1-2. Ngimba tubaghile ukwilalusya isyafiki pankhani ya nyiputo?

 NGIMBA mwilalusisyemo linga Yehova ikwamula inyiputo syinu? Linga momuno siyilile, mukaya mwibene. Abakamu na balumbu bingi bope bilalusisyemo isyakufwana na isi fiyofiyo linga bikwaghana nindamyo. Linga tukutamiwa, nanuswe kubaghile ukuya kukafu fiyo ukumanya muno Yehova ikwamulila inyiputo syitu.

² Isagha tukete inongwa iyi tukulondiwa ukusubila ukuti Yehova ikwamula inyiputo sya babombi bake. (1 Yoh. 5:15) Tukuya pakuyobesania kangi amalalusyo agha: Nongwa yafiki utubalilo tumo sibaghile ukuboneka ukuti Yehova atikwamula inyiputo syitu? Ngimba Yehova ikwamula bulebule inyiputo amasiku agha?

3. Nongwa yafiki Yehova ikulonda ukuti twiputeghe kumyake?

³ Amalemba ghikutusimikisyila ukuti Yehova atughanile kangi ukuti tuli bakulondiwa fiyo kumyake. (Haga. 2:7; 1 Yoh. 4:10) Yonongwa yake ikutubula ukuti twiputeghe kumyake ukuti atutule pabumi bwitu. (1 Pet. 5:6, 7) Yehova ikulonda ukututula ukuti tukindilile ukuya nawe pabumanyani nukwifimbilisya ku ndamyo isi tukwaghana nasyo.

4. Ngimba tukumanya bulebule ukuti Yehova ikwamula inyiputo sya babombi bake? (Keta kangi ikithuzi.)

⁴ Utubalilo twingi, tukubelenga mu Baibolo ukuti Yehova ikwamula inyiputo sya babombi bake. Ngimba mubaghile ukwinong’onelapo ikifwanikisyo kimo? Ikifwanikisyo kimo kyo kya Mwalafyale Davidi. Umwene alyaghene nabalughu bingi  pabumi bwake kangi utubalilo twingi iputagha kwa Yehova ukuti antule. Isiku limo, asumile ukuti: “We Yehova, upilikeghe ulwiputo lwangu; kangi utegheghe imbulukutu kulupyelesyo lwangu. Mbusubiliwa bwako unyamuleghe une mbugholofu bwako.” (Sal. 143:1) Yehova alyamwile inyiputo sya Davidi bo ikunsuma ukuti ampoke. (1 Samu. 19:10, 18-20; 2 Samu. 5:17-25) Nulusubilo losa Davidi ayobile ukuti: “Yehova alipipi itolo kuli bosa aba bikunsuma.” Nanuswe tubaghile ukuya nulusubilo bo ulu.​—Sal. 145:18.

5. Ngimba inyiputo sya babombi ba Yehova aba kunyuma syamuliwagha munjila iyi baghulilagha? Yoba ikifwanikisyo. (Keta kangi ikithuzi.)

⁵ Utubalilo tumo Yehova akabaghila ukwamula inyiputo syitu munjila iyi twaghulilagha. Momuno syayilile nu ntumiwa Pauli. Umwene alinsumile Kyala ukuti ansosye “umwifwa wa mumbili.” Pauli aliputile amabulendo matatu isyakufwana nindamyo iyi. Ngimba Yehova alyamwile inyiputo sya Pauli? Ena, loli umwene akalyamwile munjila iyi Pauli aghulilagha. Mmalo mwakumasya indamyo iyi alinayo, Yehova alimpele amaka Pauli agha alondiwagha ukuti akindilile ukumbombela mbusubiliwa.​—2 Kor. 12:7-10.

6. Nongwa yafiki utubalilo tumo, sibaghile ukuboneka ukuti Yehova atikwamula inyiputo syitu?

⁶ Nanuswe utubalilo tumo Yehova akabaghila ukwamula inyiputo syitu munjila iyi twaghulilagha. Tuli nulusubilo losa ukuti amenye kanunu muno abaghile ukututulila. Umwene abaghile “ukubomba fiyo mmyitu ukukinda itolo na syosa isi tukusuma na isi tukwinong’ona.” (Ef. 3:20) Panongwa ya isi, Yehova abaghile ukwamula inyiputo syitu pakabalilo aka umwene ighanile.

