1. Ngimba Yehova ikulonda ukuti tubombeghe isyafiki? (Keta kangi ikithuzi.)

 NGIMBA tubaghile ukunsuma nani ukuti atusubisyeghe nukutulongosya? Ansala walalusyo ili tummenye. Tubaghile ukunsuma Yehova Kyala ndwiputo. Yehova ikutukasya ukuti syo tubombeghe. Umwene ikulonda ukuti—“twiputeghe kumyake akabalilo kosa.” (1 Tes. 5:17) Tuli nubwabuke ubwakwiputa kwa Kyala nukunsuma ukuti atulongosyeghe pabumi bwitu. (Mbu. 3:5, 6) Panongwa yakuti umwene yo Kyala wakupa, ikulonda ukuti twiputeghe kumyake akabalilo kosa aka twighanile.

2. Ngimba tukuya pakuyobesania isyafiki munkhani iyi?

² Tukundaghisya fiyo panongwa yakuti Yehova ikutwitikisya ukwiputa kumyake. Yonongwa yake tukulondiwa ukuti inyiputo syitu siyeghe nunu. Ikindu kyakuhobosya fiyo kyo kyakuti, tukukasiwa fiyo nubulongosi bwa mu Baibolo. Munkhani iyi, tukuya pakuyobesania isi tubaghile ukumanyilako kwa Yesu pankhani yakuya nakabalilo ka kwiputa. Tukuya pakuyobesania kangi isi tubaghile ukubomba ukuti inyiputo syitu siyeghe syakufuma pasi pandumbula mwakukonga ifundo 5 isyakulondiwa fiyo.

3. Ngimba Yesu asimenye isyafiki isyakufwana ninyiputo?

³ Yesu asimenye ukuti inyiputo syakulondiwa fiyo kwa Yehova. Bo akali ukwisa pakisu kyapasi, umwene aketile muno Tata wake amulilagha inyiputo sya banyambala na bakikulu abasubiliwa. Mwakifwanikisyo, Yesu ali pabupipi na Tata wake bo ikwamula inyiputo syakufumila pasi pandumbula  isya Hana, Davidi na Eliya ukongelelapo abangi aba bali basubiliwa. (1 Samu. 1:10, 11, 20; 1 Banyaf. 19:4-6; Sal. 32:5) Yonongwa yake sikaya syakuswighisya ukuti Yesu abamanyisye abafundiwa bake ukuti biputeghe kwa Yehova akabalilo kosa.​—Mat. 7:7-11.

4. Ngimba tukumanyilako isyafiki ku nyiputo sya Yesu?

⁴ Ukwendela munyiputo syake kwa Yehova, Yesu abanangisye ikifwanikisyo abafundiwa bake iki balondiwagha ukukonga. Pabufumusi bwake bosa, Umwene iputagha akabalilo kosa. Yesu ayagha nakabalilo ka kwiputa nalinga ukuti utubalilo twingi ikolaniagha kangi ayagha nabandu bingi. (Mar. 6:31, 45, 46) Umwene alembwike nulubunju fiyo ukuti ipute pamwene. (Mar. 1:35) Isiku limo, aliputile ikilo kyosa bo akali ukusala ikindu kimo ikyakulondiwa fiyo. (Luka 6:12, 13) Kangi Yesu aliputile mwakwandisania ikilo kyakuti kilabo ikuya pakufwa bo ali pipi ukumalisya imbombo iyakutamya fiyo iyi apeliwe pakisu kyapasi.​—Mat. 26:39, 42, 44.

5. Ngimba tubaghile ukunkonga bulebule Yesu linga tukwiputa?

⁵ Ikifwanikisyo kya Yesu kikutumanyisya ukuti nalinga twikolanie fiyo, tukulondiwa ukuya nakabalilo kakwiputa. Mwakufwana itolo na Yesu, tuyeghe nakabalilo ka kwiputa. Mwakifwanikisyo, tubaghile kwiputa nulubunju pamo namayolo. Linga tukubomba isi, tukunangisya ukuti tukunndaghisya Yehova panongwa ya kyabupe kyapamwanya fiyo iki atupele. Umulumbu yumo uyu ingamu yake yo Lynne ikukumbukila muno ahobokile bo asyaghenie akakwanda ukuti ali nulusako lwa kwiputa. Umwene atile, “Bo nsyaghenie ukuti mbaghile ukuyoba na Yehova akabalilo kosa, syalindulile ukuti ninong’onele fiyo isya Kyala pakuya Mmanyani wangu wapandumbula nukukindilila ukwiputa kumyake.” Kisita kukayika, twebingi momuno tukwipilikila. Isagha tuyobesanie ifundo 5 isyakulondiwa fiyo isi tubaghile ukuyoba mu nyiputo syitu.

