ukuya pabumanyani na bakamu na balumbu mububombeli bwitu ubupya.

Jack: Akabalilo kakunyuma abakamu na balumbu bamo, baghelagha ukuti batuwisye amaka panongwa yakuti balondagha ukuti tuyeghe nabo pabupipi. Loli bo tusokileko ku Guadeloupe, unkamu yumo atukumbwisye amasyu gha Yesu agha ghali pa Matai 13:38 agha ghikuti: “Ungunda kyo kisu.” Yonongwa yake bo tuchenjile ububombeli, twakumbukilagha ukuti tukukindilila ukubomba mububombeli kisita kwinong’onela kuno tukwikala. Ikyakulondiwa fiyo kyo kighaba nabandu!

Linga tufikile ku kighaba ikipya, twaketagha ukuti abandu bamo bikwikala mwalusekelo. Yonongwa yake nanuswe twaghelagha ukwikala muno abandu aba bikalilagha. Ifyakulya fibaghile ukukindana, loli tukulya ifi bikulya kangi tukunwa ifi bikunwa, ukuti tuye nu bumi ubununu. Tukubikako fiyo indumbula ukuyoba ubununu bwa bubombeli bulibosa.

Marie-Line: Tukumanyilako nyingi fiyo ukufuma ku bakamu na balumbu. Ngukumbukila ikindu kimo iki kyabombiwe bo mfikile ku French Guiana. Ifula yatimagha fiyo, yonongwa yake twalinong’wine ukuti ifula yileke tasi bo tukali ukubuka mubufumusi. Loli umulumbu yumo alindalusisye ukuti, “Ngimba witendekisye ukubuka mubufumusi?” Naswighile, nukumwamula ukuti, “Bulebule?” Umwene atile, “Egha ambulela kangi tukuya pakwenda pa njinga.” Umu mo namanyilile muno nabaghile ukukolela ambulela nukwendesya injinga pakabalilo kamokene. Linga ngamanyile, ngayagha pakufwanisya ukufumusya pakabalilo ka fula!

Ububombeli bwinu buchenjile amabulendo 15. Ngimba mubaghile ukutubulako simo isyakufwana nukuchenja uku?

Marie-Line: Ukusama kubaghile ukuya kukafu fiyo. Loli kwakulondiwa fiyo ukughagha amalo agha mubaghile ukwipilika kanunu linga mufumile mubufumusi.

Jack: Utubalilo twingi napentagha munyumba yitu. Abakamu na balumbu pa ofesi aba bamanyagha ukuti tutikuya pakwikala akabalilo akatali, batighi, “Jack, ungitamyagha ukupenta inyumba iyi!”

Marie-Line amenye fiyo ukubika katundu pa malo ghake! Umwene abikagha fyosa mmabokosi kangi alembangapo ukuti “ifya ku bafa,” “ifya ku kipinda,” “ifya ku khitchini,” nifindu ifingi. Yonongwa yake bo tufikile kunyumba imbya, kwali kupepe fiyo ukubika amabokosi kuno ghikulondiwa. Umwene  alembagha ifya nkati mu bokosi ukuti kuyeghe kupepe ukuti tufyaghe ifi tulonda.

Marie-Line: Panongwa yakuti twamanyile muno tubaghile ukukolelana, kwatutulile fiyo ukuti twande ubupayiniya mwanakalinga.

Ngimba mukupanga bulebule imbatiko yinu ukuti ‘mumalisye ububombeli bwinu’?—2 Tim. 4:5.

Marie-Line: Utubalilo twingi pa Mande tukutusya nukwitendekesya ingomano. Ukwanda pa Kibili tukubuka mubufumusi.

Jack: Nalinga ukuti tukumalila akabalilo kingi mubufumusi umwesi ghulighosa, loli tutikubikapo amahala pa isi. Ukufumusya kyo kindu kyakulondiwa fiyo pabumi bwitu. Linga tubukile mubufumusi twafwanisyagha ukuyoba numundu aliwesa uyu twaghene nawe.

