1. Nongwa yafiki Yesu alinsumile Yehova ukuti abubatile ku mbibi abafundiwa bake?

IKILO ikyakuti kilabo ikuya pakufwa, Yesu inong’onelagha isya ndamyo isi abafundiwa bake bayagha pakwaghana nasyo. Panongwa yakuti abaghanile abafundiwa bake, Yesu alinsumile Tata wake ukuti “abubatile ku mbibi.” (Yoh. 17:14, 15) Yesu asimenye ukuti linga aghomokile kumwanya, Setano Umohesi ikuya pakukindilila ukulimbana na aliwesa uyu ikulonda ukumbombela Yehova. Yonongwa yake ababombi ba Yehova bikulondiwa ukufighililiwa.

2. Ngimba tubaghile ukusubila bulebule ukuti Yehova ikuya pakwamula inyiputo syitu?

² Yehova alyamwile ulwiputo lwa Yesu panongwa ya lughano lwake ku Mwanake. Linga tukughelaghela ukunhobosya Yehova, nanuswe ikuya pakutughana kangi ikuya pakwamula inyiputo syitu nukutufighilila. Panongwa yakuti ikutwinong’onela, Yehova ikuya pakukindilila ukutupwelelela mwalughano twe banake. Linga akabomba isi atikuya pakuyighindika ingamu yake.

3. Nongwa yafiki amasiku agha tukulondiwa ukuti Yehova atufighilileghe?

³ Lino tukulonda ukuti Yehova atufighilileghe ukukinda kunyuma. Setano balinkaghile kumwanya, yonongwa yake “ali ningalalisi si nyingi.” (Ubuset. 12:12) Umwene ikubapangisya abandu ukwinong’ona ukuti linga bikutufwima kokuti “bikumbombela akabombo Kyala.” (Yoh. 16:2) Abangi aba batikusubila mwa Kyala, bikutufwima panongwa yakuti tukindene ifyakubomba na bandu ba nkisu. Muli mosa muno abandu babaghile ukubombela pakutufwima loli tutikutila. Nongwa yafiki? Panongwa yakuti Amasyu gha Kyala ghikuti: “Umwene loli Yehova yo nsubiliwa, yo isakubakasyagha nukububatila kumbibi.” (2 Tes. 3:3)  Ngimba Yehova ikutufighilila bulebule? Tukuya pakuyobesania ifindu fibili ifi Yehova atupele.

4. Ukufwana na Baefesi 6:13-17, ngimba Yehova atupele ifindu fiki ukuti fitufighilile?

⁴ Yehova atupele ifilwilo fyosa ifi fibaghile ukutufighilila kwa Setano. (Belenga Baefesi 6:13-17.) Ifilwilo ifya kufuma kwa Kyala ifi fyamaka kangi fikubomba kanunu imbombo. Loli fibaghile ukutufighilila pene linga tukubombela kanunu ikilwilo kilikyosa. Ngimba ikilwilo kilikyosa kikwimila ifindu fiki? Isagha tukete ikilwilo kilikyosa pa kyene.

5. Ngimba lamba wabwanaloli findu fiki kangi nongwa yafiki tukulondiwa ukufwala?

⁵ Lamba ikwimila ubwanaloli ubu bukwaghiwa M’masyu gha Kyala, Ibaibolo. Nongwa yafiki tukulondiwa ukufwala lamba uyu? Panongwa yakuti Setano yo “wise wa butungulu.” (Yoh. 8:44) Umwene alyandile ukuyoba ubutungulu ukufuma kunyuma kangi “ikukisyoba ikisu kyosa.” (Ubuset. 12:9) Loli ubwanaloli bwa mu Baibolo bukutufighilila ukuti tungasyobiwagha. Nongwa yafiki tukulondiwa ukufwala lamba wabwanaloli uyu? Tukubomba isi mwakumanyila ubwanaloli ubwakuyoba isya Yehova, mwakwiputa kumyake “mwa mbepo na mbwanaloli,” kangi nukubomba ifindu mbusubiliwa.—Yoh. 4:24; Ef. 4:25; Hib. 13:18.