6. Ukufwana na Ubusetuli 4:10, 11, ngimba Yehova ikulondiwa ukwambilila ifindu fiki?

⁶ Tumpaleghe Yehova. Ukwendela nkisetuka, untumiwa Yohani ababwene abanyambala 24 kumwanya bo bikwiputa kwa Yehova. Abene bampalagha Kyala mwakuyoba  ukuti abaghiliwe ukwambilila “ubukulumba, ulwimiko namaka.” (Belenga Ubusetuli 4:10, 11.) Abandumi abasubiliwa bope bali nififukwa fingi ifya kumpala nukungindika Yehova. Abene bali kumwanya na Kyala kangi bammenye kanunu. Abandumi bikuketa utuyilo twake ukwendela mu isi ikubomba. Linga baketile muno Yehova ikubombela, bikukasiwa fiyo kangi bikumpala.​—Jobu 38:4-7.

7. Nongwa yafiki tukulondiwa ukumpala Yehova?

⁷ Nanuswe tukulondiwa ukumpala Yehova munyiputo syitu, mwakulingania ifi tufighanile nukunndaghisya. Linga mukumanyila Ibaibolo, mukulondiwa ukumanya utuyilo utu Yehova ikunangisya utu tukubahobosya fiyo. (Jobu 37:23; Rom. 11:33) Ukufuma apo, mumbuleghe Yehova muno mukwipilikila panongwa yatuyilo twake. Tubaghile ukumpala kangi Yehova panongwa yakututula pabumi bwitu nukuya mumbumba yamwambepo iya pakisu kyosa. Umwene ikutupasikisya nukutufighilila akabalilo kosa.​—1 Samu. 1:27; 2:1, 2.

8. Ngimba fifukwa filiku ifi tukulondiwa ukunndaghisya Yehova? (1 Batesalonike 5:18)

⁸ Tunndaghisyeghe Yehova. Tuli nififukwa fingi ifyakunndaghisya Yehova munyiputo. (Belenga 1 Batesalonike 5:18.) Tubaghile ukunndaghisya panongwa ya findu ifinunu ifi tuli nafyo; tukumbukeghe ukuti ifyabupe fyosa ifinunu fikufuma kumyake. (Yak. 1:17) Mwakifwanikisyo, tubaghile ukundaghisya panongwa ya kisu ikinunu fiyo nifindu ifyakuswighisya ifi apelile. Tubaghile ukundaghisya kangi panongwa ya kuya nubumi, imbumba, abamanyani kangi nulusubilo lwitu ulwa nkyeni. Kangi tukulondiwa ukunndaghisya Yehova panongwa yakutwitikisya ukuya nawe pabumanyani ubununu.

9. Nongwa yafiki tukulondiwa ukukusya akayilo ka kunndaghisya Yehova?

⁹ Tukulondiwa ukuya nakabalilo kakwinong’onela ififukwa ifi tukunndaghisya Yehova. Abandu bingi amasiku agha batikundaghisya. Utubalilo twingi abandu bikuya naminong’ono pa findu ifi bikulonda, mmalo mwakwinong’onela ifi babaghile ukubomba ukuti bandaghisye pa findu ifi bali nafyo. Linga twandile ukubomba akayilo bo aka, inyiputo syitu sibaghile ukuya itolo pambatiko ya kusuma ifindu. Ukuti tungabombagha isi, tukulondiwa ukukindilila ukundaghisya ifindu fyosa ifi Yehova ikutubombela.​—Luka 6:45.

10. Ngimba ukundaghisya kwalintulile bulebule umulumbu yumo ukwifimbilisya? (Keta kangi ikithuzi.)

¹⁰ Indumbula yakundaghisya yibaghile ukututula ukwifimbilisya ku ndamyo. Inong’onela isi syabombiwe kwa Kyung-sook, keta inkhani iyi mu Ingasya ya Ndindilili iya Chitumbuka ya Januwale 15, 2015. Balimwaghile na kansa ya mmapapalafu. Umwene atile, “Ububine ubu bwalingwisisye fiyo amaka kangi natilagha.” Ngimba findu fiki fyalintulile  ukuti ifimbilisye? Atile ikilo kilikyosa bo akali ukulambalala, abukagha pamwanya panyumba yake nukwiputa mwakukwesya amasyu kangi ayobagha ifindu 5 ifi fyanhobosyagha isiku lililyosa. Umwene aketile muno Yehova abatulilagha ababombi bake abasubiliwa pakabalilo aka baghanagha nindamyo kangi asyaghenie ukuti abasayagha fiyo. Mwakufwana itolo na Kyung-sook, nanuswe tuli nififukwa fingi ifya kunndaghisya Yehova nalinga twaghane nindamyo. Linga tukunndaghisya Kyala mu nyiputo syitu sikuya pakututula fiyo ukuti twifimbilisyeghe ku ndamyo nukuya balusekelo.

