1. Ngimba abapapi bikubalondela isyafiki abanabo?

 MWE bapapi, tusimenye ukuti mukulonda fiyo ukubatula abaninu ukuti bammanye nukungana Yehova. Loli umwene atikuboneka. Ngimba mubaghile ukubatula bulebule abaninu ukummanya nukuseghelela kumyake?​—Yak. 4:8.

2. Ngimba abapapi babaghile ukubamanyisya bulebule abanabo isya tuyilo twa Yehova?

² Injila inunu iyakubatula abana ukuseghelela kwa Yehova kokumanyila nabo Ibaibolo. (2 Tim. 3:14-17) Loli Ibaibolo likuyoba kangi injila iyingi iyi abakilumyana babaghile ukumanyila isyakufwana na Yehova. Mu buku lya Isya Mbupingamu, tata ikunkumbusya umwanake ukuti aketeghe utuyilo twa Yehova, utu tukuboneka ukwendela nkipeliwa. (Mbu. 3:19-21) Tukuya pakuyobesania injila simo isi abapapi babaghile ukubombela ikipeliwa ukuti babatule abanabo ukumanyila isya tuyilo twa Yehova.

3. Ngimba butuli buliku ubu abapapi babaghile ukubapa abanabo?

³ Ibaibolo likuyoba ukuti “namanga akayilo ka Kyala aka katikuboneka kabonekile pabwelu ntundu utu apelile ukufuma mbwandilo bwa kisu.” (Rom. 1:20) Mwe bapapi, mukuhoboka fiyo ukubuka kumalo ghamo ukwakwangala nabaninu. Mubombeleghe akabalilo aka ukuti mubatule abaninu ukuketa ukukolelana kwa “findu ifi Yehova apelile” nutuyilo twake utununu. Pa  fundo bo iyi, isagha tukete muno abapapi babaghile ukumanyilako ku kifwanikisyo kya Yesu.

4. Ngimba Yesu abombile bulebule ikipeliwa ukubamanyisya abafundiwa bake? (Luka 12:24, 27-30)

⁴ Keta muno Yesu abombelagha ikipeliwa pakumanyisya. Akabalilo kamo, umwene ababulile abafundiwa bake ukuti bakete injuni nubulenge. (Belenga Luka 12:24, 27-30.) Yesu ayagha pakuyoba isya kinyamana kilikyosa pamo ikyakumela, loli ayobile isya njuni niluba ifi abafundiwa bake bafimenye kanunu. Abene babaghile ukuti baketagha injuni namaluba bo ghikubala mungunda. Ngimba mubaghile ukwinong’onela muno Yesu abombile ifindu ifi bo ikufisosola? Kangi ngimba umwene abombile isyafiki bo ayobile ififwanikisyo ifi? Ababulile abafundiwa bake ifundo iyakulondiwa fiyo iyakuyoba isya kisa kya Tata wake wakumwanya: Yehova ikubalyesya nukubafwika ababombi bake abasubiliwa bo muno ikubombela ninjuni namaluba gha mungunda.

5. Ngimba fifwanikisyo filiku ifya nkipeliwa ifi abapapi babaghile ukubombela pakubamanyisya abanabo isya Yehova?

⁵ Mwe bapapi, ngimba mubaghile ukunkonga bulebule Yesu linga mukubamanyisya abaninu? Mubaghile ukubabula abaninu isya kindu kimo ikya nkipeliwa iki mukighanile bo ikinyamana pamo ikyakumela. Linga mukubomba isi, mubalinganieghe isi ifindu ifi fikutumanyisya isyakufwana na Yehova. Lumo mubaghile ukubalalusya isya kinyamana pamo ikyakumela iki bakighanile. Linga mukuyoba isya kindu kimo ikyakuhobosya, umwaninu ikuya pakupilikisya kanunu bo mukummanyisya isya Yehova.