6. Ngimba ikyela kya bugholofu ikya pakipambagha findu fiki kangi nongwa yafiki tukulondiwa ukufwala?

⁶ Ikyela kya bugholofu ikya pakipambagha kikwimila ifundo sya Yehova isyabugholofu. Nongwa yafiki tukulondiwa ukufwala ikyela ikya pakipambagha? Mwakufwana itolo namuno ikyela ikya pakipambagha kikufighililila indumbula ya nsilikali ukuti yingalasiwagha, ikyela kya bugholofu kikufighilila indumbula yitu iyankati ukuti yingasofanisiwagha nifindu fya nkisu. (Mbu. 4:23) Yehova ikughulila ukuti tukuya pakunnangisya ulughano nukumbombela nindumbula yitu yosa. (Mat. 22:36, 37) Loli Setano ikughelaghela ukututolesya ukuti tuleke ukumbombela Yehova nindumbula yitu yosa mwakutupangisya ukuti tukongeghe ifindu ifi fili nkisu kyake ifi Yehova afibengile. (Yak. 4:4; 1 Yoh. 2:15, 16) Linga atoliwe ukubomba isi, Setano ikuya pakughelaghela ukutupangisya ukuti tubombe ifindu ifi fitikunhobosya Yehova.

7. Ngimba tubaghile ukufwala bulebule ikyela kya bugholofu ikya pakipambagha?

⁷ Tukufwala ikyela kya bugholofu ikya pakipambagha mwakupilikila ifundo sya Yehova isya bugholofu isi sikuyoba isya nunu nimbibi kangi mwakukonga ifundo isi. (Sal. 97:10) Bamo babaghile ukwinong’ona ukuti ifundo sya Yehova sikutupoka ubwabuke. Loli linga tulekile ukukonga ifundo sya mu Baibolo pabumi bwitu, tubaghile ukufwana itolo nunsilikali uyu ikusosya ikyela ikya pakipambagha linga bikulwa ubwite panongwa yakwinong’ona ukuti kisito fiyo. Ukubomba isi bubaghile ukuya bukonyofu. Linga tunganile Yehova, indaghilo syake, “syo sikaya sito,” loli sikupoka ubumi.—1 Yoh. 5:3.

8. Ngimba ukufumusya amasyu amanunu agha lutengano uku kuli bo filato fya mmalundi kukusanusya isyafiki

⁸ Pauli atukasisye kangi ukuti ukufumusya amasyu amanunu agha lutengano ko kuyeghe bo fifilato fya mmalundi. Isi sikusanusya ukuti utubalilo tosa tukulondiwa ukufumusya amasyu amanunu agha Bunyafyale. Linga tukubabula abangi amasyu gha mu Baibolo, ulwitiko lwitu lukuya lwamaka. Tukukasiwa fiyo linga tukuketa muno ababombi ba Yehova pa kisu kyosa bikubombela ulusako ulu bali nalo ukuti bafumusyeghe kulikosa kuno baliko. Mwakifwanikisyo, abene bikufumusya ku mbombo pamo kusukulu, ku nyumba ni nyumba, ku malo gha bizinesi, linga babukile ukwakubaketa abakamu babo aba bakaya Baketi pamo linga bikuyobesania na bandu aba bakabamanya. Linga tulekile ukufumusya panongwa ya bogha, tubaghile ukufwana itolo nunsilikali uyu ikufula ifilato fyake  pakabalilo ka bwite; umwene abaghile ukufulala ku malundi. Ifyakukongapo fyake, akabaghila ukwifighilila ku balughu kangi akabaghila ukufwanisya ukukonga indaghilo sya ndongosi wake.

9. Nongwa yafiki tukulondiwa ukupimba ingulu ya lwitiko

⁹ Ingulu ya lwitiko yikwimila ulwitiko ulu tuli nalo mwa Yehova. Tukusubila ukuti umwene ikuya pakufwanisya syosa isi afingile. Ulwitiko ulu lukuya pakututula “ukusimikisyamo yosa imitipulo ya moto wa mbibi.” Nongwa yafiki tukulondiwa ukupimba ingulu iyi? Panongwa yakuti yikutufighilila ukuti tungasyobiwagha nifimanyisyo fyabutungulu ifya bakususya kangi tutikuwa amaka linga abandu bandile ukutususya pa isi tukusubila. Kisita kuya nulwitiko, tukabaghila ukuya namaka aghakukana linga abangi bikughela ukutufimbilisya ukuti tungapilikilagha ifundo sya Yehova. Akabalilo kosa linga tukukana ukubomba ikindu iki Yehova akibengile linga tuli kumbombo pamo kusukulu, ulwitiko lwitu lukutufighilila. (1 Pet. 3:15) Linga akabalilo kosa tukukana imbombo iya ndalama nyingi iyi yibaghile ukutupangisya ukuti tutoliweghe ukumbombela Yehova, ulwitiko lwitu lukutufighilila. (Hib. 13:5, 6) Linga akabalilo kosa tukumbombela Yehova nalinga ukuti tukususiwa, ulwitiko lwitu lukutufighilila.—1 Tes. 2:2.

