1. Ngimba ndamyo siliku isi ababombi ba Yehova bikwaghana nasyo?

NGIMBA mukwaghana nindamyo inywamu? Lumo yumo nkipanga ababombile ifindu ifibibi. (Yak. 3:2) Pamo aba mukubomba nabo imbombo pamo mukumanyila nabo isukulu bikubaseka panongwa yakuti mukumbombela Yehova. (1 Pet. 4:3, 4) Pamo aba mumbumba yinu bikubakanisya ukubuka kungomano pamo ukufumusya. (Mat. 10:35, 36) Linga mwaghene nindamyo bo isi, mubaghile ukuwa amaka. Loli mubaghile ukuya nulusubilo ukuti nalinga mwaghane nindamyo, Yehova ikuya pakubapa amahala namaka ukuti mwifimbilisye.

2. Ukufwana na Baroma 15:4, ngimba ukubelenga Ibaibolo kubaghile ukututula bulebule?

² M’masyu ghake, Yehova alembilemo ififwanikisyo ifi fikunangisya muno abandu abasitabugholofu bikwifimbilisyila kundamyo. Nongwa yafiki? Ukuti tumanyileko. Isi syo Yehova alinkasisye untumiwa Pauli ukuti alembe. (Belenga Baroma 15:4.) Linga tukubelenga inkhani isi, sibaghile ukutukasya nukutupa ulusubilo. Loli tukulondiwa ukubomba nyingi ukukinda itolo ukubelenga Ibaibolo. Tukulondiwa ukwitikisya ifundo sya mu Baibolo, ukuchenja muno tukwinong’onela kangi ifundo syake situfikeghe pandumbula. Ngimba tukulondiwa ukubomba isyafiki linga tukulonda ubulongosi ubwa muno tubaghile ukulimbana nindamyo? Tukulondiwa ukukonga injila 4 isi: (1) Twiputeghe, (2) Tukumbukileghe, (3) Twinong’oneleghe kangi (4) Tukongeghe isi tukumanyila. Isagha tukete muno tubaghile ukukongela injila isi. * Ukufuma apo, tukuya pakubombela injila isi pakumanyila ifindu ifi alyaghene nafyo Umwalafyale Davidi nuntumiwa Pauli.

3. Bo mukali ukwanda ukumanyila Ibaibolo, ngimba mukulondiwa ukubomba isyafiki kangi nongwa yafiki?

 ³ (1) Twiputeghe. Bo mukali ukwanda ukumanyila Ibaibolo, munsumeghe Yehova ukuti abatule ukuketa muno mubaghile ukutuliwa na isi mukubelenga. Mwakifwanikisyo, linga mukulonda ubulongosi ubwa muno mubaghile ukwifimbilisyila kundamyo munsumeghe Yehova ukuti abatule ukuti musyaghe ifundo M’masyu ghake isi sibaghile ukubatula.—Filip. 4:6, 7; Yak. 1:5.

4. Ngimba findu fiki fibaghile ukubatula ukuketa ukuti inkhani sya mu Baibolo syabombiwe naloli?

⁴ (2) Tukumbukileghe. Yehova atupele uluso ulwakuti tukumbukileghe ifindu. Ukuti tukumbukileghe inkhani sya mu Baibolo, twinong’oneleghe isi sikubombiwa kangi tufwaneghe twalipo. Mugheleghe ukuketa ifindu bo muno umundu uyu ikuyobiwa mu Baibolo aketelagha nukwipilika bo muno ipilikilagha.