6. Ngimba tubaghile ukumanyilako isyafiki kwa mama wa Christopher?

⁶ Ngimba abapapi bikulondiwa ukuya nakabalilo akanywamu ukuti bafufuze isya kinyamana pamo ikyakumela bo bakali ukuyobesania isi abanabo bikumanyilako kukipeliwa kya Yehova? Hayi. Yesu akalinganiagha ifundo nyingi isya isi injuni sikulya pamo muno amaluba ghikukulila. Nalinga ukuti umwaninu ikuhoboka linga ikumanyila isya findu ifi Yehova apelile, utubalilo tumo mubaghile ukunndalusya pamo ukuyoba ifundo mbupimba ukuti muntule ukupilikisya kanunu isi mukumbula. Keta isi unkamu Christopher ikukumbukila pakabalilo aka ali mwana, umwene atile: “Mama wangu ayobagha ifundo mbupimba ukuti atutule muno tubaghile ukundaghisyila ikipeliwa iki kitusyungutile. Mwakifwanikisyo, linga tuli pabupipi nifyamba, umwene atighi: ‘Keta ubunywamu nubununu bwa fyamba. Ngimba Yehova akaya wakuswighisya?’ Kangi linga tuli pabupipi nasumbi, atighi: ‘Keta muno amayigha ghikwendela namaka. Ngimba Kyala akaya wamaka?’” Christopher atile: “Ifundo isyakukasya isi ayobagha mbupimba syatutulagha ukwinong’onelapo.”

7. Ngimba mubaghile ukubamanyisya bulebule abaninu ukuti binong’oneleghe isyakipeliwa?

⁷ Bo abaninu bikukula, mubaghile ukubamanyisya ukuti binong’oneleghe isyakipeliwa nisya tuyilo twa Yehova. Mubaghile ukuyoba isya kindu kimo iki Yehova apelile nukubalalusya ukuti, “Ngimba isi sikubamanyisya isyafiki isya Yehova?” Mubaghile ukuswigha nukuhoboka linga mupilike aminong’ono gha baninu.—Mat. 21:16.

8. Ngimba lusako luliku ulu abapapi ba ku Israeli bali nalo linga bikwenda munjila?

⁸ Abapapi ba ku Israeli babuliwe ukuti babamanyisyeghe abanabo indaghilo sya Yehova linga bikwenda “panjila.” (Kukumbu. 11:19) Ku Israeli kwali utunjila utu abandu bendangamo utu twali ntwaya. Ifinyamana ifyakukindanakindana, injuni, namaluba fyabonekagha. Linga Abaisraeli bikwenda mutunjila utu,  bayagha nulusako ulwakubabula abanabo isya findu ifi Yehova apelile. Nanumwe mwe bapapi muli nulusako ulwakufwana itolo ulwakubombela ikipeliwa ukuti mubamanyisyeghe abaninu. Keta muno abapapi bamo babombile isi.

9. Ngimba mukumanyilako isyafiki kwa Punitha na Katya?

⁹ Umulumbu uyu ingamu yake yo Punitha, uyu ikwikala mu tawuni inywamu iya ku India, atile: “Linga tubendile aba mumbumba yitu nkaya, tukuketa ukuya lusako ulwakubatula abanitu ukumanyila isyakipeliwa ikinunu ikya Yehova. Nguketa ukuti abanangu bikumanya kanunu isyakufwana nikipeliwa linga babukile ku malo agha abandu bakaya bingi.” Mwe bapapi, abaninu batikuya pakwibwa akabalilo aka mukumalila nabo ukuketa ikipeliwa kya Yehova. Katya, umulumbu wa ku Moldova, atile: “Ikindu ikyakuhobosya fiyo iki ngukumbukila bo ndi mwana ko kabalilo aka namalilagha nabapapi bangu ukwakuketa ikipeliwa. Ngubandaghisya fiyo abapapi bangu panongwa yakummanyisya ifindu ifyakuhobosya ifi Yehova apelile ukwendela nkipeliwa.”

10. Ngimba abapapi babaghile ukubomba isyafiki linga kukafu ukubuka pakuketa ikipeliwa? (Keta ibokosi ilyakuti “ Ifi Fibaghile Ukubatula Abapapi.”)

¹⁰ Bule linga mukabaghila ukufwanisya ukubuka ku malo gha nkaya ukuti mukakete ikipeliwa? Amol, uyu yope ikwikala ku India, atile: “Kuno ngwikala, abapapi bikulondiwa ukubomba kwa maawala mingi kangi ukubuka ku malo agha nkaya kubaghile ukonanga indalama nyingi fiyo. Loli mubaghile ukuketa ikipeliwa kya Yehova nutuyilo twake bo muli papaki pamo panyumba isi mubaghile ukufwanisya ukuketa ikipeliwa.” Linga mukuketa kanunu, mukuya pakumanya ifindu ifi fili pipi nakaya kinu ifi Yehova apelile ifi mubaghile ukubanangisya abaninu. (Sal. 104:24) Mubaghile ukusyagha injuni, utunyamana, ifyakumela kangi nifingi. Karina uwa ku Germany, atile:  “Mama wangu aghaghanile amaluba, yonongwa yake bo ndi wakilumyana, umwene annangisyagha amaluba amanunu linga tukwenda nawe pampene.” Mwe bapapi, nanumwe mubaghile ukubombela amavidiyo namabuku mingi agha igulu likusosya ukuti mubamanyisyeghe abaninu isyakufwana nikipeliwa. Kisita kweghela kuno mukwikala, mubaghile ukubatula abaninu ukuketa ifi Yehova apelile. Lino isagha tuyobesanie utuyilo tumo utwa Yehova utu mubaghile ukubabula abaninu.

