1-2. Ngimba umundu ikulondiwa ukubomba isyafiki bo akali ukosiwa?

 KWA fyinja 5 ifi fikindilepo, abandu mamiliyoni mingi bosiwe nukuya Baketi ba Yehova. Bingi mwabandu aba, bafwene itolo numfundiwa Timoti, uyu amanyile ubwanaloli “ukufuma mbukeke.” (2 Tim. 3:​14, 15) Bamo bamanyile isya Yehova bobana, bamo bobakusi. Unkikulu yumo uyu amanyilagha Ibaibolo na Baketi ba Yehova alyosiwe bo alinifyinja 97.

² Linga muli mmanyili wa Baibolo pamo mukuleliwa na bapapi aba Baketi ba Yehova, ngimba mwinong’onilepo isya kosiwa? Ubu bo bwighane ubununu fiyo. Bo mukali ukosiwa, mukulondiwa ukwiyipa kwa Yehova. Inkhani iyi yikuya pakulingania isi ukwiyipa kwa Kyala kukusanusya. Yikuya pakubatula kangi ukuketa inongwa iyi mutikulondiwa ukukabila linga mwitendekisye ukuti mosiwe.

NGIMBA UKWIYIPA KWA YEHOVA KUKUSANUSYA ISYAFIKI?

3. Yoba ififwanikisyo fya bandu ba mu Baibolo aba baliyipile kwa Yehova.

³ Mu Baibolo, umundu uyu iyipagha kwa Yehova abikiwagha ukuti abombe imbombo yimo iyapadela. Israeli kyali kikolo iki kiyipagha fiyo kwa Yehova. Loli abandu bamo nkikolo iki biyipagha kwa Yehova munjila yapadela fiyo. Mwakifwanikisyo, Aroni afwalagha akamwenda pakyeni akakyela akapapate aka golide aka balembilepo ukuti “nsunguliwa wa Yehova.” Akela ka golide aka kanangisyagha ukuti asaliwe ukuti ambombeleghe Yehova munjila yapadela fiyo, iyi yimilagha umputi unkulumba uwa Israeli. (Levi. 8:9) Abanaziri biyipagha kwa Yehova munjila yapadela fiyo. Ilisyu ilyakuti “Unnaziri,” ili lifumile kulisyu ilya Nkihiburi, likusanusya “Umundu uyu Apaghuliwe” pamo “Umundu  uyu Iyipile.” Abanaziri balondiwagha ukukonga indaghilo sya Mose.—Kuba. 6:​2-8.

4. (a) Linga mwiyipile kwa Yehova, ngimba ubwighane bwinu ubunywamu bo bwakuti fiki? (b) Ngimba “ukwikana” wimwene kukusanusya isyafiki? (Keta kangi ikithuzi.)

⁴ Linga mukwiyipa mwibene kwa Yehova, ko kuti mukusala ukuya mmanyili wa Yesu Kristu nukubomba ubwighane bwa Kyala pabumi bwinu. Ngimba ukwiyipa kwa Kristu kukusanusya isyafiki kumyinu? Yesu atile: “Uyu linga ikulonda ukwisa munyuma mmyangu, yo fikuti ikaneghe mwene, apimbeghe umpiki wake, angongeghe.” (Mat. 16:24) Pakuya mbombi wa Yehova, wakwiyipa fiyo mutikulondiwa ukubomba kilikyosa iki kitikukolelana nubwighane bwake. (2 Kor. 5:​14, 15) Isi sikongelelapo “imbombo sya mbili,” bo ukubomba isyabulowe. (Gal. 5:​19-21; 1 Kor. 6:18) Ngimba ukukonga ubulongosi ubu kukupangisya ukuti mwaghaneghe nindamyo? Kukabaghila linga munganile Yehova nukusubila ukuti indaghilo syake syakutula kumyinu. (Sal. 119:97; Yes. 48:​17, 18) Unkamu Nicholas atile, “Mubaghile ukusiketa ifundo sya Yehova bo igeti lya jele ili likututolesya ukubomba isi tukulonda pamo bo waya uyu ighalile ingalamu ukuti singatufulasyagha.”

5. (a) Ngimba mukwiyipa bulebule kwa Yehova? (b) Ngimba ukwiyipa nukosiwa fikindene bulebule?(Keta kangi ikithuzi.)