10. Ngimba ikitili kya bupoki findu fiki kangi nongwa yafiki tukulondiwa ukufwala?

 ¹⁰ Ikitili kya bupoki lusubilo ulu Yehova atupele ulu lukuya pakutupoka ku bufwe nukubasaya bosa aba bikubomba ubwighane bwake. (1 Tes. 5:8; 1 Tim. 4:10; Titi 1:1, 2) Mwakufwana itolo namuno ikitili kikufighililila untu wa nsilikali, ulusubilo lwa bupoki lukufighilila aminong’ono ghitu. Mu njila yiliku? Ulusubilo ulu lukututula ukuti tukindilileghe ukwinong’onela isi Kyala afingile nukuti tungawagha amaka linga twaghene nindamyo. Ngimba tukufwala bulebule ikitili iki? Tukubomba isi linga isi tukwinong’ona sikukolelana naminong’ono gha Kyala. Mwakifwanikisyo, tukubika ulwitiko lwitu mwa Kyala komma pa kyuma iki kikumalika.—Sal. 26:2; 104:34; 1 Tim. 6:17.

11. Ngimba ulubo lwa mbepo findu fiki kangi nongwa yafiki tukulondiwa ukughabombela?

¹¹ Ulubo lwa mbepo Masyu gha Kyala, Ibaibolo. Ulubo luli namaka aghakususya ubutungulu bulibosa nukubabula abandu kufimanyisyo ifyabutungulu nutuyilo utubibi. (2 Kor. 10:4, 5; 2 Tim. 3:16, 17; Hib. 4:12) Tukumanyila ukubombela kanunu ulubo ulu linga tukumanyila patwibene kangi ukwendela mufimanyisyo ifi tukwambilila ukufuma ku gulu lya Kyala. (2 Tim. 2:15) Mwakongelelapo pa filwilo, Yehova ikutupa kangi amaka aghakutufighilila. Ngimba gho ghaliku?

12. Ngimba tukulondiwa kangi ifindu fiki kangi nongwa yafiki?

¹² Unsilikali uyu ali namaluso ikumanya ukuti akabaghila ukulwa mwene nikilundilo kya basilikali; umwene ikulondiwa ubutuli ukufuma ku basilikali abinake. Mwakufwana itolo, tukabaghila ukutola patwibene ukulwa na Setano na bandu bake; tukulondiwa ubutuli ubwakufuma ku bakamu na balumbu. Yehova atupele “abakamu na balumbu” bingi pa kisu kyosa aba babaghile ukututula.—1 Pet. 2:17.

13. Ukufwana na Bahiburi 10:24, 25, ngimba ingomano sikututula bulebule?

¹³ Injila yimo iyi tukwambilila ubutuli ko kufika pangomano syitu. (Belenga Bahiburi 10:24, 25.) Twesa utubalilo tumo tukuwa amaka. Linga isi sibombiwe, ingomano sibaghile ukutukasya fiyo. Tukukasiwa fiyo nifundo isyakufuma pasi pandumbula isi abakamu na balumbu bikwamula pangomano. Inkhani isya mu Baibolo nifyakubombiwa fikutukasya ukuti tukindilileghe ukumbombela Yehova. Kangi tukukasania fiyo linga tukuyobesania bo ingomano sikali na panyuma pangomano. (1 Tes. 5:14) Mwakongelelapo, ingomano syitu sikutupa ulusako ulwakubatula abangi kangi isi sikutupa ulusekelo. (Imbo. 20:35; Rom. 1:11, 12) Ingomano sikututula kangi munjila isingi. Sikututula muno tubaghile ukuyila namaluso pakumanyisya nukufumusya. Mwakifwanikisyo, tukumanyila muno tubaghile ukubombela kanunu amabuku agha tukumanyilila na bandu Ibaibolo. Yonongwa yake mukulondiwa ukwitendekesya kanunu ingomano sya kipanga. Pakabalilo kangomano, mupilikisyeghe kanunu. Linga mughomwikeko kungomano, mukongeghe isi mumanyile. Linga mukubomba syosa isi, mukuya pakuya “undwabwite unnunu wa Kristu Yesu.”—2 Tim. 2:3.

