1-2. Ngimba ndamyo siliku isi Abaketi bingi bikwaghana nasyo?

UNTUMIWA Pauli alinkasisye Timoti na Bakristu bosa ukuti bambombeleghe Kyala. (2 Tim. 4:5) Nanuswe tukukonga ubulongosi bwa Pauli ukuti tumbombeleghe Kyala. Loli utubalilo tumo kukafu ukubomba isi. Abakamu na balumbu bingi bikuya ni soni pakubomba imbombo iyakufumusya. (2 Tim. 4:2) Mwakifwanikisyo, inong’onela isya bakamu bitu aba bikwikala mfisu ifi imbombo yitu iyakufumusya yikanisiwe. Abene bikukindilila ukufumusya nalinga basimenye ukuti babaghile ukubikiwa mu jele.

² Ababombi ba Yehova bikwaghana ni ndamyo isyakukindanakindana isi sibaghile ukubawisya amaka. Mwakifwanikisyo, bingi bikubomba kwa maawala mingi ukuti bafyaghe ifindu ifyakulondiwa mu mumbumba syabo. Bikulonda ukwiyipa pakufumusya loli bikukatala kubumalilo bwa sabata. Bamo bikutoliwa ukubomba nyingi pakumbombela Yehova panongwa yakuti bikubina pamo bakangele kangi bamo bakabaghila ukutuleka utwaya twabo. Bamo bikuketa ukuti bakaya bakulondiwa kwa Yehova. Mary, * umulumbu uyu ikwikala ku Middle East, atile: “Nalondiwagha ukwiyipa fiyo ukuti ndeke ukutamiwa naminong’ono agha ghambangisyagha ukuti niwe amaka. Ukufuma apo, niyipagha inongwa panongwa yakuti nalondiwagha ukuya nakabalilo namaka ukuti ningile mubufumusi.

3. Ngimba tukuya pakumanyila isyafiki mu nkhani iyi?

³ Nalinga ukuti tukwaghana ni ndamyo, Yehova abaghile ukutupa amaka ukuti twifimbilisye nu kukindilila ukumbombela muno tubaghile ukufwanisyila. Bo tukali ukwanda ukumanyila muno Yehova abaghile ukututulila, isagha tuyobesanie muno alinkasyile Pauli na Timoti ukuti bafwanisye ubufumusi bwabo nalinga ukuti baghanagha ni ndamyo.

4. Ngimba ndamyo siliku isi Pauli aghanagha nasyo?

⁴ Pauli alyaghene ni ndamyo nyingi. Umwene alondiwagha ukukasiwa bo ikukomiwa, ikutunyiwa namabwe kangi bo abikiwe mu jele. (2 Kor. 11:23-25) Pauli akali nisoni ukuyoba ukuti akabalilo kamo atamiwagha naminong’ono amabibi. (Rom. 7:18, 19, 24) Kangi ifimbilisyagha ku ndamyo iyi yali bo “umwifwa uwa mumbili” ughu alondagha ukuti Kyala aghusosyemo.—2 Kor. 12:7, 8.

5. Ngimba Pauli afwanisye isyafiki nalinga ukuti aghanagha ni ndamyo?

⁵ Yehova alimpele Pauli amaka ukuti akindilile nubufumusi bwake nalinga ukuti aghanagha ni ndamyo syosa isi. Inong’onela isi Pauli afwanisye ukubomba. Mwakifwanikisyo, bo apinyiwe mu nyumba ku Roma, akindilile ukufumusya ku bandu bingi ukongelelapo abakulumba ba boma. (Imbo. 28:17; Filip. 4:21,22) Kangi afumusyagha na ku balindilila kisu na bangi aba bisagha pakunketa. (Imbo. 28:30, 31; Filip. 1:13) Pakabalilo akakufwana itolo, Pauli alembile abakalata aba babatulile fiyo Abakristu ba kunyuma kangi abakalata aba bikututula na lino. Mwakongelelapo, ikifwanikisyo kya Pauli kyabatulile Abakristu ba ku Roma, isi syapangisye ukuti abakamu bake “bakindilile itolo ukuya bakifu ukulifumusya ilisyu lya Kyala kisitalutende.” (Filip. 1:14) Nalinga ukuti Pauli akabombile nyingi bo muno umwene alondelagha loli aghelile ukubomba isi afwanisye kangi “syakindilepo ukughabasya amasyu amanunu.”—Filip. 1:12.