5. Ngimba ukwinong’onelapo ko kuti fiki kangi mubaghile ukubomba bulebule?

⁵ (3) Twinong’oneleghe. Ukwinong’onelapo kukusanusya ukwinong’onela mwakufwasa isi mukubelenga namuno ifundo syake sibaghile ukubatulila pabumi bwinu. Isi sikuya pakubatula ukuti mupilikisyeghe kanunu isi mukubelenga. Ukuti mwinong’oneleghe, mukulondiwa ukwilalusya nukwamula amalalusyo agha: ‘Ngimba umundu uyu ikuyobiwa mu nkhani iyi abombile isyafiki ukuti alimbane nindamyo? Ngimba Yehova alintulile bulebule? Ngimba mbaghile ukubombela bulebule isi mmanyile ukuti sindule ukwifimbilisya kundamyo?’

6. Nongwa yafiki tukulondiwa ukukonga isi tukumanyila?

⁶ (4) Tukongeghe isi tukumanyila. Yesu atile linga tutikukonga isi tukumanyila, tubaghile ukufwana itolo numundu uyu ikuyenga inyumba yake pa nsanga. Umwene ikwiyula fiyo loli ikutagha itolo amaka ghake. Nongwa yafiki? Panongwa yakuti linga imibelo nisoko sitekile nukwitagha pa nyumba yake, yibaghile ukuwa. (Mat. 7:24-27) Mwakufwana itolo, linga tukwiputa, tukukumbukila nukwinong’onelapo isi tukumanyila loli tutikusikonga, tubaghile ukutagha itolo amaka ghitu. Linga twaghene nindamyo pamo tukufwimiwa ulwitiko lwitu lukabaghila ukuya lwamaka. Loli linga tukubelenga nukukonga isi tukumanyila, tukusala kanunu ifyakubomba, tukuya nulutengano ulwa mundumbula kangi tukukasya ulwitiko lwitu. (Yes. 48:17, 18) Mwakubombela ifindu 4 ifi tuyobesenie, isagha tukete isi tubaghile ukumanyilako ku isi alyaghene nasyo Umwalafyale Davidi.

7. Ngimba nkhani yiliku iya mu Baibolo iyi tukuya pakuyobesania lino?

⁷ Ngimba ummanyani pamo uwa mumbumba yinu ababombilemo ifindu ifibibi? Linga mo siyilile, mukuya pakukasiwa fiyo ni nkhani ya Abisalomu umwana wa Mwalafyale Davidi, uyu alimbombile ifindu ifibibi tata wake kangi alondagha ukunyaka ubunyafyale bwa tata wake Davidi.—2 Samu. 15:5-14, 31; 18:6-14.

8. Ngimba mukulondiwa ukubomba isyafiki ukuti Yehova abatule?

⁸ (1) Twiputeghe. Linga mukwinong’onela inkhani yimo, mumbuleghe Yehova muno mukwipilikila na isi abangi bikubabombela. (Sal. 6:6-9) Ukufuma apo, munsumeghe Yehova ukuti abatule ukusyagha ifundo isi sibaghile ukubatula ukuti mwifimbilisye kundamyo.

9. Ngimba mubaghile ukuyoba isyafiki pankhani ya Davidi na Abisalomu?

⁹ (2) Tukumbukileghe. Inong’onela ifyakubombiwa ifya mu nkhani iyi, nukuketa muno syalimpalamasyile Umwalafyale Davidi. Abisalomu umwana wa Davidi abombile kwa fyinja fingi ukuti abandu bangane. (2 Samu. 15:7) Bo Abisalomu aketile ukuti akabalilo kafwene, umwene abatumile abalughu nkaya kosa ka Israeli ukuti bakababule abandu ukuti bansale ukuya  ndaghili. Kangi umwene abasumile abamanyani ba Davidi, abalaghili na Ahitofeli ukuti bantule ukusambukila. Abisalomu alipele mwene ubunyafyale kangi alondagha ukunkola Davidi ukuti angoghe, uyu pakabalilo aka abinile fiyo. (Sal. 41:1-9) Davidi asyaghenie isi Abisalomu alondagha ukumbombela yonongwa yake abopile ku Yerusalemu. Bo akabalilo kakindilepo, abalwabwite ba Abisalomu balwile ubwite na balwabwite ba Davidi. Abakususya aba batoliwe kangi Abisalomu umwana wa Davidi aghoghiwe.

