1-2. Ngimba findu fiki fikuya pakupangisya ukuti ukwiputa kwitu kuyeghe kwakwitikisiwa na Kyala?

 NGIMBA mukwinong’ona isyafiki linga mupilike amasyu aghakuti “ukwiputa”? Lumo mukwinong’onela isya nkamu uyu agwadile ukuti ipute nukuyobesania na Yehova bo akali ukulambalala. Pamo mubaghile ukwinong’onela isya mbumba iya lusekelo iyi yikuhoboka ukumanyila Ibaibolo.

² Mfyakubombiwa fyosa ifi, bosa bikunangisya ukuti bikwiputa. Ngimba Yehova ikuya pakwitikisya ukwiputa kwabo? Umwene ikuya pakwitikisya linga sikukolelana nubwighane bwake, bali nulughano kangi bikungindika. Tunganile fiyo Yehova. Tusimenye ukuti umwene ikulonda ukuti tumwiputeghe, kangi tukulondiwa ukuti tumwiputeghe mu njila inunu.

3. Ngimba tukuya pakumanyila isyafiki mu nkhani iyi?

³ Mu nkhani iyi, tukuya pakumanyila ukwiputa uku Yehova itikisyagha nkabalilo ka kunyuma kangi tukuya pakuyobesania injila 8 isi Yehova ikulonda ukuti tukongeghe pakumwiputa amasiku agha. Linga tukubomba isi, tukuya pakwinong’onela isya muno tubaghile ukwiputila munjila inunu. Kangi tukuya pakuketa inongwa iyi ukumwiputa Yehova munjila inunu kukutupangisya ukuti tuyeghe balusekelo.

4. Ngimba abandu aba bamwiputagha Yehova nkabalilo ka kunyuma banangisyagha bulebule ulughindiko nulughano kumyake?

⁴ Abanyambala abasubiliwa bo Abeli, Nowa, Abrahamu na Yobu banangisyagha ulughindiko nulughano kwa Yehova. Bulebule? Abene bampilikilagha Kyala, bali nulwitiko kangi biyipagha  kumyake. Ibaibolo litikuyoba isyakufwana na muno biputilagha. Loli babombagha syosa isi babaghile ukufwanisya ukuti bangindikeghe Yehova, kangi umwene itikisyagha ukwiputa kwabo. Ukufuma apo, Yehova abapele Abaisraeli indaghilo ukwendela mwa Mose. Indaghilo isi syongelelangapo nyingi isya muno balondiwagha ukumwiputa Yehova munjila iyi ahobokagha nayo.

5. Ngimba Yehova alondagha ukuti Abakristu babwiputeghe bulebule?

⁵ Bo Yesu afwile nu kusyuka, Yehova akaghulilagha abandu ukuti bapilikileghe indaghilo isi abapele Abaisraeli ukwendela mwa Mose. (Rom. 10:4) Abakristu ba kunyuma balondiwagha ukukonga indaghilo imbya, isi syo “ndaghilo sya Kristu.” (Gal. 6:2) Abene balondiwagha ukukonga “indaghilo” isi, komma ukusungila itolo pandumbula nu kukonga indaghilo nyingi loli balondiwagha ukukonga ikifwanikisyo kya Yesu na isi amanyisyagha. Amasiku agha, Abakristu bope bikughelaghela ukunkonga Kristu ukuti banhobosyeghe Yehova ukuti “babwaghe ubutusyo”.—Mat. 11:29.

6. Ngimba inkhani iyi yikuya pakutukasya bulebule?

⁶ Bo tukuyobesania injila yiliyosa iya kwiputa, amwilalusye ukuti, ‘Ngimba ngubomba bulebule pakighaba iki?’ Mubaghile ukwilalusya kangi ukuti, ‘Ngimba mbaghile ukunangisya bulebule ukuti ngwiputa munjila inunu?’ Mubaghile ukuya balusekelo na isi mukubomba lino, loli mukulondiwa ukunsuma Yehova ukuti abatule muno mubaghile ukubombela kanunu ifindu.

7. Ngimba Yehova ikwipilika bulebule ninyiputo syitu isyakufuma pasi pandumbula?

⁷ Tukumwiputa Yehova linga tukwiputa kumyake. Amalemba ghikufwanikisya inyiputo syitu ni fyakufukisya ifi fitendekesiwe kanunu ifi babikagha pihema ukufuma apo mu tempile. (Sal. 141:2) Ifyakufukisya ifi, fyayagha nuluma ulununu ulu lwanhobosyagha Kyala. Mwakufwana itolo, inyiputo syitu isyakufuma pasi pandumbula ‘sikunkyela’ umwene, nalinga ukuti tukubombela amasyu amapepe. (Mbu. 15:8; Kukumbu. 33:10) Tuli nikifukwa ikinunu ikyakusubila ukuti Yehova ikuhoboka linga ikupilika ukuti tukunangisya ulughano nu kundaghisya kumyake. Umwene ikulonda ukuti tumbuleghe isi tukwiyaya nasyo, ulusubilo lwitu na isi tukulonda. Bo tukali ukwanda ukuyobesania na Yehova ndwiputo, tukulondiwa ukuya maso na isi tukulonda ukuyoba. Linga tukubomba isi, tukuya pakumpa “ifyakufukisya” ifinunu fiyo Tata witu wakumwanya.

