1-2. Ngimba findu fiki fikubombiwa linga abandu bikosiwa kangi mukulondiwa ukwinong’onela isyafiki?

 NGIMBA mulibwenemo igulu lya bamanyili ba Baibolo bo likosiwa? Mubaghile ukuti mukupilika muno bikwamulila nindumbula yosa amalalusyo mabili agha bikubalalusya bo bakali ukosiwa. Mukubaketa aba mumbumba nabamanyani babo muno bikuyila balusekelo. Linga abamanyili aba bafyukile mmisi mukuketa muno bikuyila balusekelo pafyeni fyabo. Utubalilo twingi, sabata aliwesa abamanyili bingi ba Baibolo bikwiyipa kwa Yehova nukosiwa ukuti baye Baketi bake.

² Bule pakuyoba isya umwe? Linga mukwinong’onela isyakuti mosiwe, muli bakulondiwa fiyo nkisu ikibibi iki panongwa yakuti “mukundonda Yehova.” (Sal. 14:1, 2) Inkhani iyi yikuya pakubatula fiyo kali muli wakilumyana pamo nkusi. Loli uswe tosiwe tukulondiwa ukwiyipa ukuti tukindilile ukumbombela Yehova. Lino isagha tuyobesanie ififukwa fitatu ifi tukulondiwa ukukindilila ukumbombela Yehova.

3. Nongwa yafiki ababombi ba Yehova babughanile ubwanaloli nubugholofu? (Salimo 119:128, 163)

³ Yehova ababulile abandu bake ukuti “babughaneghe ubwanaloli.” (Zeka. 8:19) Yesu abakasisye abafundiwa bake ukuti babombeghe ifindu fyabugholofu. (Mat. 5:6) Isi sikusanusya ukuti tukulondiwa ukubomba ifindu ifinunu nifyabugholofu mmaso gha Kyala. Ngimba mubughanile ubwanaloli nubugholofu? Kisita kukayika mubughanile. Mububengile ubutungulu nifindu fyosa ifibibi. (Belenga Salimo 119:128, 163.) Aliwesa uyu ntungulu ikunkonga Setano, undaghili wa kisu iki. (Yoh. 8:44; 12:31) Ubwighane bumo bwa Setano bo bwakuti onange ingamu inyikemo ya Yehova Kyala. Setano ikubasyoba abandu  isyakufwana na Kyala witu ukufuma apa alinsyobile Adamu na Eva mu ngunda wa Edeni. Umwene ikubapangisya abandu ukwinong’ona ukuti Yehova atikubinong’onela kangi ndaghili uyu atikubapa abandu ifindu ifinunu. (Bwa. 3:1, 4, 5) Ubutungulu bwa Setano ubwakuyoba isyakufwana na Yehova bukubapangisya abandu ukuti banginong’onagha kanunu isyakufwana numwene. Linga abandu “batikubughana ubwanaloli,” Setano ikubapangisya ukuti bangayagha bagholofu kangi babombeghe ifindu ifibibi.​—Rom. 1:25-31.

4. Ngimba Yehova anangisye bulebule ukuti yo “Kyala wabwanaloli”? (Keta kangi ikithuzi.)

⁴ Yehova yo “Kyala wabwanaloli,” kangi umwene ikubamanyisya ubwanaloli bosa aba banganile. (Sal. 31:5) Mwakubomba isi, ikubatula ukuti bangasyobiwagha nubutungulu bwa Setano. Yehova ikubamanyisya kangi ababombi bake ukuti babombeghe ifindu ifigholofu. Isi sikubatula ukuya nulughindiko kangi nulutengano lwa mundumbula. (Mbu. 13:5, 6) Ngimba syo isi abombile kumyinu bo mumanyile Ibaibolo? Mumanyile ukuti injila sya Yehova syakutula fiyo ku bandu bosa na kumyinu. (Sal. 77:13) Yonongwa yake mukulondiwa ukukonga ifundo syabugholofu isya Kyala. (Mat. 6:33) Panongwa yakuti mukulonda ukuti ubwanaloli bumanyiwe nukunangisya ukuti isi Setano ikuyoba isyakufwana na Yehova Kyala witu syabutungulu. Ngimba mubaghile ukubomba bulebule isi?

5. Ngimba mubaghile ukunangisya bulebule ukuti mubughanile ubwanaloli nubugholofu?

⁵ Tubaghile ukusala ukubomba ifindu ifinunu pabumi bwitu nukukana ubutungulu bwa Setano mwakufighilila ubwanaloli. Mubaghile ukunangisya ukuti Yehova yo Ndaghili winu kangi nukubomba isi umwene ikuyoba ukuti nunu. Ngimba mubaghile ukubomba bulebule isi? Mumbuleghe Yehova ndwiputo ukuti mukulonda ukwiyipa kumyake mwakosiwa. Linga mubughanile ubwanaloli nubugholofu yo njila nunu iyi mubaghile ukunangisya ukuti mukulonda ukosiwa.