7. Nongwa yafiki tukulondiwa ukuchenja ifindu ifi tukunsuma Kyala ukuti atutule? Yoba ikifwanikisyo.

⁷ Tubaghile ukuchenja ifindu ifi tukusuma kwa Kyala linga tubwaghenie kanunu ubwighane bwake. Inong’onela ikifwanikisyo kya Martin Poetzinger. Bo eghile itolo, unkamu Poetzinger apinyiwe ku musasa wa Nazi. Pabwandilo, alinsumile Yehova ndwiputo ukuti bamwabule ukuti akayipweleleleghe imbumba yake nukukindilila ukufumusya. Loli bo abasabata babili bakindilepo, aketile ukuti Yehova atikubombapo simo ukuti asoke. Umwene alyandile ukwiputa ukuti: “Yehova, ngusuma unnangisye isi kulonda mbombe.” Alyandile ukwinong’onela indamyo isi abakamu abangi baghanagha nasyo ku musasa. Abakamu  bingi bapasyagha fiyo linga bikwinong’onela isya bakasi babo nabana. Unkamu Poetzinger aliputile ukuti: “Yehova, ndagha fiyo panongwa yakumba ububombeli ubupya. Ngusuma ungasye kangi ubakasye na bakamu bangu.” Umwene alikele ifyinja 9 ku kampu yakunyozelako abandu kangi akindilile ukwiputa kwa Kyala.

8. Ngimba tukulondiwa ukukumbuka isyafiki linga tukwiputa?

⁸ Tukulondiwa ukukumbuka ukuti Yehova ali nubwighane kangi ikuya pakubufwanisya ukufwana nulubatiko lwake. Ubwighane ubu bukongelelapo ukumasya ifindu fyosa ifi fikupangisya indamyo nyingi amasiku agha bo ingozi syakipeliwa, ububine ninifwa. Yehova ikuya pakufwanisya ubwighane bwake ukwendela mu Bunyafyale bwake. (Dan. 2:44; Ubuset. 21:3, 4) Loli ukufika lino, Yehova ikumwitikisya Setano ukulaghila ikisu iki. b (Yoh. 12:31; Ubuset. 12:9) Linga Yehova abaghile ukwanda ukumasya indamyo isi abandu bikwaghana nasyo amasiku agha, sibaghile ukuboneka ukuti Setano ikulaghila kanunu ikisu. Loli bo tukughulila ukuti Yehova afwanisye isi afingile, umwene ikuya pakukindilila ukututula. Isagha tukete injila isingi muno Yehova ikututulila.

9. Ngimba Yehova abaghile ukututula bulebule linga tukusala ifyakubomba? Yoba ikifwanikisyo.

⁹ Umwene ikutupa amahala. Yehova afingile ukuti ikuya pakutupa amahala agha tukulondiwa ukuti tusaleghe kanunu ifyakubomba. Tukulondiwa amahala ghakufuma kwa Kyala ukuti tusaleghe kanunu ifyakubomba pabumi bwitu bo, ukusita kwegha pamo ukweghiwa. (Yak. 1:5) Inong’onela isi alyaghene nasyo umulumbu Maria c uyu akaya pabweghi. Umwene ahobokagha fiyo pakumbombela Yehova bo mpayiniya wakabalilo kosa bo aghene nu nkamu. Maria atile: “Bo ubumanyani bwitu bwandile ukuya bwamaka, twalyandile ukunangisania ulughano. Nasyaghenie ukuti nalondiwagha ukusala ifyakubomba. Naliputile fiyo isyakufwana ninkhani iyi. Nalondiwagha ubutuli bwa Yehova, loli nasimenye kangi ukuti atikuya pakunsalila ifyakubomba.” Umwene aketagha ukuti Yehova amulagha inyiputo syake. Bulebule? Bo afufuzile mumabuku ghitu, asyaghile inkhani isi syalintulile ukwamula amalalusyo ghake. Maria akongile kangi ubulongosi bwa mahala ubwakufuma kwa mama wake. Ubulongosi ubu bwalintulile fiyo Maria pabumi bwake. Pabumalilo, syalintulile ukuti asale kanunu ifyakubomba.