11. Nongwa yafiki abafundiwa ba Yesu balondiwagha ukuya bakifu bo Yesu abukile kumwanya?

¹¹ Tunsumeghe Yehova ukuti atutule ukuya bakifu mubufumusi. Bo akali ukubuka kumwanya, Yesu abakumbwisye abafundiwa bake imbombo iyi bapeliwe iyakufumusya isyakufwana numwene “mu Yerusalemu, na mosa nkisu kya Yudai na nkisu kya Samaria ukwakufika kuno kimalikile ikisu.” (Imbo. 1:8; Luka 24:46-48) Bo akabalilo kakindilepo panandi, abalongosi ba Chiyuda balinkolile untumiwa Peteri na Yohani nukubuka nabo ku khoti ilikulumba, abene babakanisye ukuti bangafumusyagha nukwanda ukubatilisya. (Imbo. 4:18, 21) Ngimba Peteri na Yohani babombile bulebule?

12. Ukufwana na Imbombo sya Batumiwa 4:29, 31, ngimba abafundiwa babombile isyafiki?

¹² Bo abakulumba ba Chiyuda bikubatilisya, Peteri na Yohani balyamwile ukuti: “Linga kununu nkyeni mwa Kyala ukubapilika umwe, ukukinda ukumpilika Kyala, syo mulongeghe yuyumwe. Buno uswe tukabaghila ukuleka ukusiyoba isi tusibwene nisi tusipilike.” (Imbo. 4:19, 20) Bo bamwabwile Peteri na Yohani, abafundiwa baliputile kwa Yehova mwakukwesya amasyu panongwa yakubomba ubwighane bwake. Abene batile: “Ubapeghe ababombi bako ukuliyoba ilisyu nubukifu.” Yehova alyamwile ulwiputo lwabo.​—Belenga Imbombo sya Batumiwa 4:29, 31.

13. Ngimba tukumanyilako isyafiki kwa Jin-hyuk?

¹³ Tubaghile ukukonga ikifwanikisyo kya bafundiwa mwakukindilila ukufumusya nalinga abakulumba ba boma batukanisye. Inong’onela ikifwanikisyo kya Jin-hyuk, unkamu uyu apinyiwe mujele panongwa yakukana ukwingililapo pa fyandyali. Bo ali mujele, balimpele ubudindo ubwakuti abaketesyeghe abapinyiwa abinake. Loli umwene bamwitikisyagha ukuyobesania nabo isyakufwana nifindu ifi balondagha komma isyakufwana ni Baibolo. Unkamu uyu aliputile mwabukifu ukuti afumusyeghe ubwanaloli akabalilo kalikosa. (Imbo. 5:29) Umwene atile: “Yehova alyamwile inyiputo syangu mwakundula ukuya nkifu nukumba amahala ukuti mbamanyisyeghe abandu bingi Ibaibolo mujele. Ukufuma apo, pakilo nalembile abakalata aba nayagha pakubapa abapinyiwa mujele isiku lyakukongapo.” Nanuswe tubaghile ukuya nulusubilo losa ulwakuti Yehova ikuya pakututula ukuti tufwanisye ububombeli bwitu. Mwakufwana itolo na Jin-hyuk, tubaghile ukunsuma Yehova ukuti atupe ubukifu namahala.

14. Ngimba findu fiki fibaghile ukututula linga twaghene nindamyo? (Salimo 37:3, 5)

¹⁴ Tunsumeghe Yehova ukuti atutule ukwifimbilisya ku ndamyo. Twebingi tukutamiwa nindamyo ya bubine, inifwa ya nganiwa witu, indamyo sya mumbumba, ukufwimiwa nindamyo isingi. Kangi ifindu bo imbungo syakwambukila nubwite fikupangisya ukuti kuyeghe kukafu fiyo ukwifimbilisya  ku ndamyo isi. Mumbuleghe Yehova muno mukwipilikila. Mumbuleghe isyakufwana nindamyo bo muno mubaghile ukumbulila ummanyani winu wapandumbula. Tusubileghe ukuti Yehova “isa kutubombelagha.”​—Belenga Salimo 37:3, 5.