10. Ngimba Umwalafyale Davidi ayagha pakubomba isyafiki?

¹⁰ Inong’onela muno Davidi alipilikile na isi alyaghene nasyo. Umwene alinganile Abisalomu kangi ansubilagha fiyo Ahitofeli. Loli bosa balimbombile ifindu ifibibi. Abene balimpangisye Davidi ukuti ipilikeghe ifyakubaba mundumbula yake kangi alondagha nukwighogha. Davidi abaghile ukuleka ukubasubila abamanyani bake abangi mwakwinong’ona ukuti bope bayagha pakukolelana na Abisalomu. Abaghile ukwanda ukwiyinong’onela mwene nukubuka ku malo aghangi. Pamo abaghile ukuwa amaka. Loli Davidi akabombile isi. M’malo mwake alifimbilisye kundamyo isi. Nongwa yafiki afwanisye ukubomba isi?

11. Ngimba Davidi abombile bulebule ifindu pakabalilo aka alyaghene ni ndamyo?

¹¹ (3) Twinong’oneleghe. Ngimba tubaghile ukumanyilako isyafiki ku kyakubombiwa iki? Mwilalusye ukuti, “Ngimba Davidi abombile isyafiki ukuti itule?” Umwene akasalile mwanakalinga ifindu kisita kwinong’onelapo. Kangi akapasyagha ukuti akabaghile ukusala kanunu ifyakubomba. Mmalo mwake umwene aliputile kwa Yehova ukuti antule. Kangi asumile ubutuli ku mmanyani wake. Mwanakalinga umwene abombile isi asalile ukubomba. Nalinga syalimbabile loli akalekile ukubasubila abangi kangi akabakalalile. Akindilile ukunsubila Yehova nabamanyani bake.

12. Ngimba Yehova alintulile bulebule Davidi?

¹² Ngimba Yehova alintulile bulebule Davidi? Linga mukufufuza mukuya pakuketa ukuti Yehova alimpele amaka Davidi ukuti ifimbilisye kundamyo iyi. (Sal. 3:1-8) Yehova alinsayile pa isi asalile ukubomba. Kangi abatumile abamanyani bake abasubiliwa ukuti bamfighilile Davidi umwalafyale wabo.

13. Ngimba mubaghile ukunkonga bulebule Davidi linga umundu yumo abakalalisye? (Matai 18:15-17)

¹³ (4) Tukongeghe isi tukumanyila. Mwilalusye ukuti, ‘Ngimba mbaghile ukunkonga bulebule Davidi?’ Mukulondiwa ukubombapo simo mwanakalinga ukuti mwifimbilisye kundamyo. Ukufwana namuno ifindu fiyilile, mukulondiwa ukubombela ubulongosi bwa Yesu ubu bukwaghiwa pilemba lya Matai chaputala 18. (Belenga Matai 18:15-17.) Loli mutikulondiwa ukusala ifyakubomba bo mukalele. Mwiputeghe kwa Yehova ukuti abatule ukuya bololo kangi ukuti mubombeghe ifindu mwamahala ukuti mulimbane nindamyo iyi mwaghene nayo. Mungalekagha ukubasubila abamanyani binu. Mmalo mwake mwambilileghe ubutuli ubu bikubapa. (Mbu. 17:17) Kangi ikindu ikyakulondiwa fiyo mukongeghe ubulongosi ubu Yehova ikubapa ukwendela M’masyu ghake.—Mbu. 3:5, 6.