6. Ukufwana na 2 Bakorinti 12:9, 10, ngimba findu fiki fyalintulile Pauli ukuti afwanisye ubufumusi bwake?

⁶ Pauli asyaghenie ukuti kilikyosa iki afwanisyagha ukubomba pakumbombela Yehova, kyabombiwagha panongwa ya maka gha Kyala komma aghake. Umwene atile amaka gha Kyala “ghikuya mapelelesye mbonywa.” (Belenga 2 Bakorinti 12:9, 10.) Ukwendela mwa Mbepo mwikemo, Yehova alimpele Pauli amaka ukuti afwanisye ubufumusi bwake nalinga ukuti afwimiwagha, abikiwe mu jele kangi nindamyo isingi.

7. Ngimba ndamyo siliku isi Timoti aghanagha nasyo bo ikubomba ubufumusi bwake?

⁷ Uwakilumyana Timoti, uyu ali mmanyani wa Pauli yope asubilagha amaka gha Kyala ukuti afwanisye ubufumusi bwake. Timoti endagha na Pauli pamabulendo agha bumishonale. Kangi Pauli alintumile ku mabulendo aghangi  ukuti akafyendela nu kwakufikasya ifipanga. (1 Kor. 4:17) Timoti abaghile ukuti iketagha ukuti akaya namaluso. Lumo yonongwa yake Pauli alimbulile ukuti: “Nayumo angabusyokelagha ubutumwa bwako.” (1 Tim. 4:12) Kangi pakabalilo aka, Timoti ali numwifwa mumbili, ughu wampangisyagha ‘ukubina kabili kabili.’ (1 Tim. 5:23) Loli Timoti asimenye ukuti mbepo mwikemo wa Yehova ghukuya pakumpa amaka agha alondiwagha ukuti afumusyeghe amasyu amanunu nu kubabombela abakamu bake.—2 Tim. 1:7.

8. Ngimba Yehova ikubakasya bulebule ababombi bake amasiku agha?

⁸ Amasiku agha, Yehova ikubapa ababombi bake “amaka amakindilisi” ukuti bakindilile ukumbombela mbusubiliwa. (2 Kor. 4:7) Isagha tuyobesanie ifindu 4 ifi Yehova ikubombela ukuti atukasye nu kututula ukukindilila ukuya basubiliwa kumyake. Ifindu 4 fyo ifi: ulwiputo, Ibaibolo, Abakristu abinitu nu bufumusi.

9. Ngimba ulwiputo lubaghile ukututula bulebule?

⁹ Ikutukasya ukwendela ndwiputo. Pa Baefesi 6:18, Pauli ikutukasya ukuti twiputeghe kwa Kyala “akabalilokosa.” Kyala ikuya pakwamula inyiputo syitu mwakututula. Jonnie, uyu ikwikala ku Bolivia, aketile muno Yehova alintulile bo aghene ni ndamyo. Unkasi wake na bapapi bake babinile pakabalilo kamokene. Jonnie atamiwagha fiyo ukufyagha ifindu ifyakubapwelelela bosa batatu. Mama wake afwile kangi pakindile akabalilo akatali ukuti unkasi na tata wake babumbuluke. Linga ikukumbuka akabalilo ka ndamyo aka, Jonnie atile, “Linga nandile ukupasya fiyo, ikindu iki kyandulagha fiyo ko kwiputa kwa Yehova nu kumbula muno nipilikilagha.” Yehova alimpele Jonnie amaka agha alondiwagha ukuti ifimbilisye. Ronald uyu nkulumba wa kipanga ku Bolivia, apilike ukuti mama wake ali na kansa. Kangi afwile bo umwesi ghumowene ghukindilepo. Ngimba findu fiki fyalintulile ukuti ifimbilisye? Umwene atile: “Ukwiputa kwa Yehova kwalimbangisye ukuti numbule syosa isi syali mundumbula yangu kangi namuno nipilikilagha. Nsimenye ukuti umwene ikumbilikisya kanunu ukukinda umundu aliwesa kangi ukukinda namuno une ngwipilikila.” Utubalilo tumo, tubaghile ukutamiwa fiyo naminong’ono nu kusoba isyakuyoba ndwiputo. Loli Yehova ikutusuma ukuti twiputeghe kumyake nalinga ukuti kubaghile ukuya kukafu ukuyoba aminong’ono ghitu kangi namuno tukwipilikila.—Rom. 8:26, 27.