⁵ Ngimba mukwiyipa bulebule kwa Yehova? Mukufinga kumyake ndwiputo ukuti mukumwiputagha yuyo mwene nukubomba ubwighane bwake pabumi bwinu. Ukufuma apo, mukufinga kwa Yehova ukuti mukuya pakukindilila ukungana ‘nindumbula yinu yosa, numoyo winu ghosa, namaka ghinu ghosa.’ (Mar. 12:30) Ukwiyipa kwinu kukuya kwakisisi, pakati pa umwe na Yehova. Loli ulosyo lukubombiwa pabwelu, mukunangisya kubangi ukuti mwiyipile kwa Yehova. Ukwiyipa kwinu, lufingo lwapadela fiyo  kangi Yehova ikughulila ukuti mukuya pakulufwanisya bo muno mwafingile.—Ndumbi. 5:​4, 5.

NONGWA YAFIKI MUKWIYIPA KWA YEHOVA?

6. Nongwa yafiki umundu ikusala ukwiyipa kwa Yehova?

⁶ Ikifukwa ikinywamu iki mukwiyipila kwa Yehova kyo kyakuti munganile. Mutikwipilika itolo ukuti muli nulughano. Mmalo mwake, mukungana Yehova panongwa ‘yakummanya kanunu’ umwene nubwighane bwake. (Kol 1:9) Ukumanyila Amalemba kubasimikisyile ukuti (1) Yehova wanaloli, (2) Ibaibolo Masyu ghake kangi (3) ukuti ikubombela igulu lyake ukuti afwanisye ubwighane bwake.

7. Ngimba tukulondiwa ukubomba isyafiki bo tukali ukwiyipa kwa Kyala?

⁷ Bosa aba bikwiyipa kwa Yehova bikulondiwa ukumanya ifimanyisyo fyabwandilo ifi fikwaghiwa Mmasyu gha Kyala kangi nukufikonga. Abene bikughelaghela ukubabulako abangi isi bamanyile. (Mat. 28:​19, 20) Ulughano lwabo kwa Yehova lukuya lwamaka kangi bikwiyipa fiyo ukumwiputa yuyo mwene. Ngimba momuno siyilile nakumyinu? Mutikuya pakwiyipa pamo ukosiwa ukuti munhobosye itolo ummanyisi winu wa Baibolo, abapapi binu, pamo panongwa yakuti syo isi abamanyani binu bosa bikubomba. Loli mukuya pakubomba isi panongwa yakuti munganile Yehova nindumbula yinu yosa.

8. Ngimba ukundaghisya kukubatula bulebule ukuti musale ukwiyipa kwa Yehova? (Salimo 116:​12-14)

⁸ Linga mukwinong’onela ifindu fyosa ifi Yehova ababombile, mukuya pakunndaghisya nukwiyipa kumyake. (Belenga Salimo 116:​12-14.) Ibaibolo likuyoba ukuti Yehova yo ikutupa “ifyabupe fyosa ifinunu nifipelelesye.”  (Yak. 1:17) Ikyabupe ikinywamu fiyo pa fyosa lyo ikemo lya mwanake, Yesu. Inong’onela ukulondiwa kwa kyabupe iki. Ikitabulilo kikututula ukuti tuye pabumanyani ubwamaka na Yehova. Kangi kikutupa ulusako ulwakwisakwikala nubumi kwa bwila na bwila. (1 Yoh. 4:​9, 10, 19) Ukwiyipa kwa Yehova yo njila yimo iyakunangisya ukuti mukundaghisya ulughano ulunywamu kangi nulusayo ulu Yehova afingile ukwisa kubapa. (Kukumbu. 16:17; 2 Kor. 5:15) Mubuku ilyakuti Amuhobokeghe nu Bumi kwa Bwila na Bwila ikimanyilo 46, ifundo 4 yikulingania kanunu muno tubaghile ukundaghisya kangi yilipo nividiyo iyakuti, Ukubika Ifyabupe Fyitu kwa Kyala.

NGIMBA MWITENDEKISYE UKWIYIPA KWA YEHOVA NUKOSIWA?