Marie-Line: Linga tukubuka ku malo ghakutusya, akabalilo kosa napimbagha amathilakiti. Abandu bamo bisagha pakutusuma amabuku, nalinga ukuti tukababulilemo ukuti tuli Baketi ba Yehova. Panongwa ya isi, twalondiwagha ukuya maso namuno twafwalilagha nakayilo kitu. Abandu baketagha isi.

Jack: Mwakubabombela ifindu ifinunu nukubanangisya ikisa abapalamani bitu syanangisyagha ukuti tuli naloli Baketi ba Yehova. Neghagha amapepala, nukwakutagha ifindu ifinyali nukupyaghila imindu palubingilo. Abapalamani bitu baketagha isi twabombagha kangi utubalilo tumo batulalusyagha ukuti, “Ngimba mubaghile ukumbapo Ibaibolo?”

Utubalilo twingi mwafumusyagha ifighaba fyakubutali. Ngimba mukukumbukila ifindu fimo ifyapadela mu mabulendo ghinu?

Jack: Ku Guiana, ifighaba fimo kukafu ukufikako. Utubalilo twingi twalondiwagha ukwenda amamayilo 370 (600 km) kwa sabata yumoywene mu misebo imibibi. Ubulendo ubwakubuka ku St. Élie, ku matengele gha Amazon, tutisakwibwa. Twendagha amaawala mingi ukuti tukafike ukwenda pa galimoto na pa boti. Abandu bingi aba bikalagha ku malo agha bakumbagha golide. Ukuti batundaghisye panongwa ya mabuku agha twabapele, bamo batupeleko yumo mwa golide ukuya kyabupe! Namayolo, twabanangisye ghamo mwa mavidiyo gha gulu litu. Abandu bingi baketelile.

Marie-Line: Bo akabalilo kakindilepo panandi, Jack asumiwe ukuti ayobe inkhani iyakukumbukila inifwa ya Yesu ku Camopi. Ukuti tukafike ku malo agha, twalyendile amaawala 4 ukwenda pa boti mu lusoko lwa Oyapock. Isi syali syakuhobosya fiyo.

Jack: Panongwa yakuti amisi ghali manandi ndusoko, amalo ghakusuluka ghali ghakutilisya fiyo. Ukuyoba ubwanaloli syali syakuhobosya fiyo ukuketa amalo agha. Uwakwendesya iboti alondiwagha ukumanya isi ikubomba. Loli bwali bulendo bwakuhobosya fiyo. Nalinga ukuti kwali abakamu na balumbu 6, loli abandu abakufwana 50 balisile pakukumbukila inifwa ya Yesu, ukongelelapo abandu ba ku Amerindia!

Marie-Line: Abakilumyana bope babaghile ukukyagha ikindu kyakuhobosya fiyo linga bikubomba nyingi pakumbombela Yehova. Mukulondiwa ukunsubila fiyo Yehova mfyakubombiwa ifi ukuti muye nulwitiko ulwamaka. Utubalilo twingi tukuketa muno Yehova ikututulila.

Mumanyile injobelo nyingi. Ngimba kupepe kumyinu ukumanyila injobelo?

Jack: Hayi. Namanyile injobelo isi panongwa yakuti nalondagha ukuti mfwanisye ukufumusya nukutula nkipanga. Nalongosyagha ikimanyilo kya Ingasya ya Ndindilili mu njobelo ya Sranantongo * bo bakali ukumbapo ikighaba kyakubelenga Ibaibolo! Nalindalusisye unkamu yumo muno nabombile. Umwene atile, “Utubalilo tumo tukakupilikisyagha, loli syali kanunu fiyo.” Abana bandulagha fiyo. Linga nsobile, bambulagha, loli abakusi bakambulagha. Namanyile nyingi fiyo ukufuma ku bana.

Marie-Line: Nkighaba kimo, nali na bamanyili ba Baibolo aba bayobagha injobelo ya French, Portuguese, na Sranantongo. Umulumbu asakisye ukuti nande ukumanyila nabandu aba bayobagha injobelo iyi ngayimenye kanunu, ukufuma apo mmanyileghe Ibaibolo nabandu aba bayobagha injobelo iyi nayimenye. Mwanakalinga nakongile ubulongosi ubwa mahala ubu.