10. Ukufwana na Bafilipi 4:13, ngimba Yehova ikuya pakubomba isyafiki ukuti abatule ababombi bake? Yoba ikifwanikisyo. (Keta kangi ikithuzi.)

 ¹⁰ Umwene ikutupa amaka ukuti twifimbilisyeghe. Bo muno abombile nu ntumiwa Pauli, Yehova ikuya pakutupa amaka agha tukulondiwa ukuti twifimbilisyeghe ku ndamyo isi tukwaghana nasyo. (Belenga Bafilipi 4:13.) Inong’onela muno Yehova alintulile unkamu Benjamin ukuti ifimbilisye ku ndamyo. Bo wakilumyana, Benjamin nimbumba yake balikele ku misasa yabandu aba bikubopa kumyabo ku Africa. Benjamin atile: “Niputagha kwa Yehova akabalilo kosa, nansumagha ukuti ambe amaka ukuti mbombeghe ifindu ifi fikunhobosya. Yehova alyamwile inyiputo syangu mwakumba ulutengano lwa mundumbula, ukuya nkifu nukukindilila ukufumusya amasyu ghake, kangi naghaghile amabuku agha nabelengagha.” Umwene alyongelile ukuti: “Ukubelenga inkhani isyakufwana na isi abakamu na balumbu balyaghene nasyo namuno Yehova abatulile ukwifimbilisya syalindulile ukuti ngindilile ukuya nsubiliwa.”

11-12. Ngimba Yehova abaghile ukubombela bulebule abakamu na balumbu bitu ukuti amule inyiputo syitu? (Keta kangi ikithuzi.)

¹¹ Umwene ikubombela abakamu na balumbu bitu. Ikilo kyakuti kilabo ikuya pakufwa, Yesu aliputile ukufuma pasi pandumbula. Umwene alinsumile Yehova ukuti abandu bamo banginong’onagha ukuti ikunyoziwa panongwa yakuti ali namatingo kangi atikumpilikila Kyala. Yehova alintumile uwandumi ukuti akankasye Yesu. (Luka 22:42, 43) Yehova abaghile ukututula kangi mwakutukasya ukwendela mu bakamu na balumbu bitu. Twesa tukulondiwa ukuya nakabalilo akakuti “tubakasyeghe” abakamu nabalumbu bitu.​—Mbu. 12:25.

¹² Inong’onela isi alyaghene nasyo umulumbu Miriam. Bo abasabata batatu bakindilepo ukufuma apa undume wake afwile, umwene atamiwagha fiyo naminong’ono. Alilagha akabalilo kosa kangi alondagha ukuti umundu yumo ansubisyeghe. Miriam atile: “Ngali namaka ghakumwimbila ifoni umundu aliwesa, yonongwa yake naliputile kwa Yehova. Bo ngwiputa kuno ngulila, umundu yumo alinyimbile ifoni. Ali nkulumba wakipanga,  ummanyani unnunu.” Unkulumba uyu pampene nunkasi wake, balinkasisye fiyo Miriam. Umwene asyaghenie ukuti Yehova yo apangisye ukuti unkamu uyu amwimbile ifoni.

13. Yoba ikifwanikisyo ikya muno Yehova abaghile ukubombela abandu aba batikumwiputa ukuti amule inyiputo syitu.

¹³ Umwene abaghile ukubombela abandu aba batikumwiputa. (Mbu. 21:1) Utubalilo tumo Yehova ikwamula inyiputo sya babombi bake ukwendela mu bandu aba batikumwiputa ukuti babatule. Mwakifwanikisyo, umwene alimpangisye Umwalafyale Artaseresesi ukuti amwitikisye Nehemiya ukughomokela ku Yerusalemu ukuti akatulepo pambombo iyakuyenga kangi akaya aka. (Nehe. 2:3-6) Amasiku agha, Yehova abaghile kangi ukubakasya abandu aba batikumwiputa ukuti batutule.