14. Ngimba butuli buliku ubungi ubu tuli nabo?

¹⁴ Tuli nubutuli kangi ubwakufuma ku bandumi bingi abamaka. Inong’onela isi uwandumi yumonywene abaghile ukubomba. (Yes. 37:36) Lino inong’onela isi igulu lya bandumi babaghile ukufwanisya ukubomba. Akayapo umundu pamo imbepo inyali isi sibaghile ukulimbana na basilikali bamaka aba Yehova. Yehova wamaka fiyo. Utubalilo tosa umwene ikuya nanuswe nukutupa amaka ukuti tulimbane na aba bikutususya nalinga ukuti babaghile ukuya bingi. (Balo. 6:16) Tuli nulusubilo losa ukuti isi syabwanaloli. Mwinong’oneleghe abandu aba babaghile ukubatula linga abandu aba mukubomba nabo  imbombo, mukumanyila nabo isukulu pamo abakamu binu aba bakaya Baketi bikubasusya. Mukumbukeghe ukuti mukaya mwibene pabwite ubu. Indaghilo sya Yehova sikuya pakubatula linga mukusikonga.

15. Ukufwana na Yesaya 54:15, 17, nongwa yafiki ababombi ba Yehova bakabaghila ukuleka ukufumusya?

¹⁵ Ikisi iki kikulaghiliwa na Setano kili nififukwa fingi ifyakutubengela. Tukaya kulubafu lulilosa ulwa fya ndyali kangi tutikweghamo ikighaba mufya bwite. Tukufumusya isya ngamu ya Kyala, nisya Ubunyafyale bwake ukuti bo bwene ubu bubaghile ukutwala ulutengano kangi tukupilikila ifundo syake isyabugholofu. Tukubasimikisyila abandu ukuti undaghili wa kisu iki ntungulu kangi ngoghabandu. (Yoh. 8:44) Kangi tukufumusya ukuti ikisu kya Setano kikuya pakupyutiwa mwalululu. Loli Setano na bandu bake batikuya pakututolesya pambombo yitu iyakufumusya. M’malo mwake, tukuya pakukindilila ukumpala Yehova, mwakubombela injila yiliyosa iyi tubaghile ukufwanisya. Nalinga ukuti Setano ali namaka, loli atoliwe ukupangisya ukuti amasyu gha Bunyafyale ghangabafikagha abandu pa kisu kyosa ikyapasi. Isi sikubombiwa panongwa yakuti Yehova ikutufighilila.—Belenga Yesaya 54:15, 17.

16. Ngimba Yehova isakubapoka bulebule ababombi bake pakabalilo kabutolwe ubukulumba?

¹⁶ Ngimba tukughulila isyafiki? Pakabalilo kabutolwe ubukulumba, Yehova ikuya pakutupoka munjila sibili isyakuswighisya. Iyakwanda, umwene ikwisapakubapoka ababombi bake abasubiliwa pakabalilo aka isakupangisya abanyafyale ba nkisu ukunsambukila Babeloni Unkulumba, ikipanga ikyabutungulu. (Ubuset. 17:16-18; 18:2, 4) Ukufuma apo, Yehova isakubapoka ababombi bake linga ikwisapakonanga ikisu kya Setano pa Armagedoni.—Ubuset. 7:9, 10; 16:14, 16.

17. Ngimba tukutuliwa bulebule linga tukukindilila ukuseghelela kwa Yehova?

¹⁷ Linga tukukindilila ukuseghelela kwa Yehova, Setano akabaghila ukubomba kilikyosa iki kibaghile ukutufulasya. Umwene yo ikuya pakupyutiwa kwa bwila na bwila. (Rom. 16:20) Yonongwa yake mukulondiwa ukufwala ifilwilo fyosa nukukindilila ukufibombela. Mungaghelagha ukulwa ubwite na Setano nikisu kyake pamwibene. Mubatuleghe abakamu na balumbu binu. Kangi mukongeghe ubulongosi bwa Yehova. Linga mukubomba isi, mubaghile ukuya nulusubilo losa ukuti Tata winu wakumwanya ikuya pakubapa amaka nukubafighilila.—Yes. 41:10.