8. Ngimba tuli nulusako luliku ulununu ulwa kumpala Kyala?

⁸ Tukumwiputa Yehova linga tukumpala. (Sal. 34:1) Tukumpala Yehova mwakubabula abangi muno tukuyila balusekelo nutuyilo twake utununu ni mbombo syake. Tukuya nififukwa ifinunu ifyakumpala Yehova linga tukundaghisya. Linga tukwinong’onela ifindu ifinunu ifi Yehova ikutubombela, tukuya pakukindilila ukumpala. Imbombo iyakufumusya yikutupa ulusako ‘ulwakumpa Kyala ilikemo lya lutufyo, ili syo seke sya milomo.’ (Hib. 13:15) Mwakufwana itolo na muno tukuyila maso pa isi tukuya pakuyoba bo tukali ukumfika Yehova ndwiputo, tukulondiwa kangi ukwinong’onela kanunu isi tukuya pakuyoba ku bandu aba tukwaghana nabo mubufumusi. Tukulonda ukuti “ilikemo lya lutufyo” litu liyeghe inunu fiyo. Yonongwa yake linga tukubabula abangi ubwanaloli, tukuyoba ukufuma pasi pandumbula.

9. Mwakufwana itolo na Baisraeli, ngimba tukusayiwa bulebule linga tukufika pangomano? Yoba ikifwanikisyo ikya muno ingomano sikubatulila pamwibene.

 ⁹ Tukumwiputa Yehova linga tukufika pangomano. Abaisraeli babuliwe ukuti: “Katatu nkyinja kimokyene, unnyambala wesa iseghe kukwiputa kwa Yehova Kyala winu mbuyo ubu abwimike ukuya bwakwiputilako.” (Kukumbu. 16:16) Abene balondiwagha ukutuleka utwaya twabo ni mighunda yabo kisita mundu wakuyiketesya. Loli Yehova afingile ukuti: “Nayumo atisakubatolagha umwe linga mukwisa katatu pa kyinja kimokyene pakwiputa kumyangu une ne Yehova Kyala winu.” (Kuso. 34:24) Panongwa yakuti Abaisraeli bansubilagha fiyo Yehova, abene babunganagha ikyinja kilikyosa. Kangi basayiwagha munjila nyingi. Mwakifwanikisyo, bamanyilagha nyingi isyakufwana nindaghilo sya Kyala, binong’onelagha isya bununu bwa Yehova kangi bahobokagha ukuya pampene na bandu aba balinganile Yehova. (Kukumbu. 16:15) Mwakufwana itolo, nanuswe tukusayiwa fiyo linga tukubomba syosa isi tubaghile ukufwanisya linga tukubungana. Kangi inong’onela muno Yehova ikuhobokela linga tukwitendekesya ukuti tukamulepo mbupimba kangi mwakukasya pangomano.

10. Nongwa yafiki ukwimba kighaba kyakulondiwa fiyo ikya kwiputa?

¹⁰ Tukumwiputa Yehova linga tukwimba pampene inyimbo. (Sal. 28:7) Abaisraeli baketagha ukuti ukwimba kighaba kyakulondiwa fiyo pakwiputa. Umwalafyale Davidi abasalile Abanyalevi 288 ukuti bimbeghe pa tempile. (1 Syambu. 25:1, 6-8) Amasiku agha, tukunangisya ulughano lwitu kwa Kyala linga tukwimba inyimbo sya kumpala. Tutikulondiwa ukuya namasyu amanunu ukuti tufwanisye ukwimba. Inong’onela isi: Linga tukuyoba, “kabilikabili twesa tukusoba,” loli isi sitikupangisya ukuti tutoliweghe ukumanyisya nkipanga na mubufumusi. (Yak. 3:2) Mwakufwana itolo, tutikulondiwa ukwitikisya muno amasyu ghitu ghayilile ukututolesya ukwimba ukuti tumpaleghe Yehova.