14. Ngimba isi Soo Hing alyaghene nasyo sikubakasya bulebule? (Keta kangi ikithuzi.)

¹⁴ Umulumbu Soo Hing, aketile ukuti Yehova alintulile ukwendela mwa dokotala wake. Umwanake unnyambala ali nindamyo yaminong’ono. Bo umwanake apangile ingozi, umwene nundume wake balekile imbombo ukuti bampweleleleghe umwanabo. Isi syapangisye ukuti batamiweghe ukusyagha indalama. Soo Hing atile, naketagha ukuti ngabaghila ukwifimbilisya kundamyo bo iyi. Umwene alinsumile Yehova ukuti antule. Dokotala ayaghile injila iyakuti antule pampene nimbumba yake. Isi syapangisye ukuti ambilile ubutuli nukughagha amalo ghakwikala ukufuma ku boma. Pabumalilo, Soo Hing atile: “Yehova atutulile fiyo. Umwene ‘Ikupilika inyiputo.’”​—Sal. 65:2.

15. Ngimba findu fiki fyalintulile umulumbu yumo ukumanya ukuti Yehova amulagha inyiputo syake?

¹⁵ Utubalilo twingi Yehova atikwamula inyiputo syitu munjila yakuswighisya. Loli muno ikwamulila sikututula ukukindilila ukuya nulwitiko kwa Tata witu wa kumwanya. Yonongwa yake tukulondiwa ukuya nulusubilo ukuti Yehova ikwamula inyiputo syitu. Umulumbu Yoko aketagha ukuti Yehova akamulagha inyiputo syake, loli umwene alyandile ukulemba mubuku isi asumagha kwa Yehova. Bo akabalilo kakindilepo, umwene aketile isi alembile mubuku kangi asyaghenie ukuti Yehova alyamwile inyiputo syake nyingi na isi akasikumbukagha. Akabalilo kosa tukulondiwa ukukumbuka muno Yehova ikwamulila inyiputo syitu.​—Sal. 66:19, 20.

16. Ngimba tubaghile ukunangisya bulebule ulwitiko pankhani ya lwiputo? (Bahiburi 11:6)

 ¹⁶ Tukunangisya ukuti tuli nulwitiko mwakwiputa kwa Yehova nukuketa namuno ikwamulila inyiputo syitu. (Belenga Bahiburi 11:6.) Inong’onela isi alyaghene nasyo Mike nu nkasi wake, Chrissy. Abene bali nubwighane ubwakuti bakabombeleghe pa Beteli. Mike atile, “Twalembile amafomu mingi pakuya mbumba kangi twaliputile kwa Yehova utubalilo twingi isyakufwana nubwighane bwitu “loli bakatukolile.” Mike na Chrissy bakindilile ukusubila ukuti Yehova amenye kanunu muno abaghile ukubabombesyela mububombeli bwake. Abene bakindilile ukubomba syosa isi babaghile ukufwanisya, mwakubomba ubupayiniya bwa kabalilo kosa nukutula pambombo yakuyenga. Lino bikwendela idela. Mike atile, “Yehova akamulagha inyiputo syitu munjila iyi twaghulilagha loli amulagha munjila inunu fiyo ukukinda muno twinong’onelagha.”

17-18. Ukufwana na Salimo 86:6, 7, ngimba tubaghile ukuya nulusubilo luliku?

¹⁷ Belenga Salimo 86:6, 7. Uwamasalimo Davidi ali nulusubilo ukuti Yehova apilikagha nukwamula inyiputo syake. Nanuswe tubaghile ukuya nulusubilo bo ulu. Ififwanikisyo ifi tuyobesenie munkhani iyi fikutusimikisyila ukuti Yehova abaghile ukutupa amaka namahala ukuti twifimbilisyeghe. Umwene abaghile ukubombela abakamu na balumbu pamo abandu aba batikumwiputa ukuti batutule.

¹⁸ Nalinga ukuti utubalilo tumo Yehova akabaghila ukwamula inyiputo syitu munjila iyi twaghulilagha, loli tukumanya ukuti ikuya pakwamula. Umwene ikuya pakutupa ifindu ifi tukulondiwa naloli pakabalilo kake. Tukulondiwa ukukindilila ukwiputa nukuya nulusubilo losa ukuti Yehova ikuya pakwamula inyiputo syitu kangi ukuti “isakukapa akabumi kosa ifi kikulonda” nkisu ikipya.​—Sal. 145:16.