10. Ukufwana na Bahiburi 4:12, nongwa yafiki ukubelenga Ibaibolo nu kwinong’onelapo kwakulondiwa fiyo?

¹⁰ Ikutukasya ukwendela mu Baibolo. Mwakufwana itolo na Pauli uyu asubilagha Amalemba ukuti akasiwe nu kutuliwa, nanuswe tukulondiwa ukubomba mwakufwana itolo. (Rom. 15:4) Linga tukubelenga Amasyu gha Kyala nu kwinong’onelapo, Yehova abaghile ukubombela mbepo wake mwikemo ukuti atutule ukupilikisya kanunu muno Amalemba ghabaghile ukututulila pa ndamyo syitu. (Belenga Bahiburi 4:12.) Ronald, uyu tunjobile pabwandilo, atile: “Ndiwalusekelo fiyo panongwa yakuti ngwiyipa fiyo ukubelenga Ibaibolo ikilo kilikyosa. Ngwinong’onelapo fiyo isya tuyilo twa Yehova na muno ikubanangisya ulughano ababombi bake. Isi sikungasya fiyo.”

11. Ngimba Ibaibolo lyalinkasisye bulebule umulumbu uyu ali ni kitima?

¹¹ Tukulondiwa ukwinong’onelapo pa Masyu gha Kyala ukuti twipilikeghe kanunu nalinga tukwaghana ni ndamyo. Inong’onela muno Ibaibolo lyalintulile unkikulu umfwilwe uyu ali nikitima. Unkulumba yumo asakisye ukuti  unkikulu uyu abelenge inkhani isyakukasya isi sili mu buku lya Yobu. Bo ikubelenga, ikyakwanda asyaghenie ukuti Yobu ali naminong’ono amabibi. M’minong’ono ghake ansokagha Yobu atighi: “Yobu, komma ukwinong’onela fiyo indamyo syako.” Ukufuma apo, asyaghenie ukuti yope ali ni ndamyo isyakufwana itolo na isi syalimbonekile Yobu. Isi syalintulile ukuti achenje aminong’ono ghake kangi syalinkasisye ukuti ifimbilisye ku kitima iki ali nakyo panongwa ya nifwa ya ndume wake.

12. Ngimba Yehova ikutukasya bulebule ukwendela mu bakamu na balumbu bitu?

¹² Ikutukasya ukwendela mu Bakristu abinitu. Injila iyingi iyi Yehova ikubakasya Abakristu ko kwendela mu bakamu na balumbu bitu. Pauli alembile ukuti alondagha ukubapa “ikikungilwa ikyakubakasya” Abakristu abinake. (Rom. 1:11, 12) Mary, uyu tunjobile pabwandilo, ighanile fiyo ukuya pabupipi na bakamu na balumbu. Atile: “Yehova ikubombela abakamu na balumbu ukuti bandule nalinga bakasimanya indamyo syangu. Bikuyoba amasyu aghakungasya, bikundembela abakalata kangi ifundo syabo sikungasya fiyo. Sikundula kangi ukuti njobesanieghe na balumbu aba bope balyaghenepo ni ndamyo iyi ngwaghana nayo nu kumanya muno babombile. Utubalilo tosa abakulumba bikumbangisya ukuti niketeghe ukuya wakulondiwa nkipanga.”

13. Ngimba tubaghile ukubakasya bulebule abangi pangomano sya kipanga?

¹³ Amalo amanunu agha tubaghile ukukasania na bakamu na balumbu bitu ko kungomano sya kipanga. Linga mubukile kungomano mubaghile ukubakasya abininu mwakubabula ukuti mubaghanile kangi mukubandaghisya pa isi bikubomba. Mwakifwanikisyo, bo ingomano sikali ukwanda, unkulumba yumo uyu ingamu yake yo Peter alimbulile umulumbu uyu undume wake akaya nketi ukuti: “Tukukasiwa fiyo linga kwisa kungomano. Utubalilo tosa kwisa na banako 6 kangi mwesa mukwitendekesya ukuti mwamulengepo pangomano.” Umulumbu uyu akasiwe fiyo kangi atile: “Nhomwike fiyo ukupilika isi umwisyughu.”

14. Ngimba imbombo iyakufumusya yikututula bulebule?

¹⁴ Ikutukasya ukwendela mubufumusi. Linga tukufumusya ubwanaloli bwa mu Baibolo na bangi, tukuhoboka kangi tukukaba amaka linga abandu bikupilikisya pamo hayi. (Mbu. 11:25) Umulumbu Stacy aketile muno ubufumusi bukutukasyila. Pakabalilo aka uwa mumbumba yabo alyepusiwe, ali ni kitima fiyo kangi akindilile ukwilalusya ukuti, ‘Ngimba nalondiwagha ukubomba nyingi ukuti nuntule uwa mumbumba yitu?’ Stacy atamiwagha fiyo ukuti aleke ukwinong’onela isya ndamyo iyi. Ngimba findu fiki fyalintulile ukuti ifimbilisye nu kwanda ukwipilika kanunu? Ubufumusi bo ubu bwalintulile. Bo andile ukubomba imbombo iyakufumusya, alyandile ukubinong’onela abandu aba nkighaba kyake aba balondiwagha ubutuli. Umwene atile: “Pakabalilo aka, Yehova alindulile ukuti numwaghe ummanyili wa Baibolo uyu mwanakalinga akongagha isi amanyilagha. Isi syalingasisye fiyo. Ikindu iki kindulile fiyo pa bumi bwangu yo mbombo iyakufumusya.”