11. Ngimba abapapi babaghile ukubatula bulebule abanabo ukumanya ukuti Yehova walughano?

¹¹ Ukuti mubatule abaninu ukumanya ukuti Yehova walughano, mubaghile ukulingania muno ifinyamana fingi fikutupwelelela utwanabo. (Mat. 23:37) Mubaghile kangi ukulingania isya findu ifyakukindanakindana ifi fili nkipeliwa ifi fikutuhobosya. Karina, uyu tunjobile pakwanda, atile: “Linga tubukile pakwenda, mama wangu angasyagha ukuti nimeghe nukuketa ubununu bwa iluba lililyosa namuno likunangisyila ukuti Yehova walughano. Ifyinja fikindilepo, loli ngukindilila ukuketa ubununu bwa maluba aghakukindanakindana—muno Kyala aghapelile nuluko lwake.”

12. Ngimba abapapi babaghile ukubatula bulebule abanabo ukumanya ukuti Kyala wamahala? (Salimo 139:14) (Keta ikithuzi.)

¹² Mubatuleghe abaninu ukumanya ukuti Yehova wamahala. Yehova wamahala fiyo ukukinda uswe. (Rom. 11:33) Mwakifwanikisyo, mubaghile ukubabula abaninu muno amisi ghikufyukila mmwanya ukuti ghakapange amabingu namuno amabingu agha ghikusemesyela amisi ukufuma ku malo ghamo ukubuka ku malo aghangi. (Jobu 38:36, 37) Mubaghile ukulingania kangi ukuti umbili witu wapeliwe mwakuswighisya. (Belenga Salimo 139:14.) Inong’onela isi abombile tata yumo uyu ingamu yake yo Vladimir. Umwene atile: “Isiku limo, umwanitu unnyambala awile panjinga kangi afulele. Bo amasiku manandi itolo ghakindilepo, ikilonda kyapolile. Une nunkasi wangu twalindingenie umwanitu ukuti Yehova apelile umbili witu nuluso ulwakuti wibumbulusyeghe wene. Twalindingenie kangi ukuti kikayapo ikindu kilikyosa ikyakufwana na iki mu findu ifi abandu bikupanga. Mwakifwanikisyo, igalimoto yitikwitendekesya yene linga yipangile ingozi. Ikyakubombiwa  iki kyalintulile umwanitu ukupilikisya kanunu ukuti Yehova wamahala.”

13. Ngimba abapapi babaghile ukubatula bulebule abanabo ukumanya ukuti Kyala wamaka? (Yesaya 40:26)

¹³ Yehova ikutubula ukuti tukwesyeghe amaso ghitu kumwanya nukwinong’onela amaka ghake aghakuswighisya muno apelile indondwa. (Belenga Yesaya 40:26.) Mubaghile ukubakasya abaninu ukuti baketeghe kumwanya nukwinong’onela isi bikuketa. Keta isi umulumbu Tingting uwa ku Taiwan, ikukumbukila pakabalilo aka ali mwana. Umwene atile: “Linga tubukile na mama ku malo ghamo, pakilo twafwanisyagha ukuketa indondwa nyingi kumwanya panongwa yakuti tukali mu tawuni kuno kukuya ubwelu bwingi. Pakabalilo aka, napasyagha fiyo ukuti ndikuya pakufwanisya ukukindilila ukuya nsubiliwa panongwa yakuti abinangu ba ku sukulu bambangisyagha ukuti ndoliweghe ukumpilikila Yehova. Mama wangu alingasisye ukuti ninong’oneleghe isya maka gha Yehova agha abombile pakupela indondwa syosa nukukumbuka ukuti umwene abaghile ukubombela amaka agha ukuti andule ukulimbana nindamyo yiliyosa. Bo ngetile ikipeliwa pabulendo ubu, nakasiwe ukuti nummanye kanunu Yehova nukwanda ukumbombela.”