6. Ngimba fifukwa filiku ifi fikwaghiwa pa Salimo 45:4 ifi fikunangisya ukuti munganile Yesu Kristu?

⁶ Nongwa yafiki munganile Yesu Kristu? Keta ififukwa fimo ifinunu ifi fikwaghiwa pa Salimo 45:4. (Belenga.) Yesu abughanile ubwanaloli, ukwiyisya nubugholofu. Linga mubughanile ubwanaloli nubogholofu, kokuti munganile na Yesu Kristu. Inong’onela muno Yesu  anangisyilagha ubukifu ukuti afighilile ubwanaloli nubugholofu. (Yoh. 18:37) Loli ngimba Yesu anangisyagha bulebule ukwiyisya?

7. Ngimba mukwipilika bulebule panongwa yakwiyisya kwa Yesu?

⁷ Yesu anangisyagha ukwiyisya ukwendela nkifwanikisyo kyake. Mwakifwanikisyo, abikagha ulughindiko losa kwa Tata wake, komma kumwene. (Mar. 10:17, 18; Yoh. 5:19) Ngimba mukwipilika bulebule panongwa yakwiyisya kwa Yesu? Sikubakasya ukuti munganeghe umwana wa Kyala nukunkonga. Kisita kukayika syo mukubomba. Nongwa yafiki Yesu wakwiyisya? Panongwa yakuti anganile kangi ikunkonga Tata wake, uyu wakwiyisya. (Sal. 18:35; Hib. 1:3) Ngimba mutikulonda ukunkonga Yesu uyu ikukonga utuyilo twa Yehova?

8. Nongwa yafiki tunganile Yesu pakuya Mwalafyale witu?

⁸ Tunganile Yesu pakuya Mwalafyale witu panongwa yakuti yo Ndaghili witu unnunu. Yehova alimmanyisye umwanake nukumwimika ukuti alaghileghe. (Yes. 50:4, 5) Inong’onela muno Yesu iyipilagha ukuti atunangisye ulughano ulwakufuma pasi pandumbula. (Yoh. 13:1) Panongwa yakuti Yesu Mwalafyale witu, ikulonda ukuti tunnangisyeghe ulughano lwitu. Umwene ayobile ukuti bosa aba bikunnangisya ulughano bikuya bamanyani bake kangi bikupilikila indaghilo syake. (Yoh. 14:15; 15:14, 15) Tuli nulusako ulunywamu fiyo panongwa yakuya pabumanyani numwana wa Kyala.

9. Ngimba ulosyo lwa bafundiwa lufwene bulebule nulwa Kristu?

⁹ Ululaghilo lumo lwa Yesu lo lwakuti abafundiwa bake bosiwe. (Mat. 28:19, 20) Umwene atunangisye ikifwanikisyo. Munjila simo, ulosyo lwake lukukindana nulwa bafundiwa bake. (Keta ibokosi ilyakuti “ Ngimba Ulosyo lwa Yesu Nulwa Bafundiwa Bake Lukukindana Bulebule?”) Loli munjila simo lufwene. Pakabalilo aka osiwagha, Yesu anangisye ukuti ikulonda ukubomba ubwighane bwa Tata wake. (Hib. 10:7) Mwakufwana itolo, abafundiwa ba Kristu bikosiwa ukuti banangisye pabwelu ukuti biyipile kwa Yehova Kyala. Ikindu ikyakulondiwa fiyo pabumi bwabo ko kubomba ubwighane bwa Kyala komma ubwabo. Abene bikukonga ikifwanikisyo kya Mwalafyale wabo.

10. Nongwa yafiki mukukasiwa ukuti mosiwe?

¹⁰ Tukusubila ukuti Yesu mwana unganiwa wa Yehova kangi tukuhoboka panongwa yakuti yo Mwalafyale uyu Kyala ansalile ukuti atulaghileghe. Musimenye ukuti Yesu wakwiyisya kangi ikunkonga Tata wake. Mumanyile ukuti umwene abalyesyagha aba bali ninjala, abakasyagha aba bawile amaka kangi ababumbulusyagha ababine. (Mat. 14:14-21) Mukuketa muno ikulongosyela ikipanga amasiku agha. (Mat. 23:10) Kangi musimenye ukuti ikuya pakubomba nyingi nkyeni pakuya Mwalafyale wa Bunyafyale bwa Kyala. Ngimba mubaghile ukunangisya bulebule ukuti munganile? Mwakukonga ikifwanikisyo kyake. (Yoh. 14:21) Mubaghile ukwanda ukubomba isi, mwakwiyipa kwa Yehova ukuti mosiwe.