11. Ukufwana na Salimo 48:13, nongwa yafiki tukulondiwa ukuya nakabalilo akakumanyila kwa pa mbumba?

¹¹ Tukumwiputa Yehova linga tukumanyila Amasyu ghake nu kubamanyisya abanitu isyakufwana numwene. Pisiku lya Sabata, Abaisraeli bakabombagha imbombo loli pisiku ili bakasyagha ubumanyani bwabo na Yehova. (Kuso. 31:16, 17) Aba bali basubiliwa babamanyisyagha abanabo isyakufwana na Yehova nu bununu bwake. Nanuswe amasiku agha, tukulondiwa ukuya nakabalilo akakubelenga nu kumanyila Amasyu gha Kyala. Iki kighaba kya kwiputa kwa Yehova kangi sikututula ukuti tusegheleleghe kumyake. (Sal. 73:28) Kangi linga tukumanyila pampene bo mbumba, tukuya pakubatula abanitu ukukusya ubumanyani bwabo na Tata witu wa kumwanya.​—Belenga Salimo 48:13.

12. Ngimba tukumanyilako isyafiki isya muno Yehova abaketelagha aba bapangile ifibombelo fya pihema?

¹² Tukumwiputa Yehova linga tukuyenga nukutendekesya amalo aghakwiputilapo. Ibaibolo likuyoba ukuti, imbombo iyakuyenga ihema nifibombelo fyake yali ‘nsunguliwa.’ (Kuso. 36:1, 4) Amasiku agha, Yehova ikuketa imbombo iyakuyenga Inyumba sya Bunyafyale ni fingi, ukuya kighaba kya kwiputa. Abakamu na balumbu bamo bikwiyipa ukubomba imbombo isi. Tukulondiwa ukubandaghisya fiyo panongwa yakwiyipa ukubomba imbombo ya Bunyafyale iyi. Bwanaloli ukuti bope bikubomba imbombo iyakufumusya. Bamo bikulonda ukuya bapayiniya. Abakulumba bakipanga babaghile ukunangisya ukuti bikutulapo pambombo yakuyenga mwakubitikisya abakamu na balumbu abakwiyipa aba  ukuti baye bapayiniya linga babaghiliwe. Kali tuli namaluso pambombo iyakuyenga pamo hayi, twesa tubaghile ukukindilila ukutendekesya Inyumba sya Bunyafyale ukuti sibonekeghe kanunu.

13. Ngimba tukulondiwa ukuketa bulebule ifyabupe ifi tukubika ukuti tutulepo pambombo ya Bunyafyale?

¹³ Tukumwiputa Yehova linga tukutulapo nifyabupe fyitu pambombo ya Bunyafyale. Abaisraeli balondiwagha ukuya nikyabupe linga bikubuka ukwakumwiputa Yehova. (Kukumbu. 16:16) Abene balondiwagha ukupimba ikyabupe ukufwana na muno ifindu fiyilile pa bumi bwabo. Linga bikubomba isi, banangisyagha ukuti bikundaghisya pa kilikyosa iki Yehova ababombelagha. Ngimba tubaghile ukunangisya bulebule ulughano lwitu kwa Yehova panongwa ya kilikyosa iki ikutubombela? Injila yimo ko kutulapo ni ndalama nkipanga na pa kisu kyosa ukufwana na muno ifindu fiyilile pa bumi bwitu. Untumiwa Pauli atile: “Linga mubikilepo umoyo po Kyala isakufyambilila ifyabupe fyinu ifi mu kumpa, buno umwene atikummelela umundu ifi akaya nafyo.” (2 Kor. 8:4, 12) Yehova ikuhoboka fiyo na kilikyosa iki tubaghile ukumpa, nalinga ukuti kibaghile ukuya kinandi.​—Mar. 12:42-44; 2 Kor. 9:7.

14. Ukufwana na Isya Mbupingamu 19:17, ngimba Yehova ikwipilika bulebule linga tukubatula abakamu na balumbu aba bikulondiwa ubutuli?

¹⁴ Tukumwiputa Yehova linga tukubatula Abakristu abinitu aba bikulondiwa ubutuli. Yehova afingile ukuti ikuya pakubasaya Abaisraeli aba babatulagha abalondo. (Kukumbu. 15:7, 10) Bwanaloli ukuti akabalilo kosa aka tukuntula unkamu pamo umulumbu uyu ikulondiwa ubutuli, Yehova ikuketa ukuya kyabupe kumyake. (Belenga Isya Mbupingamu 19:17.) Mwakifwanikisyo, bo Abakristu ba ku Filipi batumile ikyabupe ku mpinyiwa Pauli, umwene atile, “ilikemo ili libaghile, ili linkyelile Kyala.” (Filip. 4:18) Amwinong’onele isya bakamu na balumbu aba nkipanga kyinu nukwilalusya ukuti, ‘Ngimba alimo yumo uyu mbaghile ukuntula?’ Yehova ikuhoboka fiyo linga ikutuketa ukuti tukubombela akabalilo, amaka, amaluso ni findu fyitu ifyakumbili ukuti tubatule aba bikulondiwa ubutuli. Umwene ikuketa ukuti kighaba kya kwiputa kwitu.—Yak. 1:27.