 Isiku limo, namanyilagha Ibaibolo nummanyili munjobelo iya Sranantongo ukufuma apo munjobelo iya Portuguese. Bo nandile ukumanyila numundu uwabubili, umulumbu atile, “Marie-Line, ngwinong’ona ukuti pali indamyo yimo!” Nasyaghenie ukuti nayobagha nunkikulu wa ku Brazil munjobelo ya Sranantongo m’malo mwakuyoba iki Portuguese!

Mughaniwe fiyo na aba mwabombagha nabo pampene. Ngimba mwafwanisye bulebule ukuti muye pabumanyani na bakamu na balumbu?

Jack: Isya Mbupingamu 11:25 likuti: “Umundu umpi yo ikwendelela ukuya nkabi.” Tutikukabila ukubatula abangi. Akabalilo aka twatendekesyagha Inyumba ya Bunyafyale abakamu bamo balimbulile ukuti: “Isi syo isi abafumusi bikulondiwa ukubomba.” Loli natile: “Ndagha, nanine ndi mfumusi. Yonongwa yake linga imbombo yilipo, nanine ngulondiwa ukubomba nabo.” Nalinga ukuti utubalilo tumo tuli nifyakubomba fyitu, loli tukukumbukila ukuti tubabombeleghe abangi ifindu ifinunu.

Marie-Line: Tukughelaghela ukubika ifyakulonda ifya bakamu na balumbu pamalo aghakwanda. Munjila iyi, tukumanya linga abene bikulonda yumo ukuti babapweleleleghe abanabo pamo ukubegha kusukulu. Ukufuma apo tukughelaghela munjila yiliyosa ukuti tubatule. Panongwa ya isi, tukuya pabumanyani bwamaka fiyo nabangi, kangi tukuya bakwitendekesya ukubatula linga bikulonda ubutuli.

Ngimba musayiwe bulebule panongwa yakufumusya kuno kukulondiwa ubutuli?

Jack: Panongwa yakuti tuli mububombeli bwa kabalilo kosa tusayiwe fiyo. Utubalilo twingi tukuhoboka nikipeliwa kya Yehova. Nalinga ukuti twaghanagha nindamyo, tuli nulutengano ulwamundumbula panongwa yakuti tuli nubutuli ubwakufuma ku babombi ba Kyala.

Bo ndi ndumyana, napinyiwe mu jele ku French Guiana panongwa ya lwitiko lwangu. Ngalinong’winepo ukuti nikuya pakusoka ilisiku limolyene nukuya m’mishonale nukufwanisya ukubafumukisyila aba bapinyiwe mu jele. Naloli, Yehova ansayile fiyo!

Marie-Line: Ndinulusekelo panongwa yakuti nabatulagha abangi. Tuli nulusekelo fiyo panongwa yakumbombela Yehova. Kangi bututulile ukuti tughananeghe fiyo. Utubalilo tumo, Jack ayikolelagha imbumba iyi yalondiwagha ubutuli ukuti tusalye pampene ifyakulya. Utubalilo twingi natighi, “Nakolelanagha nasyo!” Utubalilo twingi twinong’onagha isyakufwana itolo.

Jack: Bo akabalilo kakindilepo panandi, balinyaghile na kansa. Nalinga ukuti Marie-Line akalondagha ukupilika isi, bo nguyoba ukuti: “Nganiwa wangu, linga nguya pakufwa kilabo, nguya pakufwa ‘bo ngali ukukangala.’ Loli linga nguya pakufwa, nsimenye ukuti ndi nu bumi ubununu ubwa mwambepo.”​—Bwa. 25:8.

Marie-Line: Yehova atupele ububombeli ubwakukindanakindana nukututula ukuti tubombe ifindu ifi tukaghulilagha pabumi bwitu. Tuli nu bumi ubununu fiyo. Tuli nulusubilo losa mwa Kyala, ukuti kulikosa kuno igulu lyake libaghile ukututuma twitendekisye ukubuka!