11. Ngimba kifukwa kiliku ikyakulondiwa ikyakuti mosiwe, kangi nongwa yafiki?

¹¹ Ngimba kifukwa kiliku ikyakulondiwa ikyakuti mosiwe? Yesu ayobile isya lukomelesyo ulukulumba ulwa Kyala, atile: “Unganeghe Yehova Kyala wako nindumbula yako yosa, numoyo wako ghosa, namaka ghako ghosa.” (Mar. 12:30) Ngimba amasyu agha ghikunangisya bulebule ulughano lwinu kwa Kyala?

12. Nongwa yafiki munganile Yehova? (Keta kangi ikithuzi.)

¹² Filipo ififukwa fingi ifi tukunangisya ukuti tunganile Yehova. Mwakifwanikisyo, musimenye kanunu ukuti umwene “yo nyibuko ya bumi” kangi yo uyu ikutupa “ifyabupe fyosa ifinunu nifipelelesye.” (Sal. 36:9; Yak. 1:17)  Ifindu fyosa ifinunu ifi tukuhoboka nafyo fikufuma kwa Kyala witu walughano nuwakisa.

13. Nongwa yafiki ikitabulilo kyabupe kinunu fiyo?

¹³ Ikitabulilo kyo kyabupe kinunu fiyo iki Yehova atupele. Nongwa yafiki tukuyoba bo ulu? Inong’onela ubumanyani bwamaka ubu bulipo pakati pa Yehova numwanake. Yesu atile: “Tata anganile une” kangi “Une nunganile Tata.” (Yoh. 10:17; 14:31) Ubumanyani bwabo bwakindilile ukuya bwamaka pakabalilo aka babombelagha pampene kwa fyinja fingi. (Mbu. 8:22, 23, 30) Inong’onela muno syayilile syakubaba kwa Kyala ukwitikisya umwanake ukuti atamiwe nukufwa. Yehova abaghanile fiyo abandu—ukongelelapo umwe yonongwa yake alitikisye ukuti umwanake unganiwa abike ikemo ukuti umwe na bangi musikale kwa bwila na bwila. (Yoh. 3:16; Gal. 2:20) Iki kyo kifukwa ikinywamu iki tukulondiwa ukungana Yehova.

14. Ngimba bwighane buliku ubununu ubu mukulondiwa ukusala pabumi bwinu?

¹⁴ Ulughano lwinu kwa Yehova lukulile panongwa yakuti mumanyile nyingi isyakufwana numwene. Bwanaloli ukuti mukulonda ukuseghelela kumyake lino kangi kwa bwila na bwila. Kangi mubaghile ukufwanisya. Umwene ikubakasya ukuti muyihobosyeghe indumbula yake. (Mbu. 23:15, 16) Mubaghile ukubomba isi komma ukwendela mmasyu ghene loli namfyakubomba. Muno mukubombela ifindu  pabumi bwinu sikuya pakunangisya ukuti munganile naloli Yehova. (1 Yoh. 5:3) Ubu bo bwighane ubununu fiyo ubu mukulondiwa ukusala pabumi bwinu.

15. Ngimba mubaghile ukunangisya bulebule ulughano lwinu kwa Yehova?

¹⁵ Ngimba mubaghile ukunangisya bulebule ulughano lwinu kwa Yehova? Ikyakwanda, mukwiputa pamwibene nukunangisya ukwiyipa kwa Kyala yumoywene uwanaloli. (Sal. 40:8) Ukufuma apo, mukwiyipa pabwelu mwakosiwa. Bo muno tuyobesenie pakwanda munkhani iyi, ulosyo lwinu kyo kindu kyakuhobosya fiyo pabumi bwinu. Mukwanda ukubomba ifindu ifyakunhobosya Yehova komma ifyinu. (Rom. 14:8; 1 Pet. 4:1, 2) Ukubomba isi kubaghile ukuboneka ukuti ifyakusala fyinu fikuya pakuya finywamu fiyo. Loli sikubatula ukuti mubombeghe ifindu ifyakulondiwa fiyo pabumi bwinu. Bulebule?