15. Ngimba ulwiputo lubaghile ukututula bulebule “ukwifimbilisya mbutolwe”? Yoba ikifwanikisyo.

¹⁵ Linga tukukindilila ukwiputa sikuya pakututula ukuti “twifimbilisye mbutolwe.” (Rom. 12:12) Yehova ikumanya isi ababombi bake bikwaghana nasyo—“umwene ikupilika ninguto yabo nukubapoka.” (Sal. 145:18, 19) Umpainiya yumo uwa fyinja 29 uyu ingamu yake yo Kristie aketile ukuti isi syabwanaloli. Mwanakalinga alyandile ukubina ububine ubunywamu. Ifyakukongapo fyake, atamiwagha fiyo naminong’ono. Pabumalilo, apilike ukuti mama wake bamwaghile nububine ubu akabaghila ukubumbuluka. Kristie atile: “Niputagha fiyo kwa Yehova ukuti ambe amaka ukuti nifimbilisyeghe isiku lililyosa. Naghelaghelagha ukukonga imbatiko yangu mwakwaghiwapo pangomano nukumanyila Ibaibolo kwa panimwene.” Kangi atile: “Ulwiputo lwalindulile ukwifimbilisya ku ndamyo. Nasyaghenie ukuti Yehova ikuya pakundula ukuti nipilikeghe kanunu kangi isi syangasyagha fiyo. Nalinga ukuti indamyo yangu yikamalike mwanakalinga, loli Yehova alyamwile inyiputo syangu mwakumba ulutengano lwa mundumbula nukuya mololo. Tutikulondiwa ukwibwa ukuti “Yehova amenye ukubapoka ndughelo aba bikuntila.”​—2 Pet. 2:9.

16. Nongwa yafiki tukulondiwa ubutuli bwa Yehova ukuti tukane ingelo?

¹⁶ Tunsumeghe Yehova ukuti atutule ukukana ingelo. Panongwa yakuti tukaya bagholofu, utubalilo twingi tukwaghana ningelo. Setano ikubomba syosa isi abaghile ukufwanisya ukuti onange ubumanyani bwitu na Kyala. Injila yimo iyi ikubombela ukuti onange aminong’ono ghitu ko kwendela mfyakusangalusya  ifibibi. Ifyakusangalusya bo ifi fibaghile ukutupangisya ukuya naminong’ono amabibi nukubomba ubutulanongwa ubunywamu.​—Mar. 7:21-23; Yak. 1:14, 15.

17. Ngimba tubaghile ukubomba bulebule ifindu mwakukolelana ninyiputo syitu ukuti tukane ingelo? (Keta kangi ikithuzi.)

¹⁷ Tukulondiwa ubutuli bwa Yehova ukuti tukane ingelo linga tukugheliwa ukubomba ifindu ifibibi. Ndwiputo lwake ulwa nkifwanikisyo Yesu alyongelile amasyu aghakuti: “Ungatubikagha ndughelo, loli utupoke na kumbibi.” (Mat. 6:13) Yehova ikulonda ukututula loli tukulondiwa ukunsuma. Tukulondiwa kangi ukubomba ifindu mwakukolelana ninyiputo syitu. Tukulondiwa ukughelaghela ukuleka ukubelenga nukupilikisya ku findu ifibibi ifi fili nkisu kya Setano iki. (Sal. 97:10) Tukulondiwa ukuya naminong’ono amanunu mwakubelenga nukumanyila Ibaibolo. Kangi linga tukwaghiwapo pangomano nukufumusya tukuya pakufighilila aminong’ono ghitu. Yehova yope afingile ukuti atikuya pakwitikisya ukuti tugheliweghe ukukinda pamaka ghitu.​—1 Kor. 10:12, 13.

18. Pankhani ya lwiputo, ngimba twesa tukulondiwa ukubomba isyafiki?

¹⁸ Aliwesa ikulondiwa ukukindilila ukwiputa nukuya nsubiliwa kwa Yehova nkabalilo akapalapala aka. Twiputeghe akabalilo kosa. Yehova ikulonda ukuti ‘tuntaghileghe yuyo syosa isi sili mundumbula syitu’ ndwiputo. (Sal. 62:8) Tumpaleghe Yehova nukunndaghisya pa fyosa ifi ikutubombela. Tunsumeghe ukuti atutule ukuya bakifu mubufumusi. Tunsumeghe ukuti atutule ukulimbana nindamyo nukukana ingelo. Tungitikisyagha kilikyosa pamo umundu yumo ukututolesya ukwiputa kwa Yehova akabalilo kosa. Loli ngimba Yehova ikwamula bulebule inyiputo syitu? Twisa pakuyobesania ilalusyo ilyakulondiwa fiyo ili munkhani iyakukongapo.