14. Ngimba mo mfyakubombiwa filiku ifi ilemba lya 2 Timoti 1:12-16; 4:6-11, 17-22 libaghile ukutukasya?

¹⁴ Ngimba aba mumbumba yinu bikubasusya panongwa yakuti muli Baketi ba Yehova? Pamo ngimba mukwikala nkisu iki imbombo ya babombi ba Yehova yikukanisiwa? Linga momuno siyilile mubaghile ukukasiwa fiyo mwakubelenga 2 Timoti 1:12-16 na 4:6-11, 17-22. * Pauli alembile amavesi agha pakabalilo aka ali mujele.

15. Ngimba mukulondiwa ukusuma isyafiki kwa Yehova?

 ¹⁵ (1) Twiputeghe. Bo mukali ukwanda ukubelenga inkhani isi, mumbuleghe Yehova indamyo isi mukwaghana nasyo namuno mukwipilikila. Muyobeghe ubwanaloli. Ukufuma apo, munsumeghe Yehova ukuti abatule ukusyagha ifundo isyakufwana nindamyo isi Pauli alyaghene nasyo. Isi sikuya pakubatula ukumanya muno mubaghile ukubombela linga mwaghene nindamyo.

16. Ngimba findu fiki fyabombiwe kwa Pauli?

¹⁶ (2) Tukumbukileghe. Amwinong’onele muno Pauli ipilikilagha. Apinyiwe mujele ku Roma. Umwene apinyiwepo kunyuma loli pakabalilo aka aketagha ukuti ikuya pakughoghiwa. Abamanyani bake bamo balimbopile isi syalimpangisye ukuwa amaka.—2 Tim. 1:15.

17. Ngimba Pauli ayagha pakubomba isyafiki?

¹⁷ Pauli abaghile ukwanda ukwinong’onela ifindu ifya kunyuma, mwakwinong’ona ukuti linga akali Nkristu wakwiyipa, ngali akapinyiwa. Umwene ayagha pakukalala na isi abanyambala ba nkaya ka Asia balindekile kangi abaghile ukuleka ukubasubila abamanyani bake abangi. Loli Pauli akabombile isi. Nongwa yafiki akindilile ukuya nulusubilo?

18. Ngimba Pauli abombile isyafiki nindamyo isi aghanagha nasyo?

¹⁸ (3) Twinong’oneleghe. Amwamule ilalusyo ilyakuti, “Ngimba findu fiki fyalintulile Pauli?” Nalinga ukuti asimenye ukuti ikuya pakufwa, umwene inong’onelagha ikindu ikyakulondiwa fiyo uku ko kumpa ulughindiko Yehova. Kangi akindilile ukwinong’onela muno abaghile ukubakasyila abangi. Umwene ansubilagha Yehova mwakwiputa akabalilo kosa. (2 Tim. 1:3) M’malo mwakwinong’onela isya bandu aba balindekile, umwene akindilile ukundaghisya ubutuli ubwakufuma ku bamanyani bake aba bankasyagha nukuntula. Mwakongelelapo, Pauli akindilile ukumanyila Amasyu gha Kyala. (2 Tim. 3:16, 17; 4:13) Ukukinda fyosa, ali nulusubilo losa ukuti Yehova na Yesu banganile fiyo. Abene bakalindekile kangi balinsayile panongwa yakuya nsubiliwa pabubombeli bwake.

19. Ngimba Yehova alintulile bulebule Pauli?

¹⁹ Yehova alinsokile Pauli ukuti ikulondiwa ukwifimbilisya kundamyo panongwa yakuti ali Nkristu. (Imbo. 21:11-13) Ngimba Yehova alintulile bulebule Pauli? Umwene alyamwile inyiputo syake kangi utubalilo twingi ampagha amaka. (2 Tim. 4:17) Pauli ali nulusubilo losa ukuti ikuya pakwambilila ikyabupe panongwa yakwiyipa kwake. Kangi Yehova abombile abamanyani abasubiliwa ba Pauli ukuti bampe ubutuli.