16. Ngimba pa Salimo 41:12 pikunangisya ukuti Yehova isapakubabombela isyafiki bosa aba bikukindilila ukumbombela?

¹⁶ Yehova wakisa fiyo ukukinda aliwesa. Kisita kwinong’onela ifi mukumpa, umwene ikuya pakubapa ifindu fingi. (Mar. 10:29, 30) Umwene ikuya pakubapa ifindu ifinunu fiyo pabumi bwinu nalinga ukuti mukwikala nkisu ikibibi. Kangi ubu bwandilo itolo. Ubulendo ubu mwalyandile pakabalilo aka mosiwagha butikulondiwa ukumalika. Mukulondiwa ukukindilila ukumbombela Tata winu walughano kwa bwila na bwila. Ulughano ulu lulipo pakati pa umwe na Tata winu lukuya pakukindilila ukukula kangi mwisakubwagha ubumi bwa bwila na bwila panongwa yake.​—Belenga Salimo 41:12.

17. Ngimba kindu kiliku iki mubaghile ukumpa Yehova?

¹⁷ Linga mwiyipile kwa Yehova, mukuya nulusako ulwakumpa ikindu ikyakulondiwa fiyo Tata winu. Umwene ikubapa ifindu ifinunu ifi fikubapangisya ukuti muyeghe balusekelo. Nanumwe mukulondiwa ukumpa ikindu kimo Tata winu wakumwanya, ikindu iki kokwiyipa ukumbombela. (Jobu 1:8; 41:11; Mbu. 27:11) Iki kyo kindu kyakulondiwa fiyo iki mukulondiwa ukubomba pabumi bwinu. Kisita kukayika, ulughano lwinu kwa Yehova kyo kifukwa kinunu ikyakuti mosiwe.

18. Ngimba malalusyo ghaliku agha mukulondiwa ukwilalusya?

¹⁸ Ngimba mubaghile ukwamula bulebule ilalusyo ili, ngimba mukuya pakosiwa? Mubaghile ukwamula mwibene. Loli kubaghile ukuya kwakutula linga mwilalusisye ukuti, ‘Ngimba ngughulila ifindu fiki ukuti nosiwe?’ (Imbo. 8:36) Inong’onela ififukwa fitatu ifi tuyobesenie. Ikyakwanda, mubughanile ubwanaloli nubugholofu. Amwilalusye ukuti, ‘Ngimba ngulonda ukuti umundu aliwesa ayobeghe ubwanaloli nukubomba isyabugholofu?’ Ikyabubili, munganile Yesu Kristu. Amwilalusye ukuti, ‘Ngimba ngulonda ukuti umwana wa Kyala aye Mwalafyale wangu nukukonga ikifwanikisyo kyake?’ Ikyabutatu ukukinda fyosa kyo kyakuti, munganile Yehova. Amwilalusye ukuti, ‘Ngimba ngulonda ukuyihobosya indumbula ya Yehova mwakumbombela?’ Linga abaansala ba malalusyo agha bo bakuti ena, po nongwa yafiki mutikosiwa? Ngimba ngughulila findu fiki ukuti nosiwe?​—Imbo. 16:33.

19. Nongwa yafiki mutikulondiwa ukukabila ukosiwa? Yoba ikifwanikisyo. (Yohani 4:34)

¹⁹ Linga mukukabila ukuti mosiwe, inong’onela ikifwanikisyo iki Yesu ayobile. (Belenga Yohani 4:34.) Yesu afwanikisye ukubomba ubwighane bwa Tata wake nifyakulya. Nongwa yafiki? Ifyakulya fyakulondiwa fiyo kumyitu. Yesu asimenye ukuti kilikyosa iki Yehova ikutusuma ukuti tubombe kyakulondiwa kumyitu. Yehova atikulonda ukuti tubombeghe kilikyosa iki kibaghile ukutufulasya. Ngimba ubwighane bwa Yehova kumyinu bukongelelapo ukosiwa? Ena. (Imbo. 2:38) Yonongwa yake mubaghile ukusubila ukuti ukupilikila ululaghilo ulwakuti mosiwe kukuya pakubatula fiyo. Linga mukabaghila ukukabila ukulya ifyakulya ifinunu, nongwa yafiki mukukabila ukosiwa?

20. Ngimba twisapakuyobesania isyafiki munkhani iyakukongapo?

²⁰ Nongwa yafiki bamo bikukabila ukosiwa? Bamo babaghile ukwamula ukuti, “Ngali ngitendekesya.” Ubwanaloli bo bwakuti linga musalile ukwiyipa kwa Yehova nukosiwa kokuti musalile ikindu kyakulondiwa fiyo pabumi bwinu. Yonongwa yake mukulondiwa ukwinong’onela kanunu inkhani iyi ukuti mwitendekesye ukosiwa. Loli linga muli nubwighane ubwakuti mosiwe, ngimba mukulondiwa ukubomba isyafiki ukuti mwitendekesye? Twisapakuyobesania ansala wa ilalusyo ili munkhani iyakukongapo.