15. Ukwiputa kwa bwanaloli kukulondiwa akabalilo nukwiyipa, loli nongwa yafiki kukaya kukafu?

¹⁵ Ukwiputa kwa bwanaloli kukulondiwa akabalilo nu kwiyipa. Loli kukaya kukafu. (1 Yoh. 5:3) Nongwa yafiki? Panongwa yakuti tukumwiputa Yehova panongwa yakuti tunganile. Inong’onela isya mwana unnandi uyu ikulonda ukumpa ikindu kimo tata wake. Lumo abaghile ukwegha akabalilo ukuti amjambulile ikithuzi. Umwana uyu akabaghila ukwilumbusya panongwa yakabalilo aka onangile. Umwene anganile tata wake kangi ikuhoboka ukumpa ikyabupe iki. Mwakufwana itolo, panongwa ya lughano lwitu kwa Yehova, tukuhoboka ukubombela akabalilo namaka ghitu pakumwiputa.

16. Ukufwana na Bahiburi 6:10, ngimba Yehova ukwipilika bulebule na isi aliwesa ikubomba?

¹⁶ Abapapi aba bali nulughano batikughulila ikyabupe ikyakufwana itolo ukufuma ku mwana aliwesa. Abene bikumanya ukuti abana bakindene kangi bikwaghana ni findu ifyakukindanakindana pa bumi bwabo. Mwakufwana itolo, Tata witu wakumwanya ikumanya isi aliwesa abaghile ukufwanisya ukubomba. Lumo mubaghile ukubomba nyingi ukukinda abandu aba mubamenye kangi mubaghanile. Pamo mukabaghila ukubomba nyingi ukukinda  abangi, lumo panongwa ya bukangale, ububine nubudindo bwa mumbumba. Mungawagha amaka. (Gal. 6:4) Yehova atikuya pakwibwa isi mukubomba. Linga mukughelaghela ukubomba isi mubaghile ukufwanisya, umwene ikuya pakuhoboka fiyo. (Belenga Bahiburi 6:10.) Yehova ikumanya isi tukulonda ukubomba. Umwene ikulonda ukuti tuhobokeghe nukwikutisiwa na isi tukufwanisya pakumwiputa.

17. (a) Linga tukuketa ukuti ukubomba ifindu fimo pakwiputa kukafu, ngimba tukulondiwa ukubomba isyafiki? (b) Ngimba ifundo isi sili pibokosi ilyakuti “ Mongeleleghe Ulusekelo Lwinu” sibatulile bulebule?

¹⁷ Ngimba tukulondiwa ukubomba isyafiki linga kukafu ukubomba ifindu ifi tuyobesenie, bo ukumanyila Ibaibolo pamo ukufumusya? Linga tukubomba ifindu ifi, utubalilo twingi tukuya pakuhoboka nukusayiwa fiyo. Tubaghile ukufwanikisya ukwiputa ni fyakubomba fimo, bo ukupanga amafizo pamo ukumanyila ukukuba ifyakwimbila. Linga tutikubomba isi akabalilo kosa, tukabaghila ukuya namaluso. Loli ngimba findu fiki fibaghile ukubombiwa linga tukubomba isiku lililyosa? Pakwanda, tubaghile ukubomba kwa kabalilo akapimba loli linga akabalilo kakindilepo tubaghile ukufwanisya ukubomba kwa kabalilo akatali. Linga tukuketa ifyakukongapo fyake ifinunu, tubaghile ukukindilila ukubomba nukwanda ukuhoboka. Isi sifwene itolo na muno tubaghile ukubombela pa nkhani yakwiputa.

18. Ngimba ikindu ikyakulondiwa fiyo iki tukulondiwa ukubomba kyo kiliku, kangi findu fiki fikuya pakubombiwa linga tubombile isi?

¹⁸ Ukumwiputa Yehova munjila inunu kyo kindu kyakulondiwa fiyo. Linga tukubomba isi, tukuya balusekelo, bakwikutisiwa pa bumi kangi tukuya nulusubilo lwa kumwiputa Yehova kwa bwila na bwila. (Mbu. 10:22) Tuli nulutengano ulwa mundumbula panongwa yakuti tumenye ukuti Yehova ikubatula ababombi bake linga baghene nindamyo. (Yes. 41:9, 10) Tuli nififukwa ifinunu ifyakuyila balusekelo linga tukumwiputa Tata witu walughano uyu “ikwambilila ubukulumba nulwimiko” ukufuma kufipeliwa fyake fyosa.​—Ubuset. 4:11.