20. Ukufwana na Baroma 8:38, 39 ngimba tubaghile ukunkonga bulebule Pauli?

²⁰ (4) Tukongeghe isi tukumanyila. Amwilalusye ukuti, ‘Ngimba mbaghile ukunkonga bulebule Pauli?’ Mwakufwana itolo na Pauli, tukulondiwa ukughulila ukuti nanuswe tukuya pakufwimiwa panongwa ya lwitiko lwitu. (Mar. 10:29, 30) Ukuti tukindilile ukuya basubiliwa kwa Yehova linga twaghene nindamyo, tukulondiwa ukukindilila ukwiputa kumyake nukumanyila Amasyu ghake akabalilo kosa. Kangi ikindu ikyakulondiwa fiyo iki tukulondiwa ukukumbuka kyo kyakuti tumpeghe ulughindiko Yehova. Tubaghile ukuya nulusubilo losa ukuti Yehova akabaghila ukutuleka kangi ukuti kikayapo nakimo iki kibaghile ukuntolesya ukutunangisya ulughano.—Belenga Baroma 8:38, 39; Hib. 13:5, 6.

21. Ngimba findu fiki fyalintulile Aya na Hector ukwifimbilisya kundamyo isi baghanagha nasyo?

²¹ Ififwanikisyo fya mu Baibolo fibaghile ukututula ukuya bamaka linga tukwifimbilisya kundamyo. Mwakifwanikisyo, Aya umpayiniya wa ku Japan, ikuti inkhani ya Yona yalintulile  ukuti aleke ukuya nubogha pakufumusya pabwelu. Hector uwakilumyana wa ku Indonesia uyu abapapi bake batikumbombela Yehova, atile ikifwanikisyo kya Ruti kikuntula ukumanya nyingi isyakufwana na Yehova nukuti ambombeleghe.

22. Ngimba mubaghile ukutuliwa bulebule linga mukuketelela amavidiyo gha mu Baibolo pamo inkhani isi sikuya pa mutu uwakuti “Yezgani Chipulikano Chawo”?

²² Ngimba mubaghile ukufyagha kughu ififwanikisyo fya mu Baibolo ifi fibaghile ukubakasya? Amavidiyo agha tukuketelela na gha tukupilikisya kangi ni nkhani isi sikuya pa mutu uwakuti, “Yezgani Chipulikano Chawo” fikututula ukuti tumanye muno tubaghile ukubombela ifindu pabumi bwitu. * Bo mukali ukwanda ukuketelela, mupilikisyeghe pamo mubelengeghe inkhani isi mufufuzile kangi munsumeghe Yehova ukuti abatule ukusyagha ifundo isyakulondiwa isi mubaghile ukusikonga. Muketeghe ukuti nanumwe muli pamalo agha ifindu ifi fyabombiwagha. Mukongeghe isi ababombi abasubiliwa ba Yehova aba babombagha kangi namuno abatulile ukwifimbilisya kundamyo. Ukufuma apo mukongeghe isi mumanyile linga mwaghene nindamyo. Mundaghisyeghe Yehova panongwa yabutuli ubu ikubapa. Kangi mundaghisyeghe panongwa yabutuli ubu mwakubatula nukubakasya abangi.

23. Ukufwana na Yesaya 41:10, 13, ngimba Yehova afingile ukuti ikuya pakutubombela isyafiki?

²³ Kukafu fiyo ukwikala nkisu iki kikulaghiliwa na Setano kangi utubalilo tumo tutikumanya ifyakubomba. (2 Tim. 3:1) Loli tutikulondiwa ukupasya pamo ukutila. Yehova asimenye indamyo isi tukwaghana nasyo. Linga tukulonda ubutuli, umwene afingile ukuti ikuya pakutukola mwamaka nikiboko kyake ikililo. (Belenga Yesaya 41:10, 13.) Tuli nulusubilo losa ukuti Yehova ikuya pakututula kangi tubaghile ukukaba amaka ukwendela M’malemba ukuti twifimbilisye kundamyo yiliyosa.