14. Ngimba abapapi babaghile ukubombela bulebule ikipeliwa ukuti babatule abanabo ukuketa ukuti Yehova yo Kyala walusekelo?

¹⁴ Ifindu ifi Yehova apelile fikunangisya ukuti umwene walusekelo kangi ikulonda ukuti nanuswe tuyeghe balusekelo. Abasayansi baketile ukuti ifinyamana fingi fighanile ukwangala, bo injuni niniswi. (Jobu 40:20) Ngimba abaninu bikuseka linga bikuketa ikinyamana kikwangala? Lumo baketilemo pusi ikwangala nibola pamo utwana twanimbwa tukulwa. Linga akabalilo kamo abaninu bisakuseka bo bikuketa isi ifinyamana fikubomba, musabakumbusye ukuti nanuswe tukumbombela Kyala walusekelo.—1 Tim. 1:11.

15. Ngimba findu fiki fibaghile ukubatula abapapi ukumanya aminong’ono gha banabo? (Isya Mbupingamu 20:5) (Keta kangi ikithuzi.)

¹⁵ Utubalilo tumo, abapapi bikuketa ukuti kukafu ku banabo ukuti bayobe indamyo isi bikwaghana nasyo. Linga momuno siyilile,  mukulondiwa ukumanya aminong’ono gha baninu. (Belenga Isya Mbupingamu 20:5.) Abapapi bamo bikuketa ukuti kupepe ukubomba isi linga babukile pakuketa ikipeliwa pampene na banabo. Nongwa yafiki? Ikifukwa kimo kyo kyakuti batikusofanisiwa ni findu ifingi. Tata yumo uwa ku Taiwan uyu ingamu yake yo Masahiko ayobile ikifukwa ikingi, umwene atile: “Linga tubukile ku malo ghamo nabanitu—pakukwela ifyamba pamo pakwenda mumbali mwa sumbi—bikwipilika kanunu fiyo. Kukuya kupepe kumyitu ukumanya isi sili mminong’ono ghabo.” Katya, uyu tunjobile pakwanda, atile: “Linga ngotwike ku sukulu, mama wangu abukagha nanine ku paki inunu fiyo. Linga tuli ku malo amanunu agha, kwayagha kupepe kumyangu ukumbula isi naghene nasyo ku sukulu na isi ngwiyaya nasyo.”

16. Ngimba imbumba sibaghile ukubombela bulebule ikipeliwa kya Yehova ukuti sipilikeghe kanunu kangi sihobokeghe?

¹⁶ Linga imbumba sikuhoboka nifindu ifi Yehova apelile, sikwipilika kanunu kangi sikuya syalusekelo. Isi sikutula ukuti banangisanieghe ulughano. Ibaibolo likuyoba ukuti kalipo “akabalilo akakusangalukila” kangi “akabalilo akakukinila.” (Ndumbi. 3:1, 4.) Yehova apelile amalo amanunu pakisu kuno tubaghile ukubombelako ifindu ifi fikutuhobosya. Imbumba nyingi sikuhoboka ukubuka pampene ku malo ghamo, bo nkaya, ku fyamba pamo kwa sumbi. Abana bamo bikuhoboka ukubopa nukwangala kupaki ukuti baketeghe ifinyamana nukoghela mulusoko pamo mwasumbi. Tuli nulusako ulunywamu fiyo ulwakuhoboka nikipeliwa kangi nifindu ifi Yehova apelile.

17. Nongwa yafiki abapapi bikulondiwa ukubatula abanabo ukuti bahobokeghe nikipeliwa kya Kyala?

¹⁷ Nkisu ikipya, abapapi nabana bisakuhobokagha fiyo nikipeliwa kya Yehova ukukinda kunyuma. Mwakukindana na masiku agha, pakabalilo ako tutisakutilagha ifinyamana; kangi fyope fitisakututilisyagha. (Yes. 11:6-9) Twisakuya nakabalilo akanywamu akakuhoboka nifindu ifi Yehova apelile. (Sal. 22:26) Loli mwe bapapi, komma ukughulila akabalilo aka ukuti mubatule abaninu ukwanda ukuhoboka nikipeliwa. Linga mukubombela ikipeliwa pakubamanyisya abaninu isyakufwana na Yehova, bikuya pakukolelana na isi Umwalafyale Davidi ayobile, umwene atile: “We Yehova, sikayako imbombo simo isi sifwene na isi kubomba uwe.”—Sal. 86:8.