15. Ngimba mukumanyilako isyafiki ku isi Mary ayobile?

¹⁵ Panongwa ya muno ifindu fiyilile pa bumi, bamo babaghile ukuketa ukuti bakabaghila ukubomba nyingi mubufumusi. Linga nanumwe mo muno mukwipilikila, kumbuka ukuti Yehova ikuhoboka fiyo na isi mukufwanisya. Inong’onela kangi ikifwanikisyo kya Mary, Bo asamile kukighaba iki abandu bikuyoba injobelo iyingi, umwene iketagha ukuti akabaghila ukubomba nasimo. Umwene atile, “Utubalilo tumo pa syosa isi nabombagha syambangisyagha ukuti namuleghe mbupimba, ukubelenga  ivesi lya mu Baibolo pamo ukunjabila umundu ithilakiti.” Ipilikagha ukuti atikubomba nyingi pakufwanikisya na bafumusi aba bayobagha kanunu injobelo yila. Loli achenjile aminong’ono ghake. Asyaghenie ukuti Yehova abaghile ukumbombesyela nalinga ukuti akayimenye kanunu injobelo. Umwene atile, “Ubwanaloli ubu bukupoka ubumi bupepe fiyo kangi bo ubu bukuchenja ubumi bwa bandu.”

16. Ngimba findu fiki fibaghile ukubatula aba kukafu ukusokapo pakaya ukuti bangawagha amaka?

¹⁶ Kangi Yehova ikundaghisya ukwiyipa kwitu mubufumusi nalinga ukuti kukafu kumyinu ukusokapo pakaya. Umwene abaghile ukututula ukuti tulwaghe ulusako ulwakubafumukisya aba bikutupwelelela, aba dokotala na banesi. Linga tukufwanikisya muno tukubomba lino namuno twabombelagha kunyuma, tubaghile ukuwa maka. Loli linga tukuketa muno Yehova ikututulila lino, tukuya pakuya namaka aghakwifimbilisya ku ndamyo yiliyosa mwalusekelo.

17. Ukufwana na isi sili pa Undumbilili 11:6, nongwa yafiki tukulondiwa ukukindilila ukufumusya nalinga tutikuketa ifyakukongapo fyake mwanakalinga?

¹⁷ Tukamanya iseke sya bwanaloli isi tukubyala isi sibaghile ukubika imisisi nukwanda ukukula. (Belenga Undumbilili 11:6.) Mwakifwanikisyo, Barbara umulumbu uyu ali nifyinja fya mma 80 utubalilo twingi ikufumusya pa foni nu kulemba abakalata. Mwakalata wake yumo, abikilemo Ingasya ya Ndindilili iya Chitumbuka iya Malichi 1, 2014 iya mutu wakuti, “Kasi Ciuta Wali Kumucitirani Vici.” Kisita kumanya atumile kalata uyu ku bandu ba pabweghi aba balyepusiwe. Abene babelengile magazini iyi mwakwandisania. Unnyambala ipilikagha ukuti ikuyobesania na Yehova. Imbumba iyi yalyandile ukufika pangomano kangi mwanakalinga yalyandile ukwiyipa bo ifyinja ifyakufwana 27 fikindilepo. Barbara akasiwe fiyo bo aketile ifyakukongapo ifinunu panongwa ya kalata uyu alembile.

18. Ngimba tukulondiwa ukubomba isyafiki ukuti tukasiwe na Kyala?

¹⁸ Yehova ikutupa ulusako ulwakuti twambilile amaka ghake. Linga tukubombela ulwiputo, Ibaibolo, Abakristu abinitu nu bufumusi, tukunangisya ukuti tukusubila amaka gha Yehova nu kuti ikuya pakututula. Isagha akabalilo kosa tunsubileghe Tata witu wakumwanya uyu ikuhoboka ‘ukubapa amaka aba bikwiyipa kumyake ni ndumbula yosa.’—2 Syambu. 16:9.