9. Nongwa yafiki umundu atikulondiwa ukufimbilisiwa ukuti iyipe kwa Yehova?

⁹ Mubaghile ukwinong’ona ukuti mukitendekesya ukwiyipa kwa Yehova nukosiwa. Lumo mukulonda ukuti muchenje ifindu fimo pabumi bwinu ukuti mwande ukukonga ifundo sya Yehova pamo lumo mukulonda tasi ukuti muye nulwitiko lwamaka. (Kolos. 2:​6, 7) Abamanyili ba Baibolo batikukusya ulughano lwabo kwa Yehova pakabalilo akakufwana itolo, kangi bakaya bakilumyana bosa aba bikwiyipa kwa Yehova nukosiwa pa fyinja ifyakufwana itolo. Mughelegheleghe ukumanya muno mukukulila mwambepo nukubomba isi mubaghile ukufwanisya kisita kwifwanikisya numundu yumo.—Gal. 6:​4, 5.

10. Ngimba mukulondiwa ukubomba isyafiki linga mukuketa ukuti mukitendekesya ukwiyipa kwa Yehova nukosiwa? (Keta kangi ibokosi ilyakuti “ Ku aba Bakulile Mumbumba ya Baketi ba Yehova.”)

¹⁰ Nalinga musyaghanie ukuti mukitendekesya ukwiyipa kwa Yehova nukosiwa, mukindilileghe ukuya nubwighane ubu. Munsumeghe Yehova ukuti abatule ukuchenja ifindu fimo pabumi bwinu. (Filip. 2:13; 3:16) Mubaghile ukuya nulusubilo losa ukuti umwene ikuya pakwamula ulwiputo lwinu nukubatula.—1 Yoh. 5:14.

NONGWA YAFIKI BAMO BIKUKABILA UKWIYIPA KWA YEHOVA NUKOSIWA?

11. Ngimba Yehova ikuya pakututula bulebule ukuti tukindilile ukuya basubiliwa kumyake?

¹¹ Bamo aba bitendekisye ukwiyipa kwa Yehova ukuti bosiwe, bikukabila. Abene babaghile ukutila ukuti linga bosiwe babaghile ukubomba ubutulanongwa ubunywamu nukwepusiwa nkipanga. Linga muli nubogha bo ubu, musubileghe ukuti Yehova ikuya pakubapa fyosa ifi mukulonda “ukuti ulwendo lwinu lumbaghileghe [umwene] nukuti munkyeleghe yuyo muli syosa.” (Kol 1:10) Ikuya pakubapa kangi amaka ukuti mubombeghe inunu. Umwene anangisye kale ukuti abaghile ukubomba isi panongwa yakuti abatulilepo bingi ukuti babombeghe ifindu ifinunu. (1 Kor. 10:13) Yonongwa yake abandu banandi itolo bikwepusiwa nkipanga kya Bukristu. Yehova ikubatula ababombi bake ukuti bakindilileghe ukuya basubiliwa.

12. Ngimba tubaghile ukwepuka bulebule ukuti tungabombagha ubutulanongwa ubunywamu?

¹² Umundu aliwesa unsitabugholofu ikugheliwa ukubomba ifindu ifibibi. (Yak. 1:14) Loli mukulondiwa ukusala isi mubaghile ukubomba linga mukugheliwa. Ifundo yo yakuti budindo bwinu ukusala ifindu pabumi bwinu. Nalinga ukuti abandu bamo babaghile ukuyoba ukuti ifindu fimo filikanunu itolo, loli umwe mubaghile ukwikola. Kangi  nalinga ukuti mukugheliwa nifindu ifi fikabaghila ukubonekela pabwelu loli mubaghile ukwepuka nukubombapo simo. Ukuti mufwanisye ukubomba isi, mwiputeghe kwa Yehova isiku lililyosa. Muyeghe nimbatiko inunu iyakumanyila pamwibene Amasyu gha Kyala. Mwaghiwengepo pangomano syakipanga. Mubabulengeko abininu isya lwitiko lwinu. Ukubomba isi akabalilo kosa kukuya pakubatula ukufwanisya ulufingo lwinu. Kangi mutikuya pakwibwa ukuti Yehova ikuya pakubatula linga mukubomba isi.—Gal. 5:16.

13. Ngimba Yosefu atunangisye ikifwanikisyo ikinunu kiliku?

¹³ Mubaghile ukusala ukufwanisya ubwighane bwinu bo mukali ukwaghana ningelo. Ibaibolo likutubula ubwingi bwabandu aba bope babombilepo simo ukuti banhobosye Kyala, nalinga ukuti bakali bagholofu. Mwakifwanikisyo, unkasi wa Potifari amfimbilisyagha Yosefu mwakwandisania. Loli Yosefu asimenye isi alondiwagha ukubomba. Ibaibolo likuti “umwene akanile,” kangi atile: “Po nati mbombeghe bulebule isya buniongafu ubukulumba bo bububu nukutula inongwa kwa Kyala?” (Bwa. 39:​8-10) Bwanaloli ukuti Yosefu asimenye isi ayagha pakubomba bo akali ukugheliwa. Yonongwa yake kwali kupepe kumyake ukukana bo aghene ningelo.

14. Ngimba tubaghile ukwepuka bulebule kungelo?

¹⁴ Ngimba mubaghile ukunkonga bulebule Yosefu nukukana ukugheliwa? Mukulondiwa ukusala ikyakubomba lino bo mukali ukugheliwa. Mwanakalinga mukaneghe kangi munginong’onelagha ifindu ifi Yehova afibengile. (Sal. 97:10; 119:165) Isi sibaghile ukubatula ukuti mungabombagha ubutulanongwa linga mukugheliwa. Panongwa yakuti mukuya pakusalila ngani ikyakubomba.

15. Ngimba umundu abaghile ukunangisya bulebule ukuti “ikundonda” Yehova? (Bahiburi 11:6)

¹⁵ Lumo musimenye ukuti mubwaghile ubwanaloli kangi ukuti mukulonda ukumbombela Yehova nindumbula yinu yosa loli ikindu kimo kikubakabisya ukuti mwiyipe nukosiwa. Mubaghile ukubomba isi Umwalafyale Davidi abombile. Mubaghile ukunsuma Yehova ukuti: “Uli nyenesya, we Kyala wangu, nukusimanya isya mu ndumbula yangu. Kangi ungele linga lulimo ulwendo ulununu mmyangu, po lelo undongosyeghe mu  njila iyi yilabile ku bumi bwa bwila na bwila.” (Sal. 139:​23, 24) Yehova ikubasaya fiyo aba “bikundonda.” Ukughelaghela kwinu ukuti mufwanisye ubwighane bwinu ubwakwiyipa kwa Yehova nukosiwa, kukunangisya kumyake ukuti syo isi mukulonda.—Belenga Bahiburi 11:6.

TUKINDILILEGHE UKUSEGHELELA KWA YEHOVA

16-17. Ngimba aba bakulile mbwanaloli babaghile ukukwabiwa bulebule na Yehova? (Yohani 6:44)

¹⁶ Yesu ayobile ukuti abafundiwa bake bikukwabiwa na Yehova. (Belenga Yohani 6:44.) Keta isi ifundo iyi yikusanusya namuno yibaghile ukubatulila. Yehova ikuketamo ikindu kimo ikinunu mmundu aliwesa uyu ikunkwabila kumyake. Ikunketa umundu aliwesa ukuya “kyuma kyake kyapadela.” (Kukumbu. 7:6 NWT.) Umu momuno Kyala ikubaketela nanumwe.

¹⁷ Loli lumo muli wakilumyana uyu akulile mumbumba ya Baketi ba Yehova. Mubaghile ukwanda ukwinong’ona ukuti mukumbombela Yehova panongwa yakuti syo isi abapapi binu bikubomba komma panongwa yakuti Yehova abakwabile kumyake. Loli Ibaibolo likuti: “Amusegheleleghe kwa Kyala, po yope isakuseghelelagha kumyinu.” (Yak. 4:8; 1 Syambu. 28:9) Linga mukubombapo simo ukuti museghelele kwa Yehova, umwene yope isakuseghelela kumyinu. Yehova anganile umundu aliwesa pamwene. Kangi ikunkwaba umundu aliwesa ukongelelapo abandu aba bakulile mbwanaloli. Linga umundu uyu ikubombapo simo ukuti aseghelele kwa Yehova, yope ikuseghelela kumyake bo muno tuketile pa Yakobu 4:8.—Fwanikisya na 2 Batesalonike 2:13.

18. Ngimba twisakuyobesania isyafiki munkhani iyakukongapo? (Salimo 40:8)

¹⁸ Linga mwiyipile kwa Yehova nukosiwa, mukunangisya akayilo ka Yesu. Umwene aliyipile kwa Tata wake ukuti ikuya pakubomba kilikyosa iki alimbulile. (Belenga Salimo 40:8; Hib. 10:7) Munkhani iyakukongapo, twisakuyobesania ifi fikuya pakubatula ukukindilila ukumbombela Yehova mbusubiliwa linga mosiwe.